Read Ghomala New Testament LUKASI 21 Bible Online

LUKASI 21 - Ghomala New Testament bible

LUKASI 21

¹Yeso lə pʉ' mnyə, jɔ pɔ pyə wap lə bɑwə nyəŋ ywə nthʉm kak yə pu nyəŋ ywə nə́ fa' Dyə Si nə a.

²E lə yɔ bɑ mu' npfɔk mjwǐ sɔ' nyəŋ tsə bɛ pʉə nthʉm ó.

³E ghɔm gɑ: Kwa' nyənyɔ gɑ̌ siŋ wɔ gɑ bəŋ npfɔk mjwǐ yəŋ gɑ nyəŋ shyə guŋ pɔ awɛ.

⁴Nə pa' guŋ pɔ awɛ lɑ pɑ dzyak nə sɔ' hɑ, tə sɔ' m nə e, e ghɔ nə pəŋ é hɑ guŋ yə ywə yə e kɑ gɔ nə vɔk a.

⁵Shɑ́ pɔ lə pɑ gɔmnwə nə Dyə Si ba nə tsə mkwiŋ myə a lə bɑ nə Dyə Si a, mwɔ' pu a guŋ tsə tsyə pu lə hɑ Dyə Si a, Yeso ghɔm gɑ:

⁶Mtyɛ'dzʉ wə sɔ́', myə a gɔ ghɔ nə mwɔ' bǎ, sɔm lə piŋ shwə nə sɔm á, bɑ pu kwɔk ma'tə si awɛ.

⁷Wap həŋtə Yeso gɑ: Ta, a gɔ sɔ' pɑ po'o sǒ? Pu gɔ sɔ' lɑ kɑ nə zhyə mnwə bɔ̌?

⁸Yeso ghɔm bi pu gɑ: Po pɔmtə gɑ mo kɑ ghə po hɔjyə̀. Nə pa' pɔ tə jɔm gɔ sɔ' sɔ' nə tso tsɑ̌ piŋ pɑ ghɔm gɑ: A bɑ a, cwə̌ ghɔptə. Po pɔmtə nə cʉ́m jʉ̌m pú.

⁹Pɔ gɔ sɔ' yu' shu, pu piŋ bɑ gɔmnwɔ nə shu. Po kɑ pwɔk. A puŋ gɑ tsə bɔ təm awɛ. Da' gɑ a lə wuŋ bɑ nə miŋ.

¹⁰E lə piŋ gɔm bi pu gɑ: Mu' guŋ gɔ sɔ' lo' yə mu' guŋ; mu' nəfo pɑ do' yə mu' nəfo.

¹¹Ca' gɔ sɔ' pɑ cʉ'nyə po'o té', mu' bɔkbɔk gho pɑ gəm pɔmnəŋ jwətə wap, a kəya' vʉ nə shɑ mtsʉ'. Msya pu a shɑ mtiŋ təm kɛbəŋ.

¹²A gɔ sɔ' nə təm po'o, bɑ pu ghəm wɔ, pɑ́ lɑ wɔ yɔgo' sinagogə, nyəŋ wɔ dyəcɛ̌. Pɑ́ lɑ wɔ ghɔ dzə mfomfo pu a mgɔpna' nə tso tsɑ̌.

¹³A cyə m po'o po pɑ mghɛ kwinthɛ pɑ̌.

¹⁴Ka lam tsɔ́ sɔ́ nə ywə yə po gɔ sɔ' nə kwinthɛ a.

¹⁵Gɑ gɔ sɔ' hɑ ghɔm ba fʉ̌ yə bi a pɑ sɔm gɛ bo yɔ lə ghə ya a bi po.

¹⁶Mfɑ pɔ ba mso pɔ gɔ sɔ' pɑ tɛ́mnɛ́ mɔ, zhwə bo'gwyə pɔ cəcɑ̌ po.

¹⁷Guŋ pɔ awɛ gɔ sɔ' pɔ wɔ nə tso tsɑ̌.

¹⁸Da' gɑ sɔm ta' nəŋ thə́ yɔ lə pi pɑ.

¹⁹A gɔ sɔ' cyə m nə kaktʉɔ yɔ po vɔk tʉm tsɔ.

