Read Ghomala New Testament LUKASI 9 Bible Online

LUKASI 9 - Ghomala New Testament bible

LUKASI 9

¹Yeso lə cu'tə pɑkhʉ pyə́ shwɔppʉə mgham hɑ gʉ' ba tʉɔ bi pu nə́ nə jə́ŋ guŋ mzhwenyə cwəpuŋ awɛ ba nə nə jɛ mgho.

²E lə́ təm wap gɑ́ wap ghɔ shyanyə nwə Nəfo Si, bɑ jɛ mgho.

³Bǐŋ gɔ́m bi pu gɑ: Ka po nə ghɔ dɑ sɔmywə, kɑ pə̀ŋ, kɑ pʉ̀ə, kɑ ywətsʉ, kɑ ŋkhǎp lə, ka sɔmmo ghə dzə́ yɑpʉə.

⁴Po ko bǎ nə ya dyə lə, po cwə pɑ wə́ tə da' gɔ̌.

⁵Tisuŋ yə po ko nə la' pu lɑ wɔ a, po nə ghɔ dzɔp ca' nə mkwə mɔ, a pɑ yɔ nə kwinthɛ nə pú.

⁶Wap lə ghɔ, bɑ giŋ nthʉm mla', bɑ siŋ Cuŋ Pɑpuŋ, biŋ bɑ jɛ mgho.

⁷A lə pɑ̌ po'o, fo Herode yu' yə́ nwə yə á bɑwə shyə́ a nwə zhʉm é; nə pa' shɑ pɔ lə bɑwə gɔm gɑ́ Yohane yám nə vʉ̌.

⁸Shɑ pɔ pɑwə gɔm gɑ á bɑ Elia piŋ sɔ̌'. Shɑ pɔ ghɔm gɑ a bɑ mu' gɔm ghɔm Si piŋ jám nə vʉ̌.

⁹Herode ghɔm gɑ, a bɑ dě gə pu ya' thə Yohane pɑ kwa' myə̀. Mo yə gɑ̌ ju' pu pɑ gɔm yəŋ tiŋ nwə nə é a bɑ wɑ? E lə ghɔm po'o bɑ shə́ŋ jyə nə́ nə yɔ é.

¹⁰Pɑkhʉ Yeso lə pɑnyə siŋ e guŋ ywə yə wap gə á awɛ. E lɑ wáp, pu a pú ghɔ m Betsaida tsʉ' tsiŋ.

¹¹Pɔmnəŋ lə́ zhyə, jap jʉ̌m pu. Yeso lɑ wap, siŋ wap nwə nə Nəfo Si biŋ jɛ wap.

¹²Dzʉ lə to' nə pwa, Pɑkhʉ Yeso shwɔppʉə mgham sɔ' bəŋ e gɔm bi e gɑ. Tak pɔmnəŋ nə́ŋ wap ghɔ nthʉm gúŋ shəŋ ywətsʉ ba tsʉ' yə wap gɔ ti nə a, nə pa' tsɔ̌' si bɑ ghak tsʉ' a.

¹³Yeso ghɔm bi pu gɑ: Kwa' wɔ hɑ ywətsʉ bi pú. Wap ghɔm bi e gɑ: Pyə ghə da' msɛ mta' tɔ, ba bapgu duŋ pʉ̌ə, tə́ ně da' pa' bi a pɑ pyə ghɔ jo ywətsʉ nə dəŋ pɔ pɔŋ gɑ a. Pɔmnəŋ lə bɑ gwɛ a pɔ sha'tɔ.

¹⁴Yeso ghɔm bi pɑkhʉ pyə gɑ: Po ghə́ wap cwətə si pɔ mghǎmthɔ mghǎmthɔ.

¹⁵Wap lə ghə po'o, pɔmnəŋ cwətə si awɛ.

¹⁶Yeso lə kwi msɛ̌ mta' tɔ ba bapgu duŋ pʉə, bʉ' mnyə kɛbəŋ, nyəŋ byanyə nə́, bo'tə, hɑ bi pɑkhʉ pyə gɑ wap ghaptə bi pɔmnəŋ.

¹⁷Pɔmnəŋ lə pfɑ ywə tə jwyə; pu lak bo' tsə nə msap shwɔppʉə mgham.

¹⁸Yeso pu a pɑkhʉ pyə lə pɑ̌ tsʉ' tsiŋ bɑ shwyɛ'nyə si, e həŋtə wáp gɑ: Pɔmnəŋ gɔm gɑ gɑ̌ bɑ wɑ́?

¹⁹Wap pa' gɑ: Shɑ pɔ gɔm gɑ o bɑ Yohane nu' pɔ shyə, shɑ pɑ́ gɔm gɑ́ o bɑ́ Elia. Pyə shɑ pɑ gɑ o bɑ mu' gɔm ghɔm Si bɑ e yám nə vʉ̌.

