Read Ghomala New Testament LUKASI 22 Bible Online

LUKASI 22 - Ghomala New Testament bible

LUKASI 22

¹Tyɛ'dzʉ ŋwɛnyə msɛ tə ŋkwɔ' msɛ yə pu ŋkhe gɑ paska a lə pɑ sɔ',

²mtadyə mkamsi pu a pɑ zhyə mco' pɑwə shəŋ pa' wap gɔ ghə tə zhwə Yeso a, nə pa' wap lə bɑwə bwɔk pɔmnəŋ.

³A lə pɑ po'o Sata ko nə Yuda Iskariɔt yə e lə bɑ mu' nə pɑkhʉ Yeso shwɔppʉə m gham a.

⁴E ghɔ pu a mtadyə mkamsi ba mtadyə səŋwi cɔm pa' wap gɔ ghə tə e hɑ Yeso bi pu a.

⁵Wap lə ŋwɛnyə, biŋ gɑ wap gɔ hɑ ŋkháp bi e.

⁶E lə piŋ cwəlɔ, bɑwə shəŋ kwa' pá' e gɔ nə hɑ Yeso bi pu tə pɔmnəŋ jyə a.

⁷Tyɛ'dzʉ msɛ tə kwɔ'msɛ, tyɛ'dzʉ yə pu lə bɑwə gɔ zhwə dzə́ nə paska a lə kú'.

⁸Yeso təm Pɛtrɔ pu Yohane gɔm bi pu gɑ: Po ghɔ nyaptə Paska pɑ tsʉ́.

⁹Wap həŋtə e gɑ: O shəŋ gɑ pyə nyaptə Paska tsʉ' kʉ́?

¹⁰E ghɔm bi pu gɑ: Po gɔ nə ko tisuŋ po a mu' mbɛ yu'tə bɑ e kwa ghʉɔ shyə. Po yap jʉm e po a pu ghɔ dyə tsʉ' yə e dɑ m nə a.

¹¹Po ghɔm bi gɛ dyə gɑ: Tá ghɔm gɑ: Twɔ'dyə̌ yə gɑ gɔ tsu paska nə pyə a pɑkhʉ pɑ̌ a hɑ?

¹²Bɛ bɔ gɔ la'tə wɔ twɔ'dyə̌ bɑ a cəŋtə gyɛ́'nyə m zhəŋ thə́ nə pa' e. A po nyaptə guŋ ywə awɛ tsʉ'u.

¹³Wap lə ghɔ̌ ŋkho jɔ guŋ ywə awɛ pɑ pa' e la' gɔm a. Wap nyaptə Paska.

¹⁴Cwə lə ku'u e cwə tɑpe pu a mghɛ nthəm pyə;

¹⁵e ghɔm bi pu gɑ: Tə zhyə dəŋ pa' gɑ sʉm gɑ́ pɑ pəmtə dzʉ Paska yəŋ gɑ tə ŋ jɔgo'.

¹⁶Nə pa' gɑ siŋ wɔ gɑ ŋ tə gɔ la' piŋ tsʉ yá pɑ tə a la' bəmtə nthʉm Nəfo Si.

¹⁷E lə kwi nthǔ' go'tə Si nə́ gɔm gɑ: Po kɑ gaptə cəcɑ̌ po.

¹⁸Gɑ̌ siŋ wɔ gɑ ŋ tə gɔ la' tə piŋ nwə mlu' nthɔm mthə pɑ tə kəm tyɛ'dzʉ yə Nəfo Si sɔ' a.

¹⁹E lə pe msɛ̌, go'tə Si, bo'tə, hɑ bi pu gɔm gɑ: Yəŋ bɑ nɑ́ a yə pu hɑ nə po a. Po ghə po'o nə ŋkhamtə a.

²⁰E lə kwi' gə po'o ba m nə nthǔ', cwə yə wap lə miŋ nə tsʉywə a, gɔm gɑ: Nthǔ' yəŋ gɑ bɑ kɔ sə́ nə mcyə mə̌, myə pu pfyə nə po a.

²¹Tə́ yɔ: Pǔ mo yə e hɑ́ a yəŋ tɑpe tsɔ'ɔ pyə e pɑwə bəmtə dzʉywətsʉ.

²²Nə pa' Mú mo gɔ pɑ pa' Si lə yap a; tə́ ghəghʉɔ bi mo yə e hɑ é a.

²³Pɑkhʉ pyə lə to' nə həŋtə cəcɑ̌ pu gɑ ya mo nə pu lə́ gɔ ghə po'o.

²⁴Wap lə pɑ̌ nthɛshwə cəcɑ̌ pu nə mo yə e gɔ pɑ mo gwyə́ cəcɑ̌ pu a.

²⁵Yeso ghɔm bi pu gɑ: Mfomfo sa' mguŋ map, pɑ́ cya pɑ gə pu ke wap gɑ pɔ pɑpuŋ.

