Read Ghomala New Testament LUKASI 6 Bible Online

LUKASI 6 - Ghomala New Testament bible

LUKASI 6

¹A lə pɑ̌ mu' tyɛ'dzʉ Sabat, Yeso pu a pɑkhʉ pyə pɑ́ shyə nə mu' pé msɛtʉɔ, pɑkhʉ̌ pyə po' mcɛ̌ msɛtʉɔ, si'nyə pu pú pfɑ.

²Shɑ pɑ Farisai ghɔm bi pu gɑ: Nwə kɑ́ po ghə ywə yə a bɑ pu ka piŋ nə ghə tyɛ'dzʉ Sabat a?

³Yeso pa' bi pu gɑ: Po la m ŋkhe ywə yə jikǔ' lə yɛ David pu a pɔ pyə́ pu a pu lə́ bɑ́ a, e ghə a?

⁴Pa' e lə ko dyə Si, be msɛ myə pu hɑ nə nə gamtə Si a pfɑ, biŋ hɑ myə́ pɔ pyə pu a pu lə bɑ a? A nə pɑ po'o da' mkamsi nə pɑ pfɑ a?

⁵Yeso lə kwi' gɔm bi pu gɑ: Mú mo bɑ Ta Sabat.

⁶A lə kwi' bɑ mu' tyɛ'dzʉ Sabat Yeso ko sinagogə, bɑ́ ji'tə pɔmnəŋ ywə. Mu' mo pɑ sinagogə bɔ bɑ pu tʉɔ e cwyəm,

⁷pɑ Farisai pu a pɑ zhyə mco' pɑ́wə byap nə yɔ bya Yeso gɔ yɛ mo bɔ tyɛ'dzʉ Sabat a; wap ho ywə nə nthé bya nə é.

⁸Yeso zhyə mkwɛnyə map; gɔm bi mo bɔ gɑ: Lusi nthiŋnyə tùŋ; e lusi nthiŋnyə thə́.

⁹Yeso ghɔm bi pu gɑ: Pu bíŋ tyɛ'dzʉ Sabat nə ghə nwə pɑpuŋ kɑ nə ghə nwə cwəpuŋ? Nə vɔk mo kɑ nə zhwə mo?

¹⁰E lə lě wap, dzam shu' gɔm bi mo bɔ gɑ: Siŋ pu o; e siŋ pu é, a tʉɔ.

¹¹Luŋ yap sə, wap sɛ kwa' pa' wap gɔ ghə nə Yeso a.

¹²Yeso lə lǔ cwə o bɔ gɔ dəm kuŋgǒ nə cwyɛ'nyə Si. E lə ti pɑ nə cwyɛ'nyə Si tə dzʉ̌ lɔ́.

¹³Dzʉ lə lɔ, e cu'tə pɑkhʉ pyə, shwɔ' pɔ shwɔppʉə mgham cəcɑ̌ pu, ŋkhe wap gɑ mghɛ nthəm; wap lə bɑ:

¹⁴Simon yə e lɑ ke e gɑ Pɛtrɔ a, pu fɑ e Andreya; Yakop, Yohane, Filipo pu Batəlemi

¹⁵Matio pu Tomasi. Yakop mu Alfeo pu Simon mu e guŋ.

¹⁶Yuda mu Yakop pu Yuda Iskariɔt yə e gɔ sɔ' tɛ mnɛ Yeso a.

¹⁷Pu a pu lə fi' fɑ kúŋgǒ, tə ŋkho nə tsʉ' ŋkhʉ'kʉ̌', e tiŋnyə tsʉ'u pu a pɑkhʉ pyə, ba vəŋ pɔ: Fɑ́ nə́ guŋ mtsʉ' awɛ, pɑ Yudea, pɑ Yerusalɛm, pɑ giŋnyə shyə Tiro ba Sidon.

¹⁸Sɔ' nə yu' nwə é, e piŋ jɛ wap nə mgho map; pɔ pyə́ mzhwenyə cwəpuŋ lə bɑwə baknyə wap a pɑ jɛ.

