Read Ghomala New Testament LUKASI 8 Bible Online

LUKASI 8 - Ghomala New Testament bible

LUKASI 8

¹Yeso lə ghɔ nthʉm mtisuŋ ba m nthʉm mguŋ, bɑ gɔm nwə nə Nəfo Si. Pu a pɑkhʉ pyə́ shwɔppʉə mgham nə́ lə́ bɑ.

²Ba pɑ jwǐ pyə e lə yɛ wap nə mgho, ba nə zhwenyə cwəpuŋ a: Maria yə Makdala yə é lə té mzhwenyə cwəpuŋ sɔmbʉə nə e a.

³Yohana jwi Shuza ŋkhónthɛ Herode, Susana, ba pyə shɑ pyə wap lə dɑ tsə tsap nə kwitə Yeso pu a pɑkhʉ pyə a.

⁴Pɔmnəŋ lə fɑ nə mtisuŋ sɔ' bi Yeso. Wap lə́ pɑ̌ shu'tə bəŋ e kwa' vəŋ e. E lɑ ghɔm tə tútə̀ gɔm bi pu gɑ:

⁵Mu' dzəywə lə tə̌m bɑ́ dzə́ tsə́. Pa' e lə pɑ dze ywə a, mu' vʉ giŋnyə mə́jyə. Pɔmnəŋ nəŋtə, pǒmsəŋ kɛbəŋ pfɑ.

⁶Mu' gwya ywə bɔ vʉ dəm gwɔ', sa', jak shyə, jə́m.

⁷Mu' vʉ cəcɑ̌ mká'tə, pu a mká'tə pəmtə ŋkwyə́, mká'tə ŋkwɑ.

⁸Mu' gwya ywə bɔ vʉ nə tsʉ' cá' pɑpúŋ, sa', ŋkwyə, bɑ jam nthɔm jyə khə. Yeso lə ghɔm po'o nə miŋ gɔm tə thə́ gɑ: Mo yə ě ghə mtəŋ nə ju' a é yu'.

⁹Pɑkhʉ pyə́ həŋtə é pá' ghɔm bɔ nthutə a.

¹⁰E pa' bi pú gɑ: A bɑ pú lě gə gɑ́ po zhyə càm nə nwə Nəfo Si; tə́ sɔ' m nə pyə shɑ pɔ, pú pɑ dɑ pɑ ghɔm tə́ tutə̀ nə́ siŋ wap. Po'o gɑ wap yɔ tə yɔ, ju' tə yu'.

¹¹Ghɔm tə tutə̀ bɔ nthutə gɑ: Gwya ywə bɑ Ghɔm Si.

¹²Pɔ pyə wap bɑ pa' kəŋ məjyə a, bɑ pɔ pyə wap jú', Sata sɔ' nthé ghɔm bɔ nthʉm tʉm pú. Po'o gɑ wáp kɑ́ piŋ sɔ' bvɔk.

¹³Pɔ pyə wáp bɑ dəm gwɔ' a bɑ pɔ pyə wáp ju' ghɔm Si, biŋ nə́ ŋwɛnyə; tə bɑ wáp ka ghə gɛ́, wáp biŋ yap pɑ cwə o, mləŋtə cwə tə ŋkho nə pu, wap wuŋ gwa' nə piŋ.

¹⁴Ywə yə a bvʉ tùŋ mka'tə a, a bɑ pɔ pyə wap ju' ghɔm Si, nə tsɔp nɑ, fʉ', nə ŋwɛnyə nthʉm dzʉ fam; la' wap yam nthɔm tə a kwyə.

¹⁵Ywə yə a bvʉ nə tsʉ' ca' pɑpuŋ a, pɑ pɔ pyə wap ju' ghɔm Si, nə́ tʉm dəŋdəŋ, tʉ́m pɑpuŋ, bíŋ, bɑ ŋkhaktʉɔ jam nthɔm a.

¹⁶Sɔmmo tə́ su mɔk nə lambu, dɑ kɔp nə pfɔptə pɑ́, kɑ nyəŋ kɑsikodyə pɑ. E jap dəm kwɔ' lambu po'o gɑ pɔ pyə wap gɔ ko dyə a yɔ dɔlɔ̌.

¹⁷Nə pa' sɔmywə yə a tʉmnyə tə la' pu ghɔ la' zhyə a, a tə wə pɑ́, sɔm cam yə pu tə gɔ la' tu a, a tə wə pɑ́.

¹⁸Po pɔmtə nə nthi pa' po nə ju' nwə a: Nə pa' pu gɔ sɔ' hɑ ywə bi mo yə e ghə ywə a. Sɔ' m nə mo yə e ka ghə ywə á, pu kwi ba yə muywə yə é bɑ́wə ŋkwɛ gɑ e ghə a.

