Read Ghomala New Testament YOHANE 3 Bible Online

YOHANE 3 - Ghomala New Testament bible

YOHANE 3

¹Mu' mo lə bɑ cəcɑ̌ pɑ Farisai tso tsyə pɑ Nikodemo. E lə bɑ́ ŋkham pɑ Yudea.

²E lə sɔ' mtsʉ́', jɔ Yeso, gɔm bi é gɑ: Rabi, pyə̌ zhyə gɑ o bɑ gɛ zhi'tə yə Si nə nthəm é a, nə pa' bi a pɑ sɔmmo lə té mtiŋ msya myə o gə a, tə a bɑ gɑ́ pǔ Si nə bɑ.

³Yeso pa' bi é gɑ: Kwa' nyənyɔ nyənyɔ gɑ̌ siŋ o gɑ tə da' nə tsə mo m nə tsə sə́ a, bɑ bi a pɑ sɔmmo lə yɔ Nəfo Si.

⁴Nikodemo ghɔm bi e gɑ: Bi a pɑ́ pu tsə mò m gɑ kɑ̀ bɑ ě tsə vò? Bi a pɑ́ e piŋ ŋkho vam map e mu' cʉ́m tə́ pu tsə é a?

⁵Yeso ghɔm bi é gɑ: Kwa' nyənyɔ nyənyɔ, gɑ̌ siŋ o gɑ: Sɔmmo yə́ pu ka tsə é m nə́ shyə ba m nə Zhwenyə á, bi a pɑ́ e lə ko nə Nəfo Si.

⁶Ywə yə pu tsə é m nə bapnɑ a bɑ pɑ bapnɑ, ywə yə pu piŋ dzə é nə Zhwenyə a bɑ́ zhwenyə.

⁷Ka nwə cyə o pa' gɑ gɔm bu gɑ: A shəŋ gɑ pu tsə o m nə tsə sə́ a.

⁸Fəfa shʉ' nə́ tsʉ' yə e kuŋ a, o piŋ bɑ ju' gi e, da' gɑ́ la' o zhyə tsʉ' yə a fɑ m nə a, o lə nəŋ jyə tsʉ' yə a gɔ m nə a. A bɑ dəŋdəŋ po'o nə mo yə pu tsə é m nə Zhwenyə a.

⁹Nikodemo ghɔm bi e gɑ: A bi a a pɑ́ po'o m gɑ́ kɑ?

¹⁰Yeso pa' bi e gɑ: O bɑ gɛ zhi'tə Israɛl, biŋ bɑ́ bɑ o ka zhyə́ mnwə bɔ a?

¹¹Kwa' nyənyɔ nyənyɔ gɑ̌ siŋ o gɑ: Pyə̌ gɔm ywə yə pyə̌ zhyə a, pyə̌ ŋkwinthɛ̌ nə ywə yə pyə̌ yɔ a; da' gɑ́ po lə piŋ mkwinthɛ mɔ́k.

¹²A bi a gɔmnwə dəmcǎ' bi po, po lə piŋ, bɑ gɔm yə kɛbəŋ bɑ po gɔ piŋ m gɑ́ kɑ?

¹³A nə pɑ po'o bɑ sɔmmo la m ŋkwɔ' kɛbəŋ tə ně da' mo yə e lə fi' fɑ kɛbəŋ, Mu mo a.

¹⁴A piŋ bɑ po'o, dəŋdəŋ pa' Mosɛ lə cyə̌ŋ nɔk thə́ ghakgo a, a shəŋ gɑ pu cyəŋ Mu mo thə́.

¹⁵Po'o gɑ́ bǎ ya mo lə yə e piŋ a, e cyə m nə e gə vɔk mama.

¹⁶Nə pa' Si bɑ é kuŋ dzʉ té' o, tə hɑ Mu e, ŋkwi Mu e, po'o gɑ bǎ ya mo lə́ yə e piŋ é a e kɑ pfʉ́, e ghə vɔk mama.

¹⁷Nə pa' Si la tə́ nthəm Mu é nthʉm dzʉ gɑ e sɔ' fyɛ' dzʉ pɑ, e lə nthəm e gɑ dzʉ̌ cyə m nə e bvɔk.

¹⁸Mo yə e piŋ é a, pu tə gɔ fyɛ' e pɑ; mo yə e ka piŋ e a bɑ pu é da' fyɛ' e nə pa' a bɑ e ka piŋ tsó ŋkwi Mu Si.

