Read Ghomala New Testament LUKASI 23 Bible Online

LUKASI 23 - Ghomala New Testament bible

LUKASI 23

¹Guŋ yap awɛ lə lusi cwəlɔ dɑ e gɔ dzə Pilato.

²Wáp lə pɑ bútə e bɑ gɔm gɑ: Pyə yɔ tambɛ yəŋ gɑ e pɑwə ma' paknyə nthʉm gùŋ, ŋkhəŋnyə gɑ pu kɑ ma' shwɔp, biŋ bɑwə gɔm gɑ e bɑ Mesia, bɑ fo.

³Pilato həŋtə e gɑ: O bɑ fo pɑ Yudea a? Yeso pa' bi e gɑ: Wə nə gɔm.

⁴Pilato ghɔm bi mkamsi gwyəgwyə, ba bi lǎ' gɑ: Ŋ kha yɔ ywə yə bi a pɑ pu nyəŋ shɛ thə bɛ yəŋ nə a.

⁵Wap piŋ shəŋtə gɔm gɑ: E bɑwə nthənyə pɔmnəŋ nə va' pu a nwə yə e bɑwə ji'tə wap Yudea a, tə ntho' fɑ Galilea ŋkhəm tsɔ'ɔ.

⁶Pilato lə yu' po'o həŋtə bi a bɛ bɔ lə bɑ yə Galilea.

⁷E lə yu' gɑ Yeso nthəm nə guŋ yə́ Herode nə sa'a, gɔm gɑ pu lɑ e nə gɔ jɔ Herode, nə pa' e lə bɑ Yerusalɛm nə tyɛ'dzʉ bɔ.

⁸Herode lə nə yɔ Yeso nwə puŋ é, nə pa' a lə bɑ e yu' pa' pu gɔm nwə nə Yeso a, bɑwə shəŋ nə yɔ e tə fɑ tə́ tyɛ̌', bɑwə ŋkwɛ gɑ e gɔ yɔ pa' e gə msya a.

⁹E lə həŋtə e mnwə jɔmyɔm da' gɑ la' Yeso pa' sɔm nwə bi e.

¹⁰Mkamsi gwyəgwyə pu a pɑ zhyə́ mco' pyə wap lə bɑ tsʉ'u a lə bɑwə shwɔp nthinthi mnwə nə Yeso.

¹¹Herode pu a msəŋwi pyə́ lə yəmtə́ é, biŋ shap e, ŋkwa dzə dəŋnyə ləŋnyə nə e, ba' e bi Pilato.

¹²Tyɛ'dzʉ bɔ, Herode pu Pilato pyə wap lə bɔnyə a pʉɔ shʉ' msó.

¹³Pilato lə ke mkamsi gwyəgwyə, ba mfomfo, ba pɔmnəŋ

¹⁴gɔm bi pu gɑ: Po lɑ bɛ yəŋ sɔ' jɔ a, gɔm gɑ e bɑwə fɛ pɔmnəŋ gɑ wap kɑ ghiŋ nə məjyə dəŋdəŋ; da' gɑ́ gɑ̌ təŋtə e nwə dzə po, la' jɔ ywə yə e hɔ nə́ mnwə myə po gɔm nə e a, tə bi a pɑ pu nyəŋ shɛ thə e a pɑ.

¹⁵Ba Herode ka yɔ sɔmywə yə e hɔ a, a ywə yə a gə tə e pa' e bi pɑ a. E ka ghə sɔmywə tə a pɑ́ pɑ nwə vʉ́.

¹⁶Gɑ gɔ ghə pu cwɔ e nthak e nə́ŋ.

¹⁷A lə bɑ mà gɑ e tak ta' gɛ cɛ̌ nəŋ nə tyɛ'dzʉ ŋwɛnyə.

¹⁸Wap lə cwé guŋ yap awɛ gɑ: Zhwə e, hɑ Barabas bi pyə.

¹⁹Barabas bɔ lə bɑ e lə zhwə̌ mo biŋ ma' paknyə tisuŋ, pu ghəm e nyəŋ cɛ́.

