Read Ghomala New Testament LUKASI 2 Bible Online

LUKASI 2 - Ghomala New Testament bible

LUKASI 2

¹A lə́ pɑ̌ cwə o bɔ, Kasa Ogwisto ghɔm gɑ́ pu sɛ́ guŋ pɔ awɛ dəm sicǎ'.

²Yəŋ dəŋdzə nə́ sɛ pɔ lə́ bɑ́ cwə yə Kirinus lə́ bɑ́ gɔpna' Siria lə.

³Bǎ wɑ̌ lə́ pɑ́ gɔ la' pú, pú və tso tsyə́ nə ŋwa'nyə nə sɛ́ pɔ̀.

⁴A lə́ pɑ̌ po'o ba Yosɛp lu Nazarɛt, nthʉm guŋ Galilea, gɔ nthʉm guŋ Yudea, tisuŋ Bɛtəlehɛm pfəla' fo David, nə pa' e lə bɑ mo nə́ ŋkhədyə fo David a.

⁵Po'o gɑ pu sɛ́ wap pu Maria jwi e yə é lə́ bɑ́ m tsʉ̌m a, bvə mtso map nə ŋwa'nyə nə sɛ́ pɔ.

⁶Wap lə ko tsʉ'u, cwə yə Maria lə́ bɑ́wə gɔ tsə́ a ku'.

⁷E tsə́ mu mbɛ, thə́sə e. Dɑ mkam dzə́ nə dzʉmtə é, nuŋ é nthʉm kɔp ywətsʉ mnɔm, nə pa' tsʉ' lá tə́ jɑ dyə mghʉɔ bi pu pɑ́.

⁸Shɑ mghɛ pyapdzə́ lə́ bɑ́ kwɛ tsʉ'u, bɑ pé mtsʉ' bɑ́wə de dzə́ tsap.

⁹Wap lə nə yɔ aŋgəle ŋwak dzə̌ pú, ghu'tə Cyəpɔ ləŋnyə nə pu, wap pwɔk te' o, sə́ŋ.

¹⁰Aŋgəle ghɔm bi pu gɑ: Ka po pwɔk, gɑ̌ sɔ' siŋ wɔ cùŋ pɑpuŋ yə bǎ ya mo lə́ gɔ nə yu' pɑ ŋwɛnyə a.

¹¹A bɑ gɑ nthʉm tisuŋ fo David tyɛ' ɔ pu tsə́ gɛvɔk pɔ, yə e bɑ Kristo, bɑ Cyəpɔ a.

¹²Mtiŋ myə po gɔ ko nə zhyə e á bɑ́ gɑ́ po gɔ ko wə yɔ mubwǎ bɑ pu lə mkam dzə́ nə dzʉmtə é, nuŋ é nthʉm kɔp ywətsʉ mnɔm.

¹³Wap lə nə yɔ, vəŋ m aŋgəle sɔ' nthamtə nə aŋgəle bɔ pu a pu pɑ jwɔpshyə gamtə Si gɔm gɑ.

¹⁴Ghu'tə bi Si thə́ kɛbəŋ, byanyə pɑ dəmcǎ' bi pɔ pyə é ŋkhuŋ wap a.

¹⁵Cwə yə pɑ aŋgəle lə pɑnyə m kɛbəŋ á, mghɛ pyapdzə ghɔm cəcɑ̌ pu gɑ: Pɑ ghɔ tə ŋkhəm Bɛtəlehɛm, jɔ ywə yə a nthəm wə a, ywə yə Cyəpɔ gə gɑ́ pɑ zhyə a.

¹⁶Wap lə ŋkhʉdʉ̌ gɔ wə́, ŋkho jɔ Maria pu Yosɛp ba mú bɑ pu nuŋ é nthʉm kɔp ywətsʉ mnɔm.

¹⁷Wap lə yɔ e po'o, gɔm guŋ mnwə awɛ myə wap la' ju' nə mu bɔ a.

