Read Ghomala New Testament YOHANE 14 Bible Online

YOHANE 14 - Ghomala New Testament bible

YOHANE 14

¹A lam tsɔ kɑ sɔ; po piŋ Si, po piŋ ba myə̀ yɑ̌.

²Mtsʉ' bɑ dyə Tá a tə́ jɔ́m; ka po'o a bɑ gɑ̌ ghɔm bi po gɑ́ gɑ̌ gɔ ghɔ nyaptə tsʉ' bi po yə po gɔ sɔ' pɑ́ nə á lə?

³Cwə yə gɑ̌ gɔ ghɔ tə nyaptə tsʉ' bi po a, a biŋ sɔ' dɑ wɔ pɑ ghɔ̌, po'o gɑ́ tsʉ' yə gɑ̌ nə a, ba wɔ yɔ sɔ' bɑ́ tsʉ'u.

⁴Sɔ' m nə tsʉ' yə gɑ̌ gɔ m nə́ a, a bɑ po zhyə məjyə.

⁵Tomasi ghɔm bi e gɑ: Cyəpɔ, pyə bɑ pyə ka zhyə́ bǎ tsʉ yə o gɔ m nə a, tə̀ pyə gɔ zhyə́ məjyə m gɑ́ kɑ?

⁶Yeso ghɔm bi e gɑ: Gɑ̌ bɑ məjyə, bíŋ bɑ́ nyənyɔ, bíŋ bɑ vɔk. Sɔmmo tə́ gɔ bi Tá tə cyə pɑ m nə m̀ pɑ.

⁷Po la' pé'e jyə́ a, bɑ po zhyə ba Tá a. Tə fɑ cwəlɔ pǒ bɑ pǒ zhyə e, biŋ bɑ́ bɑ pǒ yɔ e.

⁸Filipo ghɔm bi e gɑ: Cyəpɔ, la'tə wɔk Tá, a ku' bi pyə.

⁹Yeso ghɔm bi e gɑ: Myə, gɑ̌ bɑ́ cəcɑ̌ po tə fɑ tə tyɛ̌', ba tə po'o wə Filipo o lə piŋ jyə a lə? Mo yɔ a, bɑ ě yɔ Tá: Nwə kɑ o ghɔm gɑ: La'tə wɔk Tá a?

¹⁰O tə́ biŋ gɑ́ gɑ̌ bɑ nə́ Tá, Ta piŋ bɑ nə m̀ a? Mghɔm myə gɑ̌ gɔm bi po a, ŋ tə gɔm nə́ yɑ thə́ pɑ́. Tá yə e bɑ nə m̀ a nə fá' mfà' myə́.

¹¹Po piŋ gɑ́ gɑ̌ bɑ nə Tá, Tá pɑ nə m̀; bi a pɑ pɑ́ gɑ́ po tə gɔ piŋ ghɔm tsɑ̌ pɑ́, po piŋ shyə m nə mfa' myə́ mɔ gɑ.

¹²Kwa' nyənyɔ nyənyɔ, gɑ̌ siŋ wɔ gɑ́ mo yə ě piŋ a bɑ ba yʉ́ gɔ fa' mfá' myə gɑ̌ fa' a. E gɔ fa' a cyə ba m po'o, nə pa' gɑ̌ gɔ m bi Tá.

¹³Gúŋ ywə awɛ yə po gɔ lɑ tsó tsɑ̌ lo a, bɑ gɑ̌ gɔ ghə, po'o gɑ a cyə m nə Mú pu ghu'tə Tà.

¹⁴Po lo ywə bəm m nə tso tsɑ̌ bɑ gɑ̌ gɔ ghə po'o.

¹⁵Po kuŋ a bɑ po gɔ kaktʉɔ nə ghiŋ nə́ mco' mə̌;

¹⁶a shwyɛ'nyə Tá, e hɑ mu' Parakle yə pu a pu gɔ pɑ́ guŋ mcwə awɛ a bi po.

