Read Ghomala New Testament LUKASI 19 Bible Online

LUKASI 19 - Ghomala New Testament bible

LUKASI 19

¹Yeso lə ko Yeriko, bɑ shyə tisuŋ.

²Mu' ta' mbɛ tso tsyə pɑ Sakio, bɑ gɛ kwishwɔp, bɑ e zhi té' ŋwak.

³E lə bɑwə shə́ŋ nə yɔ Yeso, da' gɑ e lə ku' nə yɔ e nə pa' é lə bɑ tutu' mo, bɑ pɔmnəŋ piŋ jɔm té' o.

⁴E lə khʉdʉ̌ gɔ dzə ŋkwɔ' nə shʉm thə. Nə tsʉ' yə Yeso lə́ bɑ gɔ cyə nə a, nə yɔ e.

⁵Yeso lə kəm tsʉ'u, bʉ' mnyə myə́, gɔm bi e gɑ: Sakio fi' mgʉ̌'; nə pa' a wə shəŋ gɑ shwə dyə o tyɛ' ɔ.

⁶Sakio lə fi' mgʉ̌', ŋwɛnyə, pu e ghɔ la' e.

⁷Pu lə nə yɔ po'o, ŋkhukú, gɔm gɑ, e wə shwə́ m ywə mo cwəpuŋ.

⁸Sakio lə nə yɔ po'o sɔ' bəŋ Cyəpɔ gɔm gɑ: Cyəpɔ gɑ gɔ ghaptə tsə tsɑ nə ghə dəŋdəŋ jyə pʉə, hɑ ta' jyə bi mpə̌ŋ. Bi a pɑ bɑ gɑ̌ hɔnwə bi mo, bɑ gɑ gɔ pa' bi e m cʉm pfʉə.

⁹A pɑ po'o Yeso ghɔm bi e gɑ: Kwa' tyɛ' ɔ vɔk ko nə yəŋ dyə, nə pa' ba mo yəŋ gɑ bɑ pɑ mu' mú Abraham.

¹⁰Nə pa' Mu mo lə sɔ' nə cəŋ piŋ vɔk ywə yə a lə pi a.

¹¹Pu lə pɑ nthéŋmtəŋ nə nwə yə e lə bɑwə gɔm a, pa' pu a pu lə bɑ wap kəm bəŋ tisuŋ Yerusalɛm a, pu pɑwə ŋkwɛ gɑ Nəfo Si wə sɔ' a, e ghɔm mu' ghɔm tə tutə bi pu,

¹²gɔm gɑ: Mu' mbɛ nə ŋkhənyə Nəfo lə pɑ gɔ m nə mu' guŋ gʉə sʉəsʉə pu hɑ Nəfo bi e, tə e piŋ bɑnyə jʉm.

¹³E lə nə ghɔ ŋkhe shɑ mco' pyə pɔ gham su ntwa yap hɑ tsə bɛ gham bɛ gham bi pu, biŋ gɔm bi pu gɑ: Po ghɔ nthɛ ŋkhap ba tə̌ ŋ da' sɔ̌'.

¹⁴Da' gɑ pɑ guŋ pu lə bɑwə bɔ e. Wap lə təm pɔ gɑ wap ghɔ gɔm gɑ: Pyə ka kuŋ gɑ e sa' wɔk.

¹⁵Pu lə hɑ nəfo bi e, e piŋ jʉm, ŋkhe mco' pyə́ pyə e lə hɑ ŋkhap bi pu a, nə zhyə pa' wap le nə nthɛ a.

¹⁶Dəŋdzə co' e lə sɔ' gɔm gɑ: Bʉm myə o lə hɑ bəm ǎ, tsə tsə́ bɛ ghǎm.

¹⁷E ghɔm bi e gɑ: A puŋ m co' fo pɑpuŋ. Pa' o kě bɑ nyənyɔ nə muywə ywə́ á, gɑ̌ gɔ hɑ mtisuŋ gham bu o pɑ sa'.

¹⁸Batə mo yɑpʉə lə sɔ' gɔm bi e gɑ: Ta, bʉm myə o lə hɑ bəm a tsə́ tsə bɛ tɔ.

¹⁹E ghɔm bi e gɑ: Ba wə yu gɔ pɑ sa' mtisuŋ mənthɔ.

²⁰Yə mu' mo sɔ' gɔm gɑ: Cyəpɔ yɔ ŋkhap o yə̌ŋ; gɑ̌ bɑ ŋ dě ŋkwɑ́ nə pak dzə́ dwɔ́',

²¹nə pa' ŋ də bɑwə bwɔk o, nə kɑlə o bɑ mo shɔkcɔ̌k, bɑ dɑ ywə yə o ka yap a, dɑ ywə tsʉ' yə o le tə tsə ywə nə a.

²²E ghɔm bi e gɑ: Gɛfa' cwəpuŋ gɑ gɔ cyə pɑ nə ghɔm tsǔ tə ghəm o. O lə zhyə gɑ́ gɑ̌ bɑ mo shɔkcɔ̌k; bɑ dɑ tə yap, dɑ tə tsə;

²³nwə kɑ bɑ o lě tə́ nyəŋ ŋkhap a baŋk? Bɑ ŋ də gɔ pɑnyə nə té bɑ ǎ tsə́.