¹⁸Bǎ wɑlə yə e lə yu' nwə bɔ bi mghɛ pyapdzə́ a, a lə zhʉm é te'.

¹⁹Maria lwɔ' guŋ mnwə bɔ awɛ nthʉm tʉm e bɑ ŋkhamtə.

²⁰Mghɛ pyapdzə lə nə́ pɑnyə giŋ jwɔp nə ghu' Si nə pa' ywə yə wap jɔ biŋ ju' a pəmtə nə ywə yə pu lǎ' siŋ wap a.

²¹A lə nə́ kəm tyɛ'dzʉ hɔ̌m, tyɛ' nə vo mú; pu ké tso tsyə gɑ Yeso; tso tsyə aŋgəle lə ghɔm tə́ pu la' fəŋ mú bɔ a.

²²Dəŋ mtyɛ'dzʉ nə sɔk mviŋ nə pu lə nə́ ku', pa' a bɑ nə mco' Mosɛ a, Yosɛp pu Maria kwa é nə́ gɔ Yerusalɛm nə la'tə é bi Cyəpɔ.

²³Pa' a bɑ nə́ mco' Si bɑ pu və gɑ: Guŋ mthəsə po pɑ bɛ gɔ sɔ' pɑ́ bi Cyəpɔ!

²⁴Biŋ hɑ́ ywə yə mco' gɔm a nə nuŋpwɔ' bi Si; a pɑ pǒ msəŋgɔpfo pɑpʉə kɑ pǒ mzhwəkuku pɑpʉə lɑ.

²⁵A lə́ nə́ pɑ̌ po'o mu' mo pɑ́ Yerusalɛm, tso tsyə́ pɑ́ Simeon. E lə́ bɑ́ kwa' biŋ Si mkù', bɑ́ mo dəŋdəŋ, Zhwenyə Si pɑ nə é. E lə́ bɑ́wə byap gɑ Si gɔ sɔ' zhwyətə́ Israɛl.

²⁶Zhwenyə Dɔlɔ̌ lə́ bɑ ǎ ghə e zhyə gɑ́ e tə gɔ sɔ' pfʉ tə yɔ Kristo yə Cyəpɔ nthəm é a pɑ.

²⁷Zhwenyə Dɔlɔ̌ lə ghə e sɔ' Dyə Si tyɛ'dzʉ bɔ. Pa' tá Yeso pu map e lə lɑ̌ é sɔ' Dyə Si nə ghə ywə yə mco' gɔm nə e a.

²⁸E lə kwi é, go'tə Si, gɔm gɑ:

²⁹Cyəpɔ, bi a pɑ o tak ŋkwɔ o nəŋ cwəlɔ e ghɔ, pa' o lə ghɔm a nə hwitə.

³⁰Nə pa' mnyə́ mə̌ yɔ ywə vɔk.

³¹Ywə vɔk yə o nyaptə bi guŋ pɔ awɛ,

³²ŋkha' nə ŋkhyɛ' mgùŋ. Ghu'tə bi Israɛl pɔ pǔ.

³³Nwə lə zhʉ̌m ta Yeso pu map e nə mnwə myə pú lə bɑwə gɔm nə é a.

³⁴Simeon nyəŋ byanyə nə e, gɔm bi Maria map e gɑ: Shɑ pɔ gɔ sɔ' cyə m nə mu yə̌ŋ vʉtə sí, pyə shɑ pɔ cyə m nə é bvɔ̌k nthʉm guŋ Israɛl. E gɔ sɔ' pɑ mtiŋ fəŋnyə́ nwə.

³⁵Pɛ nyə́ gɔ sɔ' swɔp tʉm tsǔ m Maria. E gɔ sɔ' ghə gɑ́ guŋ mfʉ̀m myə pɔ jɔmyɔ̌m dʉm nthʉ́m tʉ́m pu a tə́m pu yɔ.

