Read Ghomala New Testament YOHANE 19 Bible Online

YOHANE 19 - Ghomala New Testament bible

YOHANE 19

¹A lə́ pɑ̌ po' Pilato lɑ Yeso bɑnyə, gə pu lɑ shɔm shwɔ e.

²Msəŋwi lə sǔ co' thə́ e, bɑ wap lɑ júŋ nə bá', ŋkwa sʉəsʉə pɛ dzə́ fɔk nə e.

³Wap lə́ bɑwə gɔ bəŋ e lə́ bɑ gɔm gɑ: Ca'tə, m fo pɑ Yudea! Biŋ bɑ shwɔ mshɔm nə e.

⁴Pilato lə pǐŋ ŋkwi' nthəm dzʉ́ gɔm bi pɑ Yudea gɑ: Po yɔ, gɑ̌ lɑ e nthəm dzʉ́ dzə po. Po zhyə gɑ́ ŋ kha yɔ sɔmywə yə pu butə e nə a.

⁵Yeso lə́ nə tə̌m dzʉ́ cwəlɔ, bɑ pu su co' júŋ thə́ e biŋ ŋkwa pɛ dzə́ nə e. Pilato ghɔm bi pu gɑ: Mbɛ yəŋ.

⁶Da' gɑ́ mkamsi gwyə pu a pɔ pap lə́ cwə̌ tə jɔ e, guŋ bɑ shwe gɑ: Kwe e bɛnyəpɛnyə! Kwe e bɛnyəpɛnyə! Pilato ghɔm bi pu gɑ: Pɑ kwa' wɔ ŋkwe e thə bɛnyəpɛnyə nə pa' myə̀, ŋ kha yɔ sɔmywə yə bi a pɑ́ pú putə e nə a.

⁷Pɑ Yudea pa' bi e gɑ: Pyə bɑ pyə ghə mu' tɑ̀' mcò', a pɑ gɔ cyə m nə́ mcó' bɔ pu zhwə e, nə pa' a bɑ ě ke nɑ e gɑ Mú Si.

⁸Pilato lə cwə̌ tə ju' ghɔm tsɔ, bwɔk nə gɔ dzə.

⁹E lə pɑnyə dyə e, gɔm bi Yeso gɑ: Kwa' wə nthəm hɑ? Da' gɑ́ Yeso lə ghɔm sɔm nwə bi e.

¹⁰A pɑ po'o Pilato ghɔm bi e gɑ: O ŋkhəŋnyə pa' nə ghɔmnwə bəm. O ka zhyə gɑ́ gɑ̌ bɑ gɑ̌ ghə tʉɔ nə gə pu tak o nəŋ kɑ nə ghə pu kwe o bɛnyəpɛnyə a?

¹¹Da' gɑ Yeso pa' bi e gɑ: O kě tə ku' nə ghə sɔm tʉɔ nə m̀ tə a bɑ gɑ kɛbəŋ nə hɑ bu; a shyə m po'o tə́ mo yə e hɑ a bu a pɑ́ bɑ e kwà kwa' mɑ mhɔnwə myə ǎ cyə a!

¹²Tə́ fɑ po'o, Pilato pɑ shəŋ nə tak e nəŋ, da' gɑ́ pɑ Yudea to' nə pɑ́ shwe biŋ bɑ gɔm bi Pilato gɑ́: O tak e nəŋ bɑ o tə̌ wə giŋ pa' so Kasa a pɑ́! Nə pa' mo ghɔm gɑ e fo bɑ e gɛ bo Kasa.

¹³Pilato lə cwə̌ tə́ ju' po'o dɑ Yeso nthəm jap e dəm kwɔ' shɛ́, tsʉ' yə pu ŋkhe gɑ́ Litostrotos, a pɑ nə Ebraika bɑ gɑ Gabata.

¹⁴A lə́ bɑ tyɛ' nyaptə̀ mnɑ́ nə Paska, gwɛ́ a nə mɔkcʉ́. Pilato ghɔm bi pɑ Yudea gɑ: Yɔ́ fo yɔ̌ yə̌ŋ.

