Read Ghomala New Testament LUKASI 17 Bible Online

LUKASI 17 - Ghomala New Testament bible

LUKASI 17

¹Yeso ghɔm bi pɑkhʉ̌ pyə gɑ: Sɔmywə yə bi a pɑ a kɔ ywə fa'tə á a tə̌ wə pɑ́, tə gǒ' bɑ bi mo yə a gɔ cyə m nə e a.

²Dzə̌ bi mo bɔ gɑ pu cəŋ ləŋ nthuŋ e, ma' e nthʉm shyə lɑpʉə. Shyə pa' bi a pɑ e ghə mu' nə pɑkhʉ pɔ gɑ vʉ́ si a.

³Po pɔmtə: fɑ́ o hɔnwə bu, o tɔk e, bi a e kwyəpnyə a, o lɑ mhɔ myə́ nə shwyɛ' e.

⁴E hɔnwə bu mcʉm sɔmbʉə nə tyɛ'dzʉ, tə sɔ' dzə o kwyəpnyə mcʉm sɔmbʉə, o lɑ mhɔ myə́ shwyɛ' e.

⁵Mghɛ nthəm ghɔm bi Cyəpɔ gɑ: Kwi' piŋnthʉm yɔk.

⁶Cyəpɔ ghɔm bi pu gɑ: Po la' gə piŋnthʉm dəŋ msɔm sɔ́k bɑ po ghɔ̀m bi ta' thə́ yəŋ gɑ gɑ́: Cwɔ' nɑ o gɔ nthʉ́m shyə lɑpʉə. Bɑ a gɔ yu' shwə yɔ.

⁷Wǎ nə po yə e la gə ŋkwɔ e, e pɑ́ dzʉ'ne kɑ byap dzə́ lə, bɑ cwə yə e fɑ pé a, é gɔ ghɔm bi e gɑ sɔ' shwə dəm tɑpe?

⁸Gɛ̌. E gɔ ghɔm bi m gɑ: Nyaptə ywətsʉ nə sɔ' hɑ bəm. Cwə yə gɑ̌ tsʉ ywə tə jwyə biŋ nwə́ a, o gɔ ghɔ tsʉ yǔ cwəlɔ.

⁹E gɔ gho'tə ŋkwɔ e bɔ nə pa' e ghə ywə yə e gɔm bi e a?

¹⁰Bɑ wɔ yɔ, cwə yə po ghə guŋ ywə awɛ yə pu lə ghɔm gɑ po ghə a, po ghɔm gɑ: Pyə̌ bɑ pɑ́ sobo mghɛ fa', pyə̌ ghə pɑ ywə yə pyə kɑ bɑ gɔ ghə a.

¹¹Yeso lə pɑ gɔ m Yerusalɛm, shyə m Samaria pu Galilea.

¹²E lə pɑ ŋkho nthʉm mu' guŋ, shɑ mghɛ ka'pap pɔ gham sɔ' pu a pu yu'tə, wap tiŋnyə gʉə sʉəsʉə.

¹³Shwé gɑ: Yeso ta, cɔmmtso mɔ́k.

¹⁴Yeso lə nə yɔ wap gɔm bi pu gɑ: Po ghɔ da'tə nɑ tsɔ bi mkamsi. Wap lə pɑ̌ gɔ, nɑ tsap lɔ́.

¹⁵Mu' mo nə pu lə yɔ bɑ ě yɛ, bɑnyə nə mkwə myə́, giŋ gu'tə Si tə́ thə́,

¹⁶sɔ' bvʉ nə mkwə Yeso, pfɔptə sə é si go'tə e; mo bɔ lə bɑ yə Samaria.

¹⁷A pɑ́ po'o Yeso ghɔm gɔm gɑ: Guŋ pɔ gham awɛ ka yɛ a? Pyə shɑ pɔ vʉ̌' hɑ?

¹⁸Sɔmmo ka təm cəcɑ̌ pu sɔ' gu'tə Si, tə ně da' gʉɔ yəŋ gɑ.

¹⁹Biŋ gɔm bi e gɑ: Lusi gɔ; Piŋnthʉm o vɔk o.

