Read Ghomala New Testament YOHANE 11 Bible Online

YOHANE 11 - Ghomala New Testament bible

YOHANE 11

¹Mu' mbɛ lə bɑ́wə, bɑ gɛ gho; mo bɔ lə bɑ Lazaro, yə Betanya, la' pɑ Maria pu fɑ e Marta.

²Pu gɔm Maria yə é lə́ lɑ mwɑ damnyəlamnyə nə jwɔ' Cyəpɔ, biŋ dɑ nə̀ŋ thə́ e nə shi' mkwə myə́ a. Fɑ e Lazaro nə lə́ bɑwə gǒ.

³Mfɑ pyə́ pyə pɑ jwǐ lə́ təm gɑ́ pu ghɔ gɔm bi Yeso gɑ: Cyəpɔ, mo yə o ŋkhuŋ e a wə gǒ.

⁴Yeso lə cwə́ tə ju' po'o gɔm gɑ: Gho bǎ tə gɔ miŋ m nə vʉ̌ pɑ́, pu gɔ cyə m nə́ yɔ ghu'tə̀ Si: A gɔ cyə m nə́ tə pu ghu'tə Mu Si.

⁵A lə nə pɑ̌ po'o Yeso pɑ́ ŋkhuŋ Marta pu fɑ e yə mjwǐ ba Lazaro.

⁶Tə́ ba tə pa' e lə zhyə̌ gɑ Lazaro wə go a, e lə pǐŋ shwə tsʉ' yə e lə́ bɑ nə a tyɛ'dzʉ tsɑ pʉ̌ə.

⁷Tə́ biŋ gɔm bi pɑkhʉ̌ pyə gɑ: Pɑ̀ pɑnyə Yudea.

⁸Pɑkhʉ̌ pyə lə ghɔm bi e gɑ: Rabi, a ka sak pa' pɑ Yudea kɑ bɑwə shəŋ nə lɑ mwɔ' nthamtə o a; o biŋ shəŋ nə pɑnyə wə́ lə́?

⁹Yeso pa' bi pu gɑ: Ta' tyɛ'dzʉ tə́ bɑ ǎ ghə mnàm shwɔppʉə mgham a lə? Mo pɑ́ giŋ dɔdzʉ̌ bɑ e tə́ gɔ cwɔ' kwə e pɑ, nə pa' e bɑwə jɔ ŋkha' yəŋ dzʉ̌.

¹⁰Da' gɑ́ mo pɑ giŋ mtsʉ' bɑ e gɔ cwɔ' kwə e nə́ pa' ŋkha' tə bɑ nə e pɑ.

¹¹Yeso lə́ ghɔ́m mghɔm mɔ biŋ gɔm gɑ: So yɔk pɑ̀ Lazaro ti, da' gɑ́ gɑ̌ gɔ ghɔ yàm e.

¹²Pɑkhʉ̌ pyə ghɔm bi e gɑ: Cyəpɔ e pɑwə di bɑ e gɔ sɔ' vɔk.

¹³Yeso lə gɔm po'o bɑ gɔm vʉ́ Lazaro tə wap kwɛ yap gɑ́ e gɔm pɑ́ lwɔ̌k.

¹⁴Yeso ghɔm bi pu sɔsɔ̌ gɑ: Lazaro pfʉ́,

¹⁵tə ŋ bɑwə ŋwɛnyə nə po nə pa' ŋ kě tə pɑ tsʉ'u a, po'o gɑ a ghə po piŋ. Da' gɑ́ pɑ́ ghɔ bəŋ e.

¹⁶A lə pɑ̌ po'o, Tomasi, mo yə́ pu ŋkhe e gɑ́ Didimə a ghɔm bi pyə shɑ pɑkhʉ̌ gɑ: Pɑ ghɔ ba yɔk pɑ̀, po'o gɑ́ pɑ̀ a pú pəmtə́ pfʉ́.

¹⁷Yeso lə nə ŋwak, jɔ Lazaro m nthʉ̌m sì, bɑ ě cwə́ sí tyɛ' pfʉə.

¹⁸Nə pa' nthə́ Betanya bɑ̀ kilo pʉə mkam nə Yerusalɛm.

¹⁹Pɑ Yudea tə́ jɔ̀m lə́ bɑ wap sɔ' ywə Marta pu Maria nə zhwyətə wap nə vʉ̌ fɑ́ yap.

