Read Ghomala New Testament LUKASI 20 Bible Online

LUKASI 20 - Ghomala New Testament bible

LUKASI 20

¹A lə pɑ nə mu' tyɛ'dzʉ nə mtyɛ'dzʉ myə e lə bɑwə ji'tə pɔmnəŋ ywə Dyə Si bɑ siŋ wap Cuŋ pɑpuŋ a, mtadyə mkamsi pu a pɑ zhyə mco', ba mghətso ŋwak.

²Gɔm bi e gɑ: Siŋ wɔk tʉɔ yə o nə gə mɔ mnwə a, kə mo yə e hɑ tʉɔ bɔ bu a lə.

³E ghɔm bi pu gɑ: Ba myə gɑ̌ gɔ həŋtə wɔ nwə:

⁴Po siŋ a: Kwǐshyə Yohane lə fɑ m kɛbəŋ kɑ bi pɔmnəŋ?

⁵Wap lə sɛ cəcɑ̌ pu gɑ: Pɑ ghɔm gɑ a lə fɑ m kɛbəŋ, bɑ e gɔ ghɔm gɑ: tə nwə kɑ bɑ po lě tə piŋ e?

⁶Pɑ nəŋ gɔm gɑ a lə fɑ m bi pɔmnəŋ, bɑ pu gɔ lɑ mwɔ' tamtə wɔk pɑ nə pa' a bɑ pu zhyə gɑ Yohane lə bɑ gɔm ghɔm Si.

⁷Wap lə pa' gɑ wap ka zhyə tsʉ yə a lə fɑ m nə a.

⁸Yeso piŋ gɔm yə́ bi pu gɑ: Bi a pɑ́ ba myə̀ lə siŋ wɔ tʉɔ yə gɑ̌ nə gə mnwə bɔ a.

⁹Yeso lə ghɔm po'o biŋ dɑ ghɔm tə tutə gɔm bi pɔmnəŋ gɑ: Mu' mo lə tsə̌ mthə nə nu' mlu' pe e, jo' bi pɑ nu' mlu', nthəm nthʉm guŋ gɔ m nə́ mu' tsʉ'.

¹⁰Cwə lə ku'u e təm mu' gɛfa' e bi pɑ nu' mlu' gɑ e ghɔ kwi ywə yə a nthəm pe a. Pɑ nu' mlu' lə ko shwɔ e, jəŋ e tə hɑ sɔmywə bi e.

¹¹E lə piŋ nthəm mu' gɛfa' e bi pu. Wap ko ŋkwi' shwɔ bɑ yʉ́, jəmtə e, jəŋ e tə hɑ sɔmywə bi e.

¹²E lə piŋ ŋkwi' nthəm mu' mo batə yɑtá, wap ko bo' fiŋ nə e, tə jəŋ e.

¹³Gɛ pě sɛ gɑ: Gɑ̌ gɔ ghə gɑ kɑ? Gɑ̌ gɔ təm mú a yə gɑ ŋkhuŋ e té' a; bǎ yʉ́, wap gɔ ko ghə mku' myə́.

¹⁴Da' gɑ pɑ nu' mlu' lə nə yɔ mú é sɛ cəcɑ̌ pu gɑ: E bɑ dzʉdyə̌; pɑ zhwə e, a tsə mcʉ́' cʉ́' tsɔk pɑ.

¹⁵Wap lə lɑ e nthəm pé cwəlɔ, jwə e. Gɛ pe gɔ po'o ghə m gɑ kɑ nə pú?

¹⁶E gɔ sɔ' sɔ' zhwətə pɑ nu' mlu' bɔ pyə a bɑ wap ka ku' nə sɔmywə a; hɑ pe bi shɑ pɔ. Wap lə nə yu' po'o gɔm gɑ: Bi a lə pɑ pa' a.

¹⁷Yeso lə lě wap dəŋdəŋ, həŋtə wap gɑ: Ghɔm tsɔ tsyə pu lə və nthʉm ŋwa'nyə Si a nthutə gɑ́ kɑ̀? Gwɔ' yə pɑ pəm pa' lə wa' a lě dí ji gwɔ' phə pa'.

¹⁸Bǎ ya mo lə yə e vʉ nə gwɔ' bɔ a, gɔ po'tə nɑ́ e, mo yə gwɔ' bɔ vʉ nə e a, a tsa'tə e.

¹⁹A lə pɑ po'o mtadyə mkamsi pu a pɑ zhyə́ mco' cəŋ nə ghəm e pɑ cwə o bɔ, da' gɑ biŋ bɑwə bwɔk pɔmnəŋ. Nə pa' a lə bɑ wap zhyə gɑ Yeso lə gɔm ghɔm tə tutə bɔ pɑ nə́ pú.

²⁰Wap lə to' nə na' Yeso, nthəm mjuŋ gɑ wap ghɔ dəŋtə e dɑ pɑ ghɔm tsyə nə gəm e, tə hɑ e bi pɑ sa' guŋ pu a bi gɔpna'.

