Read Ghomala New Testament LUKASI 13 Bible Online

LUKASI 13 - Ghomala New Testament bible

LUKASI 13

¹A lə pɑ pɑ́ cwə o bɔ, shɑ pɔ sɔ' siŋ e ywə yə a lə təm nə pɑ Galilea pyə Pilato lə lɑ mcyə map ŋi'nyə myə́ tsəpwɔ' tsap a.

²E ghɔm bi pu gɑ: Po kwɛ gɑ pɑ Galilea bɔ̌ bɑ wap lə hɔnwə shyə guŋ pyə shɑ pɑ Galilea awɛ tə jɔgo' tiŋ po' a?

³Gɑ siŋ wɔ gɑ gɛ̌. Tə́ po pɑ tə pʉɔtʉm tsɔ, bɑ ba wɔ yɔ gɔ sɔ' pfʉ pɑ po'o awɛ.

⁴Kɑ po kwɛ gɑ pɔ shwɔp hɔm mgham pyə sʉəsʉə pa' Siloe lə vʉ̀ nə pu jwə́ wap a, lə bɑ wap hɔnwə shyə guŋ pɑ Yerusalɛm a?

⁵Gɑ̌ siŋ wɔ gɑ gɛ̌; tə́ po pɑ tə pʉɔtʉm tsɔ, bɑ ba wɔ yɔ gɔ sɔ' pfʉ pɑ po'o awɛ.

⁶É lə́ ghɔ́m ghɔ̀m tə́ tútə gɑ. Mu' mo lə ghə́ ta' thə́ nthɔmmthə pe e bɑ e tsə ka e. E lə́ sɔ' de nthɔm myə́, e lə yɔ sɔmywə nə.

⁷E lə́ ghɔ́m bi byap ka ga: Yəŋ gɑ si bɑ batə́ gu'dzʉ́ tsɑtá pa' bǎ sɔ' nə le nthɔm nə thə nthɔmmthə́ yəŋ gɑ, ŋ də yɔ sɔmywə a. Nwə ka e lɑ yəŋ gɑ tsʉ' ca' néné?

⁸Byap kà pa' bi e gɑ: Ta: Kwi' nthak e nəŋ gu' ɔ, po'o gɑ̀ nthəŋ giŋnyə e, nyəŋ dziak nə,

⁹pɑtyɛ' a yam nthɔm; tak po'o, o ko' e ma' si.

¹⁰Yeso lə pɑ̌ ji'tə ywə bi pɔmnəŋ sinagogə tyɛ' Sabat.

¹¹Mu' mjwǐ pɑ dyə o bɑ mú' zhwenyə lɑ é gə ŋkho'tə tə fɑ nə gu' shwɔp hɔm mgham. Bɑ e lě bɔnyə, la' e pɑ bʉ' nɑ́ e jyə́

¹²Yeso lə yɔ e gɔm bi e gɑ: Mɑmjwi, o vɔk po'tə o.

¹³Gɔm po'o jap bu myə́ nə e; e wuŋ bʉ' nɑ e, go'tə Si.

¹⁴Tə tadyə Sinagogə yɛluŋ pa' Yeso jɛ mo po'o tyɛ' Sabat a, gɔm bi pɔmnəŋ gɑ: Mtyɛ'dzʉ fa' wə nthɔkə, po sɔ' pu yɛ wɔ tyɛ' o bɔ. Ka po sɔ' m tyɛ' sabat. Cyəpɔ pà' bi e gɑ:

¹⁵Mlǎbu! Bǎ ya mo lə nə po tə bɑ tyɛ' sabat ŋkhyɛ' nɔmna' e kɑ jakasi e lə́ dɑ e gɔ e nwə́ shyə a?

¹⁶Tə mɑmjwi yəŋ gɑ, yə e bɑ go Abraham a, yə sata bɑ e le shəŋ e tə fɑ nə gu' shwɔp hɔm mgham a, a ké tə puŋ gɑ pu kyɛ' e tyɛ' sabat a?

¹⁷E lə pɑ gɔm po'o, sǒ pɑ ŋkhú mghɛ bo pyə; tə pɔmnəŋ pɑ ŋwɛnyə nə mnwə pɑpuŋ myə e lə́ gə a.

¹⁸E lə kwi' gɔm gɑ: Nəfo Si hwə́ kɑ, bi a pɑ ŋ də kɑ fǒ'?

