Read Ghomala New Testament LUKASI 7 Bible Online

LUKASI 7 - Ghomala New Testament bible

LUKASI 7

¹Yeso lə mǐŋ nə́ ghɔmnwə bi pɔmnəŋ, gɔ Kapɛrnaum.

²Mu' Tadyə msəŋwi pɔ ŋkhə lə bɑ wə bɑ e ghə ŋkwɔ e, bɑ ŋkhúŋ é té' o. Ŋkwɔ é bɔ lə́ bɑwə go tə bɑwə gɔ pfʉ́pfʉ́.

³Tadyə msəŋwi bɔ lə nə́ yu' pa' pu gɔmnwə nə Yeso a, nthəm shɑ mghətso pɑ Yudea gɑ wap ghɔ shwyɛ'nyə e gɑ e sɔ' jɛ ŋkwɔ é bɔ.

⁴Wap lə kə̌m bəŋ Yeso shwyɛ'nyə gɔm gɑ: E ku'nyə mo yə bi a pɑ o ghə ywə yə e həŋtə á bi a.

⁵E ŋkhuŋ pɔ pɔ́k pɑ. Yʉ́ nə lə́ gə tə pu kwɑ sinagogə yɔk pɑ.

⁶Yeso pu a pɔ bɔ lə ghɔ tə bɑ gɔ kəm nə́ pa' bɔ, Tadyə msəŋwi tə́m mso pyə́ wap ghɔm bi é gɑ: Ta, kɑ ywɔk baknyə nɑ o pɑ té'; nə pa' ŋ kha ku'nyə mo yə bi a pɑ́ o ko dyə e a.

⁷A ywə yə a la' gə tə jɔ gɑ ŋ kha ku'nyə nə sɔ' pɑ kwa' myə̀ jɔ o a. Ghɔm da' nwə mukhʉ a yɛ.

⁸Nə pa' myə̀ yə gɑ̌ ju'shwə pɔ pyə́ wap sa' a, gɑ̌ bɑ gɑ̌ ghə msəŋwi pyə gɑ sa' wap a: Gɑ̌ gɔm bi mu' gɑ ghɔ̌, e ghɔ; gɔm bi mu' gɑ sɔ̌', e sɔ'; gɔm bi ŋkwɔ a gɑ: Ghə yə̌ŋ, e ghə.

⁹Yeso lə yu' mghɔm mɔ̌ gɑ, nwə Tadyə msəŋwi bɔ puŋ e. E fɛ nɑ gɔm bi pɔ pyə wap lə́ bɑ́ jʉm é a gɑ: Gɑ̌ siŋ wɔ gɑ tə ŋkhəm pɑ́ Israɛl ŋ kha wuŋ jɔ yəŋ nthi piŋnthʉm.

¹⁰Pɔ pyə pu lə təm wap a lə nə pɑnyə dyə Tadyə msəŋwi bɑ ŋkwɔ e yə e kɑ bɑwə go a yɛ̀.

¹¹Yeso lə piŋ gɔ nthʉm tisuŋ Naim. Pɑkhʉ pyə́ pu a vəŋ pɔ pɑ jʉm e.

¹²E lə ghɔ tə nə ko shwə pù' tisuŋ, pu pɑwə dɑ pfə mo gɔ m nthəŋpɔ təŋ e. A lə bɑ pfə ŋkwi mu mu' npfɔk mjwǐ. Pu a pɑ tisuŋ bɔ nə lə bɑ.

¹³Cyəpɔ lə nə yɔ npfɔk mjwǐ bɔ, mtso myə kú é; e ghɔm bi e gɑ: Kɑ kwi' dɔ.

¹⁴E lə ghɔm po'o gɔ jap pu é nə ŋkwɔp pfə mo. Pɔ pyə wap lə́ bɑwə ŋkwa a tiŋnyə; e ghɔm gɑ: Mu səm, gɑ̌ ghɔm bu yǎm!

¹⁵Pfə mo bɔ lə lu shwə si, ntho' nə ghɔmnwə. Yeso hɑ e bi map e.

¹⁶Nwə cyə guŋ pɔ awɛ, wap pɑ gamtə Si gɔm gɑ: Kwa' gɔm ghɔm Si gwyə cəcɑ̌ pɑ. Si bɑ e lé pɔ pyə.