²¹Wap lə ghɔ gɔm bi e gɑ: Ta pyə zhyə gɑ ghɔm tsǔ ba nwə yə o da'tə a bɑ dəŋdəŋ. O bɑ nyənyɔ nə guŋ pɔ awɛ. O da'tə məjyə Si nyənyɔ.

²²A po'o bi a pɑ pyə ma' shwɔp bi kasa kɑ gɛ̌?

²³Yeso lə zhyə yo' yə wap lə bɑ wap tʉ' nə e a gɔm bi pú gɑ: Po la'tə a bɛ ŋkhǎp. Wap la'tə e.

²⁴E həŋtə wap gɑ: Thə́ mo ba ywə bvəvə yə a nə a bɑ yə wɑ? Wap pa' gɑ yə kasa.

²⁵Yeso ghɔm bi pú gɑ: Po pa' ywə kasa bi kasa, ba' yə Si bi Si.

²⁶Wap lə yu' po'o la' wap zhyə nə lɑ ghɔm tsyə gəm e, nwə cyə wap, mshwə map cɑ.

²⁷Shɑ pɑ Sadukai, pɔ pyə wap gɔm gɑ nə yam nə vʉ̌ tə bɑ wə a pɑ lə sɔ' yap bəŋ Yeso nə həŋtə e shɑ mnwə.

²⁸Wap lə ghɔm bi e gɑ: Ta, Mosɛ lə və bi pyə gɑ. Mbɛ pɑ bɑ e ghə mumap e yə mbɛ bɑ e lɔmdyə̌, pfʉ tə tsə mú, e sɔk npfɔk e, pu e ghə yə gwya fɑ e bɔ.

²⁹A nəŋ bɑ po'o bɑ mu' mɑmjwi lə ghə pwabɛ sɔmbʉə. Dəŋdzə lɔmdyə pfʉ tə tsə́,

³⁰ba batə yɑpʉə

³¹batə yɑtá sɔk npfɔk; pɑ po'o nə pɔ sɔmbʉə; sɔm lə nə pfʉ dzə́ mú.

³²Mjwi ti pfʉ yə.

³³Wap nə́ miŋ həŋtə Yeso gɑ: A gɔ sɔ' pɑ́ nə tyɛ' nə yam nə vʉ̌ mjwǐ bɔ pɑ yə wɑ nə pú? Nə pa' guŋ yap sɔmbʉə lə lɔm e dyə.

³⁴Yeso ghɔm bi pu gɑ: Pɔ pyə wap bɑ m nə yəŋ wɔ dzʉ a, dɔmdyə.

³⁵Da' gɑ pɔ pyə wap bɑ wap ku'nyə nə sɔ' bɑ nə yə wɔ dzʉ yə a gɔ tə sɔ' a, piŋ pɑ ba m nə yam nə vʉ̌ a tə dɔmdyə pɑ.

³⁶Vʉ̌ tə jɑ nə pu pɑ, nə pa' wap bɑ wap cʉ' m pá' pɑ aŋgəle a, shʉ' po Si, pǒ nə yam nə vʉ̌.

³⁷Nə pa' mpfəsi gɔ sɔ' yam nə vʉ̌, nə pa' Mosɛ bɑ e le da'tə yá nə cwə cu' mghé mɔk tə khə tsʉ' yə e ŋkhe Cyəpɔ gɑ Si Abraham, Si Isak, Si Yakop a.

³⁸Si tə bɑ Si mpfə pɔ pɑ, e bɑ Si pɔmtʉɔ pyə wap bɑ pyə a.

³⁹Shɑ pɑ zhyə́ mco' ghɔm gɔm gɑ: Ta o ghɔm a puŋ

⁴⁰nə pa' wap la tə ku' nə piŋ həŋtə e sɔmywə a.

⁴¹Yeso lə kwi' gɔm bi pu gɑ: Pu gɔm gɑ Kristo bɑ mu David m gɑ kɑ?

⁴²Nə pa' ba David yə gɔm nthʉm ŋwa'nyə mzhwɔp gɑ: Cyəpɔ ghɔm bi Cyəpɔ a gɑ: Cwə nə ghəŋ pu tʉɔ a

⁴³tə gə o ghiŋ də̌m mghɛ bo pǔ.

⁴⁴David ŋkhe e gɑ Cyəpɔ e, e piŋ bɑ mú e m gɑ kɑ?

⁴⁵Yeso lə piŋ gɔm bi pɑkhʉ pyə dzə guŋ pɔ awɛ gɑ:

⁴⁶Po pɔm pɑ zhyə́ mco' pyə wap ŋkwa nsʉə dzə nə giŋ, bɑ shəŋ gɑ pu ca'tə wap dəm sim, ba ŋkho sinagogə shwə nə dəŋdzə kwɔ', biŋ bɑ tsʉ la'nwə shwə pɑ nə dəŋ dzə tsʉ' a.

⁴⁷Wap pyə wap mitə tsə mpfɔk ndyə map, biŋ bɑ gə msʉəsʉə mcwyɛ'nyə nə fʉtə wap a. Pu gɔ sɔ' nyəŋ shɛ yə ǎ cyə a thə' pú.