Read Ghomala New Testament LUKASI 16 Bible Online

LUKASI 16 - Ghomala New Testament bible

LUKASI 16

¹Yeso lə pǐŋ gɔm bi pɑkhʉ pyə gɑ: Mu' zhi mo lə ghə mukhʉ mtɔ e, pú sɔ' siŋ e gɑ e wə bɔptə potsə tsyə́ pɔptə.

²E ké é gɔm bi é gɑ: Gɑ ju' gɑ kɑ nə o lé? Sɛ tsə tsɑ̌ siŋ a pa' o nə gə a, nə pa' tə́ wə ne gɔ piŋ pɑ lé tsə́ tsɑ̌ pɑ.

³Mukhʉ mtɔ bɔ sɛ nthʉm tʉm e gɑ: Gɑ̌ gɔ pɑ fa' kɑ, nə pa' ta á kwi fa' bəm a? Gɑ̌ gɔ tsʉ' ca' lə? Ŋ kha ghə gʉ́'. Gɑ̌ gɔ cʉ' do ywə lə? Sǒ gɔ ku a.

⁴Gɑ̌ zhyə pa' gɑ gɔ ghə tə ghə pɔ pyə wap gɔ nyəŋ a mdyə map cwə yə pu te a fa' a.

⁵A lə pɑ po'o, e ke mghɛ ju tap e yɑmu' yɑmu' gɔm bi dəŋdzə mo gɑ: Po ta á ghə kʉ̌?

⁶E pa' bi e gɑ pyə e ghə mwɑ mta' ŋkhə. E ghɔm bi e gɑ: Cwəsi, pe ŋwa'nyə o bvə nə gɑ mghǎmthɔ.

⁷Biŋ gɔm bi yə mu' gɑ: Po ta a ghə kʉ̌? E pa' bi e gɑ́ msɛ msap ŋkhə. E ghɔm bi e gɑ: Pé ŋwa'nyə o bvə nə gɑ mgham hɔ̌m.

⁸Bɛ bɔ lə gho'tə fʉ́ mukhʉ́ mtɔ̌ bɔ, nə pa' e lɑ ghə nwə pa' sɛ nwə a. Nə pa' pɑ dzʉ bɑ wap zhyə fʉ tə' shyə pɔ pyə wap giŋ nthʉm ŋkha' a.

⁹Gɑ̌ ghɔm bi po gɑ po lɑ́ tsə mfʉm ŋkho mso pɔ. Po'o gɑ tyɛ'dzʉ yə po ka ghə ywə a, wap nyəŋ wɔ dyə vɔk mama.

¹⁰Mo yə e bɑ nyənyɔ nə mu ywə ywə́ a, bɑ nyənyɔ nə ywə gwyə. Mo yə e tə bɑ nyənyɔ nə muywə ywə́ a pɑ, e tə bɑ nyənyɔ nə yə gwyə pɑ́.

¹¹A bi a pɑ gɑ po ka pɑ nyənyɔ nə tsə mfʉm bɑ wɑ gɔ sɔ' hɑ tsə nyənyɔ bi pǒ?

¹²A piŋ bɑ gɑ po ka pɑ́ nyənyɔ nə ywə yə a yə mo dyɛ' a bɑ wɑ gɔ hɑ ywə yə a yɔ a bi pǒ?

¹³Bi a pɑ sɔm gɛfa' lə fá' bi mtǎ fa' pɑpʉə, nə pa' bɑ e gɔ pɑ pɔ mu', pɑ kuŋ mu', pɑ la nɑ́ e nə mu', pɑ wa' mu'. Bi a pɑ po lə fa' bi Si pu ŋkhap.

¹⁴Pɑ Farisai pyə wap lə ŋkhuŋ ŋkhap a lə nə yu' po'o, bɑ gwi Yeso.

¹⁵E ghɔm bi pu gɑ: Po da'tə bi pɔmnəŋ gɑ po bɑ pɔ nyənyɔ. Tə Si bɑ e zhyə mtʉm mɔ. Nə pa' ywə yə pɔmnəŋ nyəŋ dəŋ nə a bɑ dzə Si bɑ kwa' mzhʉ̌m.