²⁴E lə piŋ gɔm bi pɔ pyə pu a pu lə bɑ tsʉ'u a gɑ: Po kwi ŋkhap yə a bi a, hɑ bi mo yə e gə tsə gham a.

²⁵Wap ghɔm bi é gɑ: Cyəpɔ a bɑ e tsə ghə tsə ghǎm.

²⁶E ghɔm bi pu gɑ: Gɑ siŋ wɔ gɑ pu gɔ sɔ' hɑ ywə bi mo yə e ghə ywə a, sɔ' m nə mo yə e ka ghə ywə a, ba yə muywə yə a bi a pu kwi.

²⁷Ba po'o, po lɑ mghɛ bo pɑ̌ pyə wap ka tə bɑwə biŋ gɑ sa' wap a pɑ sɔ' dzə m̀ a, gwatə wap.

²⁸Yeso lə ghɔm po'o, nthamdzə nə pʉɔ dɑ m Yerusalɛm.

²⁹E lə ghɔ tə bɑ ŋkhəm Befage pu Betanya nə ghəŋ kuŋ yə pu ŋkhe gɑ kúŋ mthə olivə a, Yeso təm shɑ pɑkhʉ pyə pɑpʉə

³⁰gɔm bi pu gɑ: Po ghɔ nə la' tsyə ǎ dzə a; po gɔ ko wə yɔ mú jakasi yə pu ka wuŋ ŋkwɔ' nə e a, bɑ pu cəŋ é, po kyɛ' e nə sɔ'.

³¹Mo həŋtə wɔ gɑ: Po ŋkhyɛ' e gɑ kɑ? Po ghɔm gɑ: Cyəpɔ wə shəŋ.

³²Pɔ pyə pú lə təm wap a, lə ghɔ biŋ jɔ guŋ ywə awɛ pɑ pa' Yeso la' gɔm a.

³³Wap lə pɑ̌ ŋkhyɛ' mú jakasi, mghɛ pyə́ ghɔm bi pú gɑ: Po ŋkhyɛ' e gɑ kɑ?

³⁴Wap ghɔm gɑ: Cyəpɔ wə shə́ŋ.

³⁵Wap lə ma' mdzə́ map dəm mú jakasi, dɑ e nə gɔ hɑ bi Yeso, Yeso kwɔ́' dəm e.

³⁶Wap lə nə ghiŋ, lə pɔmnəŋ pɑ siŋ mdzə́ map mə́jyə

³⁷wap lə ghɔ tə bɑ ŋkhəm bəŋ Yerusalɛm, nə məjyə yə a dzəŋ fɑ m nə kuŋ mthə olivə, guŋ vəŋ pɑkhʉ pyə awɛ ŋwɛnyə, bɑ go'tə Si tə thə nə guŋ msya myə wap lə yɔ a.

³⁸Wap lə bɑwə gɔm gɑ: Byanyə bi mo yə e wə sɔ' a, nə fo, tso Cyəpɔ! Hwitə pɑ kɛbəŋ, ghamtə pɑ bi Si.

³⁹Shɑ pɑ Farisai pyə wap lə bɑ́ cəcɑ̌ pɑkhʉ pyə́ a lə ghɔm bi Yeso gɑ: Ta, ghɔm gɑ pɑkhʉ pu lɛ́tə́.

⁴⁰Yeso ghɔm bi pú gɑ: Gɑ siŋ wɔ gɑ wap la dɛtə bɑ mwɔ' gɔ zhwɔp!

⁴¹Yeso lə ghɔ tə bɑ ŋkhəm bəŋ tisuŋ, jɔ tisuŋ, dɔ̌ nə é,

⁴²gɔm gɑ: Ba wə yǔ la' pe' jyə ywə yə bi a pɑ a hɑ hwitə bu! Da' gɑ ǎ cwəlɔ bɑ ǎ tʉmnyə, o lə pɑwə jɔ.

⁴³Shɑ mtyɛ'dzʉ wə sɔ́' myə mghɛ bo pǔ gɔ tsam o nyəŋ tuŋ, hyanyə o mghəŋ mghə̌ŋ

⁴⁴tsa'tə o, pu a po pǔ, sa'tə o, wap lə nə tak o, sɔm gwɔ' yɑ dəm mú', pa' o lě tə́ zhyə́ tyɛ'dzʉ́ yə pu lə kəka o a.

⁴⁵E lə ko Dyə Si ntho' nə zhəŋ pɑ tɛmtɔ,

⁴⁶lə bɑ gɔm bi pu gɑ: A bɑ pu lě bvə́ gɑ dyə a gɔ sɔ' pɑ dyə mcwyɛ'nyə tə po nə gə dyə msamshwə.

⁴⁷E lə bɑ Dyə Si guŋ mtyɛ'dzʉ awɛ bɑ ji'tə pɔmnəŋ. Mtadyə mkamsi, pu a pɑ zhyə mco', ba mfo pɑ shəŋ nə zhwə e.

⁴⁸Da' gɑ la' wap zhyə pa' wap gɔ ghə a, nə pa' pɔmnəŋ lə bɑwə shəŋtə́ biŋ nwə yə e lə bɑwə gɔm a.