²⁰Pilato lə kwi' gɔm nwə bi pu nə nə tak Yeso nəŋ.

²¹Da' gɑ wap cu' gɑ: Kwě, kwé é thə bɛnyəpɛnyə.

²²E lə kwi' gɔm bi pu batə m cʉ̌m ntha gɑ: Bɛ yəŋ gɑ bɑ e hɔ kɑ? Ŋ khɑ yɔ sɔmywə yə e ghə tə a pɑ pɑ́ nwə vʉ a. Gɑ gɔ ghə pu cwɔ e, nthak e nəŋ.

²³Tə wap kwi' nthegʉ' gɔm pɑ gɑ, pu kwe e thə bɛnyəpɛnyə, gɔm po'o bɑ nə gɔ pɑ́ m dzə.

²⁴A pɑ́ po'o Pilato yap gɑ ywə yə wap wə həŋtə a gɔ pəmtə.

²⁵E lə tak mo yə pu lə nyəŋ e cɛ́ nə paknyə, ba nə zhwə mo a, yə wap lə bɑwə həŋtə́ á nə́ŋ; tə sɔ' m nə Yeso e hɑ e bi pu pa' wap lə bɑwə həŋtə́ á gɑ́ wap ghə nə é pa' wap yɔ a.

²⁶Wap lə pɑ dɑ e gɔ, gəm mu' Simon yə Kirena, e pɑ fɑ m gǒ jap bɛnyəpɛnyə Yeso dəm e gɑ e kwa nə jap jʉm e.

²⁷Pɔmnəŋ lə bɑ jʉm é tə jɔm té' o ba pɑjwǐ, wap lə ghiŋ bɑ dzɔp kəkɔp yap, bɑ dɔ̌ nə e.

²⁸Yeso fɛ nɑ e gɔm bi pu gɑ: Gogo Yerusalɛm ka po lɔ m nə́ m̀. Po lɔ m nə po, bɑ m nə́ pó pɔ́.

²⁹Nə pa' mtyɛ'dzʉ wə sɔ̌' yə pu gɔ ghɔm gɑ: Mpuŋtsé bɑ mkíŋ pɑ jwǐ, ba pyə wap ka tsə, wap lə nə́ŋ núŋ pó a.

³⁰Pu gɔ la' pɑ ghɔm bi m kǔŋgo gɑ, po vʉtə nə pyə. Piŋ ghɔm bi pǒ mkuŋgo gɑ: Po tʉ̌m wɔk.

³¹Nə pa' a bɑ bi a a pɑ po'o nə ta' thə hwǐ, bɑ a gɔ sɔ' pɑ nə ta' thə yə̌mtə m gɑ kɑ?

³²Pu lə lɑ̌ shɑ mghɛ ghə nwə cwəpuŋ pɑpʉə, nə gɔ nə zhwə wap pu a pu.

³³Wap lə ko nə tsʉ' yə pu ŋkhe gɑ kəlo' thə mo a. Wap kam e thə bɛnyəpɛnyə ba mghɛ ghə nwə cwəpuŋ pɑpʉə. Mu' ghəŋ pu tʉɔ, mu' ghəŋ pu kwyap.

³⁴Yeso lə ghɔm gɑ: Ta lɑ mhɔ map shwyɛ' wap nə pa' wap ka zhyə́ ywə yə wap bɑwə gə a. Wap lə ghɔ m̌ nə ghaptə mdzə́ myə́, nə nthamnthuŋ.

³⁵Pɔmnəŋ lə tiŋnyə bɑ jɔ: Mtadyə pɑ gwi é bɑ gɔm gɑ: E lě bvɔk shɑ pɔ, e vɔk nɑ e, a pɑ yə e bɑ Mesia, Si a, bɑ Si ci e a.

³⁶Msəŋwi lə yəmtə́ é yap, dɑ cɔk mlu' sɔ' bəŋ é hɑ bi é gɔm gɑ:

³⁷O pɑ fo pɑ Yudea o vɔk thə́ nɑ o.

