Read Ghomala New Testament YOHANE 2 Bible Online

YOHANE 2 - Ghomala New Testament bible

YOHANE 2

¹A lə nə pɑ̌ nə batə tyɛ'dzʉ yɑtá, pú ghə la'nwə̀ lɔmdyə́ Kana Galilea, má Yeso pɑ́ tsʉ'u.

²A lə bɑ pu ké ba Yeso pu a pɑkhʉ̌ pyə nə la'nwə bɔ̌.

³Pá' mlu' lə pɑ jak a, má Yeso ghɔm bi e gɑ: wap ka piŋ gə mlu'.

⁴Da' gɑ́ Yeso ghɔm bi e gɑ: Pǔ kɑ́ mɑmjwi? Yɑ cwə̌ jɑ tə́ wuŋ sɔ̌'.

⁵Map e lə ghɔm bi mghɛ fa' gɑ: E ghɔm gɑ́ po ghə pɑ gɑ kɑ́ lə, po ghə pɑ́ po'o.

⁶A lə́ nə pɑ̌ po'o mkɔ́p pɑ tsʉ'u nthɔk bɑ mkɔ́p mwɔ', mkɔp myə pɑ Yudea lə́ nə sɔk mnwə map a. Bǎ ya kɔp lə́ lə bɑ bi a pɑ́ ywə ko nə mfo' məbʉ̌ə kɑ mfo' mənthá lə.

⁷Yeso lə́ ghɔm bi mghɛ fa' gɑ: Po nyəŋ shyə nthʉm mkɔ́p mɔ̌ tə a lo; wap lə nyəŋ shyə nə́ tə a kəm shwə o.

⁸Yeso ghɔm bi pu gɑ: Pó tu' cwəlɔ nə gɔ hɑ́ bi tá la'nwə́. Wap lə nə̌ gɔ hɑ bi e;

⁹e zhwi'tə shyə bɑ ǎ zhi mlu', la' e zhyə tsʉ' yə a fɑ nə a, nə pa' da' pɔ pyə wap lə tu' a nə lə́ bɑwə jyə́, a pɑ po'o e ghɔm bi tá jwigʉɔ gɑ:

¹⁰Guŋ pɔ awɛ də́ŋdzə hɑ pɑ mlu' pɑpuŋ, pu nwə́ tə bam tə́ e hɑ myə a ka ghyɛ' buŋ a; tə sɔ' m nə o, bɑ ǒ lwɔ' myə pɑpuŋ tə ŋkhəm cwəlɔ!

¹¹Yəŋ bɑ dzə̀ mtiŋ myə Yeso lə pɑ Kana Galilea gə lə. E lə la'tə ghu'tə e, pɑkhʉ̌ pyə pìŋ biŋ e.

¹²A lə cyə̌ cwəlɔ, e tsəŋ gɔ Kapɛrnaum pu a map e, ba mfɑ pyə pu a pɑkhʉ̌ pyə, da' gɑ ŋkho wə shwə pɑ nə pǒ mtyɛ'dzʉ́.

¹³Paska pɑ Yudea lə pɑ̌ sɔ' Yeso pʉɔ gɔ Yerusalɛm.

¹⁴E lə yɔ pɑ tɛmtɔ Dyə Si bɑ wap cwətə́: Pɑ tɛ mna', ba mjʉ̀jʉ̀, ba mzhwə̀ pu a pɑ kwyəpnyə ŋkhap.

¹⁵E lə́ lɑ̌ gwɑ gə nthé, nə jəŋ guŋ yap awɛ Dyə Si, ba mjʉ̀jʉ̀, ba mna'; sa'tə ŋkhap pɑ kwyəpnyə ŋkhap, ŋkwɔk mtɑpe map;

¹⁶biŋ gɔm bi pɑ tɛ mzhwə gɑ: Po té guŋ tsə bǎ awɛ tsɔ'ɔ, po kɑ piŋ dɑ Dyə Ta á gə dyə mtɔ̌.

¹⁷Pɑkhʉ̌ pyə lə kámtə gɑ́ a bɑ pu lě bvə gɑ: Ji dyə o wə shəŋtə jɛ́ a.

¹⁸Da' gɑ́ pɑ Yudea pa' gɑ: O gɔ la'tə wɔk ya nthi mtiŋ msya tə́ gə po'o?

¹⁹Yeso pa' bi pu gɑ: Po sa'tə Dyə Si yəŋ gɑ, a biŋ bʉ' nə mtyɛ'dzʉ mɑnthá.

²⁰A pɑ po'o pɑ Yudea ghɔm bi e gɑ: Pu lə lɑ gu' shwɔp nthɔk mghap pfʉə tə́ nə ŋkwɑ Dyə Si yə̌ŋ, ǒ piŋ gɔm gɑ́ o gɔ pu' nə mtyɛ'dzʉ mɑnthá lə́?

²¹Da' gɑ e lə́ gɔm Dyə Si yə a bɑ nɑ e a.

²²A po'o tə́ cwə yə Yeso lə yǎm nə vʉ̌ a, pɑkhʉ̌ pyə kamtə gɑ́ e lə́ ghɔm po'o, bíŋ ywə yə pu lə və a, biŋ bíŋ ba ghɔm tsyə e lə ghɔm a.

²³Bó'gwyə pɔ lə yɔ mtiŋ msya myə Yeso lə ghə nə cwə yə e lə̌ bɑ́ Yerusalɛm nə cwə ŋwɛnyə Paska a, biŋ tso tsyə.

²⁴Da' gɑ́ la' Yeso tak nɑ e bi pú, nə pa' a lə bɑ e zhyə wap awɛ.

²⁵Tə la' e yɑwə́ byap gɑ pu siŋ e sɔm nwə nə nwə mo pɑ́! Nə pa' a lə bɑ e zhyə́ ywə yə a bɑ nə mo a.