Read Ghomala New Testament LUKASI 5 Bible Online

LUKASI 5 - Ghomala New Testament bible

LUKASI 5

¹Yeso lə pɑ bəŋ mʉ'nyə Genezarɛt mu' tyɛ'dzʉ́, pɔmnəŋ pɑ bəŋ e tə jɔm bɑwə nthənyə nə yu' Ghɔm Si.

²E yɔ pɛ̌ yɑpʉə bəŋ mʉ'nyə bɑ mghɛ pɛ fi'si bɑwə sɔk mnthənthɔm bapgu map.

³E ko nə yə́ pɛ pɑ Simon. Gɔm bi e gɑ e na' dɑ pɛ bɔ gɔ dəm shyə. E nə gɔ dəm shyə, e cwə nthʉm o bɑ ji'tə́ pɔmnəŋ.

⁴E lə miŋ nə ghɔmnwə, gɔm bi Simon gɑ: Ghɔ tə cəcɑ́ shyə ma' mnthənthɔm mɔ shyə nə gəm bapgu.

⁵Simon ghɔm bi e gɑ: Ta pyə ti pɑ nə yɔgǒ', la' pyə ghəm sɔmywə. Tə́ shyə m nə ghɔm tsǔ, gɑ gɔ ma' mnthənthɔm shyə.

⁶Wap lə ma' mnthənthɔm shyə. A ghəm bapgu tə ŋkhitə́.

⁷Wap ghə mtiŋ bi pyə shɑ mso pap pyə wáp lə bɑ nthʉm yə mu' pɛ a gɑ́ wap sɔ' ŋkwitə wap. Wap lə́ sɔ̌' pu a pu nyəŋ bapgu tə mpɛ map mɑbʉə lo, tə bɑ́ gɔ nuŋtə m shyə.

⁸Simon Pɛtrɔ lə́ nə yɔ̌ po'o, bvʉ nə mkwə Yeso, gɔm bi e gɑ: Cyəpɔ gɑ bɑ gɛ mhɔ lu bəŋ m̀.

⁹Nə pa' lam tsyə lə bɑ ǎ sɔ, ba tsyə pyə shɑ pɔ pyə pu a pu lə́ bɑ́ a, shyə m nə dəŋ bapgu yə wap lə ghəm a.

¹⁰Ba tsyə lam Yakop, bɑ Yohane, pǒ Zebede msǒ Simon lə sɔ. Yeso ghɔm bi Simon gɑ: Ka lam tsu sɔ, tə fɑ́ cwəlɔ, o gɔ pɑ ghəm pɑ pɔmnəŋ.

¹¹Wap lə fəŋ mpɛ map gɔ tə ŋkho kəŋ shyə, nthak guŋ potsə awɛ tsʉ'u, ntham jʉm é.

¹²Yeso lə ko nthʉm mu' tisuŋ, mu' gɛ ka'pap yɔ e, nuŋ dzə e shwyɛ'nyə e gɑ: Cyəpɔ, o kuŋ bɑ o gɔ lɔnyə a.

¹³Yeso nya pu e, ŋkwak e, gɔm gɑ: Gɑ kuŋ; lɔ́. Ka'pap wuŋ nthəm nə é.

¹⁴Yeso ghɔm bi é gɑ: Pɔm tə siŋ sɔmmo, ghɔ da'tə nɑ o bi mkamsi biŋ hɑ ywə yə Mosɛ lə́ və gɑ mo yə ka'pap yɛ nə é a hɑ a, wap nə jyə́ nyənyɔ gɑ ǒ yɛ.

¹⁵Pɔmnəŋ lə pɑ gɔm nwə nə tsǒ Yeso nə gɔ dzə̀. Vəŋ pɔ sɔ' nə́ yu' ywə yə é lə́ bɑwə gɔm a, ba m gɑ́ e yɛ́ wap.

¹⁶E lə lu gɔ ghakgo shwyɛ'nyə Si.

¹⁷A lə pɑ mu' tyɛ'dzʉ, Yeso pɑ ji'tə pɔmnəŋ. Pɑ Farisai, pu a mtadyə pɑ zhyə mco' pyə gwyə́gwyə́ pɑ yap sí bɑ wap fɑ́ nə guŋ mlǎ' Galilea, Yudea, ba m Yerusalɛm. Tʉɔ Cyəpɔ lə́ bɑwə bɑ nə e, gə e yɛ́ mgho.

¹⁸Shɑ pɔ lə sɔ̌', bɑ wap kwa mo, e pɑ gɛ po'tə nɑ́. Wap pɑwə shəŋ gɑ Yeso yɔ e.

¹⁹Wap lə cəŋ jyə nə dɑ e shyə tɑ ŋkhə́m bəŋ Yeso kəkɔ, bɑ pɔmnəŋ jɔm yɔm. Wap lɑ e shyə m do pa'. Ntwɔk e shya dyə pu a kodyə e cəcɑ̌ pɔmnəŋ dzə Yeso.

