Read Ghomala New Testament YOHANE 16 Bible Online

YOHANE 16 - Ghomala New Testament bible

YOHANE 16

¹Gɑ̌ gɔm guŋ mnwə bǎ awɛ po'o gɑ po kɑ̀ vʉ̀ nə mləŋtə̀.

²Pú gɔ sɔ' pɑ́ té wɔ msinagogə. Cwə nəŋ bɑwə sɔ̌' yə mo yə e gɔ zhwə wɔ́ a gɔ pɑ kwɛ m̀ gɑ e pa' a bɑwə nuŋpwɔ' bi Si a.

³Wap gɔ sɔ' pɑ ghətə po'o nə pa' a bɑ wap ka zhyə́ Tá, wap lə́ nəŋ jyə ba myə̀.

⁴Tə́ gɑ̌ siŋ wɔ po'o gɑ cwə bɔ cwə tə sɔ̌', po kamtə gɑ́ ŋ dě siŋ wɔ. Ŋ dě tə siŋ wɔ́ tə fɑ cwə nə́ to', nə pa' pɑ lə bəmtə bɑ́.

⁵Tə́ cwəlɔ gɑ̌ gɔ m̀ bə̌ŋ mo yə e lə təm a á, la' sɔmmo yɔ nəŋ həŋtə a gɑ́: O gɔ m hɑ?

⁶Cwəlɔ yə gɑ̌ siŋ wɔ a, nə zhwíŋ lo nthʉm tʉm po.

⁷Tə́ a bɑ́ po'o bɑ gɑ̌ siŋ wɔ nwə nyənyɔ; dzə̀ bɑ bi po bɑ gɑ ŋ gɔ̌, nə pa' bɑ́ tə ghɔ bɑ Parakle tə́ gɔ sɔ' bi po pɑ́; tə́ da gɔ̌ bɑ gɑ gɔ təm e bi po.

⁸Sɔ' m nə e, nə yə nə sɔ', e gɔ ghə dzʉ̌ zhyə́ mhɔ, jyə́ nwə dəŋdəŋ ba nə fyɛ':

⁹Nə mhɔnwə. Wap tə́ biŋ a pɑ;

¹⁰nə nwə dəŋdəŋ nə pa' gɑ̌ gɔ̀ m bəŋ Tá, po lə ghɔ piŋ pɑ́ yɔ a.

¹¹Nə nə́ fyɛ' nə pa' a bɑ pu tsə fyɛ' mu fo yəŋ dzʉ̌.

¹²Shɑ mnwə yɑ̌ si myə gɑ̌ gɔ siŋ wɔ a, da' gɑ cwəlɔ po ka wuŋ ŋkhu' nə yu';

¹³cwə yə́ Zhwenyə nwə nyənyɔ gɔ sɔ' sɔ' bi po a, e ghə po zhyə guŋ nwə nyənyɔ awɛ, nə pa' e tə́ gɔ sɔ' pɑ́ ghɔmnwə pɑ́ nə yə́ thə́ pɑ. E gɔ sɔ' pɑ́ ghɔmnwə yə e yu' a, pɑ siŋ wɔ guŋ ywə awɛ yə a gɔ sɔ' a.

¹⁴E gɔ sɔ' ghu'tə a nə pa' e gɔ sɔ' pɑ́ kwi ywə yə á bɑ bəm a tə́ siŋ wɔ.

¹⁵Guŋ tsə́ tsyə Tá a bɑ é ghə a bɑ pɑ bəm; á shyə m po'o tə́ bɑ gɔm gɑ́ e gɔ sɔ' ghə po zhyə ywə yə é ŋkwi bəm a.

¹⁶A cʉ' muywə́ po lə piŋ jɔ a, biŋ shʉ' muywə po piŋ jɔ a.

¹⁷Shɑ pɑkhʉ̌ pyə lə bɑ gɔm cəcɑ̌ pú gɑ: E shəŋ nə ghɔm bí pɑ̀ gɑ́ kɑ tə́ gɔm gɑ: A cʉ' muywə po lə piŋ jɔ a, biŋ shʉ' múywə po yɔ a? Kɑ nə ghɔm gɑ́: Gɑ gɔ m bi Tá á?

¹⁸Wap lə bɑwə gɔm gɑ: Muywə bɔ da'tə gɑ kɑ̀? Pyə tə̌ wə ju' ywə yə é bɑwə shəŋ nə ghɔm a pɑ́.

¹⁹Yeso lə́ zhyə́ gɑ́ wap wə́ shəŋ nə həŋtə e nwə, gɔm bi pu gɑ: Po wə shəŋ cəcɑ̌ po nə zhyə ywə yə́ ghɔm tsɑ̌ gɑ́: A cʉ' muywə po lə piŋ jɔ a, biŋ shʉ' muywə po piŋ jɔ a da'tə a.