¹⁷Mghɔm mɔ nə Yeso lə ghɔ tə ŋkho Yudea ba nə guŋ mtsʉ' awɛ.

¹⁸Pɑkhʉ̌ Yohane lə siŋ e mcuŋ bɔ awɛ,

¹⁹e ke pɔ pʉə nə pu, nthəm wap bi Cyəpɔ gɑ wap ghɔ gɔm bi é gɑ: O bɑ mo yə e bɑwə sɔ' a, kɑ pyə gɔ kwi' pyap mu' mo?

²⁰Wap lə kəm bəŋ Yeso gɔm bi e gɑ: Yohane nu' pɔ shyə təm wɔk bu gɑ pyə ghɔm gɑ: O bɑ mo yə e bɑwə sɔ' a, kɑ pyə gɔ kwi' pyap mu' mo?

²¹A lə pɑ̌ pɑ́ cwə o bɔ, Yeso yɛ mgho nə pɔ jɔmyɔ̌m, jɛ mkho'tə, jɛ pɔ pyə zhwenyə cwəpuŋ lə ba ǎ ko nə pu a, biŋ gə mfʉ pɑ jɔ tsʉ'.

²²E lə pa' bi pu gɑ: Po ghɔ siŋ Yohane ywə yə po jɔ a ba yə po ju' a. Mfʉ yɔ tsʉ', mkho'tə ghiŋ, mghɛ ka'pap lɔ́, mbu'mtəŋ yu'nwə. Mpfə pɔ yám nə vʉ̌, mpə̌ŋ yu' yap Cùŋ pɑpuŋ.

²³Buŋtsě bɑ mo yə ŋ tə gɔ pɑ ywə fa'tə yə e gɔ cyə m nə vʉsi a pɑ.

²⁴Mghɛ nthəm Yohane lə cwətə gɔ, Yeso ghɔm bi pɔmnəŋ nə nwə Yohane gɑ: Po lə gɔ m ghakgo nə yɔ kɑ? Shʉɔ ka' yə fəfa wə ŋu 'nyə a lə̀?

²⁵Po lə gɔ m nə yɔ kɑ? Mo bɑ e kwa dzə mkwiŋ lə̀? Pɑ kwa dzə mkwiŋ shwə m dyə̌ mfo.

²⁶Tə po lə gɔ m nə yɔ kɑ? Gɔm ghɔm Si lə? Əŋ gɑ siŋ wɔ gɑ e cyə gɔm ghɔm Si.

²⁷A bɑ mo yə a bɑ pu və nə é gɑ! Gɑ̌ təm shwiŋkhʉɔ a dzə o gɑ e nyaptə məjyə o dzə o.

²⁸Yeso ghɔm gɑ: Gɑ̌ siŋ wɔ gɑ sɔmmo tə́ cəcɑ̌ pɔ pyə mjwǐ dzə́ wap a bɑ e cyə Yohane a; tə́ mukəcɔk mo nthʉm Nəfo Si bɑ ě cyə é.

²⁹Guŋ pɔ awɛ pyə wap lə yu' gi e a, ba mghɛ kwishwɔp, gə Yohane nu' wap shyə a bɑ wap zhyə nwə dəŋdəŋ Si.

³⁰Tə́ pɑ Farisai pu a pɑ mtadyə nə mco' Si lě ŋkhəŋnyə ywə yə si shəŋ bi pu a, ŋkhəŋnyə kwishyə Yohane.

³¹Yeso lə kwi' gɔm gɑ: Bi a pɑ fo' pɔmnəŋ nə yəŋ wɔdzʉ nə wɑ? Wap hwə́ wɑ́?

³²Wap hwə shɑ́ pɔ pyə wap shwəsi dəm sim a, bɑ gɔm cəcɑ̌ pu gɑ: Pyə túŋ dúŋ la' po nə̌ŋ. Ŋkwa vʉ, la' po lɔ,

³³nə pa' Yohane nu'pɔ shyə́ sɔ' la' e pɑ dzʉ msɛtʉɔ, e lɑ pɑ nwə mlu': Po ghɔm gɑ zhwenyə cwəpuŋ nə e.

