Read Ghomala New Testament YOHANE 18 Bible Online

YOHANE 18 - Ghomala New Testament bible

YOHANE 18

¹Yeso lə́ ghɔ̌m po'o, gɔ̌ pu a pɑkhʉ̌ pyə́ nə yəmu' jʉɔ cwɛ mcɑ Kedroŋ; mu' kà lə bɑ tsʉ'u yə e lə ko nə pu a pɑkhʉ̌ pyə́ a.

²A lə́ nə pɑ bɑ Yuda, yə e lə bɑ gɔ hɑ Yeso a zhyə́ tsʉ'u bɔ. Nə pa' Yeso pu a pɑkhʉ pyə lə́ bɑ wap lə cu'tə tsʉ'u mcʉm jɔmyɔ̌m.

³E lə tiŋnyə thə́dzə̀, msəŋwi pu a pɑ pyap pɑ́ jʉ̀m e, bɑ mkamsi gwyəgwyə pu a pɑ Farisai nə́ nthəm wap. Wap lə kǒ kà, bɑ wap wim mcu' khá' pu a mlǎmbù, ba tsə shù.

⁴Pa' Yeso lə́ bɑ ě zhyə́ ywə yə́ a wə gɔ sɔ' nə́ é a, e lə fʉ'tə nɑ́ e gɔ bəŋ pú, gɔm bi pú gɑ: Pǒ shəŋ wɑ̀?

⁵Wap pa' bi e gɑ: Yeso yə́ Nazarɛt. E ghɔm bi pú gɑ gɑ̌ bɑ́ é. A lə́ nə pɑ̌ po'o Yuda yə e lə bɑ gɔ hɑ Yeso a pɑ cəcɑ̌ pu.

⁶Yeso lə́ cwə tə́ gɔm bi pu gɑ́ gɑ̌ bɑ́ e, wap fʉ' jʉ̀mjʉ̀m bvʉtə́ si.

⁷Yeso lə kwi' həŋtə́ wap m sə gɑ: Pǒ shəŋ wɑ? Wap pa' gɑ: Yeso yə́ Nazarɛt.

⁸Yeso pa' bi pú gɑ: Gɑ̌ siŋ wɔ gɑ́ gɑ̌ bɑ e. A pɑ gɑ́ po shəŋ pɑ́ myə̀, po tak pɔ pɔ gɑ wap ghɔ.

⁹A lə pɑ̌ po'o, ghɔm tsyə Yeso lə ghɔm gɑ: Ŋ kha pi sɔmmo nə́ pɔ pyə o lə hɑ̌ wap bəm á, a pəmtə.

¹⁰A lə pɑ̌ po'o Simon Pɛtrɔ yə a lə bɑ ě tyəp nyə a té nyə bvɔ nə nɔk gɛ fá' ŋkhamsi gwyə́, ja' təŋ ě yə tʉɔ; tsǒ gɛ fà' bɔ lə́ bɑ Malkos.

¹¹Yeso ghɔm bi Pɛtrɔ gɑ: Nyəŋ piŋ nyə́ o bvɔ! Ŋ tə́ gɔ nwə́ nthu' yə Tá hɑ bəm a pɑ a?

¹²Msə̌ŋwi pu a tadyə yap ba pɑ pyap pɑ Yudea lə ghəm Yeso cwəlɔ ŋkwɑ e.

¹³Wap lə́ ləŋdzə dɑ é gɔ dzə̌ Hana. Hana lə́ bɑ́ tá jwi Kaifa yə e lə́ bɑ́ ŋkhamsi gwyə gu' bɔ a.

¹⁴Kaifa bɔ nə lə gɔm bi pɑ Yudea gɑ́ dzə gɑ́ ta' mò pfʉ̀ nə thə́ pɔmnəŋ.

¹⁵Simon Pɛtrɔ pu mu' mukhʉ̌ lə yap jʉ̌m Yeso. Pa' a lə́ bɑ́ bɑ ŋkhamsi gwyə zhyə́ e a, pu Yeso lə pəmtə ŋkho shwədyə̌ e.

¹⁶Pɛtrɔ wuŋ dzʉ́, bə́ŋ jyədyə̌; mukhʉ̌ yə a lə bɑ ŋkhamsi gwyə zhyə́ e a lə tə̌m, jɔ gò yə́ e lə́ bɑwə byap jyədyə̌ a, gɔm é ghə Pɛtrɔ ko dyə.

¹⁷Múgò gɛ fà' yə e lə́ bɑwə byap jyədyə̌ a lə ghɔm bi Pɛtrɔ gɑ: Ba wə yǔ tə́ bɑ̀ múkhʉ̌ bɛ yəŋ á? Pɛtrɔ pa' gɑ: A tə a pɑ́.

¹⁸Mghɛ fà' pu a pɑ́ pyap tsʉ' lə bɑ wap sumɔ́k bɑ̀ bəŋ o bɑwə jwɔk, nə pá' fɔk lə́ bɑwə ŋkhú. Bà Pɛtrɔ lə bɑ yə́ tsʉ'u bɑwə jwɔk mɔk.

¹⁹Ŋkhamsi gwyə lə to' nə́ tə́ŋtə Yeso nwə̀ nə pɑkhʉ̌ pyə ba nə ywə yə e ji'tə wap a.

²⁰Yeso pa' bi e gɑ: Ŋ də gɔmnwə bi guŋ pɔ awɛ pɑ́ sɔsɔ̌, ŋ də ji'tə ywə guŋ mcwə awɛ dyə́ sinagogə ba m Dyə Si, tsʉ' yə guŋ pɑ Yudea awɛ lə shu'tə nə a, la' gɔm sɔmywə m càm.