²⁶Da' gɑ po tə bɑ yɔ m po'o pɑ: A puŋ gɑ Mo gwyə cəcɑ̌ po cwə nə tsʉ' mukhʉ̌, a gɛ sa' cwə nə tsʉ' gɛfa'.

²⁷A po'o mo gwyə pɑ́ pɑ mo yə e tɑpe a kɑ mo yə e dɑ ywə sɔ' tɑpe a? A tə bɑ mo yə e tɑpe a pǎ? Tə́ gɑ̌ bɑ cəcɑ̌ po bɑ́ pɑ gɛfa'.

²⁸Po bɑ́ pɔ pyə wap do' tə pwa jʉ̌m m̀ nthʉm go' a.

²⁹A gɔ cyə m po'o a hɑ Nəfo bi po dəŋdəŋ pa' Ta hɑ Nəfo bəm a.

³⁰Po'o gɑ po sɔ' nwə́ biŋ pfɑ tɑpe m̀ nthʉm Nəfo a. A jap wɔ nə mleŋfo shwɔppʉə mgham. Po pɑ sa' mtuŋdyə Israɛl shwɔppʉə mghǎm.

³¹Cyəpɔ ghɔm gɑ: Simon Simon, yɔ, sata wə shəŋ nə cʉ' o pa' pu shʉ' msɛ a.

³²Da' gɑ́ gɑ̌ cwyɛ'nyə Si nə thə́ o, po'o gɑ piŋnthʉm o kɑ mi. Tə́ sɔ́' m nə́ wə, cwə yə o gɔ sɔ' pɑnyə bəm a o pʉ' mfɑ pǔ.

³³Pɛtrɔ ghɔm bi e gɑ: Cyəpɔ gɑ wə byap tə bi a pu pəmtə gɔ dyəcɛ̌ kɑ nə́ pfʉ lə.

³⁴Yeso ghɔm bi é gɑ: Pɛtrɔ, gɑ siŋ o gɑ ko' gɔ cwə nə tuŋ tyɛ' ɔ bɑ o e da' ŋkhəŋnyə gɑ o ka zhyə a mcʉm mənthá.

³⁵Yeso lə piŋ gɔm bi pu gɑ: Cwə yə ŋ də təm wɔ po ghɔ tə lɑ petə́, tə́ lɑ pʉə, tə lɑ mthap a, ywə lə ko jak bi po a? Wap pa' gɑ gɛ̌.

³⁶E piŋ gɔm bi pu gɑ: Sɔ' m nə cwəlɔ, mo yə e ghə petə́ a lɑ, ba mo yə e ghə pʉə a e lɑ. A mo yə e ka ghə nyədwɔp a fiŋ dzə́ dəm e nə jo nyədwɔp.

³⁷Nə pa' gɑ wə siŋ wɔ gɑ ghɔm tsyə pu lə la' bvə gɑ: Pu lě sɛ́ é m cəcɑ̌ pɑ ghə nwə cwəpuŋ a gɔ pəmtə nə m. Nə pa' guŋ ywə yə a bɑwə de a gɔ pəmtə.

³⁸Pɑkhʉ pyə lə ghɔm bi e gɑ: Cyəpɔ mnyədwɔp mɔ gɑ mɑbʉə. E ghɔm bi pu gɑ: A ku'.

³⁹E lə təm pa' e ji nthəm a gɔ m kúŋ mthə olivə, pɑkhʉ pyə yap jʉm e.

⁴⁰Pu a pu lə kəm tsʉ'u, e ghɔm bi pu gɑ: Po cwyɛ'nyə Si gɑ po kɑ vʉ nə mləŋtə.

⁴¹E lə lu bəŋ pu, giŋ nthə pa' bi a pɑ mo ma' gwɔ' a vʉ nə a; ŋkham mkwi'tə myə́ si shwyɛ'nyə Si gɔm gɑ:

⁴²Ta, o kuŋ gɑ yəŋ gɑ nthǔ' kɑ cyə bəŋ m̀. Da' gɑ tə ywə yə myə̀ nə ŋkhuŋ a pɑ, ywə yə wə nə ŋkhuŋ a nə pəmtə́.

⁴³A lə pɑ po'o ta' aŋgəle fɑ kɛbəŋ, sɔ' bɑ bʉ' é,

⁴⁴e pɑ nyəŋ gʉ' nə mcwyɛ'nyə. Mtsi'nyə pɑ nthəm nə e pa' mcyə á, lə shʉmtə si.

⁴⁵E lə miŋ nə cwyɛ'nyə Si, dusi gɔ bəŋ pɑkhʉ pyə, nə sɔ' wap pɑwə di nthʉm zhwiŋ.

⁴⁶E ghɔm bi pu gɑ: Po wə di tsɔ! Po lusi shwyɛ'nyə Si gɑ po kɑ vʉ nə gʉ' mləŋtə.

⁴⁷E lə pɑ̌ gɔm po'o nə yɔ vəŋ pɔ ŋwak, mu' nə pɑkhʉ pyə shwɔppʉə mgham yə pu ŋkhe e gɑ Yuda a pɑ thə́dzə. E lə sɔ' bəŋ Yeso, nuŋ mgho' myə́.