¹⁶Mco' ba mghɔ́m ghɔm Si lə́ miŋ nə Yohane. Tə fɑ po'o pu pɑ ju' Cuŋ Pɑpuŋ Nəfo Si nə guŋ mtsʉ' awɛ. Bǎ ya mo lə pɑ nthé gʉ' nə ko nə́.

¹⁷Kɛbəŋ pu cǎ' gɔ sɔ' cyə; tə bi a pɑ sɔm ta' cwɔ' lə təm nə mco'.

¹⁸Bǎ yá mbɛ lə yə e zhəŋ jwi e biŋ ŋkho mu' a, bɑ e ghə ghap. Mo yə e nəŋ ŋkho nə mjwǐ yə pu zhəŋ e a bɑ gɛ ghə ghap.

¹⁹Mu' gɛ ywə lə bɑ wə, bɑ ŋkwa dzə nə̌m, dzə dap də̀ŋ, bɑ ŋwɛnyə guŋ mtyɛ'dzʉ awɛ.

²⁰Mu' bə́ŋ, bɑ mshwə tsə səŋ e awɛ, tso tsyə pɑ Lazaro pɑ nuŋ jyədyə̌ e.

²¹E lə bɑ shəŋ nə pɑ dak msisya ywə yə a lə bvʉ si nə tɑpe gɛ ywə bɔ a nə bvɔk yə; da' gɑ́ bvʉ́ tsyə pɑ sɔ' dzɛ mshwə tsə myə́.

²²A lə pɑ po'o, bə̌ŋ bɔ ti pfʉ, pɑ aŋgəle lɑ é jap bəŋ Abraham. Gɛ ywə lə ti pfʉ yə pu təŋ e.

²³E lə ko guŋ mpfə pɔ, bɑ jɔgo', bʉ' mnyə jɔ Abraham ba Lazaro bəŋ e tə gʉə sʉəsʉə.

²⁴E lə cwě gɔm gɑ: Ta a Abraham cɔmmtso mə̌, nthəm Lazaro e co' pu e nə shyə nə sɔ' bvyə ghak a nə pa' gɑ si tsɔ'ɔ bɑwə jɔgo' te' o nthʉm mɔk.

²⁵Abraham pa' bi é gɑ: Mú a, kamtə gɑ o lə kwi tsu tsə pɑpuŋ nthʉm vɔk o dəŋdəŋ pa' Lazaro lə yɔgo' a. Cwəlɔ, e tsɔ'ɔ pu pɑwə nə zhwyə̌tə e o pɑwə jɔgo'.

²⁶A piŋ nə pɑ̌ po'o ta' tsʉm pɑ cəcɑ̌ pɑ, po'o gɑ pɔ pyə wap gɔ fɑ tsɔ'ɔ ghɔ tsa'a, kɑ tsa' a sɔ' tsɔ'ɔ a kə cyə.

²⁷Gɛ ywə ghɔm gɑ: Gɑ̌ wə shwyɛ'nyə o m ta gɑ o təm Lazaro la' ta á.

²⁸Nə pa' mfɑ pɑ̌ yɑ́ la' pɑ́ tɔ, e ghə wap zhyə, po'o gɑ wap kə la' sɔ' tsɔ'ɔ nthʉm go'.

²⁹Abraham pa' bi e gɑ. Mosɛ pu a mghɔm ghɔm Si bəŋ pu. Wap yu' ywə yə wap gɔm bi pu a.

³⁰Gɛ ywə ghɔm gɑ: Gɛ m ta a Abraham, mo nə ghɔ bəŋ pu fɑ m guŋ a vʉ̌ bɑ wap gɔ pʉɔtʉm tsap.

³¹Abraham ghɔm bi e gɑ: Wap pɑ́ tə yu'shwə Mosɛ ba mghɔm ghɔm Si, bɑ mo yam pɑ nə vʉ̌ bɑ wap tə gɔ pʉɔtʉm tsap pɑ́.