Read Ghomala New Testament YOHANE 13 Bible Online

YOHANE 13 - Ghomala New Testament bible

YOHANE 13

¹Ŋwɛnyə Paska lə nə ku' Yeso zhyə gɑ yə cwə wə bɑ ǎ ku', cwə yə e gɔ təm nə yəŋ dzʉ̌ ghɔ bəŋ Ta a, yʉ́ yə e lə́ bɑ e kuŋ pɔ pyə́ pyə wap bɑ nthʉm dzʉ a, e piŋ ŋkhuŋ wap tə́ miŋ.

²Pu a pu lə́ nə pɑ tsʉ̌ ywə, bɑ Sata tsə́ nyəŋ mkwɛnyə nə hɑ Yeso bi mghɛ bó pyə nthʉm tʉm Yuda Iskariɔt mu Simon.

³Yeso zhyə́ gɑ Tá nyəŋ guŋ ywə awɛ tuŋ pú e; jyə́ gɑ e nthəm nə Si, biŋ bɑ gɔ m bi yʉ Si,

⁴dusi dəm tɑpe, nthɔk dzə e jap si, shəŋ mu' kamdzə vʉ' e.

⁵Biŋ nyəŋ shyə nthʉm kɛ́, ntho' nə́ nə sɔk mkwə pɑkhʉ̌ pyə́, biŋ bɑ dɑ kamdzə yə a vʉ' e a nə shi'.

⁶E lə́ kəm nə Simon Pɛtrɔ, e ghɔm bi e gɑ: Wə Cyəpɔ sɔk mkwə mə̌ lə?

⁷Yeso pa' bi e gɑ: Ywə yə gɑ̌ wə gə a, bi a pɑ o lə zhyə́ cwəlɔ, da' gɑ́ o gɔ sɔ' yu' m jʉ̀m.

⁸Pɛtrɔ ghɔm gɑ: Tə o sɔk mkwə mə lə́! Gɛ̌, gɛ̌! Yeso ghɔm bi e gɑ: Bɑ tə sɔk o bɑ pu tə́ yɑ̌ nə sɔmywə pɑ́.

⁹Simon Pɛtrɔ ghɔm bi e gɑ: A pɑ́ pa' m Cyəpɔ, o kə́ sɔk da' mkwə mə̌, o sɔk ba bú mə̌ ba thə́ a.

¹⁰Yeso ghɔm bi e gɑ: Mo yə a bɑ e sɔk nɑ e a tə́ biŋ shəŋ gɑ́ pu sɔk e pɑ́, nə pa' a bɑ ě lɔ: Sɔ' m nə wɔ, a bɑ pǒ lɔ da' gɑ tə guŋ yɔ awɛ pɑ́.

¹¹Yeso lə́ bɑwə jyə́ mo yə́ e lə́ bɑwə gɔ hɑ e a; a cyə m po'o tə́ e ghɔm gɑ: Tə́ guŋ yɔ awɛ pɑ.

¹²Yeso lə́ miŋ nə sɔk mkwə máp, ŋkwa dzə e, biŋ shwə dəm tɑpe, gɔm bi pu gɑ: Pǒ yu' ywə yə gɑ̌ gə nə po a lə́?

¹³Pǒ ŋkhe a gɑ Tá, ba m gɑ́ Cyəpɔ, bɑ̀ po ka hɔ, nə pa' gɑ̌ bɑ e.

¹⁴Bi a pɑ gɑ myə̀ Cyəpɔ, bíŋ bɑ́ Tá, gɑ̌ sɔk mkwə mɔ, bɑ pǒ gɔ pɑ́ sɔk mkwə mɔ cəcɑ̌ po,

¹⁵nə pa' a fo' yə gɑ hɑ́ bi po a: Ywə yə gɑ gə bi po a, po ghə po'o bi pyəshɑ pɔ.

¹⁶Kwa' nyənyɔ nyənyɔ, gɑ̌ siŋ wɔ gɑ gɛfa' tə́ bɑ ě cyə tá fa' e pɑ́, kɑ mo yə pu nthəm e nə cyə mo yə é nthəm e a lə.

¹⁷Po zhyə po'o, bɑ pǒ bɑ mpuŋtsé, bi a pǒ ghiŋ po'o a.

¹⁸Ŋ tə gɔm nə guŋ yɔ awɛ pɑ́; gɑ̌ bɑ gɑ̌ zhyə́ pɔ pyə́ gɑ shwɔ' wap a. Da' gɑ́ ywə yə pu lə və a, a pəmtə́ gɑ: Mo yə pyə é lə́ pəmtə́ dzʉ̌ ywə a lě fɛ jʉm a.