¹⁹Má Yeso pu a mfɑ pyə lə sɔ' nə cə́ŋ e da' gɑ la' wap kəm bəŋ e, bɑ pɔmnəŋ nə́ jɔm.

²⁰Pu ghɔm bi Yeso gɑ: Mɔ̌ pu a mfɑ pǔ dzʉ bɑwə shəŋ nə́ yɔ ó.

²¹Yeso pa' gɑ: Ma á pu a mfɑ pɑ bɑ pɔ pyə wap ju' ghɔm Si bɑ giŋ pa' a gɔm a.

²²A lə pɑ mu' tyɛ'dzʉ, Yeso pu a pɑkhʉ pyə ko nthʉm kənu'. E ghɔm bi pú gɑ: Pɑ sa' gɔ nə yəmu' jʉɔ mʉ'nyə. Pu a pu ghɔ.

²³Wap lə pɑ sɔp shyə nə sa', Yeso ti. Fʉ́m təm dəm mʉ'nyə, ŋkwa shyə nyəŋ nthʉm kənu', nwə pɑ gɔ ghə wap.

²⁴Wap ghɔ bəŋ Yeso jam e gɔm gɑ: Ta, Ta, pɑ si gɔ pfʉ́. Yeso yam, baptə́ fəfa ba fá shyə wap na', tsʉ' wuŋ dɛtə́ gɑ kǎm.

²⁵Yeso ghɔm bi pɑkhʉ pyə gɑ: Piŋnthʉm yɔ hɑ? Wap pwɔk, nwə cyə wap. Wap pɑ gɔm cəcɑ̌ pu gɑ: Yəŋ bɑ wɑ yə e gɔm nwə bi fəfa bɑ m bi shyə wap yu' shwə e a?

²⁶Wap lə kə̌m kəŋ shyə nthʉm guŋ pa Gerasa yə a bɑ nə yə mu' jʉɔ Galilea a.

²⁷Yeso lə fi'si, mu' mo, nthəm m tisuŋ, mzhwenyə cwəpuŋ pɑ nə é sɔ' dzə é. Mo bɔ la tə́ ŋkwa dzə́ a tə fɑ tə tyɛ̌', e lə nəŋ bɑ́ dí dyə; e lə́ shwə pɑ nthʉm mthəsì.

²⁸E lə yɔ Yeso, sɔ' bvʉ nə mkwə myə́ shwé tə thə́ gɔm gɑ: O kwi kɑ bəm Yeso Mu Si tə́ thə kɛbəŋ? Səso kɑ mɛnyə a.

²⁹Yeso ghɔm bi zhwenyə cwəpuŋ gɑ e təm nə mo bɔ. Nə pa' e lə́ ŋkho nə e mcʉmmcʉ̌m; pu lə́ dɑ pɑ gwɑ mtʉɔ pu a mkəlo' mtʉɔ tə́ nə́ kwɑ mkwə myə́. E pɑ shwa mgwɑ bɔ; zhwenyə cwəpuŋ pɑ nthənyə é shya pɑ m ghakgo.

³⁰Yeso həŋtə bɛ bɔ gɑ: Tso tsu bɑ wɑ? E pa' bi e gɑ jɔmyɔ̌m nə́ pa' mzhwenyə cwəpuŋ lə bɑ nə e tə jɔm a.

³¹Wáp lə cwyɛ'nyə Yeso gɑ́ e kɑ ghə wap ko tsʉ̀m.

³²Mu' mɑ ka mgənɔm lə bɑ kuŋgo tsʉ'u bɑwə pfɑ́ mghe. Mzhwenyə cwəpuŋ bɔ cwyɛ'nyə Yeso gɑ e piŋ gɑ wap ko nə pǒ mgənɔm bɔ. E piŋ.

³³Mzhwenyə cwəpuŋ təm nə bɛ bɔ, ŋkho nə mgənɔm. Ka mgənɔm, keŋnyə nə́ mkəkəŋ bvʉtə nthʉm shyə mʉ'nyə, npfʉ́tə́.

³⁴Pɔ pyə wap lə́ bɑwə byap mgənɔm bɔ a lə nə́ yɔ ywə yə a shyə a, ŋkhʉ giŋ sɛ nwə bɔ tisuŋ bɑ m nthʉm guŋ.