¹⁹Fyɛ' bɑ́ gɑ: Ŋkha' bɑ ǎ sɔ' nthʉm dzʉ, da' gɑ pɔmnəŋ cwɔ' jʉ̌m nə pa' mfa' map bɑ mfa' bɔkpɔ̌k.

²⁰Nə pa' mo yə e gə bɔkbɔk nwə a bɔ ŋkha', biŋ bɑ ŋkhə́ŋnyə nə sɔ' nə ŋkha', bɑ bwɔk gɑ pu kɑ yɔ mfa' myə́.

²¹Mo yə e gə nwə nyənyɔ a sɔ' nə ŋkha' po'o gɑ pu yɔ mfa' myə́, mfa' myə pu lə́ ghə m nə Si a.

²²A lə nə cyətə, Yeso pu a pɑkhʉ̌ pyə ghɔ nthʉm guŋ Yudea; pú a pú lə cwə̌ wə́, e pɑ nu' pɔ shyə.

²³Yohane lə bɑ nə yə́ ghə́ŋ Enoŋ bəŋ Salim tsʉ' yə shyə bɑ ǎ yɔm nə a, bɑwə nu' pɔ shyə. Pɔmnəŋ lə bɑwə sɔ̌' lə e nu' wap shyə.

²⁴Nə pa' pu lə jɑ́ tə́ wuŋ nyəŋ Yohane dyəcɛ̌.

²⁵A lə pɑ̌ po'o, nə tɛshwə̀ təm cəcɑ̌ mu' yə Yudea pu a pɑkhʉ̌ Yohane nə nə sɔk mnwə.

²⁶Wap lə ghɔ jɔ Yohane gɔm bi e gɑ: Rabi, mo yə po e lə bɑ nə mu' jʉɔ Yurdɛŋ, mo yə o lə ŋkwinthɛ̌ nə e a, e yəŋ gɑ ba yʉ yə́ pɑwə nu' pɔ shyə, guŋ pɔ awɛ pɑwə gɔ pɑ́ m bi e.

²⁷Yohane pa' bi pú gɑ: Pɑ sɔmmo lə ghə sɔmywə tə a cyə dəŋ yə́ Si hɑ bi e a.

²⁸Kwa' wɔ wə bɑ mkwinthɛ gɑ ŋ də ghɔm gɑ: Ŋ tə bɑ Kristo pɑ. Gɑ̌ bɑ pɑ mo yə pu lə təm e dzə e a.

²⁹Mo yə mjwǐ bɑ bi a, bɑ́ dhə e; sɔ' m nə so dhə, e pɑ nthiŋnyə ju' ywə yə e ghɔm a, dhə cwə tə gɔmnwə, so e ŋwɛnyə. A po'o tə́ gɑ̌ bɑwə ŋwɛnyə, ŋwɛnyə pɑpuŋ.

³⁰A shəŋ gɑ e nə wu', a bɑ syaptə syaptə̀.

³¹Mo yə́ é fɑ m thə́ kɛbəŋ á, bɑ m̀ dəm guŋ mnwə awɛ. Mo yə́ é bɑ dəmcǎ' á pɑ mo dəmcǎ', bɑ gɔmnwə pɑ pa' pɑ dəmcǎ' á;

³²Mo yə́ e fɑ kɛbəŋ a ŋkwinthɛ̌ nə ywə yə e jɔ́ a, ba nə yə e ju' a. Da' gɑ sɔmmo lə piŋ mkwinthɛ.

³³Mo yə ě piŋ yə nə́ ŋkwinthɛ̌ a, e biŋ gɑ Si bɑ nyənyɔ.

³⁴Nə pa' mo yə Si nthəm e a gɔm ghɔ̀m Si yə e hɑ Zhwenyə tə dhə̀ bi a.

³⁵Tá ŋkhuŋ Mú, biŋ bɑ́ bɑ ě nyəŋ guŋ mnwə awɛ pu é.

³⁶Mo yə́ e piŋ Mú a, bɑ e ghə vɔ̀k mama; mo yə e kəŋnyə̀ nə piŋ Mú a tə́ gɔ la' yɔ vɔ̀k pɑ̀; luŋ Si piŋ bɑ jɛ́ nə é guŋ mcwə awɛ.