³⁶Mu' gɔ̀m ghɔm Si, mjwǐ, lə bɑ́ yə́ Dyə Si tyɛ'dzʉ bɔ. Tso tsyə́ pɑ́ Ana, mu Fanuɛl, nə gwya pɑ Asɛr. E lə́ bɑ́ gətso mjwǐ, bɑ e lə lɔmdyə, pu dhə e cwə da' gu' sɔmbʉə.

³⁷Dhə e pfʉ tə fɑ po'o e zhi pfɔ̌k. E lə nəŋ biŋ dɔmdyə. A lə́ bɑ ě ghə gu' shwɔppfʉə mgham hɔm, bɑ shwə pɑ Dyə Si. Bɑ fa' bi Si guŋ nthyatə ba m mɔkcʉ; bɑ shwə tə tsʉ̌ ywə nthʉm cwyɛ'nyə Si.

³⁸E lə ŋwak yə cwə o bɔ, go'tə Si, siŋ mcuŋ Yeso bi guŋ pɔ awɛ pyə wap lə bɑwə byap gɑ Si kwi Yerusalɛm a.

³⁹Yosɛp pu Maria lə miŋ guŋ ywə yə mco' Cyəpɔ lə yap gɑ́ pu ghə a awɛ, bɑnyə Nazarɛt nthʉm guŋ Galilea la' pu.

⁴⁰Mú pɑ ŋkwyə́, bɑ nthʉɔ, gə zhyənwə; gho' Si pɑ nə e.

⁴¹A lə́ bɑ́ nə guŋ mgu'dzʉ awɛ, ta Yeso pu map e pɑ gɔ Yerusalɛm nə́ ŋwɛnyə Paska.

⁴²Yeso lə ghə gu' shwɔppʉə mgham pu a pu pəmtə gɔ nə́ Paska pa' a lə bɑ́ nə mà á.

⁴³Paska lə mǐ, wap nə pɑnyə, Yeso mú səm wuŋ Yerusalɛm la' wap zhyə.

⁴⁴Wap kwɛ gɑ e m̀ dzə̀ pu a pyə shɑ pɔ̀. Wap lə ghiŋ ta' tyɛ'dzʉ, shəŋ e cəcɑ̌ mfɑ pap kəkɔ.

⁴⁵Wap lə pɑ tə yɔ é, bɑnyə Yerusalɛm nə cəŋ e.

⁴⁶Wap lə cəŋ é nə mtyɛ'dzʉ mɑntha, jɔ e Dyə Si, cəcɑ̌ pɑ la'tə ywə́ e pɑwə ju' ywə yə wap lə bɑwə gɔm a biŋ bɑwə həŋtə wap nwə nə́.

⁴⁷Bǎ wɑlə́ lə́ bɑwə nə yu' pa' e gɔm nwə á, a zhʉm é, nə tiŋ zhyənwə pu a mpʉɔnwə myə́.

⁴⁸Tap e pu map e lə́ nə yɔ é, nwə cyə wap, map e ghɔm gɑ: Yə o gə nə pyə po'o a bɑ kɑ? Pyə tɔ̌ bɑ́wə nə cəŋ o lam tsɔk pɑ́wə sɔ.

⁴⁹E ghɔm bi pu gɑ: Po shəŋ a gɑ kɑ? Po ka zhyə gɑ gɑ̌ gɔ pɑ́ pɑ́ pɑ́ ywə Tá a?

⁵⁰E lə ghɔm po'o la' wap yu' kwa' pɑpuŋ.

⁵¹Pu a pu lə pɑnyə Nazarɛt. E pɑ ju'shwə yap. Map e lwɔ' guŋ mnwə bɔ awɛ nthʉm tʉm e.

⁵²Yeso pɑ kwyə nə zhyənwə, nə gʉ̌', ba nə byanyə Si, dzə Si, ba m dzə pɔmnəŋ.