³⁵Pɔmnəŋ lə sɔ' nə yɔ ywə yə a shyə a. Wap lə ŋwak bəŋ Yeso, jɔ mo yə mzhwenyə cwəpuŋ nthəm nə e a, bɑ e cwə bəŋ e, dzə pɑ nə e, zhyənwə e pɑ bɑ a sɔ' bi e cwəlɔ kwa' pɑpuŋ. Wap pwɔk.

³⁶Pɔ pyə wap la' jɔ pa' a shyətə a, siŋ wap pa' gɛ mzhwenyə cwəpuŋ la' nə jɛ a.

³⁷A pɑ́ po'o, pɑ Gerasa cwyɛ'nyə Yeso gɑ é ghɔ, nə pa' wap lɑ bɑwə bwɔk te'. Yeso lə kǒ nthʉm kənu' nə́ gɔ.

³⁸Mo yə mzhwenyə cwəpuŋ nthəm nə e a, həŋtə e gɑ e gɔ wuŋ bəŋ e. Da' gɑ Yeso la'nyə é gɔm bi e gɑ:

³⁹Pɑnyə la' o, ŋkho siŋ pɔmnəŋ ywə yə Si gə nə o a. Bɛ bɔ pɑnyə, shyanyə ywə yə Yeso gə nə e a nthʉm guŋ tisuŋ awɛ.

⁴⁰Yeso lə nə pɑnyə, vəŋ pɔ pɑwə byap é. Wap lɑ e.

⁴¹A pɑ po'o mu' mo sɔ', tso tsyə pɑ Yairos. E pɑ tadyə sinagogə. E lə sɔ' bvʉ nə́ mkwə Yeso, shwyɛ'nyə e gɑ e sɔ' ywə e.

⁴²Nə pa' mú e, ŋkwi mú e mjwǐ, gu' shwɔppʉə mgham lə́ bɑwə gɔ pfʉpfʉ. Yeso lə pɑ gɔ m wə́, pɔmnəŋ pɑ nthənyə e,

⁴³mu' mjwǐ bɑ pa' mcyə pɑ̌ nthəm nə e á ǎ ghə gu' shwɔppʉə mgham, bɑ e sím guŋ yə́ ywə awɛ wə́ mgəgɛ̀, la' sɔmmo yɛ́ é.

⁴⁴E lə́ sɔ̌' nthəm m jʉ̌m Yeso, ŋkwak pu e nə dzə Yeso, mcyə ya' nə təm nə é.

⁴⁵Yeso ghɔm gɑ: Wɑ̌ kwak a? Sɔmmo lə piŋ. Pɛtrɔ ghɔm gɑ: Ta a bɑ pɔ pyə́ wap bɑwə nthənyə biŋ hyapnyə o a.

⁴⁶Yeso ghɔm gɑ: Mǒ kwak a. Gɑ̌ yú' bɑ mu' gʉ' təm nə m.

⁴⁷Mjwǐ bɔ yɔ gɑ pu zhyə e. E sɔ' nə vʉ nə mkwə Yeso, bɑ səŋ. Siŋ Yeso dzə̌ guŋ pɔ awɛ ywə yə a gə tə́ e kwak e, ba pa' e ŋkwak é guŋ jɛ a.

⁴⁸Yeso ghɔm bi e gɑ: Gò a, piŋnthʉm o vɔk o, ghɔ nə hwitə.

⁴⁹Yeso lə pɑ gɔm po'o mu' mo fɑ́ ywə Yairos tadyə msinagogə gɔm bi e gɑ: Gò o pfʉ́. Kɑ piŋ baknyə Ta.

⁵⁰Yeso yu', gɔm bi Yairos gɑ: Kɑ pwɔk. Piŋ piŋ, e gɔ yɛ.

⁵¹Yeso lə ŋwak wə Yairos, e lə piŋ gɑ pu sɔmmo pəmtə ŋkho dyə tə ně da' Pɛtrɔ pu Yohane ba Yakop biŋ gə ta mú pu ma mú.

⁵²Guŋ pɔ awɛ lə́ bɑwə dɔ̌, bɑwə dzɔp nɑ tsap nə mú bɔ. Yeso ghɔm gɑ: Ka po lɔ; e ka pfʉ́, é diti.

⁵³Wap yəmtə Yeso, nə pa' wap lə́ bɑwə jyə́ gɑ ě pfʉ́.

⁵⁴Yeso tɔm pu e, ŋkhe e gɑ: Mú ǎ yǎm!

⁵⁵Zhwenyə e pɑnyə nə é, e wuŋ du si. Yeso ghɔm gɑ pu hɑ ywətsʉ bi e.

⁵⁶Nwə cyə́ tap e pu map e. Tə Yeso co' bi pu gɑ wap kɑ siŋ sɔmmo ywə yə a shyə a.