²⁰Pɑ Farisai lə həŋtə Yeso cwə yə Nəfo Si gɔ sɔ' sɔ' a; e pa' bi pu gɑ: Nəfo Si tə gɔ sɔ' sɔ' tə pu pɑ dɑ mnyə jɔ a.

²¹Pu tə gɔ sɔ' ghɔm gɑ: A yəŋ gɑ bɑ m tsɔ' gɑ a, kɑ gɑ́, a yə́ gɑ bɑ mtsi'i gɑ a. Nə pa' Nəfo Si dzə́ pɑ cəcɑ̌ po.

²²E lə piŋ gɔm bi pɑkhʉ pyə gɑ: Cwə̌ wə́ sɔ́' yə po gɔ sɔ' ti' nə yɔ mu' tyɛ'dzʉ nə mtyɛ'dzʉ Mú mo a, da' gɑ po lə yɔ.

²³Pu gɔ sɔ' pɑ ghɔm bi po gɑ: A m tsɔ'ɔ gɑ, kɑ a m tsi' i gɑ: Ka po ghɔ tsʉ'u,

²⁴dəŋdəŋ pa' pəpa' bəŋ ŋwɛ kɛbəŋ kwicʉ̌m nə guŋ mghəŋ dzʉ́ awɛ a, dəŋdəŋ pa' a gɔ sɔ' pɑ nə tyɛ'dzʉ Mu mo a.

²⁵Da' gɑ a bɑwə shəŋ gɑ e ləŋdzə jɔgo' te'te', tə pɔ nə yəŋ wɔ̌ dzʉ wa' e.

²⁶Ywə yə a lə pɑ̌ nə cwə Noe a gɔ sɔ' piŋ pɑ nə cwə Mú mo.

²⁷A lə bɑ cwə o bɔ pɔmnəŋ pɑ dzʉ́, nwə́, bɑ dɔmdyə, biŋ hɑ po pap lɔmdyə tə ŋkhəm tyɛ'dzʉ yə Noe lə ko kənu' dɔmnyə̀ bəŋ mwe lú, mshyə sagʉə jwətə pɔ a.

²⁸Ba dəŋdəŋ pa' a lə pɑ nə cwə Lɔt a, pu lə dzʉ́, nwə́, bɑ jó, bɑ fiŋ, bɑ dzə ywə biŋ bɑ ŋkwɑ mpa'

²⁹tə' tyɛ'dzʉ yə Lɔt lə təm Sodɔm a, Si ghə bəŋ mɔk pu a mwɔ' hwéhwě lú, jwətə wap awɛ.

³⁰A gɔ sɔ' pɑ pɑ́ po'o nə tyɛ'dzʉ yə Mú mo gɔ sɔ' sɔ' a.

³¹A tyɛ'dzʉ bɔ, mo yə e m̀ zhəŋ dyə thə́ a kɑ fi' gɑ e gɔ ghɔ lɑ tsə tsyə zhəŋ Dyə Si; mo yə e m pe a kɑ pɑnyə la'.

³²Po kamtə jwi Lɔt,

³³mo yə e gɔ sɔ' pɑ cəŋ nə vɔk a gɔ sɔ' pi. Mo yə e pi vɔk e a, vɔ́k.

³⁴Gɑ siŋ wɔ gɑ a gɔ sɔ' pɑ mtsʉ' bɔ, pɑ bɛ pɑ dəm ta' kodyə pɑpʉə; pu lɑ mu', nthak yə mu'.

³⁵Pɑjwǐ pɑpʉə gɔ sɔ' pɑwə pəmtə wɔ' msɛ. Pu lɑ mu' ta', nthak yə mu'.

³⁶Pɑ bɛ pɑpʉ́ə gɔ sɔ' pɑ́ pé, pu lɑ ta' mo nthak ta' mo.

³⁷Pɑkhʉ pyə həŋtə e gɑ: A gɔ sɔ' pɑ po'o hɑ Cyəpɔ? E ghɔm bi pu gɑ: Tsʉ' yə pfə ywə nə a, a tsʉ' yə mŋwə̌ŋwə shu'tə nə a.