¹⁹Guŋ pɔ awɛ lə́ bɑ́wə shəŋ nə kwak e, nə pa' mu' gʉ' lə bɑwə nthəm nə é bɑ jɛ wap.

²⁰Yeso lə pu' mnyə myə́, de pɑkhʉ pyə gɔm gɑ: Mpuŋtsé bɑ́ wɔ mpə́ŋ nə pa' Nəfo si bɑ bi po.

²¹Mpuŋtsé bɑ́ wɔ pyə jikǔ' wə jɛ wɔ cwəlɔ a, pǒ gɔ sɔ' zhwyə́. Mpuŋtsé bɑ wɔ pyə po wə dɔ̌ cwəlɔ a, po gɔ sɔ' wí.

²²Po bɑ mpuŋtsé, nə cwə yə pɔmnəŋ gɔ pɑ pɔ wɔ́, wa' wɔ́, pɑ́ yəmtə wɔ́, pɑ́ wak wɔ́, pɑ pɔptə mtso mɔ pa' pɔ bɔkpɔk a, nə Mu mo a.

²³Po ŋwɛnyə nə cwə bɔ, po ŋwɛnyə nə pa' mcwɔ'fa' gwyə wə byap wɔ thə́ kɛbəŋ. Ba mtá pap lə lɑ̌ mghɔm ghɔ̀m Si jɔgo' pɑ po'o.

²⁴Tə ghəghʉɔ yɔ, wɔ mghɛ tsə́. Po bɑ po e da' gə yɔ nə puŋ.

²⁵Ghəghʉɔ yɔ, wɔ pyə po wə jwyə cwəlɔ ji gɔ ti yɛ́ wɔ; ghəghʉɔ yɔ, wɔ pyə po wə gwi cwəlɔ a, po gɔ ti lɔ̀.

²⁶Ghəghʉɔ yɔ́ nə cwə yə guŋ pɔ awɛ gɔ pɑ gho'tə wɔ a; mta pap lə gə pɑ po'o nə mghɔm ghɔm Si cwanwə̀.

²⁷Tə gǎ wə gɔm bi po pyə pó wə ju' a gɑ́ pò kuŋ mghɛ bo pɔ; po ghə nwə pɑpuŋ bi pɔ pyə wap bɔ wɔ́ a

²⁸po nyəŋ byanyə́ nə pɔ pyə wap nyəŋ do nə po a, po cwyɛ'nyə Si nə thə pɔ pyə wap nthɛmnɛ mɔ a.

²⁹Mo cwɔ pǔ nə́ mu' ghəŋ təŋ o, o nya yə mu' ghəŋ bi. Mo lɑ dzə fɔk o, o kɑ kɔ gɑ e kɑ lə yə nthʉm o.

³⁰Mo kwi ywə bu, o hɑ bi e. Mo lɑ ywə ó, o tak bi e.

³¹Ywə yə pǒ shəŋ gɑ pɔmnəŋ ghə nə po a, po ghə ywə bɔ nə pu.

³²Po pɑ ŋkhuŋ pɑ́ pɔ pyə wap ŋkhúŋ wɔ a, bɑ pu gɔ gho'tə wɔ nə kɑ́ ywə? Ba pɔ cwəpuŋ ŋkhuŋ pɔ pyə́ wap ŋkhuŋ wap a.

³³Po pɑ gə nwə pɑpuŋ pɑ bi pɔ pyə wap gə nwə pɑpuŋ bi po a, bɑ pu gɔ gho'tə wɔ nə kɑ́ ywə? Ba pɔ cwəpuŋ gə yap pɑ́ po'o.

³⁴Po pɑ hu pɑ bi pɔ pyə wap gɔ ti pa' bi po a, bɑ pu gɔ piŋ gho'tə wɔ nə kɑ ywə? Ba pɔ cwəpuŋ hu ywə bi pɔ cwəpuŋ, po'o gɑ wap ti ba' bi pu.

