Read Ghomala New Testament LUKASI 3 Bible Online

LUKASI 3 - Ghomala New Testament bible

LUKASI 3

¹Kasa Tibɛrə lə nə ghə gu' shwɔptɔ mghǎm dəm nəfo, cwə yə Pontio Pilato lə́ bɑ́ gɔpna' pɑ Yudea; cwə yə Herode lə́ bɑ́ fo Galilea; cwə yə Filipo fɑ Herode lə́ bɑ́ fo Trashonitə, cwə yə Lizanias lə́ bɑ́ fo Abilena a;

²gu' yə Ana pu Kaifa lə́ bɑ́ mtadyə mkamsi a. Ghɔm Si sɔ' bi Yohane mú Sakaria e pɑ ghakgo.

³E ghɔ nə mguŋ giŋnyə Yurdɛŋ bɑ shyanyə nwə nə kwishyə pʉɔtʉm, po'o gɑ si lɑ mhɔnwə mo nə shwyɛ' e.

⁴Dəŋdəŋ pa' a bɑ̀ pu və nthʉm ŋwa'nyə mghɔm Esaya gɔm ghɔ̀m Si gɑ: Gi mo ghakgo shwe gɔm gɑ: po nyaptə məjyə Cyəpɔ. Siŋ mpim jyə

⁵pú gɔ sɔ' lonyə msʉ̀m, sɛtə́ mkǔŋgó sʉəsʉə ba myə ŋkho'ŋkho', siŋ mtsìŋ a tiŋnyə, ghə mlo'mló' jyə sɛ́tə́.

⁶Guŋ pɔ awɛ yɔ ywə vɔk Si.

⁷Pɔmnəŋ lə sɔ' tə jɔm gɑ é nu' wap shyə. E pɑ́ gɔm bi pu gɑ: Gwya nɔk mtiŋ. Wɑ̌ da'tə́ wɔ nə ŋkhʉ yɛluŋ Si yə a wə sɔ' a?

⁸Po yam nthɔm myə a ku'nyə nə pɔ pyə wap pʉɔtʉm tsap a. Ka po pɑ́ gɔm pɑ́ gɑ́ pǒ bɑ́ po Abraham, gɑ̌ wə siŋ wɔ gɑ́ bi a pɑ́ Si lɑ mwɔ' mɔ nə gə po Abraham.

⁹Po zhyə gɑ́ jɔm é da' bɑ to mthə. Yə́ ta'thə yə a tə́ jam nthɔm pɑpuŋ a pɑ, pu gɔ ko' to mɔk.

¹⁰Pɔmnəŋ lə bɑ həŋtə Yohane gɑ: Pyə gɔ ghə m gɑ́ kɑ?

¹¹E ghɔm bi pu gɑ: Mo yə e ghə dzə́ yɑpʉə a e ghap hɑ́ yə mo yə e ka ghə ywə a. Mo yə e ghə ywətsʉ a ghə pɑ po'o.

¹²Shɑ mghɛ kwishwɔp lə sɔ'yap nə kwishyə gɔm bi e gɑ: Ta tə pyə gɔ ghə yɔk gɑ́ ka?

¹³E ghɔm bi pu gɑ: Ka po kwi' dəŋ ywə yə pu gɑ po kwi a.

¹⁴Msə̌ŋwi lə həŋtə e yap gɑ: Pyə gɔ ghə yɔk gɑ ka? E ghɔm bi pu gɑ: Ka po hya mo, kɑ nə fʉtə é lɑ. Po wuŋ yo da' nə dəŋ ŋkhap fa' yɔ.

¹⁵A lə́ bɑ́ cwə o bɔ guŋ pɔmnəŋ awɛ pɑwə byap Kristo. Pu zhi nə pɑ həŋtə gɑ́ jyə gɑ Yohane tə bɑ́ Kristo a kilɑ́?

¹⁶Tə́ Yohane pɑ ba' bi guŋ pɔ awɛ gɑ: Ŋ gɑ̌ bɑwə nu' wɔ pɑ shyə; Mu'mo jʉ̌m m̀ bɑwə sɔ̌', bɑ e tʉɔ shyə a, bɑ ŋ kha ku'nyə nə kyɛ' ŋkhə mthap myə́. E gɔ sɔ' pɑ nu' wɔ nthʉm Zhwenyə Dɔlɔ̌ pu mɔk.

¹⁷A bɑ ě wim ywə nə nthya pu é. E gɔ tya mduŋ tsə́ pɑpuŋ nyəŋ ŋkhiŋ. A cʉ' mgha' tsə e su mɔk tə la' bi nə́.

¹⁸Yohane lə lɑ̌ nthinthi mghɔm sə́sò nə siŋ Cùŋ pɑpuŋ bi pɔmnəŋ.

¹⁹A lə pɑ̌ po'o fo Herode yə Yohane lə bɑwə shɔk e, bɑ e té Herodia jwi fɑ́ e nə gə jwǐ e, ba nə shɑ́ mbɔkbɔk nwə tə a yɔm a

²⁰nə miŋ ma'nə, gəm Yohane nyəŋ e dyəcɛ̌.

²¹Pa' guŋ pɔmnəŋ awɛ lə pɑ̌ ŋkwishyə á, ba Yeso lə kwi yə shyə tə bɑ́ shwyɛ'nyə Si,

²²kɛbəŋ ghyɛ' Zhwenyə Dɔlɔ̌ fi' sɔ' nə e pa' səŋgɔp fo a: Pu yu' gi mo fɑ kɛbəŋ gɔm gɑ: O bɑ mú a yə gɑ ŋkhuŋ e te' a, gɑ cwɔ' o tyɛ' ɔ.

²³Yeso lə nə to' fa' bɑ é ghə gu' mghǎm nthá. E lə bɑ mu Yosɛp pa' pu lə ŋkwɛ á, mu Heli

²⁴mú Mata, mú Levi, mú Meleki, mú Yanái, mú Yosɛp,

²⁵mú Matatias, mú Amɔs, mú Naum, mú Esli, mú Nagai,

²⁶mú Maat, mú Matatias, mu Semei, mu Yosɛk, mú Yoda,

²⁷mú Yohanan, mú Resa, mú Zorobabɛl, mú Salatiɛl, mú Neris

²⁸mú Meleki, mú Addi, mú Kosam, mú Elmadam, mú Er

²⁹mú Yeso, mú Eliezer, mú Yorim, mú Mata, mú Levi

³⁰mú Simeon, mú Yuda, mú Yosɛp, mú Yonam, mú Eliakim,

³¹mú Melea, mú Meŋna, mú Matata, mú Natam, mú David,

³²mú Esaya, mú Yɔbɛd, mú Boos, mú Sala, mú Naasɔm,

³³mú Aminadab, mú Admiŋ, mú Arni, mú Esrom, mú Farɛs, mú Yuda

³⁴mú Yakop, mú Isak, mú Abraham, mú Tara, mú Nakor,

³⁵mú Seruk, mú Rago, mú Falek, mú Ebɛr, mú Sala,

³⁶mú Kainam, mú Arfatsad, mú Sem, mú Noe, mú Lamek

³⁷mú Matusala, mú Enɔk, mú Yaret, mú Malelɛl, mú Kainam

³⁸Enɔs, mú Sɛt, mú Adam, mú Si.