¹⁵Da' gɑ wap to' nə pɑ shwe gɑ: E pfʉ́! E pfʉ́! Kwe e bɛnyəpɛnyə! Pilato piŋ gɔm gɑ: Gɑ̌ gɔ kwé fo yɔ bɛnyəpɛnyə lə́? Mkamsi gwyəgwyə pa' bi e gɑ: Pyə ka ghə mu' fo tə ně Kasa.

¹⁶A lə pɑ̌ po'o e hɑ Yeso bi pú gɑ pú kwé e bɛnyəpɛnyə. Wap fɔm e cwəlɔ.

¹⁷Yeso lə kwa bɛnyəpɛnyə e pɑ́ kwa' yʉ́ nə nthəm gɔ tsʉ' yə pu ŋkhe gɑ́ tsʉ' kwé thə mó a, a pɑ nə Ebraika bɑ gɑ Gɔlgota a.

¹⁸Pu lə́ kwe é nə bɛnyəpɛnyə tsʉ'u bɔ, biŋ ŋkwe ba shɑ pɔ pɑpʉə; Yeso pɑ cəcɑ̌ pú.

¹⁹Pilato lə́ ba e və mu' ŋwa'nyə gə pu yap thə bɛnyəpɛnyə; a lə bɑ̀ pu və nə́ gɑ́: Yeso yə Nazarɛt, fo pɑ Yudea.

²⁰Bo'gwyə pɑ Yudea lə kě ŋwa'nyə bɔ, nə pá' tsʉ' yə pu lə kwe Yeso nə a lə́ bɑ bəŋ tisuŋ. Ŋwa'nyə piŋ bɑ́ bɑ pu və nə́ ghɔm Ebraika ba nə ghɔm Roma, ba nə Grikia.

²¹Mkamsi gwyə pɑ Yudea ghɔm bi Pilato gɑ: Pu ka bɑ́ gɔ və gɑ́ fo pɑ Yudea pɑ̀. Pu kɑ̀ bɑ̀ gɔ və m gɑ: Mo yə̌ŋ bɑ e ghɔm gɑ e bɑ́ fo pɑ Yudea.

²²Pilato pa' bi pu gɑ: Ywə yə gɑ̌ və a, gɑ é da' bvə́!

²³Msəŋwi lə mǐŋ nə kwe Yeso nə bɛnyəpɛnyə, dɑ dzə́ tsyə́ nə gap jyə́ pfʉə, tá' jyə̀ pɑ́ bi tà' mo. A cʉ' sʉəsʉə dzə é yə a lə bɑ pu pá' la' pu ya' sɔmtsʉ' nə tə fɑ thə́ a.

²⁴Msə̌ŋwi lə ghɔm cəcɑ̌ pu gɑ: Ka pɑ khitə, pɑ tam nthuŋ nə jɔ mo yə ě tsʉ a: A pɑ̀ po'o ywə yə pu lə və a pəmtə gɑ́: Wap ghaptə dzə tsɑ̌, dɑ sʉəsʉə dzə a ntham nthuŋ. Yəŋ bɑ ywə yə msəŋwi lə ghə a.

²⁵A lə bɑ bəŋ bɛnyəpɛnyə Yeso map e pɑ tsʉ'u bɑ ě tiŋnyə ba Maria fɑ map e, jwi Clopas ba Maria yə Makdala.

²⁶Yeso lə nə́ yɔ̌ map e ba mukhʉ e yə e lə ŋkhuŋ e a bəŋ e gɔm bi map e gɑ: Mɑmjwi yɔ mú o yə̌ŋ.

²⁷Biŋ gɔm bi mukhʉ e gɑ: Yo mɔ yə̌ŋ. Tə́ fɑ cwə o bɔ mukhʉ e lɑ e dyə e.