¹⁷Yú nə bɑ Zhwenyə nyənyɔ, mo yə dzʉ̌ bɑ e ka ku' nə kwi e a, nə pa' dzʉ̌ tə́ jɔ e pɑ́, e lə nəŋ jyə́ e. Po bɑ pǒ zhyə e nə pa' e shwə bəŋ po, biŋ bɑ nə po.

¹⁸Ŋ tə gɔ tak wɔ pa' pǒmcyə a pɑ́, gɑ̌ wə sɔ' m bi po.

¹⁹Ǎ cʉ' muywə dzʉ̌ lə piŋ jɔ a; tə́ po gɔ pɑ yɔ a, bɑ pɑ wə́, ba wɔ yɔ pɑ́ pɑ wə́.

²⁰A gɔ sɔ' pɑ́ tyɛ'dzʉ́ bɔ, po zhyə gɑ́ gɑ̌ bɑ nə Tá a, po pɑ nə m̀, bɑ nə po.

²¹Mo yə ě tɔm mco' mə̌, biŋ bɑ giŋ nə a, mo bɔ ŋkhuŋ a: Mo yə ě nəŋ ŋkhuŋ a, bɑ Tá a gɔ kuŋ e, ba myə̀ yɑ̌ piŋ ŋkhuŋ e, Ta piŋ gə e zhyə a.

²²Yuda yə e tə bɑ yə Iskariɔt a pɑ́ ghɔm bi e gɑ: Cyəpɔ kɑ gə o ghɔ ghə pyə zhyə o, tə́ o lə ghə dzʉ̌ zhyə o?

²³Yeso pa' bi e gɑ: Mo kùŋ á, bɑ e gɔ zhyə̀ ghɔm tsɑ̌, a Tá a kuŋ é; A pyə sɔ̌' bi e, gə tsʉ' shwə yɔk ywə e.

²⁴Mo yə e tə́ ŋkhuŋ a a pɑ́ tə jyə̀ ghɔm tsɑ̌ pɑ́. A nəŋ nə́ pɑ̌ po'o, ghɔm bɔ tsyə po jú' a lə pɑ́ ghɔm tsɑ̌, a bɑ́ tsyə Tá a yə e nthəm a.

²⁵Dě siŋ wɔ mnwə bǎ nə cwə yə ŋ də bɑ́ bəŋ po a.

²⁶Tə́ Parakle, Zhwenyə Dɔlɔ̌ yə Tá gɔ təm bi po cyə m nə́ tso tsɑ̌ a gɔ sɔ' zhi'tə wɔ guŋ mnwə awɛ, piŋ ghə po kamtə myə də ghɔm a awɛ.

²⁷Gɑ wə nthak hwitə bi po; gɑ̌ hɑ hwitə a bi po. Ŋ tə hɑ m nthi pa' dzʉ̌ hɑ a pɑ́. Lam tsɔ kɑ kwi' sɔ, po kɑ kwi' bwɔk.

²⁸Po yu' nwə bɔ, gɑ ghɔm bi po gɑ: Gɑ̌ gɔ ghɔ, piŋ sɔ' bi po. Po la' pe' e bɑ ŋkhuŋ a bɑ po gɔ ŋwɛnyə pa' gɑ gɔ m bi Tá a, nə pa' Tá bɑ é cyə a.

²⁹Gɑ̌ gɔm bi po cwəlɔ tə́ nwə bɔ cwə́ sɔ̌', po'o gɑ a cwə́ tə sɔ́' po piŋ.

³⁰Tə́ fɑ cwəlɔ, pɑ̀ tə gɔ kwi' pəmtə cɔm nwə pɑ, nə pá' fo yəŋ dzʉ̌ wə sɔ̌'. A nyənyɔ gɑ e ka ghə sɔm gʉ' nə m̀;

³¹Tə́ e bɑwə sɔ' po'o tə́ dzʉ̌ zhyə gɑ gɑ̌ ŋkhuŋ Tá a, biŋ bɑ gə bǎ kɑ lə pɑ pa' Tá jap a. Po lusi, pɑ fɑ tsɔ̌' gɔ̌!