Read Ghomala New Testament YOHANE 1 Bible Online

YOHANE 1 - Ghomala New Testament bible

YOHANE 1

¹Nə nə to', Ghɔm lə́ bɑ́, Ghɔm lə biŋ bɑ pu Si, Ghɔm lə bɑ Si.

²Ghɔm lə́ bɑ́ nə to' bɑ́ pu Si.

³Si lə́ dɑ pɑ Ghɔm nə́ gə guŋ ywə awɛ. Sɔmywə yə Si lə ghə a, e la tə́ cyətə lɑ pɑ yʉ nə gə pɑ́.

⁴Vɔk lə́ bɑ́ nə é; vɔk bɔ lə́ biŋ bɑ́ ŋkha' bi pɔmnəŋ.

⁵Ŋkha' piŋ ŋkhyɛ' nthʉm jʉ́m, da' gɑ́ jʉ́m lə yu' é pɑ́.

⁶Mu' mo lə pɑwə́, bɑ Si nə nthəm e; tso tsyə lə́ bɑ́ Yohane.

⁷E lə sɔ' pa' ŋkwinthɛ̌ a, nə ŋkwinthɛ̌ nə ŋkhá', po'o gɑ́ guŋ pɔmnəŋ awɛ cyə m nə e biŋ ŋkha'.

⁸E la tə́ bɑ ŋkha' pɑ, da' gɑ e lə bɑ́ ŋkwǐnthɛ bi ŋkha'.

⁹Ghɔm lə́ bɑ́ kwa' ŋkha' nyənyɔ. E lə́ nə sɔ' nthʉm dzʉ, bɑ ŋkhyɛ' guŋ pɔmnəŋ awɛ.

¹⁰E lə́ bɑ́ nthʉm dzʉ, Si lɑ́ dɑ pɑ yʉ́ gə dzʉ́, da' gɑ la' dzʉ̌ zhyə é biŋ.

¹¹E sɔ' kwa' nthʉ̌m gùŋ e, da' gɑ la' pɔ pyə́ lɑ́ e.

¹²Tə́ sɔ' bi pɔ pyə wap lə lɑ̌ e a, bi pɔ pyə wap biŋ tso tsyə a, e hɑ gʉ' nə jí pó Si bi pú.

¹³Pu tə́ dzə́ pɔ bɔ̌ m nə mcyə pɑ́, kɑ́ m pá' bap nɑ́ nə ŋkhuŋ a lə, kɑ́ m pá' mo nə ŋkhuŋ a lə. Pu dzə́ wap m pa' Si nə ŋkhuŋ a.

¹⁴Ghɔm lə cʉ' mo, biŋ shwə́ cəcɑ̌ pɑ́, pɑ́ piŋ jɔ ghu'tə e; ghu'tə bɔ, ŋkwi Mú Si yə gho' ba nyənyɔ bɑ ǎ lo nə é a ŋkwi bi Si.

¹⁵Yohane ŋkwinthɛ̌ é, bɑ gɔm gɑ: Yə̌ŋ bɑ́ mo yə gɑ̌ gɔm nə é gɑ: Mu' mo gɔ təm jʉ̌m m̀, bɑ e lě da' bɑ dzə̌ m̀, nə pa' ŋ də́ nə pɑwə bɑ é lě da' bɑwə.

¹⁶A shyə m pa' a bɑ ě lonyə nə gho' a, tə pɑ ghə gho' mzhəŋ mzhəŋ.

¹⁷A pɑ gɑ́ Mosɛ, lə hɑ mco', bɑ gho' pu a nyənyɔ sɔ̌' shyə́ m nə Yeso Kristo.

¹⁸Sɔm mó la m jɔ Si; ŋkwi Mu Si yə e bɑ nə Tá a lě gə pɑ zhyə́ e.