³⁴Mu mo sɔ', bɑ dzʉ́ biŋ nwə́; po ghɔm gɑ: E bɑ pɑ dzʉywə́, bɑ nwəywə. E bɑ so mghɛ kwishwɔp ba mghɛ ghə mnwəcwəpuŋ.

³⁵Tə pɑkhʉ pyə' bɑ wap zhyə́ zhyənwə yə a fɑ bi Si a.

³⁶Mu' Farisai lə ke Yeso gɑ pu e tsʉywə. Yeso ghɔ ywə e, ŋkho dyə e shwə́ tɑpe.

³⁷Mu' mjwǐ lə́ bɑ nthʉm tisuŋ bɔ bɑ mjwǐ cwəpuŋ. E lə yu' gɑ Yeso dyə Farisai, dɑ shəŋ mwɑ damnyəlamnyə nə sɔ'.

³⁸Nthiŋnyə jʉm mkwə Yeso. Dɔ̌, dɑ shyətsə e nə bvyə mkwə Yeso, dɑ nəŋthə e nə shi' biŋ núŋ mkwə myə́, dɑ mwɑ damnyəlamnyə bɔ nə shi'.

³⁹Farisai yə e lɑ kě Yeso a, yɔ gɔm nthʉm tʉm e gɑ: Bɛ yəŋ lá' pe' bɑ gɔm ghɔm Si bɑ e zhyə mjwǐ yə̌ŋ, jyə́ gɑ́ e mjwǐ cwəpùŋ.

⁴⁰Yeso ghɔm bi e gɑ: Simon gɑ̌ gɔ siŋ o mu' nwə. Simon ghɔm bi Yeso gɑ: Ta ghɔ̌m.

⁴¹Yeso ghɔm gɑ: Mu' mo lə pɑ̌ ŋkhʉə jú bi pɔ pɑpʉə. Pu dəŋdzə mo pɑ tsə ŋkhətɔ. Pu batə mo yɑpʉə pɑ tsə bɛ mǔthɔ.

⁴²Pa' pɔ bɔ la tə ghə ywə nə nthuŋ ju yap á, bɛ bɔ lə́ lɑ̌ ju bɔ nə shwyɛ' wap. Ya mo nə pɔ bɔ pɑpʉə gɔ kuŋ bɛ bɔ cyə yá?

⁴³Simon pa' gɑ: Gɑ kwɛ gɑ́ mo yə pu nthak ŋkhap jɔmyɔm bi a. Yeso ghɔm bi e gɑ: O sɛ kwa' pɑpuŋ.

⁴⁴Biŋ fɛ nɑ e dé mjwǐ bɔ gɔm bi Simon gɑ: O ka yɔ mjwǐ yəŋ a? Gɑ ko dyə́ o, o lə hɑ́ shyə nə sɔk mkwə mə̌: Tə́ mjwǐ yə̌ŋ lɑ shyətsə e nə́ bvyə́ mkwə mə̌, dɑ nəŋthə e nə shi'.

⁴⁵O ka núŋ mgho' mə̌ tə́ tə fɑ pa' ŋkho dyə́ ɔ á, e bɑwə núŋ mkwə mə̌.

⁴⁶O kɑ pfyə mwɑ thə́ m̀; tə́ e pfyə mwɑ damnyəlamnyə nə́ mkwə mə̌.

⁴⁷A cyə m po'o siŋ o gɑ́ pu lɑ guŋ mhɔnwə myə́ awɛ nə shwyɛ' e. A ywə yə a gə tə́ e la'tə yəŋ tiŋ mɑ kuŋnyə a. Tə́ mo yə pu dɑ pɑ muywə mhɔnwə shwyɛ' e a, ŋkhuŋnyə e tə́ jɔm pɑ́.

⁴⁸Yeso ghɔm bi mjwǐ bɔ gɑ: Pu lɑ mhɔnwə mǔ shwyɛ' o.

⁴⁹Pɔ pyə pu a pu lə bɑ́ tɑpe a ghɔm cəcɑ̌ pu gɑ: Yəŋ bɑ wɑ yə e dɑ ba mhɔnwə pɔ shwyɛ' wap a?

⁵⁰Yeso ghɔm bi mjwǐ bɔ gɑ: Piŋnthʉm ó vɔk o, ghɔ nə hwitə.