⁴⁸Yeso ghɔm bi e gɑ: Yuda, o shyə m nə nə́ nùŋ mgho' tə́ hɑ Mú mo lə?

⁴⁹Pɔ pyə wap lə bɑ bəŋ Yeso a, lə yɔ ywə yə a lə bɑwə gɔ cyə a, həŋtə Yeso gɑ: Cyəpɔ, pyə lɑ mnyədwɔp mɔk do' a?

⁵⁰Mu' mo nə pu lɑ nyədwɔp e nɔk gɛfa' tadyə mkamsi, ja' təŋ e yə tʉɔ.

⁵¹Da' gɑ Yeso ghɔm gɔm gɑ: Po tak pa' a, e ghɔm po'o, sho' pu e nə təŋ gɛ a tʉɔ.

⁵²Yeso piŋ gɔm bi pɔ pyə wap lə sɔ' nə ghəm e a, pɑ mtadyə mkamsi, mtadyə pɑ pyap Dyə Si, ba mghətso Dyə Si gɑ: Pa' nə ghəm samshwə a po nə́ sɔ' dɑ mnyədwɔp pu a mwya!

⁵³Cwə yə ŋ də bɑ cəcɑ̌ po Dyə Si guŋ mtyɛ'dzʉ awɛ a, po lě tə yap pu nə m̀. Tə yəŋ bɑ yɔ cwə, gʉ' jʉ̌m.

⁵⁴Wap lə ghəm e, dɑ e gɔ dyə tadyə mkamsi. Pɛtrɔ pɑ jʉ̀m, tə́ na' bɑ gʉə sʉəsʉə.

⁵⁵Pa' pɔ bɔ lə su mɑ mɔk shwədyə̌ shwə bəŋ o a, Pɛtrɔ lə bɑ yə cəcɑ̌ pu bɑ e cwə.

⁵⁶Mú' mjwǐ gɛfa' lə lɑ sɛ mɔ̌k jɔ Pɛtrɔ, de é dəŋdəŋ gɔm gɑ: Ba pu mo yə gɑ nə kɑ bɑ.

⁵⁷Pɛtrɔ kəŋnyə gɔm gɑ: Mɑmjwi, ŋ khɑ zhyə́ e.

⁵⁸A lə nə cwə muywə mu' mo kwi' jɔ e gɔm gɑ: Ba wə o bɑ mo yap. Pɛtrɔ pa' gɑ a tə bɑ a pɑ́.

⁵⁹A lə nə cyə ta' nam mu' mo piŋ shəŋtə gɔm gɑ: Kwa' nyənyɔ pu mo yə gɑ nə kɑ bɑ; e nəŋ bɑ yə Galilea.

⁶⁰Pɛtrɔ lə pa' gɑ: Ŋ kha zhyə ywə yə o bɑwə shəŋ nə ghɔm a. Pɛtrɔ lə pɑ gɔm po'o ko' tuŋ

⁶¹Cyəpɔ fɛ nɑ e de Pɛtrɔ. Pɛtrɔ kamtə ghɔm tsyə Cyəpɔ la' gɔm bi e a gɑ: Ko' gɔ nə tuŋ tyɛ' ɔ bɑ o kəŋnyə a m cʉm ntha a.

⁶²E lə tə̌m dɑ mtso dɔ̌.

⁶³Pɔ pyə wap lə bɑwə byap Yeso a, lə yəmtə e, dɑ mshɔm shwɔ e.

⁶⁴Pa' a lə bɑ wap kwɑ mnyə myə́ a, wáp lə həŋtə e gɑ, wɑ̌ shwɔ o, tu e.

⁶⁵Wap lə lɑ mcap nthinthi nə shap e.

⁶⁶Dzʉ lə lɔ̌, mghətso Dyə Si pu a mtadyə mkamsi, pu a pɑ zhyə mco' cu'tə dɑ Yeso gɔ dzə cu'tə gwyə yə pu ŋkhe gɑ Sanedrɛŋ a.

⁶⁷Gɔm bi e gɑ: O pɑ Mesia o siŋ wɔk. E ghɔm bi pu gɑ: Siŋ wɔ́ bɑ po tə gɔ piŋ pɑ.

⁶⁸Bi a nəŋ həŋtə wɔ nwə bɑ po tə gɔ pa' pɑ.

⁶⁹Da' gɑ tə fə cwəlɔ, Mu mo gɔ cwə́ nə́ ghəŋ tʉɔ Si nthʉɔtʉɔ.

⁷⁰Guŋ yap awɛ ghɔm gɑ: Yəŋ gɑ́ la'tə gɑ o bɑ Mú Si. E ghɔm bi pu gɑ: Pɑ kwa' wɔ nə gɔm, gɑ̌ bɑ e.

⁷¹Wap piŋ gɔm gɑ: Pɑ biŋ bɑwə byap ya nthi nə ŋkwinthɛ? E ghɔmnwə tə pɑ nə́ŋ jú'.