²⁰Yeso həŋtə wap gɑ: Sɔ' m nə po, po gɔm gɑ gɑ̌ bɑ wɑ? Pɛtrɔ ghɔm gɑ: O bɑ Kristo Si.

²¹Yeso co' bi pu gɑ wap kɑ siŋ sɔmmo.

²²Biŋ gɔm gɑ: Mú mo gɔ yɔgo' tə', mghətso ba mtadyə mkamsi pu a pɑ zhyə mcò' wa' e, pu zhwə e, a pɑ batə tyɛ'dzʉ yɑtá e yám nə vʉ̌.

²³E lə piŋ gɔm bi guŋ yap awɛ gɑ: Mo pɑ gɔ yap jʉ̌m m̀, e kəŋnyə thə nɑ e, biŋ ŋkwa yə bɛnyəpɛnyə nə jap jʉ̌m m̀ guŋ mtyɛ'dzʉ awɛ.

²⁴Mo yə ě cəŋ nə vɔk vɔ́k é a gɔ pi, mo yə e pi vɔk e nə thə́ ǎ gɔ sɔ' vɔk.

²⁵A po'o bi a pɑ mo nyəŋ guŋ dzʉ awɛ pʉə e tə bi vɔk, kɑ sa'tə vɔk e lə bɑ a gɔ kwitə e m kɑ?

²⁶Mo yə ě kuso nə m̀ ba nə ghɔm tsɑ̌ a, bɑ Mu mo gɔ sɔ' kuso nə e nə cwə yə e gɔ sɔ' sɔ' nthʉm ghu'tə e, ba yə Tap e pu a pɑ aŋgəle dɔlɔ̌ a.

²⁷Gɑ̌ siŋ wɔ kwa' nyənyɔ gɑ shɑ pɔ cəcɑ̌ pɔ pyə wap tsɔ' á, tə gɔ sɔ' pfʉ́ tə yɔ Nəfo Si pɑ.

²⁸A lə nə cyə tyɛ'dzʉ hɔ̌m pá' Yeso gɔm mɔ mnwə a, e lɑ Pɛtrɔ, ba Yohane pu Yakop pu a pu ghɔ dəm kuŋgo nə cwyɛ'nyə Si.

²⁹Yeso lə pɑ shwyɛ'nyə Si, sə e sɑnyə̀, dzə e fɔk dəŋnyələŋnyə.

³⁰Pu yɔ shɑ pɔ pɑpʉə pu a pu pɑ wə gɔmtə. A lə bɑ Mosɛ pu Elia.

³¹Bɑ wap ŋwak nthʉm ghu'tə̀. Wap lə bɑwə gɔm pa' cwə yə Yeso gɔ pɑnyə a si gɔ ku' Yerusalɛm a.

³²Pɛtrɔ pu a mso pyə lə bɑwə gʉɔnyə lwɔk. Wap lə cwə tə jǎm, jɔ ghu'tə̀ Yeso ba pɔ pɑpʉə pyə pu a pu lə́ bɑ́wə gɔm a.

³³Pɔ bɔ pu a Yeso lə nə hapnyə, Pɛtrɔ ghɔm bi e gɑ: Ta, a puŋ nə pɑ tsɔ'ɔ; pɑ zhɔk mpfɑ tsɔ'ɔ mɑntha: Yǔ, yə Mosɛ ba yə Elia. E lə gɔm po'o tə pɑwə jyə́ ywə yə e gɔm a.

³⁴E lə pɑ gɔm po'o mlwa təm sam pɔ bɔ. Pɑkhʉ Yeso nə yɔ pa' mlwa sam wap a bwɔk te' ó.

³⁵Wap yu' gi mo nthʉm mlwa ghɔm gɑ: Mo yəŋ gɑ bɑ Mú a, bɑ gɑ cwɔ' e. Po yu'nyə é.

³⁶Wap lə nə yu' gi mo po'o, biŋ jɔ pɑ́ da' Yeso do é. Pɑkhʉ pyə lɛtə gɑ kǎm. Wap lə siŋ sɔmmo ywə yə wap jɔ́ a cwə o bɔ.

³⁷Dzʉ lə́ lɔ, wap fi' dəm ŋkhuŋ gɔ̌. Pɔmnəŋ tə jɔm sɔ' dzə Yeso.

³⁸Mu' mo cəcɑ̌ vəŋ pɔ ghɔm tə thə́ gɑ: Ta, səso ma' mnyə mǔ nə mú a yə̌ŋ. E bɑ pɑ duŋ e do é bəm.

³⁹Mu' zhwenyə cwəpuŋ ŋkho nə é. E cwe, sɛtə́ mnyə, sə́ mkəkak, nə təm nə e a tʉɔ, nə təm bɑ e pwa.

⁴⁰Gɑ̌ cwyɛ'nyə pɑkhʉ pǔ, gɑ wap zhəŋ zhwenyə bɔ, la' wap ghə jyə́.

