Read Ghomala New Testament LUKASI 15 Bible Online

LUKASI 15 - Ghomala New Testament bible

LUKASI 15

¹Guŋ mghɛ kwishwɔp pu a mghɛ mhɔ lə cu'tə bəŋ Yeso bɑ ju' nwə yə e bɑwə gɔm a.

²Pɑ Farisai pu a pɑ zhyə́ mco' khukhu nthúŋ pu gɔm gɑ: Mo yəŋ wə shu'tə mghɛ mhɔ, pu a pu pɑ dzʉywə.

³Yeso lə ghɔ̌m ghɔ̀m tə tutə gɔm bi pu gɑ:

⁴Ya mbɛ nə po bi a pɑ e ghə jʉ̀jʉ̀ tsyə́ ŋkhə, mu' ta' təm nə bi, bɑ e tə gɔ tak pyə shɑ shwɔp vʉ̌' mgham vʉ̌' gó, ghɔ cəŋ yə bɔ̌ yə e bi a tə yɔ e a?

⁵Cwə yə e yɔ é a, e dɑ ŋwɛnyə ŋkwa é jap e kəbo' e,

⁶bɑnyə la' e, ŋkhe mso pyə́ pu a mghɛ dhə la' pyə́ gɔm bi pu gɑ: Pɑ ŋwɛnyə nə pa' gɑ yɔ mu jʉ̀jʉ̀ a yə e lə pi a.

⁷Dəŋdəŋ po'o tə́ gɑ̌ siŋ wɔ gɑ ŋwɛnyə gɔ sɔ' pɑ thə́ kɛbəŋ nə thə́ ta' gɛ mhɔ yə e pʉɔtʉm tsyə a tə cyə nə pɔ shwɔp vʉ̌' mgham vʉ̌' pyə wap tə wə byap nə pʉɔtʉm a pɑ́.

⁸Kɑ ya mjwǐ yə e ghə drashəma gham, ta' drashəma pi nə, bɑ e tə gɔ khyɛ' lambu, kʉm dyə tə yɔ drashəma bɔ a?

⁹Cwə yə e yɔ a, e ke mso pyə pu a mghɛ dhə la' pyə gɔm bi pu gɑ: Pɑ ŋwɛnyə nə pa' gɑ yɔ drashəma yə a lə pi a.

¹⁰Dəŋdəŋ po'o tə́ gɑ̌ siŋ wɔ gɑ ŋwɛnyə bɑ dzə̌ pɑ́ aŋgəle nə ta' gɛ mhɔ yə e pʉɔtʉm tsyə a.

¹¹E lə kwi' gɔm bi pu gɑ: Mu' mbɛ lə ghə pǒ pyə pɑpʉə.

¹²Yə mo ŋkho' ghɔm bi tap e gɑ: Tá hɑ tsɑ tsə tsyə o bɑ gɔ la'tə hɑ bəm a. E lə ghɔm po'o ta yap ghaptə tsə tsyə́ bi pu.

¹³A lə nə cyə po mtyɛ'dzʉ, yə mo ŋkho' cu'tə tsə tsyə gɔ nə mu' guŋ tə gʉə sʉəsʉə, sim tsə tsyə bɔ nə vɔk tə ŋkhɛ.

¹⁴Cwə yə e lə pɔptə́ tsə bɔ tə a mi a, mu' mɑ kəya' vʉ nthʉm gúŋ. E cʉ' bə̌ŋ.

¹⁵E lə ghɔ jɔ mu' yə́ guŋ bɔ, dɑ fa' bi e, e təm e gó gɑ e ghɔ bɑ byap mgənɔm pyə.

¹⁶E lə bɑwə shəŋ nə pɑ dzʉ tsyə nə ywətsʉ mnɔm, da' gɑ la' sɔmmo pɑ hɑ ywətsʉ mnɔm m bi e.

¹⁷E lə ghəmnɑ e gɔm gɑ: Mghɛ fa' ta á pɑ́ sʉ'ʉ shəŋtə dzʉywə tə́ nthak bvʉ'? Sɔ' m nə m, gɑ̌ yəŋ tsɔ'ɔ bɑwə pfʉ́ jikǔ'.

¹⁸Gɑ gɔ lusi ghɔ bəŋ ta á ghɔm bi e gɑ: Ta ŋ de hɔnwə nə kɛbəŋ ba m bú.

¹⁹Ŋ kha piŋ ŋkhu' pá' bi a pɑ o ké a gɑ mú o a. Lɑ a pa' mu' gɛfa' o a.

²⁰E lə lusi cwəlɔ gɔ nə yɔ tap e. E lə yɑ gʉə sʉəsʉə tap e yɔ e, mtso myə́ kú e, e kʉdʉ̌ nthɛtə nthuŋ e, nuŋ mgho' myə́.

²¹Mu é bɔ ghɔm bí e gɑ: Ta ŋ dě hɔnwə nə kɛbəŋ ba m bǔ, ŋ kha piŋ ŋkhu'nyə nə pa' bi a pɑ pu ke a gɑ mu o a.

²²Tə́ tap e ghɔm bi mghɛ fa' pyə gɑ: Po lo'nyə dé kwa' dzə pɑpuŋ nə sɔ' ŋkwa nə é, biŋ jwe kwɛ nthə pu e, biŋ su ba mthap mkwə e.

²³Po lɑ mu hùŋ mhə̌m sɔ' jwə e, pɑ pfɑ́, ŋwɛnyə;

²⁴nə pá' mu a yəŋ gɑ lə pfʉ̌, e piŋ sɔ̌' nə vɔk, e lə pǐ, pu piŋ jɔ é. Wap lə to' nə ŋwɛnyə.

²⁵A lə nə pɑ po'o shyə̀dzə é pɑ m pě. E lə pɑ bɑnyə, sɔ' tə ŋkhəm be dyə̌, jʉ' pa' pu dyə jwɔp lə́ nəŋ a,

²⁶ŋkhe mu' gɛfa', həŋtə é ywə yə a bɑ ya a.

²⁷E ghɔm bi e gɑ: Fɑ o bɑ ě pɑnyə; pa' e nə sɔ' bɑ pɑ́ nthʉɔ a tɔ ɔ zhwə mú hùŋ mhə̌m.

²⁸E lə yu' po'o, luŋ e yɛ, e lə kuŋ nə ko dyə. Tap e tə́m byɛ'tə e.

²⁹E ghɔm bi tap e gɑ. Pa' bɑ fa' bu a, a cwəlɔ mgu' jɔmyɔ̌m, ŋ də m nthʉɔthə́ bu; tə o la m hɑ mu dzə́ bəm gɑ pyə a mso pɑ nə ŋwɛnyə.

³⁰Tə mu o yɑ yə é sɔ' a, yʉ yə́ e lə sǐm tsə́ tsǔ pu a pɑ mcʉ'ma' a, o zhwə́ mú hùŋ mhə̌m nə e!

³¹Tap e ghɔm bi e gɑ: Mú a, pu nə́ bɑ guŋ mcwə awɛ, guŋ ywə yə gɑ gə a, a pɑ yǔ.

³²Tə́ a bɑwə shəŋ gɑ pu ŋwɛnyə nə pá' fɑ o yɑ lə́ pfʉ̌ e piŋ jam nə vʉ̌, e lə pǐ, pu piŋ ho é.