Read Ghomala New Testament LUKASI 14 Bible Online

LUKASI 14 - Ghomala New Testament bible

LUKASI 14

¹Yeso lə ko dyə mu' tadyə pɑ Farisai tyɛ' Sabat nə tsʉ ywə. Pɑ Farisai pɑ dé é

²nə pa' mu' mo lə́ bɑ dzə e, gho vam pɑ nə e.

³Yeso lə lɑ́ ghɔm gɔm bi mtadyə nə mco' ba m bi pɑ Farisai gɑ: A bɑ pu piŋ kɑ ŋkhə́ŋnyə nə yɛ gho tyɛ' Sabat?

⁴Wáp lə kwé. Yeso ké gɛ gho jɛ é, gə e ghɔ.

⁵Biŋ gɔm bi pu gɑ: Yǎ mo nə pó yə mú e kə nɔmna' e lə vʉ̀ ghʉ́m shyə tyɛ' Sabat bɑ e tə́ wuŋ té e a?

⁶La' wap ku' nə pa' nwə nə́.

⁷E lə yɔ pa' pɔ pyə pu lə ke wap a lə́ bɑwə ŋkho dyə shwə pɑ dzə a, gɔm bi pú nə ghɔm tə tutə gɑ:

⁸Mo ke o nə la'nwə e, o kɑ sɔ' ŋkho dyə shwə nə dəŋdzə kwɔ'; nə pá' bi a pɑ bɑ pu ké mu' mo yə e cyə o a, e sɔ'

⁹mo yə é ŋkhe wɔ a sɔ' gɔm bu gɑ o hɑ yu tsʉ' bi é, sǒ kú u nə ghɔ shwə jʉ̀m.

¹⁰Tə́ mo ke o, o ko dyə, o ghɔ shwə jʉ̀m; po'o gɑ mo yə e ŋkhe o a sɔ', e ghɔm bu gɑ: So a, ghɔ dzə shwə́. A gɔ pɑ́ cwə o bɔ pɑ gu'tə ghǔ'tə bu dzə̌ pɔ pyə pu ŋkhe wɔ pu a pu a.

¹¹Nə pa' mo yə e ŋa'nɑ é a pu gɔ sɔ' fi' e hɑ si, a mo yə e fi'nɑ e hɑ si a, pu ŋa' e hɑ thə́.

¹²E lə piŋ gɔm bi mo yə é lə ké é á gɑ: O pɑ gɔ la'nwə o kɑ ké mso pǔ, kɑ mfɑ pǔ, kɑ mta pǔ, kɑ mghɛ dhə la' o pyə wap zhi a lə, bwɔk gɑ wap kɑ ti ŋkhe o yap, a pɑ mù mcwɔ'fa'.

¹³Tə́ o pɑ dá'nwə, o ké mpə̌ŋ, ŋkké mghɛ po'tə ba mkho'tə, pu a mfʉ,

¹⁴po'o gɑ o pɑ pɑpuŋ nə pa' wap ka ghə sɔmywə nə shwɔ'fa' o a, Si nə ghɔ sɔ' cwɔ'fa' o a.

¹⁵Mu' mo nə pɔ pyə pú a pú lə ké wap a lə nə yu' mghɔm bɔ gɔm bi Yeso gɑ: Buŋtse mo yə e gɔ sɔ' tsʉ ywə nthʉm Nəfo Si a.

¹⁶Yeso piŋ gɔm bi e gɑ: Mu' mo lə pɑ da'nwə, ŋkhe pɔmnəŋ tə wap yɔm.

¹⁷A lə ku' cwə nə tsʉ ywə, e təm gɛfa' gɑ e ghɔ gɔm bi pɔ pyə e lə ké wap a gɑ: Po sɔ̌' nə pa' tsə pəmtə.

¹⁸Da' gɑ guŋ yap awɛ lɑ ŋkwishwə da'nyə: Dəŋdzə mo ghɔm gɑ: Gɑ yo pé, a pɑwə shəŋ gɑ gɔ jɔ. Səso la'nyə a.