²⁰Kwa' nyənyɔ nyənyɔ gɑ̌ siŋ wɔ gɑ́ po gɔ pɑ zhwíŋ piŋ pɑ lɔ̀, a dzʉ̌ pɑ ŋwɛnyə; po gɔ sɔ' pɑ zhwiŋ, da' gɑ zhwìŋ yɔ gɔ sɔ' pʉɔ cʉ' ŋwɛnyə̀.

²¹Cwə yə mjwǐ bɑ dzə́ a, jwiŋ nə pa' yə cwə bɑ ǎ ku'; da' gɑ́ e shwə tə́ dzə́ mú, e lə piŋ ŋkhamtə́ ghəghʉɔ e, e ŋwɛnyə ŋwɛnyə nə pa' e tsə mo a.

²²A bɑ po'o tə́ pǒ cwəlɔ̀ bɑwə jwiŋ; da' gɑ gɑ̌ gɔ sɔ' piŋ yɔ wɔ m sə, tʉm tsɔ ŋwɛnyə, ŋwɛnyə yə bi a pɑ́ sɔmmo lə kwi bi po a.

²³A po'o tə́ a gɔ sɔ' pɑ́ nə tyɛ'dzʉ́ bɔ, po lə piŋ həŋtə a sɔmywə. Kwa' nyənyɔ nyənyɔ gɑ̌ siŋ wɔ gɑ̀ po ló bǎ kɑ̀ lə bi Tá a m nə tso tsɑ̌ bɑ e gɔ hɑ bi po.

²⁴Tə́ ŋkhəm cwəlɔ po ka lo sɔmywə bi Ta a m nə tso tsɑ̌: Po ló, pu gɔ hɑ bi po tə́ ŋwɛnyə yɔ pɑ tə dzə.

²⁵Gɑ̌ lɑ pɑ̀ mghɔm tə tútə nə siŋ wɔ guŋ mnwə bɔ awɛ, da' gɑ́ cwə wə sɔ̌' yə ŋ tə́ gɔ piŋ ghɔmnwə bi po m nə nthi bɔ a pɑ́, yə gɑ̌ gɔ siŋ wɔ nwə nə́ Tá sɔsɔ̌ a.

²⁶A gɔ sɔ' pɑ nə tyɛ'dzʉ́ bɔ po ló ywə bi Tá nə tsó tsɑ̌, da' gɑ ŋ tə́ gɔm bi po gɑ́ gɑ̌ gɔ sɔ' cwyɛ'nyə Tá nə po pɑ́,

²⁷nə pa' kwa' yʉ Tá ŋkhuŋ wɔ, shyə́ m nə pa' a bɑ pǒ kuŋ a, biŋ bíŋ gɑ́ gɑ̌ nthəm m̀ nə́ Si.

²⁸Gɑ̌ nthəm m nə́ Tá sɔ' nthʉm dzʉ́, biŋ bɑwə cwəlɔ nthəm nthʉm dzʉ́ gɔ m bi Tá.

²⁹Pɑkhʉ̌ pyə́ ghɔm bi e gɑ: Cwəlɔ ǒ wə gɔmnwə sɔsɔ̌, o lə piŋ bɑwə gɔm ghɔm tə tútə́ pɑ;

³⁰Cwəlɔ pyə̌ zhyə́ gɑ́ o bɑ o zhyə́ guŋ ywə awɛ, pyə̌ zhyə gɑ́ o tə́ yɑ̌ wə byap ga pu həŋtə́ o sɔmywə pɑ́. A ywə́ yə a gə tə́ pyə piŋ gɑ́ o nthəm m nə Si a.

³¹Yeso pa' bi pú gɑ: Pǒ piŋ cwəlɔ a?

³²Po yɔ́, cwə̌ wə́ sɔ̌', cwə bɔ tsə pɑ̀ yə̌ŋ, yə́ po gɔ sɛtə, bǎ yà mo lə́ ghɔ nə yə məjyə, po tak á do m̀ a. Da' gɑ ŋ tə́ bɑ́ dǒ m̀ pɑ. Pyə́ Tá nə bɑ.

³³Gɑ̌ siŋ wɔ nwə bɔ po'o gɑ́ po cyə m nə m̀ gə hwitə̀. Nthʉm yəŋ dzʉ̌ po bɑwə jɔ ghəghʉɔ. Tə́ po kaktʉɔ, gɑ̌ bɑ gɑ̌ ló' shyə́ dzʉ́.