Read Ghomala New Testament LUKASI 4 Bible Online

LUKASI 4 - Ghomala New Testament bible

LUKASI 4

¹Yeso lə nə́ fɑ Yurdɛŋ bɑ Zhwenyə Dɔlɔ̌ ló nə é. Zhwenyə bɔ lə lɑ́ é gɔ ghakgo

²Sata ləŋtə é nə tyɛ'dzʉ mghappfʉə. E lə cwə nə mtyɛ'dzʉ bɔ tə tsʉ sɔmywə. Cwə lə cyə̌, jikǔ' yɛ e.

³A pɑ́ po'o Sata ghɔm bi é gɑ: O pɑ Mú Si, o ghɔm gɑ́ gwɔ' yəŋ gɑ pʉɔ ji msɛ o tsʉ.

⁴Yeso pa' bi é gɑ: A bɑ pu və gɑ: Mo tə́ bvɔk da' nə msɛ́ pɑ́.

⁵Sata ka' é thə́, guŋ da'tə é guŋ nəfo dəmca' awɛ, gɔm bi e gɑ:

⁶Gɑ̌ gɔ hɑ guŋ nə́ sa' ba ghú'tə nə nəfo tsɔ bu. Nə pa' bɑ pu lě hɑ bəm, bɑ́ hɑ bi mo yə gɑ̌ kuŋ a.

⁷O kam mkwitə mǔ dzə̌ m̀ gamtə a, bɑ a gɔ cʉ' tsǔ.

⁸Yeso pa' bi e gɑ: A bɑ pú lé bvə gɑ: O gɔ pɑ ghamtə da' Cyəpɔ Si o, pɑ fa' da' bi e.

⁹Sata lɑ e gɔ Yerusalɛm; jap e dò Dyə Si, gɔm bi e gɑ: O pɑ Mú Si, o léŋ tsa' a shʉm si

¹⁰nə pa' a bɑ pu və gɑ: E gɔ pɑ ghɔm bi pɑ aŋgəle pyə́, wap pɑ byap o,

¹¹bɑ ŋkwa o nə bu map, bwɔk gɑ o kɑ cwɔ'kwə o nə gwɔ̀'.

¹²Yeso pa' bi e gɑ: Pu gɔm gɑ o kɑ ləŋtə Cyəpɔ Si o.

¹³Sata lə lɑ̌ guŋ nthinthi mləŋtə awɛ dəŋtə é tə a mi, e lu bəŋ e gɔ̌ tə́ ŋkhəm cwə yə pu lə yap a.

¹⁴Gʉ' Zhwenyə Dɔlɔ̌ lə lǒ nə Yeso. E pɑnyə Galilea. Dəŋ e sɛ nə guŋ mtsʉ' awɛ.

¹⁵E pɑ ji'tə pɔ dyə́ sinagogə. Pu pɑ gu'tə é nə guŋ mtsʉ' awɛ.

¹⁶E lə ghɔ Nazarɛt, tsʉ' yə e lə kwyə̌ nə a. A pɑ tyɛ' Sabat, e ko sinagogə pa' a lə bɑ́ mɑ̀ bi a. E lə lǔsi nə̌ ke ŋwa'nyə.

¹⁷Pu hɑ ŋwa'nyə gɔm ghɔm Si Esaya bi e. E kyɛ', jɔ tsʉ' yə a lə́ bɑ pu və gɑ:

¹⁸Zhwenyə Cyəpɔ bɑ nə m. A bɑ e cwɔ' a gɑ gɔ shwi ŋkhʉɔ pɑpuŋ bi mpə̌ŋ. E nthəm a gɑ siŋ mkwɔ̀ gɑ wap tə yɑ mkwɔ́ pɑ́. Mfʉ yɔ tsʉ', pɔ pyə pu hya wap a, wap lusi,

¹⁹gɔm nwə gʉ' cɔmmtso Cyəpɔ.

²⁰E lə pǔ ŋwa'nyə hɑ bi gɛfa' sinagogə, shwə́si cwəlɔ. Guŋ pɔ pyə wap lə bɑ sinagogə á pʉ' mnyə map nthʉ nə é.

²¹A pɑ po'o e ghɔm bi pu gɑ. Ghɔm tsɔ tsyə́ po du m̌ sí nə́ yu' nthʉ́m ŋwa'nyə a pəmtə tyɛ' ɔ.

²²Guŋ yap awɛ pɑ gɔm pɑpuŋ nə e. A pɑ po'o nwə cyə wap nə́ nthi mghɔm gho' myə a lə́ bɑ́wə nthəm shwə é a. Wap pɑ gɔm gɑ: E tə bɑ mú Yosɛp a lə́?

²³Yeso ghɔm bi pu gɑ: Po gɔ ghɔm kwa' ghɔ̀m tə tutə tsyə a bɑ gɑ: Gəgɛ pá nɑ o á, bəm. Po gɔ ghɔm bə̀m gɑ: Ghə ywə yə pyə ju' gɑ ǒ ghə Kapɛrnaum á tsɔ'ɔ, gǔŋ po.