¹⁹Yəŋ bɑ nə kwinthɛ̌ yə Yohane lə kwǐ nə cwə yə pɑ Yudea Yerusalɛm lə tə̌m mkamsi pu a pɑ Levi bi e, wap həŋtə́ e gɑ: o bɑ wɑ?

²⁰E lə ghɔ̌m sɔsɔ̌, gɔm gɑ: ŋ tə́ bɑ́ Kristo pɑ.

²¹Wap piŋ həŋtə é gɑ: O bɑ wɑ? O bɑ Elia a? E pa' bi pú gɑ: ŋ tə bɑ é pɑ́. O bɑ gɔm ghɔm Si a? E pa' gɑ gɛ.

²²Wap ghɔm bi e gɑ: O bɑ wɑ? Nə́ ko hɑ piŋ ghɔm bi pɔ pyə wap nthəm wɔk a, kwa' wə gɔm gɑ́ o bɑ wɑ?

²³Yohane ghɔm bi pú gɑ: Gɑ̌ bɑ gi mo yə é shwe ghakgo gɑ: Po sɛtə məjyə cyəpɔ pa' gɔm ghɔm Si Esaya lə́ ghɔm a.

²⁴A lə nə pɑ́ po'o pɔ pyə pú lə təm wap a pɑ́ pɑ Farisai.

²⁵Wap lə tə́ŋtə́ Yohane nə gɔ dzə́, bɑ həŋtə́ e gɑ: A pɑ́ gɑ́ o tə́ bɑ Kristo a, kɑ Elia, kɑ gɔm ghɔm Si lə, bɑ o nu' pɔ shyə gɑ kɑ?

²⁶Yohane pa' bi pu gɑ: Myə̀, gɑ̌ nu' pɔ nthʉm shyə. Mu' mo cəcɑ̌ po bɑ po ka zhyə e;

²⁷ě jʉ̌m m̀ bɑwə sɔ̌', bɑ ŋ kha ku'nyə nə kyɛ' ŋkhə mthap myə́.

²⁸A lə shyətə po'o Betanya, nə yə mu' jʉɔ shyə́ Yurdɛŋ, tsʉ' yə Yohane lə́ bɑ́ nə bɑwə nu'pɔ shyə a.

²⁹Dzʉ́ lə lɔ̌, Yohane yɔ Yeso e pɑwə sɔ́' m bi e, gɔm gɑ: Yɔ mu jʉ̀jʉ̀ Si yə e nthé mhɔnwə dzʉ a yə̌ŋ.

³⁰A bɑ́ nə é tə́ ŋ dɑ́ gɔm gɑ: Mu' mo jʉ̌m m̀ bɑwə sɔ̌', bɑ dzə m̀, nə pa' ŋ də nə pɑwə bɑ́ e le da' bɑwə a.

³¹Kwa' myə̀, ŋ dá tə bɑwə jyə é pɑ; da' gɑ ŋ də nu' pɔ shyə, bɑ nə nyaptə pa' e gɔ təm cəcɑ̌ pɑ Israɛl a.

³²Yohane lə ŋkwinthɛ̌ gɔm gɑ: Gɑ̌ yɔ Zhwenyə, a fi' fɑ kɛbəŋ pa' səŋgɔp fo a, shwə nə e.

³³Ŋ da tə́ bɑwə jyə e pɑ; da' gɑ́ mo yə e lə təm a gɑ nu' pɔ shyə a lə ghɔm bəm gɑ: Mo yə o yɔ Zhwenyə fi' shwə nə e a, a bɑ mo yə e nu' pɔ nthʉ́m Zhwenyə Dɔlɔ̌ a.

³⁴Myə̀, gɑ̌ yɔ, biŋ bɑwə biŋ gɑ e bɑ Mú Si.

³⁵Dzʉ́ lə́ lɔ̌, Yohane kwi' bɑ tsʉ'u bɔ pu a shɑ pɑkhʉ̌ pyə pɑpʉə.