³⁸Mu' ywə́ bvə və́ lə bɑ thə é bɑ pu və gɑ: E bɑ fo pɑ Yudea.

³⁹Mu' gə nwə cwəpuŋ yə pu lə kamtə wap pu a pu a lə yəmtə é yə́ gɑ: O tə bɑ Mesia a lə? Vɔk thə́ nɑ o, bɑ wɔk yɔk.

⁴⁰Da' gɑ yə mu' cɔk e gɔm gɑ: O tə bwɔk Si a, wə yə o bɑwə jɔgo' pɑ pa' yʉ́ a?

⁴¹Yɔk pu gǒ' bɑ ǎ ku' nə pu. Pu bɑwə ŋkwi pɑ mcwɔ'fa' mɔk pu. Tə sɔ' m nə é, a bɑ e ka hɔ sɔmywə.

⁴²E lə ghɔm bi Yeso gɑ: La' ŋkhamtə a nə tyɛ'dzʉ yə o gɔ sɔ' sɔ' pa' fo a.

⁴³Yeso pa' bi e gɑ: Kwa' nyənyɔ gɑ siŋ o gɑ tyɛ' ɔ, pu gɔ pɑ nthʉm Paradisi.

⁴⁴Mɔkcʉ́ lə kǔ' dzʉ̌ so nə guŋ mtsʉ' awɛ dəmcǎ' tə gɔ ŋkhəm nə m nam tá.

⁴⁵Nam lə pǐ. A pɑ po'o dzə́ nə sam Dyə Si sɔnyə dəŋdəŋ.

⁴⁶Yeso cwé tə thə́ gɔm gɑ: Tá a, gɑ̌ yap zhwenyə a nə bu mǔ. E lə ghɔm po'o pfʉ́.

⁴⁷Tadyə msəŋwi ŋkhə lə nə yɔ ywə yə a shyə a, gu'tə Si gɔm gɑ: kwa' nyənyɔ bɛ yəŋ kɑ bɑ mo dəŋdəŋ.

⁴⁸Guŋ pɔ awɛ pyə wap lə cu'tə bɑwə jɔ yəŋ nwə a, lə yɔ pa' a shyə a, bɑnyə bɑ dzɔp pu kəkɔp pu.

⁴⁹Guŋ pɔ pyə wap lə bɑ wap zhyə́ Yeso a lə tiŋnyə gʉə sʉəsʉə ba pɑjwǐ pyə wap lə bɑ jʉm é tə fɑ Galilea bɑ de.

⁵⁰A lə pɑ po'o mu' mo tso tsyə pɑ Yosɛp, bɑ mo cəcɑ̌ mghətso, bɑ mo pɑpuŋ, mo dəŋdəŋ sɔ́':

⁵¹Bɑ e la tə piŋ nwə mso pyə ba mfa' map. E lə bɑ yə Arimatea, tisuŋ pɑ Yudea. E lə bɑwə byap Nəfo Si.

⁵²Bɛ bɔ lə ghɔ jɔ Pilato həŋtə gɑ é hɑ pfə Yeso bi e.

⁵³E lə fi' é thə bɛnyəpɛnyə, dɑ mkam dzə dzʉmtə e jap e nthʉm sì bɑ pú təŋ yá nə wǔ gwɔ', bɑ pu la m nyəŋ sɔmmo nthʉm o.

⁵⁴Sabat lə bɑwə sɔ̌', a pɑ tyɛ'dzʉ nə nyaptə.

⁵⁵Pɑjwǐ pyə wap pu a Yeso lə bɑ tə fɑ Galilea lə yap jʉm Yosɛp; wap lə yɔ thəsì biŋ jɔ pa' pu lə yap pfə Yeso nthʉm o a.

⁵⁶Wap lə pɑnyə cwəlɔ, nyaptə mwɑ́ damnyəlamnyə; a pɑ Sabat, wap hwitə pa' mco' lə yap a.