²⁴Tə gɑ̌ gɔ siŋ wɔ kwa' nyənyɔ gɑ pu tə biŋ sɔm gɔm ghɔm Si guŋ pu pɑ.

²⁵Gɑ̌ siŋ wɔ kwa' nyənyɔ gɑ, nə dzʉ gu' tá mŋwə nthɔk nə cwə Elia, yə bəŋ lə cyətə lú nthʉm guŋ Israɛl, jiku'u yɛ́ nə́ guŋ dəmca' awɛ a, mpfɔk pɑ jwi lə́ bɑ́ nthʉm guŋ Israɛl tə jɔm

²⁶da' gɑ pu la tə́ təm Elia ywə sɔmmo nə pu tə ne ywə pfɔk mjwǐ yə Sarɛpta, nthʉm guŋ Sidon.

²⁷Ba m nə́ cwə Elize, gɔm ghɔm Si, mghɛ ka'pap lə bɑ nthʉm guŋ Israɛl tə jɔm. Tə́ sɔm la tə́ yɛ̌ tə ně da' Naaman yə Siria.

²⁸Wap lə yu' po'o luŋ guŋ yap awɛ sə́ sinagogə,

²⁹wap lusi, jəŋ e nə nthəm tisuŋ tə khəm shyə́ ŋkhuŋ nə kə̌ŋ yə a lə bɑ wap kwɑ tisuŋ yap nə a, bɑ gɔ kwɔk e ma' kʉm.

³⁰Tə e cyə cəcɑ̌ pu, gɔ tsyə́.

³¹Yeso lə tsə̌ŋ gɔ Kapɛrnaum, tisuŋ Galilea bɑ ji'tə pɔmnəŋ tyɛ' Sabat.

³²Nwə yə e lə bɑwə gɔm a pɑ ŋkhonyə pɔmnəŋ nə pa' e lə nə ghɔm nyəŋ dəŋ nə́.

³³Mu' mbɛ lə bɑ sinagogə bɔ, zhwenyə cwəpuŋ pɑ nə e. E cwé tə́ thə́ gɔm gɑ:

³⁴Wɛ̌, o ŋkwi kʉ̌, Yeso yə Nazarɛt? O sɔ' pɑ m nə ghə gɑ pyə pi a? Gɑ̌ zhyə mo yə o bɑ e a. O bɑ Dɔlɔ̌ Si.

³⁵Yeso paptə e gɔm gɑ: Lɛtə! Təm nə bɛ yə̌ŋ! Zhwenyə bɔ ma' bɛ bɔ si cəcɑ̌ pɔmnəŋ. Nthəm nə é, tə ghə sɔmywə nə é.

³⁶Nwə cyə wap awɛ. Wap pɑ gɔm cəcɑ̌ pu gɑ: Yɔ mu' nthi ghɔm. E dɑ tʉɔ ba gʉ' e nɔ́ mzhwenyə cwəpuŋ. Wap təm nə pɔmnəŋ.

³⁷Pu pɑ gɔm nwə nə Yeso geŋnyə tsʉ'u awɛ.

³⁸E lə təm sinagogə bɔ, gɔ dyə́ Simon. Mhwi lə́ bɑ́wə səŋ ma jwi Simon tə' o. Pu cwyɛ'nyə Yeso gɑ e kwitə e.

³⁹E pɔ nɑ e nə é, baptə mhwi, mhwi təm nə e. E lusi pɑ cwə o bɔ ntho' nə fa' bi pu.

⁴⁰Nam lə cwə tə bi, guŋ pɔ awɛ pɑ́ dɑ nthinthi mghɛ gho sɔ' bi é, e pɑ jap bu bǎ nə ya lə, jɛ wap.

⁴¹Zhwenyə cwəpuŋ pɑ nə təm nə bo'gwyə pɔ, lə́ bɑ shwé gɑ: O bɑ Mú Si. Yeso pɑ baptə wap, e lə piŋ gɑ́ wap ghɔmnwə, nə pa' a lə́ bɑ́ wap zhyə gɑ e bɑ Kristo.

⁴²Dzʉ lə nə lɔ, e təm gɔ m ghakgo. Pɔmnəŋ cə́ŋ é tə jɔ é. Shəŋ nə ghə gɑ e kɑ piŋ gɔ mu' tsʉ'.

⁴³E ghɔm bi pu gɑ: A shəŋ gɑ gɔ siŋ Cuŋ pɑpuŋ nə́ Nəfo Si bi pyə shɑ́ mtisuŋ yap, nə pa' a bɑ ywə yə pu lə təm a nə́ a.

⁴⁴E lə́ pǐŋ bɑ́ gɔm nwə Si nə msinagogə Yudea.