¹⁹Gɑ̌ siŋ wɔ cwəlɔ po'o tə́ nwə tə́m, po'o gɑ a cwə tə́ nthəm po piŋ gɑ́ Gɑ̌ bɑ.

²⁰Kwa' nyənyɔ nyənyɔ gɑ̌ ghɔm bi po gɑ nə lɑ mo yə gɑ̌ gɔ sɔ' təm é a bɑ nə lɑ kwa' myə̀. Nə nəŋ dɑ́ a pɑ nə lɑ Mo yə e nthəm a lə́.

²¹Yeso lə́ ghɔm po'o, lam tsyə sɔ, e piŋ gɔm sɔsɔ̌ gɑ: Kwa' nyənyɔ nyənyɔ mu' mo nə po gɔ hɑ a.

²²Pɑkhʉ̌ pyə cʉnyə́, bɑ́ həŋtə́ cəcɑ̌ pú mo yə e gɔm é a.

²³Mu' mukhʉ̌ yə Yeso lə́ ŋkhuŋ e a lə bɑ bəŋ e.

²⁴Simon Pɛtrɔ nwɔ'tsə bi gɑ: Tsɑtə e gɑ e gɔm wɑ́lə?

²⁵Mukhʉ̌ bɔ lə pɔ̌ nɑ e nə́ kəkɔp Yeso, gɔm bi e gɑ: Cyəpɔ, a bɑ wɑ́?

²⁶Yeso pa' gɑ: A mo yə́ gɑ gɔ co' bo'ywə hɑ bi a. E lə ghɔm po'o sho' bo' ywə hɑ bi Yuda Iskariɔt, mu Simon.

²⁷Tə́ fɑ cwə yə Yeso lə hɑ̌ bo'ywə bɔ bi Yuda á, Sata ko nə e. Yeso ghɔm bi e gɑ: Ywə yə o gɔ ghə a, lo'nyə gə̌.

²⁸Sɔmmo nə pɔ pyə wap lə bɑ tsʉ'u a la tə yu' ywə yə a gə tə́ Yeso ghɔm po'o a pɑ́.

²⁹Pa' Yuda lə́ gwim peté a, shɑ pɔ lə́ kwɛ m gɑ Yeso gɔm bi e gɑ́ e yó ywə yə a gɔ kwitə nə ŋwɛnyə, kɑ m gɑ e hɑ ywə bi mpə̌ŋ lə.

³⁰Da' gɑ sɔ' m nə Yuda, e lə cwə tə ŋkwi bó' ywə bɔ, guŋ nthəm: A lə́ bɑ mtsʉ'.

³¹Yuda lə́ cwə tə́ nthəm, Yeso ghɔm gɑ: Pu e da' gu'tə Mu mo a piŋ bɑ́ bɑ pu lě shyə m nə e gu'tə Si.

³²Si gɔ ghu'tə e cyə pɑ m nə yʉ Si. Ǎ cʉ' muywə Si ghu'tə e.

³³Pǒ mkəcɔk po pɑ̌, jɑ̌ cəcɑ̌ po pɑ́ nə muywə cwədzʉ̌. Pó gɔ sɔ' cəŋ a; dəŋdəŋ pa' ŋ də ghɔm bi pɑ Yudea gɑ: Tsʉ' yə gɑ gɔ m nə a, bi a pɑ́ po lə sɔ' tsʉ'u a, ba m bi po yɔ gɑ̌ wə gɔm po'o cwəlɔ.

³⁴Gǎ wə hɑ ta' mco' sə bi po: Po kuŋnyə wɔ wɔ. Dəŋdəŋ pa' dɑ kuŋ wɔ a, po pɑ ŋkhuŋnyə wɔ wɔ.

³⁵A pɑ gɑ̀ po ghə ŋkhuŋnyə cəcɑ̌ po, bɑ guŋ yap awɛ gɔ zhyə́ gɑ́ po bɑ pɑkhʉ̌ pɑ̌.

³⁶Simon Pɛtrɔ ghɔm gɑ: Cyəpɔ o gɔ m hɑ́? Yeso pa' bi e gɑ tsʉ' yə gɑ̌ gɔ m nə a, bi a pɑ́ o lə yap jʉ̀m m̀ cwəlɔ, da' gɑ o gɔ lá' yap jʉ̀m m̀.

³⁷Pɛtrɔ ghɔm gɑ: Cyəpɔ, nwə kɑ́ tə́ bi a pɑ ŋ də yap jʉm o cwəlɔ? Gɑ̌ gɔ sɔ' wa' vɔk a nə o.

³⁸Yeso pa' bi e gɑ: Wa' vɔk o nə m̀! Kwa' nyənyɔ nyənyɔ gɑ̌ siŋ o gɑ: O gɔ kəŋnyə a mcʉm ntha tə́ ko' túŋ.