¹⁹Yə mu' mo ghɔm gɑ: Gɑ yo mna' ghǎm, bɑ si po'o bɑ m məjyə nə ghɔ jɔ́, səso la'nyə a.

²⁰Yə mu' mo kwi' gɔm yə gɑ: Gɑ bɑwə tə dɔmdyə, bi a pɑ də ghɔ tsʉ'.

²¹Gɛfa' pɑnyə jʉm siŋ tap e. Tap e yɛlúŋ gɔm bi é gɑ: Khʉdʉ́ gɔ mthə jyə pu a m məjyə, ŋkhe mpə́ŋ, pu a mghɛ po'tə, ba mfʉ̀ pu a mkho'tə.

²²Gɛfa' ghɔm gɑ: Ta, pu ghə pá' o gɔm a, da' gɑ tsʉ' yɑ̌ pɑ dyə.

²³Tá ghɔm bi gɛfa' gɑ: Ghɔ nə mpim jyə nthə́nyə pɔ wap ko dyə tə̌ dyə̌ lo.

²⁴Nə pa' gɑ siŋ wɔ gɑ sɔmmo nə pɔ pyə dɑ kě wap a tə gɔ la' zhwi' cəŋ tsɑ̌ pɑ.

²⁵Yeso pu a pɔ tə jɔm lə pɑ̌ giŋ məjyə, e fɛ nɑ e jʉ̀m gɔm bi pu gɑ:

²⁶Mo yə e yap jʉ̌m m̀ tə́ la' e wa' tap e, gwa' map e, gwa' jwi e, gwa' po pyə gwa' mfɑ́ pyə pyə pɑ bɛ ba pɑjwǐ, ba bə̌ŋ nɑ é a, ka ku' nə pɑ mukhʉ a.

²⁷Mo yə e ka kwa yə bɛnyəpɛnyə nə jap jʉ̀m m̀ a, bi a pɑ gɛ lə pɑ mukhʉ a.

²⁸Nə pa' wɑ nə po yə e pɑ gɔ kwɑ shəŋ bɑ e tə gɔ ləŋdzə cwəsi, sɛ yɔ bi a e ghə dəŋ tsə́ nə ŋkwɑ́ shəŋ tə miŋ a?

²⁹Bwɔk gɑ e kɑ ma' cyə shəŋ gwa' pu nə gwi e, bɑ gɔm gɑ:

³⁰Bɛ yəŋ lě ma' shəŋ miŋ kəkɔ.

³¹Kɑ ya fo yə e pɑ gɔ ghɔ lo' yə mu' fo shù, bɑ e tə gɔ ləŋdzə cwə́si lé, tə yɔ gɑ e ghə gʉ' nə dɑ msəŋwi pɔ sha' gham tə nə gɔ do' mo yə e ghə msəŋwi pɔ sha' mghambʉə a?

³²A tak po'o bɑ cwə yə yə mu' fo yɑ̌ gʉə sʉəsʉə a, bɑ e gɔ təm gɛ nthəm bi e gɑ e ghɔm bi e gɑ pu e ghə hwitə.

³³A po' gɑ po zhyə gɑ bǎ ya mo lə nə po pɑ tə kəŋnyə guŋ tsə tsyə e gə a awɛ bɑ e tə gɔ pɑ mukhʉ a pɑ.

³⁴Gwɛ̌ bɑ kwa' ywə pɑpuŋ; tə gwɛ̌ pɑ tə piŋ dʉ̌m, bɑ pu gɔ lɑ kɑ ghə a tʉ̌m?

³⁵Bɑ bi á pɑ́ a lə piŋ ŋkwitə bi cǎ', kɑ nə nə dwɔp cá' lə; pu gɔ ma' gwɛ bɔ pé. Mo yə e ghə mtəŋ nə ju' a yu'!