²⁰Marta lə nə yu' gɑ Yeso wə sɔ̌' gɔ məjyə jɔ e; da' gɑ Maria pɑ pɑ́ dyə bɑ ě cwəsi.

²¹Marta lə ghɔm bi Yeso gɑ: Cyəpɔ, o kɑ pé' e bɑ tsɔ'ɔ bɑ fɑ a kě tə pfʉ́.

²²Tə́ ba cwəlɔ gɑ̌ zhyə́ gɑ́ bǎ kɑ lə́ yə o gɔ ló bi Si a, Si gɔ hɑ bu.

²³Yeso ghɔm bi e gɑ: Fɑ o gɔ yam.

²⁴Marta pa' bi e gɑ: Gɑ̌ zhyə́ gɑ́ e gɔ sɔ' yam nə tyɛ' nə yam nə vʉ̌ nə jʉɔjʉ̀m tyɛ'dzʉ.

²⁵Yeso ghɔm bi é gɑ: Gɑ̌ bɑ nə yam nə vʉ̌, biŋ bɑ vɔk: Mo yə e piŋ a, é pfʉ́ ba pfʉ̀pfʉ̌ bɑ e gɔ vɔk;

²⁶a mo yə e nəŋ bvɔk biŋ biŋ a lə nəŋ da' pfʉ́. Ǒ piŋ po' a?

²⁷Marta pa' bi é gɑ: É m Cyəpɔ, gɑ̌ piŋ gɑ o bɑ Kristo, gɑ̌ piŋ gɑ o bɑ Mu Si Mo yə e sɔ' nthʉm dzʉ́ a.

²⁸E lə ghɔm po'o dú gɔ ŋkhe fɑ e Maria shamtə́ bi e gɑ: Tá tsi' e bɑwə ŋkhe o.

²⁹Maria lə nə yǔ' gúŋ dusi gɔ bəŋ e.

³⁰A lə́ nə pɑ̌ po'o Yeso yɑ́ tə wuŋ ŋkho nthʉm la' bɔ; e lə jɑ́ pɑ tsʉ' yə pú Marta lə yu'tə nə a.

³¹Pɑ Yudea lə bɑ dyə, bɑwə jwyətə Maria. Wap lə́ nə yɔ pá' e gúŋ dusi nthəm a jap jʉ̀m é, bɑwə ŋkwɛ gɑ e gɔ m thəsì nə lɔ̀.

³²Maria lə ŋwak tsʉ' yə Yeso lə́ bɑ nə a, shwə tə jɔ e, bvʉ nə mkwə myə́ gɔm bi e gɑ: Cyəpɔ, o kɑ pe' bɑ tsɔ'ɔ bɑ fɑ à kě tə̀ pfʉ́.

³³Yeso lə́ nə yo pa' Maria pu a pɑ Yudea pyə wap lə́ bɑ jʉ̀m e a wə dɔ́ a, tʉm tsyə sə́ŋ, lam tsyə sɔ.

³⁴E ghɔm gɑ: Pǒ yap é hɑ? Wap pa' bi e gɑ: Cyəpɔ, sɔ' jɔ́.

³⁵A pɑ́ po'o Yeso lɔ̀.

³⁶Pɑ Yudea lə bɑ́ gɔm gɑ: Po yɔ́ pa' e kɑ ŋkhuŋ e.

³⁷Da' gɑ shɑ̀ pɔ cəcɑ̌ pu ghɔm gɑ: Mo yə e lə ghyɛ' mnyə fʉ̀ a, e kě tə kú' nə kɔ̀ gɑ Lazaro kɑ pfʉ.

³⁸A pɑ po'o tʉm Yeso kwi' səŋ, e ghɔ thəsì; thəsì bɔ lə́ bɑ túŋ ghú gwɔ̀', bɑ pu lɑ mú' gwɔ' nə pfɔptə shwə é.

³⁹Yeso ghɔm gɑ: Po cʉ́ɔ gwɔ' yə̌ŋ. Marta, fɑ npfə́ ghɔm bi e gɑ: Cyəpɔ, e gɔ tsə́ pɑwə lam, nə pa' a cwəlɔ tyɛ' pfʉə.

⁴⁰Tə́ Yeso ghɔm bi e gɑ: Ŋ khě tə ghɔm bu gɑ́ o piŋ, bɑ o gɔ yɔ ghu'tə Si lə́?

