Read Ghomala New Testament YOHANE 17 Bible Online

YOHANE 17 - Ghomala New Testament bible

YOHANE 17

¹Yeso lə́ nə mìŋ nə ghɔm po'o, bʉ' mnyə myə́ kɛbəŋ gɔm gɑ: Tǎ, cwə̌ ku', ghu'tə́ Mú u tə́ Mú u ghu'tə o.

²Tə́ a piŋ shyə m nə gʉ' yə o hɑ bi e nə́ guŋ monəŋ awɛ a, e hɑ vɔk mama bi guŋ pɔ awɛ pyə o hɑ wap bi e a.

³Vɔk mama bɔ pɑ́ gɑ́ wap zhyə́ o, wə da' Si nyənyɔ, biŋ jyə́ mo yə́ o nthəm e a, Yeso Kristo.

⁴Gɑ̌ ghu'tə o dəmcǎ', gɑ̌ miŋ fa' tsyə o lə́ hɑ̌ gɑ́ gə a.

⁵Cwəlɔ, m Ta, ghu'tə a bəŋ o, nə mtiŋ ghu'tə yə a lə bɑ gɑ̌ ghə bəŋ o tə́ dzʉ̌ la' bɑwə a.

⁶Gɑ̌ ghə pɔ pyə o lə hɑ wap bəm nthʉm dzʉ a zhyə tso tsʉ̌. Wap lə́ bɑ́ bu, o hɑ́ wap bəm, wap lě giŋ nə pa' ghɔm tsǔ gɔm a.

⁷Wap bɑ wap zhyə́ cwəlɔ gɑ́ guŋ ywə awɛ yə́ o hɑ bəm a fɑ́ pɑ́ bu.

⁸Wap zhyə́ gɑ́ mghɔm myə gɑ̌ gɔm bi pú a bɑ mghɔm myə o hɑ bəm a. Wap kwi mghɔm bɔ; wap zhyə́ nyənyɔ gɑ́ gɑ̌ nthəm nə o nə́ŋ biŋ bíŋ gɑ́ wə nə nthəm a.

⁹Gɑ̌ shwyɛ'nyə o nə pú, ŋ tə́ shwyɛ'nyə o m nə dzʉ̌ pɑ́; gɑ̌ shwyɛ'nyə o nə pɔ pyə́ o hɑ́ wap bəm a: Wap bɑ́ bu,

¹⁰a piŋ bɑ guŋ ywə yə ǎ bəm a pɑ́ bu, guŋ ywə yə a bu a pɑ bəm, a po'o tə́ pu lə́ gu'tə a shyə m nə́ pú.

¹¹Tə fɑ cwəlɔ ŋ tə́ jɑ nthʉm dzʉ́ pɑ́; tə́ wap shwə pɑ nthʉm dzʉ́; tə́ sɔ' m nə́ m̀ gɑ̌ bɑwə sɔ' m bu. Ta dɔlɔ̌, pyap wap shyə́ m nə́ tso tsǔ tsyə o lə́ hɑ̌ bəm a, po'o gɑ wap pɑ yɑmu' pa' wɔk pú bɑ́ yɑmu' a.

¹²Cwə yə pyə a pú lə́ bəmtə́ bɑ a, ŋ bɑ́ byap wap shyə m nə́ tsò tsǔ tsyə o lə́ hɑ bəm a: Ŋ dě pfɔ́ptə wap tə́ la' sɔ́m mo yap pi tə́ ně da' mú bi pǐ, po' gɑ ywə yə pu lə və a pəmtə̀.

¹³Cwəlɔ gɑ̌ wə sɔ' m bəŋ o, tə́ ba tə́ po'o, nthʉm yəŋ dzʉ̌, jɑ́wə siŋ wap mnwə mɔ̌ po'o gɑ wap ghə ŋwɛnyə a, guŋ ŋwɛnyə awɛ nə pú.

¹⁴Ŋ dě hɑ ghɔm tsʉ̌ bi pú, dzʉ̌ piŋ bɔ wap nə pá' wap tə́ bɑ pɑ dzʉ́ pɑ́, dəŋdəŋ pa' ŋ tə́ bɑ́ yə dzʉ́ a pɑ́.

¹⁵Ŋ tə́ dó bu gɑ́ o té wap nthʉm dzʉ́ pɑ. Gɑ̌ dó bu gɑ́ o pfɔptə wap nə Cwəpuŋ.

¹⁶Wap tə́ bɑ pɑ dzʉ́ pɑ́, dəŋdəŋ pa' ŋ tə́ bɑ yə dzʉ́ a pɑ́.

¹⁷Lɑ́ nyənyɔ dɔnyə wap: Ghɔm tsǔ bɑ́ nyənyɔ.

¹⁸Dəŋdəŋ pa' o nthəm a nthʉ́m dzʉ́ a, gɑ̌ tə́m wap nthʉm dzʉ́.

¹⁹Gɑ̌ guŋ bɑ yɑ̌ pɑ nə pú, po'o gɑ ba wap yap wuŋ bɑ́ pɑ nə nyənyɔ.

²⁰Ŋ tə́ shwyɛ'nyə o da' nə pu pɑ́, gɑ̌ shwyɛ'nyə bɑ m nə pɔ pyə á gɔ cyə m nə ghɔm tsap wap piŋ á a;

²¹gɑ́ guŋ yap awɛ pɑ́ yɑmu' pa' wə Tá o bɑ bəm biŋ bɑ́ bu á, gɑ́ ba wap yap pɑ́ nə pu tə́ dzʉ̌ piŋ gɑ́ wə̀ nə́ nthəm a.

²²Gɑ̌ bɑ gɑ hɑ ghu'tə yə o lə́ hɑ bəm a bi pú, po'o gɑ́ wap pɑ yɑmu' pa' pu bɑ́ yɑmu' a.

²³A bɑ bi pú pa' o bɑ́ bəm a, po'o gɑ wap pɑ́ kwa' nə ŋkwishwə pɑpuŋ tə́ a cyə m po'o a dzʉ̌ zhyə gɑ́ wə nə́ nthəm a, ba gɑ́ a bɑ ǒ kuŋ wap dəŋdəŋ pa' o ŋkhuŋ a lə.

²⁴Ta, gɑ̌ shəŋ gɑ́ tsʉ' yə gɑ̌ nə́ a, pɔ pyə o hɑ wap bəm a, pyə a pú pəmtə́ bɑ́ tsʉ'u, po'o gɑ́ wap yɔ ghu'tə yə́ o hɑ bəm a, nə pa' o le ŋkhuŋ a tə́ dá' nyaptə dzʉ́.

²⁵Tá dəŋdəŋ, a bɑ dzʉ̌ ka zhyə́ o, gɑ̌ bɑ gɑ̌ zhyə o, ba pɔ pɔ zhyə́ gɑ o təm a.

²⁶Gɑ̌ ghə̀ wap zhyə́ tsó tsǔ, biŋ bɑ gɔ kwi' ghə wap zhyə po'o gɑ́ ŋkhuŋnyə yə o nə ŋkhuŋ a pɑ̀ bi pú ba myə̀ piŋ bá bi pú.