³⁵Sɔ' m̀ nə po, po kuŋ mghɛ bo pɔ́, gə́ nwə pɑpuŋ bi pu, bɑ hu tə pyap gɑ pu gɔ ti pa' bi po. Po gɔ sɔ' ghə mcwɔ'fa' gwyə́, po gɔ sɔ' pɑ pó Si yə e shɔm ba pɔ cwəpuŋ a.

³⁶Po pɑ mghɛ cɔmmtso dəŋdəŋ pa' Tá yɔ bɑ gɛ cɔmmtso a!

³⁷Ka po pɑ nthé bya nə pɔmnəŋ, Si kɑ sɔ' nthé bya nə po. Ka po pɑ nyəŋ shɛ thə́ pɔmnəŋ, Si kɑ sɔ' nyəŋ shɛ thə po! Po pɑ dɑ mhɔ pɔ shwyɛ' wap, Si sɔ' dɑ mhɔ mɔ nə shwyɛ' wɔ.

³⁸Po pɑ hɑ ywə bi pyə shɑ́ pɔ, Si sɔ' hɑ ywə bi po; pu gɔ sɔ' nyəŋ pʉə dzə́ yɔ, hya, cʉ'nyə, a lo tə pfyə. Si gɔ sɔ' lɑ pɑ fo' yə po nə fo' pɔ a nə fo' wɔ.

³⁹Yeso lə kwǐ' gɔm ghɔm tə tutə bi pú gɑ: Bi a pɑ́ fʉ̀ tɔm pǔ mu' fʉ a? Bɑ wap tə gɔ pəmtə vʉ tɔm a lə́?

⁴⁰Bi a pɑ́ mukhʉ̌ lə cyə Tap e. Tə bǎ yɑ mukhʉ lə yə pu cəŋtə ŋkwyə e a gɔ sɔ' pɑ pa' tap é a.

⁴¹Nwə kɑ o yɔ sisya ghe bɛtsə fɑ o tə́ bi a pɑ o lə yɔ nthyə̌ yə a bɛtsə o a?

⁴²Bi a pɑ o ghɔm bi fɑ o gɑ: Cʉ' nthe sisya ywə bɛtsə o m gɑ kɑ, wə yə o tə bɑwə́ jɔ gak bɛtsə o a? Dabǔ, te gak tsə o, tə jyə nə te sisya ghe tsə fɑ o.

⁴³Thə́ nthʉɔ tə jam nthɔm cwəpuŋ pɑ; thə́ cwəpuŋ lə pɑ́ jam nthɔm pɑpuŋ.

⁴⁴Pú jyə ba ya ta' thə́ lə pɑ nə nthɔm myə́. Bi a pɑ pu lə kap nthɔm thə́ nə mka'tə, kɑ nə kap nthɔm thə mlu' nə jǔŋ lɑ?

⁴⁵Mo pɑpuŋ nthé nwə pɑpuŋ nə nthɛ nwə pɑpuŋ yə a bɑ nthʉm tʉ́m tsyə́ a, mo cwəpuŋ pɑ nthé go' nə nthɛ go' e. Nə pa' ywə yə mo gɔm a bɑ ywə yə a fɑ nthʉm tʉm e a.

⁴⁶Nwə kɑ po pɑ ŋkhe a gɑ Cyəpɔ, Cyəpɔ, tə́ tə pɑ̌ gə ywə yə gɑ gɔm a?

⁴⁷Gɑ̌ gɔ siŋ wɔ nthi mo yə́ mo yə́ é ju' ghɔm tsǎ giŋ nə a, hwə́ e a.

⁴⁸E bɑ pa' mo yə e pɑ gɔ kwɑ pa' pe é, nthəŋ cyə e təŋ tə ji to pa' nə wǔ gwɔ' a; bəŋ sɔ' dú, shyə sa gʉ̀ə, dzə́ŋ ŋkho nə pa', a lə ghə sɔmywə nə́ pa' bɔ, nə pá' a bɑ pu kwɑ a lɛtə a.

⁴⁹Mo yə e ju' ghɔm tsɑ, la' e ghiŋ nə a shwə pa' mo yə e kwɑ pa' e tə təŋ cyə e a; shyə cwə tə ŋkho nə a wuŋ bvʉ, sa'tə awɛ a.