¹⁹A hwə́ pá' sɔm sɔk yə mo dzə ka é: A ŋkwyɛe, ji ta' thə́, pǒmsəŋ to kɛbəŋ pɑ ba' mkɔ map nə bu myə́ a.

²⁰E lə kwi' gɔm gɑ: Nəfo Si bɑ pa' kɑ a?

²¹Nəfo Si bɑ pa' ywə nə gə msɛ kwɔ', yə mjwǐ nyə́ŋ muywə nə msɛ bǔ ntha nə gə a cəŋtə ŋkwɔ' a.

²²Yeso lə pɑ gɔ m Yerusalɛm, nə cyə́ mla' ba mtisuŋ, giŋ ji'tə pɔmnəŋ ywə́.

²³Mu' mo ghɔm bi é gɑ: Cyəpɔ, jyə gɑ́ da' pó mduŋ pɔ nə gɔ sɔ' vɔk lə? Yeso pa' bi pu gɑ:

²⁴Po kaktʉɔ nə cyə m nə jyədyə̌ ŋkho dyə́. Nə pa' gɑ̌ siŋ wɔ gɑ pɔ tə jɔ́m gɔ sɔ' cəŋ nə ko dyə, wap lə ku' nə ko.

²⁵Cwə yə gɛ la' gɔ sɔ' lusi yo' jyədyə̌ nə cɑ wɔ dzʉ a, po to' nə pɑ ŋkho'tə jyədyə̌ bɑ gɔm gɑ: Cyəpɔ hé jyədyə̌ bi pyə. E pa' bi po gɑ: ŋ kha zhyə́ wɔ.

²⁶A po to' nə ghɔm gɑ: Pyə lə tsʉ́ biŋ nwə dzə o. O lə ji'tə ywə guŋ pyə.

²⁷E piŋ ba' bi po gɑ: Ŋ kha zhyə wɔ. Po lu bəŋ m̀ wɔ mghɛ ghə nwə cwəpuŋ.

²⁸Po gɔ sɔ' pɑ lɔ piŋ pɑ pfɑ msuŋ mɔ nə tyɛ'dzʉ yə po gɔ sɔ' yɔ Abraham, yɔ Isak ba Yakop ba guŋ mghɔ́m ghɔm Si awɛ nthʉm Nəfo Si, bɑ pu wa' wɔ m pé a.

²⁹Pu gɔ sɔ' fɑ ghəŋ nthəmnam, ba m ghəŋ binam, fɑ shyə́dzʉ̌ ba m mto dzʉ pɑ tsʉ́ nthʉm Nəfo Si.

³⁰A po'o tə́ shɑ pɑ jʉm gɔ sɔ' cʉ' pɑ dzə̀, shɑ́ pɑ dzə cʉ' pɑ jʉm.

³¹A lə pɑ̌ pɑ́ cwə o bɔ, shɑ́ pɑ Farisai sɔ' gɔm bi e gɑ: Ghɔ̌! Lu si tsɔ'ɔ nə pa' Herode bɑwə shəŋ nə zhwə o a.

³²E ghɔm bi pu gɑ: Po ghɔ gɔm bi sʉ́sʉm bǎ gɑ: Yɔ: Gɑ wə jəŋ mzhwenyə cwəpuŋ, biŋ bɑwə jɛ mgho tyɛ' ɔ ba m yǒ. A piŋ bɑ nə batə tyɛ' ta, á yɑ dəŋ ku'u.

³³Tə', a puŋ gɑ giŋ tyɛ' ɔ, ba m yǒ, ba m yəmu' yo, nə pa' a ka puŋ gɑ sɔm gɔm ghɔm Si pfʉ́ tə pfʉ́ pɑ Yerusalɛm pɑ.

³⁴Yerusalɛm, Yerusalɛm, wə yə o jwə mghɔm ghɔ̀m Si, bɑ dɑ mwɔ' nthamtə pɔ pyə pu nthəm wap bu a, ŋ də cəŋ nə cu'tə pó pǔ pa' mɑgɔp shu'tə po pyə bap e a la' po kuŋ.

³⁵Tə́ pú gɔ sɔ' tak la' tsɔ bi po. Po lə nəŋ biŋ jɔ a tə ŋkhəm cwə yə po gɔ sɔ' ghɔm gɑ: Byanyə nə tso Cyəpɔ bi mo yə e wə sɔ' a.