²⁰Yeso yɔ piŋnthʉm yap, gɔm bi bɛ bɔ gɑ: Pu lɑ mhɔnwə mǔ shwyɛ' o.

²¹Pɑ zhyə́ mco' pu a pɑ Farisai pyə wap lə bɑ si a pɑ gɔm cəcɑ̌ pu gɑ: Yəŋ bɑ ya nthi mo yə e jəmtə si po' a. Wɑ yə bi a pɑ́ e lɑ mhɔnwə mo shwyɛ' e tə ně da' Si?

²²Yeso zhyə pa' wap wə ŋkwɛnyə a, gɔm bi pu gɑ: Nwə kɑ́ po ghə yɑ nthi kwɛnyə nthʉm tʉm pǒ?

²³A ghɔ nə nə́ ghɔm gɑ: Pu lɑ mhɔnwə mǔ nə shwyɛ' o, pu nə ghɔm gɑ: Lusi gǐŋ, bɑ yá yɛ̀?

²⁴Po'o tə po nʉ jyə gɑ́ Mú mo bɑ ě ghə tʉɔ nə dɑ mhɔnwə pɔmnəŋ nthʉm dzʉ́ shwyɛ' wap. E ghɔm po'o gɔm bi bɛ bɔ gɑ: Gɑ̌ ghɔm bu: lusi ŋkwa kodyə o, bɑnyə dyə́ o.

²⁵E lə wuŋ dusi pɑ cwə o cwə o, dzə̌ pu, ŋkwa kodyə yə pu la' nə ŋkwa e a, giŋ gamtə Si bɑnyə dyə e.

²⁶Nwə cyə guŋ pɔmnəŋ awɛ. Wap pɑ gamtə Si; bɑ bwɔk, lə bɑ gɔm gɑ. Pyə yɔ msya tyɛ' ɔ.

²⁷Yeso lə tə̌m, ŋkho jɔ mu' gɛ kwishwɔp tso tsyə pɑ Levi, bɑ e cwə dyə shwɔ̀p. Yeso ghɔm bi e gɑ: Yap jʉ̌m m̀.

²⁸E tak guŋ potsə tsyə awɛ nəŋ jap jʉm e.

²⁹Levi lə lɑ̌ Yeso gɔ la' e pu a pú ŋwɛnyə, pu a pyə shɑ vəŋ mghɛ kwishwɔp, ba shɑ pɔ lə pɑ dzʉ̌ywə

³⁰pɑ Farisai pu a pɑ zhyə mco' pɑ ŋkhunyə nthuŋ pú; gɔm bi pɑkhʉ Yeso gɑ: Nwə kɑ́ pu a mghɛ kwishwɔp pu a pɔ cwəpuŋ pɑ bəmtə dzʉywə biŋ nwə ba m lǔ'?

³¹Yeso ghɔm bi pu gɑ: Pɑ nɑ́ nthʉɔ tə shəŋ gəgɛ pɑ. Mghɛ gho nə shəŋ gəgɛ.

³²Ŋ da tə́ sɔ' ghɔm gɑ pɔ nyənyɔ pʉɔtʉm tsap pɑ, dɑ sɔ' ghɔm gɑ mghɛ mhɔ pʉɔtʉm tsap.

³³Wap ghɔm bi Yeso gɑ: Pɑkhʉ̌ Yohane, ba pyə pɑ Farisai shwə tə tsʉ̌ywə, bɑ́ shwyɛ'nyə Si. Pú pɑkhʉ̌ pɑ́ dzʉ tsap pɑ́ ywə lə́ nwə mlu'.

³⁴Yeso pa' bi pu gɑ: Bi a pɑ́ po ghə gɑ mso tajwigʉɔ cwə́ tə tsʉywə nə́ cwə yə tajwigʉɔ cəcɑ̌ pu a?

³⁵Mtyɛ'dzʉ wə sɔ̌' yə pú gɔ kwi tajwigʉɔ bi pu a. A gɔ pɑ nə mtyɛ'dzʉ bɔ, wap cwə tə tsʉ̌ywə.

³⁶E lə́ kwi' gɔm bi pú nə ghɔm tə tutə gɑ: Pɑ sɔmmo lə hʉə pakdzə́ nə dzə́ sə́ nə ntham yə bvo; bɑ a tə gɔ hwənyə pɑ́, piŋ kitə.

³⁷Sɔmmo tə nyəŋ mlu' sə́ nthʉm bvo nthǔ' pɑ; tak po'o bɑ mlu' sə́ gɔ sɔ bvo nthǔ', pfyə e sɔm nthu'.

³⁸Pu nyəŋ mlu' sə nthʉm nthu' sə.

³⁹Sɔmmo tə nwə́ bvo mlu' biŋ nwə́ mlu' sə́ pɑ́. E gɔm pɑ́ gɑ bvo mlu' bɑ ǎ puŋ.