⁴¹Yeso ghɔm gɑ: Gwya msɔk tʉ́m, pɑ tə́ ghə piŋnthʉm, pɔ cwəpuŋ. Pɑ gɔ piŋ cwə dəŋ pa' po pɑ dzá nə m̀? Lɑ mu o nə́ sɔ'.

⁴²Mu lə pɑ sɔ', zhwenyə bɔ ma' e si. Shʉ'nyə e m bò. Yeso cɔk zhwenyə cwəpuŋ bɔ, jɛ mu bɔ, hɑ e bi tap e.

⁴³Guŋ pɔ awɛ yɔ pa' gʉ' Si bɑ a tʉɔ a, a sya wap. Wap lə pɑ ŋwɛnyə nə guŋ tsə tsyə, Yeso lə gə a, e ghɔm bi pɑkhʉ pyə gɑ:

⁴⁴Po cəŋtə ju' ywə yə gɑ gɔ ghɔm bi po a: Pu gɔ hɑ mu mo nə bu pɔmnəŋ.

⁴⁵Da' gɑ la' pɑkhʉ pyə yu' ywə yə e bɑwə gɔm bi pu a, bɑ ǎ tʉmnyə nə zhyənwə yap. Wap piŋ bwɔk nə həŋtə e nwə nə́.

⁴⁶Pɑkhʉ pyə lə pɑ̌ fəŋnyə cəcɑ̌ pu nə zhyə mo gwyə nə pú.

⁴⁷Yeso zhyə́ ywə yə wap lə bɑwə ŋkwɛ a, ŋkhe mu' múywə mú jap e bəŋ e.

⁴⁸Gɔm bi pú gɑ: Mo yə é lɑ tso tsɑ̌ nyəŋ múywə mú yəŋ dyə a, bɑ e nyəŋ pa' pɑ myə̀ dyə́. Mo yə e nyəŋ a dyə a, bɑ e nyəŋ mo yə e nthəm a dyə́; nə pa' mo yə e cəcɑ̌ po bɑ mo ŋkho' a nə bɑ mo gwyə́.

⁴⁹Yohane ghɔm gɑ: Ta, pyə yɔ mu' mo e pɑwə dɑ́ tso tsú jəŋ mzhwenyə cwəpuŋ pyə cə́ŋ nə́ kɔ bi é, nə pa' tə pyə a pu nə bəmtə bɑ jʉm o pɑ.

⁵⁰Tə́ Yeso ghɔm gɑ: Ka po kɔ bi e nə pa' mo yə e tə bɑ gɛ bo yɔ a pɑ bɑ so yɔ.

⁵¹Cwə yə Yeso lə bɑ gɔ təm nthʉ́m dzʉ́ lə ku' a, e yap gɑ e gɔ ghɔ Yerusalɛm.

⁵²Nthəm mghɛ nthəm dzə e. Wap lə ghɔ tə ŋkho nthʉm mu' pfə la' nthʉm guŋ Samaria nə nyaptə tsʉ' bi Yeso.

⁵³Pɑ tsʉ'u bɔ kəŋnyə nə lɑ wap, nə pa' wap lə bɑwə gɔ m Yerusalɛm a.

⁵⁴Yakop pu Yohane lə yɔ po'o, gɔm gɑ: Cyəpɔ, o piŋ gɑ pyə ke mɔk, a fi' fɑ thə́ kɛbəŋ sɔ' si'nyə wap a?

⁵⁵Yeso fɛ nɑ e de wap, shɔktə wap

⁵⁶pu a pu ghɔ nə mu' guŋ dyɛ'.

⁵⁷Wap lə pɑ mə́jyə, mu' mbɛ ghɔm bi Yeso gɑ: Gɑ gɔ yap jʉ̌m o, tə ko bǎ hɑ́ lə́ yə o ghɔ a.

⁵⁸Yeso ghɔm bi e gɑ: Msə́sʉm bɑ wap ghə mghʉ̌m map, pǒmsəŋ to kɛbəŋ ghə mkɔ máp, tə́ Mú mo bɑ e ka ghə tsʉ' nə yap thə́ é nə́.

⁵⁹Biŋ gɔm bí mu' mo gɑ: Yap jʉ̌m m̀. Mo bɔ ghɔm gɑ: Ta piŋ gɑ də́ŋdzə gɔ nthəŋ ta á,

⁶⁰Yeso ghɔm bi e gɑ: Tak mpfə pɔ wap təŋ mpfə pɔ pap, sɔ' m nə o, ghɔ siŋ Nəfo Si.

⁶¹Mu' mo kwi' gɔm bi e gɑ: Ta gɑ gɔ yap jʉm o, da' gɑ piŋ bəm gɑ́ gɔ pyə a mfɑ pɑ̌ la'nyə.

⁶²Yeso ghɔm bi e gɑ: Mo yə ě kyəp sú nə dzʉ'ne, dé jʉm a, ka ku'nyə nə́ Nəfo Si.