²⁰Cwə yə po gɔ sɔ' yɔ bɑ msəŋwi lɑ Yerusalɛm a, pɔ zhyə́ gɑ cwə ghəghʉɔ é ku'.

²¹A la' tə bɑ po'o, pɔ pyə wap Yudea a khʉ gɔ m dəm khuŋgɔ̌; pɔ pyə wap nthʉm tisuŋ a khʉ nthəm, ba pɔ pyə wap m go a kɑ pɑnyə tisuŋ.

²²Nə pa' a gɔ sɔ' pɑ tyɛ'dzʉ nə pa' bo, ywə yə pu lə və a, a pəmtə.

²³Ghəghʉɔ pɑjwǐ tsʉ̌m pu a mʉə po nə tyɛ' dzʉ bɔ, nə pa' mɑzhwiŋ gɔ sɔ' pɑ́ nthʉm guŋ, lúŋ Si yɛ nə pɔmnəŋ.

²⁴Pu pɑ dɑ mnyədwɔp pəpɛ gwatə wap, mguŋ mguŋ pɑ gəm wap nə gɔ gə mkwɔ pap, pɑ tə́ pɑ pɑ Yudea nəŋtə Yerusalɛm tə̌ yap cwədzʉ̌ kǔ'.

²⁵Mtiŋ təm nə nam, ba nə mɑŋwə́, ba m nə msɛ́, a piŋ bɑ dəm sicǎ' mguŋ pɑ jwiŋ. Lam tsap pɑ sɔ nə́ nə cu' shyə lɑpʉə ba fa é.

²⁶Pɔmnəŋ gɔ sɔ' pfʉ́ cwɔ', bɑ bwɔk ywə yə a gɔ cyə dəmca' a, nə pa' mtʉɔ kɛbəŋ gɔ sɔ' cʉ'nyə.

²⁷A gɔ pɑ cwə o bɔ pu yɔ Mú mo e sɔ' dəm mlwa nthʉm ghu'tə ba tʉɔ.

²⁸Cwə yə mnwə bɔ gɔ təm a, po tiŋnyə dəŋdəŋ, bʉ' mthə́ mɔ, nə pa' cwə nə vɔk wɔ ghɔptə.

²⁹Yeso ghɔ́m mu' ghɔm tə tutə bi pu gɑ: Po le thə́ nthɔmmthə pu a guŋ mthə́ awɛ tə jɔ.

³⁰Cwə yə po jɔ bɑ mhwə to' nə twɔp nə a po ghɔm gɑ cwədzʉ pɑpuŋ wə sɔ́'.

³¹A dəŋdəŋ po'o, po la' jɔ mnwə bɔ təm po zhyə gɑ Nəfo Si wə sɔ̌'.

³²Gɑ wə siŋ wɔ kwa' nyənyɔ: Pɔmnəŋ nə yəŋ wɔdzʉ́ tə gɔ sɔ' cyə tə mnwə bɔ sɔ́' pɑ.

³³Kɛbəŋ pu ca' gɔ sɔ' mi, da' gɑ́ mghɔm mə tə gɔ la' mi pɑ.

³⁴Po pɔmtə gɑ́ mlu' pu a ywətsǔ ba m nə zhwiŋ kɑ ghə tʉm tsɔ pwa. Bwɔk gɑ tyɛ'dzʉ bɔ kɑ sɔ' bvonyə́ wɔ vonyə.

³⁵A gɔ sɔ' vʉ dəm guŋ pɑ nthʉm dzʉ awɛ pa' ŋkhə vʉ́m a.

³⁶Ka po ti, po pɑ shwyɛ'nyə Si guŋ mcwə awɛ po'o gɑ e hɑ gu' bi po, po vɔk mnwə bɔ myə a gɔ sɔ' sɔ' a, tə ŋwak yɔ dzə Mú mo dəŋdəŋ.

³⁷Yeso lə jwɔk ji'tə pɔmnəŋ nwə Dyə Si, á cwə bɑ bwadzʉ̌ e ghɔ dəm kuŋ mthə olivə.

³⁸Guŋ pɔ awɛ piŋ bɑ sɔ' Dyə Si kwa' mɑmpʉm dzʉ bɑ ju' ywə yə e gɔm a.