²⁸A lə pɑ po'o, Yeso zhyə gɑ guŋ ywə awɛ mi, po'o gɑ ywə yə pu lə və a pəmtə́ tə́ ŋkhəm cwiŋ, gɔm gɑ: Ghak a wə ŋkhə.

²⁹Mu' ghʉɔ lə bɑ tsʉ'u bɑ pu nyəŋ mcyə́ nə tə a ló. Pu lə sǔ cu' ywə nə mcyə́ bɔ, nthə́ŋ nə́ thə́ kam ywə yə pu ŋkhe gɑ izopə a, nya bəŋ shwə e.

³⁰Yeso lə cwə̌ tə́ nwə mcyə, gɔm gɑ: Guŋ ywə awɛ mì; biŋ shiŋ thə e, hɑ zhwenyə.

³¹Pa' a lə́ bɑ tyɛ' nə nyaptə nɑ a, pɑ Yudea lə pɑ bwɔk gɑ pfə mo kɑ cwə̌ nə bɛnyəpɛnyə nə cwə sabat nə pa' tyɛ' sabat bɔ lə bɑ m dəŋ, wap ghɔ jɔ Pilato gɔm gɑ e ghə pu po'tə mkwə map, gə pu cʉɔ wap.

³²Msə̌ŋwi lə sɔ' cwəlɔ bo'tə mkwə dəŋdzə ba batə mo yə pu lə kwe wap pu a pu a.

³³Wap lə nə kəm nə Yeso jɔ gɑ́ ě da' pfʉ́; a pɑ́ po'o la' wap po'tə mkwə myə́.

³⁴Da' gɑ́ mu' ta' səŋwi lə lɑ kuŋ swɔp be é, mcyə ba shyə wuŋ nthəm.

³⁵Mo yə e lə yɔ a ŋkwinthɛ̌ nə ywə yə e lə yɔ a, kwǐnthɛ e piŋ bɑ nyənyɔ, ba po'o mo bɔ jyə gɑ e gɔm ywə yə ǎ pɑ nyənyɔ a, po'o gɑ́ ba wɔ yɔ piŋ.

³⁶Guŋ ywə bɔ awɛ nthəm po'o tə ywə yə pu lə və a a pəmtə; bɑ pu lě bvə gɑ: Pu tə́ gɔ la' po' sɔm kwé ě pɑ́.

³⁷Ba mu' tsʉ' ŋwa'nyə ŋkwi' bɑ́ gɔm gɑ: Wap gɔ sɔ' yɔ mo yə wap swɔp e a.

³⁸Mnwə bɔ lə cyə̌, Yosɛp yə Arimatea, yə e lə bɑ mukhʉ Yeso, da' gɑ́ bɑ dʉmnyətʉmnyə, bɑ bwɔk pɑ Yudea, lo bi Pilato gɑ́ e piŋ gɑ e cʉɔ pfə́ Yeso. Pilato piŋ, Yosɛp sɔ' shʉɔ pfə Yeso.

³⁹Ba Nikodemo yə e lə́ ghɔ jɔ Yeso mtsʉ́' a lə sɔ' yə; nə sɔ' gwim mu' ŋi'nyə mwɑ mira pu aloɛs gwɛ a nə kilo shwɔpta mgham tha.

⁴⁰Wap lə́ lɑ pfə Yeso cwəlɔ gɔ dɑ mbak dzə dzʉm pu a mwɑ damnyəlamnyə pa' a bɑ nə ma pɑ Yudea nə lə nthəŋ mo a.

⁴¹A lə bɑ́ nə́ tsʉ' yə pu lə kwe Yeso nə bɛnyəpɛnyə nə a, kà pɑ tsʉ'u, mu' thəsì pɑ nthʉm kà bɔ tə pu guŋ nyəŋ sɔmmo nə́.

⁴²A lə cyə m pa' pɑ Yudea lə bɑwə nyaptə nɑ tsap a, ba pa' ghʉ̌m bɔ lə bɑ̀ pɑ́ tsʉ' u a pu nyəŋ Yeso nthʉ́m o.