³⁶E lə tʉ̌ mnyə nə Yeso e pɑwə shyə̌, gɔm gɑ: Yɔ mu jʉ̀jʉ̀ Si yə̌ŋ.

³⁷Pɑkhʉ̌ pyə pɑpʉə lə yǔ' tsɔ ghɔm, jap jʉm Yeso.

³⁸Yeso lə fɛ nɑ́ e jɔ gɑ wap yap jʉm e, gɔm bi pu gɑ: Po shəŋ kɑ? Wap pa' gɑ: Rabi a pɑ́ da'tə gɑ Tá; gɔm gɑ: O shwə hɑ́?

³⁹E ghɔm bi pu gɑ: Po sɔ̌', pǒ gɔ yɔ. Wap lə ghɔ̌ jɔ tsʉ' yə e shwə nə a, biŋ shwə bəŋ e nə tyɛ'dzʉ bɔ; a lə bɑ́ gwɛ a nə batə mnam ghǎm.

⁴⁰Andreya, fɑ Simon Pɛtrɔ lə bɑ mu' mo nə pɔ pyə wap lə yu' gi Yohane, jap jʉm Yeso a.

⁴¹E ghɔ, dəŋdzə̀ jɔ kwa' fɑ e Simon gɔm bi e gɑ: Pyə yɔ Mesia, a pɑ da'tə gɑ́ Kristo.

⁴²E lə́ lɑ é nə gɔ bi Yeso. Yeso lə lé é dəŋdəŋ gɔm gɑ: O bɑ Simon, mú Yohane; pu gɔ pɑ ke o gɑ Kefas, a la'tə gɑ́ Pɛtrɔ.

⁴³Dzʉ lə lɔ̌, Yeso yap gɑ e gɔ ghɔ Galilea. E lə yɔ Filipo gɔm bi e gɑ: Yap jʉ̌m m̀.

⁴⁴A lə nə pɑ po'o Filipo pɑ yə Betsaida, tisuŋ Andreya pu Pɛtrɔ.

⁴⁵E lə ghɔ jɔ Natanaɛl gɔm bi e gɑ: Mo yə a bɑ pu və nwə nə é nthʉm mco' Mosɛ ba m nə ŋwa'nyə mghɔ́m ghɔ̀m Si a, pyə yɔ é: A bɑ Yeso Mu Yosɛp, yə Nazarɛt.

⁴⁶Natanaɛl pa' bi e gɑ: Bi a pɑ́ sɔmywə pɑpuŋ tə́m Nazarɛt a? Filipo ghɔm bi é gɑ: Sɔ̌', biŋ jɔ́.

⁴⁷Yeso lə lé Natanaɛl cwə yə e lə pɑ̌ sɔ' m bəŋ e a gɔm nə e gɑ: Yɔ kwa' yə Israɛl yə nyənyɔ, yə mfʉm tə̌ nə e a yə̌ŋ.

⁴⁸Natanaɛl həŋtə e gɑ: O jyə́ a hɑ? Yeso piŋ ba' bi e gɑ: Filipo e nə ké o, ba cwə yə o la' bɑ to thə nthɔmthə́ a bɑ gɑ e jɔ o.

⁴⁹Natanaɛl piŋ gɔm bi e gɑ: Rabi, o bɑ Mú Si, o bɑ fo pɑ Israɛl.

⁵⁰Yeso pa' bi e gɑ: Pa' gɑ̌ gɔm gɑ gɑ̌ e jɔ o to ta'thə nthɔmthə a ǒ piŋ. O gɔ sɔ' yɔ tsə tsyə a cyə po' a.

⁵¹Biŋ ŋkwi' gɔm gɑ: Kwa' nyənyɔ nyənyɔ gɑ̌ siŋ wɔ gɑ po gɔ sɔ' yɔ kɛbəŋ ghyɛ', a pɑ aŋgəle Si pɑ ŋkwɔ' lə fi' dəm Mú mo.