²¹Nwə̀ kɑ́ o həŋtə pɑ́ myə̀ nwə̀ nə ywə yə ŋ də ghɔm a? Ywə yə́ ŋ də ghɔm a, həŋtə bi pɔ pyə wap lə́ yu' a. Wap zhyə ywə yə ŋ də ghɔm a kwa' pɑpúŋ.

²²Yeso lə cwə̌ tə́ gɔm po'o, mu' səŋwì gɛ pyap yə e lə bɑ tsʉ'u a cwɔ pǔ təŋ é gɔm gɑ: A pa' o gɔmnwə bi ŋkhamsi gwyə a lə́?

²³Yeso pa' bi é gɑ: A pɑ́ gɑ́ gɑ̌ ghɔm a pɔk, o la'tə a yə ǎ pɔk nə́ a; nəŋ bɑ́ gɑ́ gɑ̌ ghɔm a puŋ, bɑ o nəŋ shwɔ a gɑ́ kɑ̀?

²⁴A lə́ pɑ̌ po'o pu kwɑ̀ Yeso, Hana cya é bi Kaifa, ŋkhamsi gwyə.

²⁵A lə́ nə pɑ̌ po'o Pɛtrɔ pɑwə jwɔk pɑ́ mɔ̌k. Pú ghɔm bi e gɑ: Ba wə yǔ tə́ bɑ mu' mukhʉ̌ é a lə́? Pɛtrɔ pa' gɑ: Ŋ tə́ bɑ e pɑ́.

²⁶Mu' mo nə mghɛ fa' ŋkhamsi gwyə, fɑ́ mo yə Pɛtrɔ lə́ yá' təŋ e a lə ghɔm bi Pɛtrɔ gɑ: Ŋ khě tə́ yɔ wɔ pò é nthʉm kà lə̀?

²⁷Pɛtrɔ lə̀ pǐŋ ŋkwi' ŋkhəŋnyə é m nə́ kəŋnyə sə́, a wuŋ bɑ pɑ̀ cwə o bɔ, ko' túŋ.

²⁸A lə́ nə́ pɑ̌ po'o bɑ pu lɑ Yeso fɑ wə Kaifa gɔ m wə gɔpna'. A lə́ bɑ mɑfɔkdzʉ̌. Pɔ pyə wap lə lɑ e nə gɔ a lə ko la' wap ko wə gɔpna', bɑ bwɔk pa' wap gɔ viŋ nɑ tsap tə ghɔ tsʉ́ paska a.

²⁹Pilato lə tə̌m dzʉ́ jɔ wap, gɔm bi pú gɑ: Pǒ butə bɛ yəŋ nə kɑ?

³⁰Wap pa' gɑ: Mo yəŋ la' pe' bɑ́ bɑ e ka ghə nwə bɔkpɔ̌k bɑ pɑ́ pyə hɑ é bu a?

³¹Pilato ghɔm bi pú gɑ: Pɑ́ kwa' wɔ nə lɑ e gɔ fyɛ' e nə mco' mɔ. A tə́ bɑ́ bɑ pu piŋ gɑ̀ bi a pɑ́ pyə ghə mo pfʉ́ pɑ́.

³²A lə́ bɑ̀ po' tə́ ghɔm tsyə́ Yeso lə́ ghɔm nə́ nthi vʉ̌ yə e lə bɑ̀ gɔ la' pfʉ́ a pəmtə̀.

³³Pilato lə́ pɑ̌nyə́ ŋkhó wə e, ŋkhe Yeso, gɔm bi gɑ: O bɑ fò pɑ Yudea?

³⁴Yeso pa' bi e gɑ: Pɑ́ kwa' wə̀ nə gɔm kɑ shɑ́ pɔ nə gɔm bu nə m̀?

³⁵Pilato pa' bi e gɑ: Gɑ̌ bɑ yə Yudea a? Guŋ o pu a mkamsi gwyə hɑ́ o bəm! A bɑ o ghə la?

³⁶Yeso pa' gɑ: Nəfo tsɑ̌ tə́ bɑ nə yəŋ dzʉ̌ pɑ́. Nəfo tsɑ̌ la' bɑ́ nə yəŋ dzʉ̌ bɑ pɑ pyap a lo'shù gɑ pu kɑ hɑ̌ a bi pɑ Yudea. Da' gɑ́ cwəlɔ Nəfo tsɑ̌ tə̌ nə yəŋ dzʉ̌ pɑ.

³⁷A pɑ́ po'o Pilato ghɔm bi é gɑ: O bɑ fo a? Yeso pa' bi é gɑ: Wə nə gɔm gɑ́ gɑ̌ bɑ̀ fo. Pu lə dzə́ a, sɔ' nthʉm yəŋ dzʉ̌ pɑ ŋkwinthɛ̌ nyənyɔ. Mo yə e bɑ nə nyənyɔ a ju' gi a.

³⁸Pilato ghɔm bi e gɑ: Nyənyɔ bɑ́ kɑ? E lə ghɔm po'o gɔ dzʉ́ jɔ pɑ Yudea gɔm bi pu gɑ: Sɔ' m nə m̀ ŋ khɑ yɔ́ sɔmywə yə po butə é nə a.

³⁹Da' gɑ́ pa' a bɑ́ mà gɑ a pɑ nə paska a ŋthak ta' mo nəŋ bi po a, pǒ kùŋ gɑ ŋthak fo pɑ Yudea nəŋ bi po a?

⁴⁰Wap lə to' nə cwe gɑ: Tə́ mo bǎ pɑ, tak pɑ́ Barabas. A lə nə pɑ̌ po'o Barabas pɑ̀ Samshwə.