Read Ghomala New Testament LUKASI 18 Bible Online

LUKASI 18 - Ghomala New Testament bible

LUKASI 18

¹Yeso lə ghɔm mu' ghɔm tə tutə bi pɑkhʉ pyə nə́ nə siŋ wap gɑ a puŋ gɑ wap pɑ shwyɛ'nyə Si tə pwa.

²E lə ghɔm bi pu gɑ: Mu' gɛ fyɛ' lə bɑ nthʉm mu' tisuŋ e lə pɑ bwɔk Si, e lə nəŋ bɑ shɔm nə sɔmmo.

³Mu' npfɔk mjwǐ lə bɑ nthʉm tisuŋ bɔ bɑ sɔ' guŋ mcwə awɛ gɔm bi é gɑ: Ya'shɛ yɔk pyə gɛ bo a.

⁴A lə cwə́ te', la' e kuŋ nə ya' shɛ bɔ. Biŋ di gɔm gɑ: Ba pa' ŋ tə́ bwɔk Si a, ŋ də nəŋ bɑwə shɔm nə sɔmmo a pɑ,

⁵npfɔk mjwǐ yəŋ nəŋ bɑwə sɔ' baknyə a guŋ mcwə awɛ a, a puŋ gɑ ja' shɛ e. A taktə pɑ po'o bɑ e gɔ pɑ sɔ' guŋ mcwə awɛ paknyə a pɑ po'o tə shwə bwa bi e.

⁶Cyəpɔ ghɔm po'o biŋ ŋkwi' gɔm gɑ: Po yú' ywə yə ba'sa' cwəpuŋ gɔm a!

⁷Já Si tə gɔ ya'shɛ́ pɔ pyə wap bɑ e lě ŋkhe wap, wap pɑ pɔ pyə, bɑ sɔ' shwé bi e mɔkcʉ́ ba mtsʉ' a lə? Já e gɔ cwə te' tə kwitə wap lə?

⁸Gɑ siŋ wɔ gɑ: E gɔ lo'nyə ya'shɛ yap. Da' gɑ tə Mú mo gɔ la' nə sɔ' kwyatə mghɛ piŋnthʉm dəmcǎ' lə?

⁹E lə kwi' gɔm mu' ghɔm tə tutə nə pɔ pyə wap ŋkwɛ gɑ wap bɑ pɔ dəŋdəŋ tə́ bɑ gwak pyə shɑ pɔ a gɔm gɑ:

¹⁰Shɑ pɑ bɛ pɑpʉə lə ghɔ Dyə Si nə cwyɛ'nyə Si. Mu' mo nə pu lə bɑ Farisai, yə mu' mo pɑ gɛ kwishwɔp.

¹¹Farisai lə tiŋnyə thə́ shwyɛ'nyə Si gɔm gɑ: Si, gɑ gho'tə nə pa' ŋ tə bɑ pa' pyə shɑ pɑ bɛ a pɑ: Wap bɑ mcúŋ, bɑ pɑ ghə nwə cwəpuŋ, pɑ ghə ghap. Ŋ tə bɑ pa' gɛ kwishwɔp yəŋ gɑ a pɑ.

¹²Gɑ̌ shwə tə tsʉ̌ ywə mcʉm bʉə nə gapdzʉ biŋ bɑ hɑ bɑtə jyə gham nə tsə́ tsǎ bu.

¹³Gɛ kwishwɔp tiŋnyə gʉə sʉəsʉə, la' e zhyə bɑ nə́ pʉ' mnyə myə́ de kɛbəŋ, dɑ mtso dzɔp kəkɔp e gɔm gɑ: Si kɑ yɛluŋ nə m̀, myə̀ gɛ mhɔ.

¹⁴Gɑ siŋ wɔ gɑ bɛ yəŋ lə nə́ pɑnyə la' e bɑ si lɑ mhɔ myə́ shwyɛ' e; tə sɔ' m nə yə mu' mo la' Si lɑ mhɔ myə́ shwyɛ' e pɑ. Nə pa' mo yə e ŋa' nɑ e á pu gɔ sɔ' fi' e hɑ si, mo yə e fi' nɑ e hɑ si a pu ŋa' e hɑ thə́.

¹⁵Shɑ pɔ lə lɑ ba po bwa nə sɔ' bi Yeso gɑ e yap bu nə pu. Pɑkhʉ pyə lə nə yɔ po'o shɔktə po bɔ.

¹⁶Da' gɑ Yeso ghə pu lɑ po bwa bɔ sɔ̌', e ghɔm gɑ: Po tak po mkəcɔk po wap sɔ' bəm, ka po kɔ bi pu; nə pa' Nəfo Si bɑ yə pɔ pyə wap hwənyə wap a.

¹⁷Kwa' nyənyɔ gɑ̌ siŋ wɔ gɑ mo yə e ka lɑ Nəfo Si m pa' mú kəcɔk mú a bɑ e tə gɔ sɔ' ko nə pɑ.