⁴¹Pu lə́ cʉ̌ɔ gwɔ'. Yeso piŋ bʉ' mnyə myə́ gɔm gɑ: Ta gɑ̌ gho'tə ó nə pa' ǒ yu' a lə.

⁴²Gɑ̌ zhyə́ gɑ o ji ju' a guŋ mcwə awɛ, da' gɑ́ gɑ̌ gɔm po'o shyə m nə vəŋ pɔ̀ pɔ̌ pyə wap bə́ŋ m̀ a, po'o gɑ wap piŋ gɑ́ a bɑ ǒ təm a!

⁴³E lə́ ghɔm po'o shwé tə thə́ gɑ: Lazaro, tə́m!

⁴⁴Mo yə e lə́ bɑ ě pfʉ́ a tə̌m, bɑ pu kwɑ́ mkwə̀ myə́ pu a bu myə́, biŋ dɑ dzə́ sam sə́ e. Yeso ghɔm bi pɔmnəŋ gɑ: Po kyɛ' e, nthak e nəŋ e ghɔ.

⁴⁵Bo'gwyə pɑ Yudea pyə wap lə sɔ' bəŋ Maria biŋ jɔ ywə yə Yeso lə ghə a lə piŋ é.

⁴⁶Da' gɑ́ pyəshɑ́ ghɔ jɔ́ pɑ Farisai siŋ wap ywə yə Yeso gə a.

⁴⁷Mkamsi gwyəgwyə pu a pɑ Farisai lə ko cu'tə gɔm gɑ: Pɑ̌ gə kɑ? Bɛ yə̌ŋ wə gə mtiŋ msya yɔ̌m.

⁴⁸Pɑ̀ tak é nəŋ e nə gɔ dzə̀ po'o bɑ guŋ pɔ awɛ gɔ piŋ e, pɑ Roma ko nə́, sɔ' sa'tə tsʉ' dɔlɔ̌ yɔk pɑ̀ ba guŋ yɔk pɑ̀.

⁴⁹Mu' mo cəcɑ̌ pú, Kaifa yə e lə́ bɑ tádyə mkamsi gǔ' bɔ a ghɔm gɑ: Po tə wə jú' sɔmywə pɑ́.

⁵⁰Po lə piŋ bɑwə sɛ ba m gɑ́ dzə bi po gɑ́ ta' mo pfʉ́ nə thə́ pɔmnəŋ, po'o gɑ́ gùŋ kɑ simnyə̀ awɛ a?

⁵¹Mghɔm bɔ myə e lə ghɔm a lá tə́ bɑ myə́ pɑ́. Da' gɑ́ pa' e lə bɑ tadyə mkamsi gǔ' bɔ a, e lə gɔm pɑ ghɔm Si gɑ a lə́ bɑwə shəŋ gɑ́ Yeso pfʉ́ nə thə́ guŋ,

⁵²ba tə da' nə thə́ guŋ pɑ, ba m nə nə́ shu'tə́ po Si pyə wap bɑ wap sɛ dzʉ́ dzʉ̌ a nthʉm nthamtə.

⁵³A tyɛ'dzʉ bɔ tə́ wap lə́ nyə̌ŋ gɑ wap gɔ zhwə é.

⁵⁴Tə fɑ po' Yeso nə yə ghə́ŋ lə na' nə́ŋtə nə pɑ ŋkhəka cəcɑ̌ pɑ Yudea sɔsɔ̌; e lə təm gɔ m̀ ghə̌ŋ ghakgo, m nthʉ̌m tisuŋ Efraim pu a pɑkhʉ pyə́ pɑ́ shwə́ wə́.

⁵⁵A lə́ nə pɑ̌ po'o Paska pɑ Yudea pɑwə sɔ̌'. Bo'gwyə pɔ lə wuŋ yə mu' jʉ̀m dzʉ̌ fɑ go bʉɔ gɔ Yerusalɛm nə nə lɔnyə nɑ tsap.

⁵⁶Wap lə bɑwə shəŋ Yeso, biŋ bɑ Dyə Si tsʉ' yə wap lə bɑ nə a bɑ gɔm cəcɑ̌ pú gɑ: Pǒ sɛ gɑ kɑ̀? E tə́ gɔ sɔ' nə Paska pɑ̀.

⁵⁷A lə́ bɑ mkamsi gwyəgwyə ba pɑ Farisai hɑ mco' gɑ: Bǎ wɑlə́ yə ě zhyə́ tsʉ' yə e nə́ a la'tə́, pu ghɔ gəm é.