¹⁸Mu' ŋkhám biŋ si lə həŋtə Yeso gɑ: Tá pɑpúŋ gɑ̌ gɔ ghə gɑ kɑ tə sɔ' kwi vɔk mama a?

¹⁹Yeso ghɔm bi e gɑ: Nwə kɑ o ke a gɑ mo pɑpuŋ? Sɔmmo tə bɑ mo pɑpuŋ pɑ tə ně da' Si do e.

²⁰O bɑ o zhyə́ mco' gɑ: Kɑ ghə ghap; kɑ zhwə mo; kɑ zhʉ; kɑ cwanwə; ghə mku' tɔ ɔ pu mɔ ɔ.

²¹Ŋkhǎm bɔ pa' gɑ: Ŋ dɑ́ jyə mco' bǎ tə fə mubwǎ.

²²Yeso lə yu' po'o gɔm bi e gɑ: A yɑ̌wə jak o ta' ywə yɑmu': Fiŋ tsə tsyə o ghə a, gaptə bi mpə̌ŋ, biŋ sɔ' jap jʉ̌m m̀; o gɔ sɔ' ghə fʉ' kɛbəŋ.

²³E lə nə yu' po'o sə e fi', nə pa' a lə bɑ e zhi té' o.

²⁴Yeso yɔ e po'o gɔm gɑ: Nə ko nə Nəfo Si bɑ a tʉɔ té' bi mghɛ ywə.

²⁵Nə pa' a yɛ̀ bi kamelo nə twɔk nə fǎ syap shyə́ pa' bi a pɑ gɛ ywə ko nə Nəfo Si a.

²⁶Pɔ pyə wap lə yu' a həŋtə e gɑ: Tə́ a bɑ po'o wɑ ghɔ sɔ' vɔk?

²⁷Yeso pa' gɑ: Ywə yə a shyə pɔmnəŋ a tə shyə Si pɑ!

²⁸Pɛtrɔ ghɔm gɑ: Yɔ, pyə lě gwa' tsə tsɔk awɛ jap jʉm o.

²⁹Yeso pa' bi pu gɑ: Kwa' nyənyɔ gɑ ghɔm bi po gɑ́ sɔmmo tə̌ wə yə e le gwa' la' tsyə, ba jwi e, bɑ pǒmmʉə pyə, bɑ mtǎ pu a mʉə, bɑ po pyə nə́ Nəfo Si,

³⁰la' e ghə fʉ' cwəlɔ tə a yɔm, piŋ sɔ' cwə jʉm ko nə vɔk mama a pɑ.

³¹Yeso lə ke pɔ shwɔppʉə mgham bəŋ e, gɔm bi pu gɑ: Po yu', pɑ si po'o bʉɔ m Yerusalɛm; guŋ mnwə awɛ yə mghɔm ghɔ̀m Si lə və nə Mu mo a, a pəmtə.

³²Pu gɔ hɑ e bi pɑ tə pɑ pɑ Yudea, pu yəmtə e, dɑ e jɔgo', nthətə́ mti nə e.

³³Piŋ cwɔ e, zhwə e, tə́ a nə pɑ tyɛ'dzʉ yɑtá e yam nə vʉ̌.

³⁴Yeso lə ghɔm po'o la' pɑkhʉ pyə yu' kwa' pɑpuŋ. Mghɔm bɔ̌ pa' bɑ ǎ tʉmnyə, wap lə pɑwə jyə sɔmywə nə́.

³⁵Yeso lə nə kəm bəŋ Yeriko, mu' fʉ pɑ kəŋ məjyə bɑ e cwə, bɑwə do ywə.

³⁶Fʉ bɔ lə yu' pa' pɔmnəŋ wə shyə a həŋtə ywə yə a bɑ ya a.

³⁷Pu siŋ e gɑ: Yeso bɑwə shyə̌.

³⁸E cwe tə thə́ gɑ: Yeso Mú David cɔmmtso mə̌.

³⁹Pɔ pyə wap lə bɑ dzə́ e ɑ cɔktə e gɑ e lɛ́tə́; da' gɑ e piŋ shwé tə thə́ gɑ: Mu David cɔmmtso mə̌.

⁴⁰Yeso tiŋnyə, gɔm gɑ pu lɑ e sɔ' bi e. E lə kəm bəŋ e, e həŋtə e gɑ:

⁴¹O shəŋ gɑ gə la m wu? E pa' bi e gɑ: Cyəpɔ gɑ jɔ tsʉ'.

⁴²Yeso ghɔm bi é gɑ: Yɔ tsʉ'; piŋnthʉm o vɔk o.

⁴³E lə wuŋ jɔ tsʉ', jap jʉm Yeso, giŋ gu'tə Si. Guŋ pɔ awɛ lə nə yɔ po'o, go'tə Si.