Read Ghomala New Testament YOHANE 5 Bible Online

YOHANE 5 - Ghomala New Testament bible

YOHANE 5

¹Yə bɔ lə nə cyə, a pɑ nə mu' ŋwɛnyə́ pɑ Yudea, Yeso pʉɔ Yerusalɛm.

²A nə pɑ po'o, mú' tam shyə pɑ Yerusalɛm bəŋ jyədyə̌ jʉ̀jʉ̀, tsǒ tam shyə bɔ pɑ Bezata nə ghɔm Ebraika. Mpə̌ŋ lə bɑ nə mɑnthɔ.

³Mghɛ ghó kwa' vəŋ e pɑ nuŋtə nthʉm mpəŋ bɔ: Mfʉ́, mkho'tə, pɑ tə ŋaknyə jyə́, bɑ byap gɑ́ shyə nəŋnyə.

⁴Nə pa' a lə bɑ shɑ mcwə, aŋgəle Cyəpɔ fi' nthʉm tam shyə bɔ; shyə nəŋnyə, nə pa' dəŋdzə mo yə e lə́ ŋkho nthʉm shyə cwə yə a sə a lə jɛ́, kɑ gho e la' bɑ pɑ́ gɑ kɑlə́.

⁵Mu' mo lə bɑ tsʉ'u bɑ ŋkho'tə tə fɑ nə gu' mgham ntha.

⁶Yeso lə yɔ e bɑ ě núŋ, biŋ nə yu' gɑ́ e bɑ pɑ po'o tə fɑ tə tyɛ̌', gɔm bi e gɑ: O shəŋ nə yɛ́ a?

⁷Ŋkho'tə bɔ ghɔm bi e gɑ: Ŋ kha ghə sɔmmo yə bi a pɑ́ e nyəŋ a shyə cwə yə tam shyə to' nə nəŋnyə a; nə pa' cwə nə ghɔ tə ŋkho bɑ shɑ pɔ tam dzə m̀.

⁸Yeso ghɔm bi e gɑ: Lusi ŋkwa ko'tə kodyə o gǐŋ!

⁹Mo bɔ lə́ wuŋ jɛ; ŋkwa ko'tə kodyə e, gǐŋ. A lə nə pɑ̌ po'o tyɛ'dzʉ bɔ pɑ tyɛ' sabat.

¹⁰Tə pɑ Yudea wuŋ gɔm bi mo yə pu jɛ́ e a gɑ: Yəŋ gɑ bɑ tyɛ' sabat, mco' kɑ piŋ gɑ o kwa ko'tə kodyə o.

¹¹Da' gɑ e pa' bi pu gɑ: Mo yə e gə jɛ á, yʉ nə gɔm bəm gɑ: Kwa ko'tə kodyə o gǐŋ.

¹²Wap həŋtə e gɑ: Bɛ bɔ yə e gɔm bu gɑ: Kwa ko'tə kodyə o giŋ a bɑ wɑ́?

¹³Da' gɑ mo yə Yeso lə yɛ e a la tə bɑwə jyə mo yə bɛ bɔ bɑ e a pɑ, nə pa' Yeso lə́ bɑ ě lu bəŋ vəŋ pɔ pyə wap lə́ bɑ tsʉ'u a.

¹⁴Yeso lə cwə biŋ jɔ mo bɔ Dyə Si, gɔm bi e gɑ: Ǒ yɑ́ bɑ o cəŋtə jɛ: Kɑ piŋ hɔnwə, bwɔk gɑ mu' bɔkbɔk nwə kɑ piŋ ŋkho nə o.

¹⁵Bɛ bɔ lə ghɔ gɔm bi pɑ Yudea gɑ Yeso nə la' jɛ e.

¹⁶Tə fɑ po'o pɑ Yudea to' nə khiŋ Yeso gɑ e ghə po'o tyɛ' Sabat.

¹⁷Da' gɑ Yeso pa' bi pu gɑ: Tǎ a bɑwə fǎ' tə ŋkhəm cwəlɔ; ba myə̀ yɑ̌ piŋ bɑwə fǎ'.

¹⁸Tə fɑ po'o, pɑ Yudea pɑ shəŋ nə zhwə̀ Yeso nə gɔ pɑ m dzə, nə pa' é lá tə́ bɔptə́ pɑ da' mco' Sabat pɑ́; e lə́ biŋ bɑwə ŋkhe Si gɑ tap e dəŋdəŋ, po'o nə da'tə gɑ e bɑ́ pa' Si a.

¹⁹Yeso lə́ lɑ̌ ghɔm gɔm gɑ: Kwa' nyənyɔ nyənyɔ gɑ̌ siŋ wɔ gɑ́ bi a pɑ Mú lə ghə sɔmywə nə yə thə; e gə pɑ́ ywə yə ě yɔ pa' Tá gə a; nə pa' ywə yə Tá gə a, ba Mú gə yə pɑ́ po'o.

²⁰Nə pa' Tá ŋkhuŋ Mú, biŋ bɑ da'tə é guŋ ywə awɛ yə é gə a; é gɔ sɔ' kwi' la'tə é mfa' myə ǎ kwi' gu' té' a, tə̌ nwə pɑ shyə́ wɔ.

²¹Dəŋdəŋ pa' Tá jám mpfə pɔ, gə wap vɔk a, ba Mú gə mo yə e kuŋ a vɔk.

²²Tá tə́ fyɛ' sɔmmo pɑ, nə pa' a bɑ e hɑ guŋ nə fyɛ' awɛ bi Mú;

²³Po'o gɑ guŋ pɔ awɛ hɑ mku' bi Mú dəŋdəŋ pa' wap hɑ mku' bi Tá a. Mo yə e tə hɑ mku' bi Mú a tə hɑ mku' bi Tá yə e nthəm e a pɑ́.

²⁴Kwa' nyənyɔ nyənyɔ, gɑ̌ wə siŋ wɔ, mo yə ě yu' ghɔm tsɑ̌, biŋ mo yə e nthəm a, vɔk mɑmɑ bɑ bi e; e tə́ gɔ sɔ' sɔ' nə fyɛ' pɑ́, nə pa' a bɑ ě cyə nə vʉ̌ ŋkho nə vɔk.

²⁵Kwa' nyənyɔ nyənyɔ gɑ̌ wə siŋ wɔ, cwə wə sɔ̌', bɑ é da' sɔ̌', cwə yə mpfə pɔ gɔ yu' gí Mǔ Si a. Pɔ pyə wap nəŋ gɔ la' yu' a pɑ gɔ sɔ' vɔk.

²⁶Nə pa' dəŋdəŋ pa' Tá bɑ ě ghə vɔk nə e a, a bɑ e hɑ gɑ ba Mu ghə vɔk nə e.

²⁷Tá bɑ ě hɑ gʉ' nə fyɛ' pɔ bi e, nə pa' e bɑ Mu mo.

²⁸A mnwə mɔ kə́ cyə wɔ nə pa' cwə wə sɔ̌', yə pɔ pyə wap bɑ m nthʉm mthəsì a gɔ yu' gi e a.

²⁹A pɔ pyə wap lə́ ghə nwə pɑpuŋ a təm nə yam nə vʉ̌ yə a dɑ mo gɔ nə vɔk a; pɑ ghə bɔkbɔk nwə təm yap nə yam nə vʉ̌ yə a dɑ mo gɔ m nə fyɛ' a.

³⁰Sɔ' m nə m̀, bi a pɑ ŋ də ghə sɔmywə pɑ nə yɑ thə pɑ́; gɑ fyɛ' m pa' gɑ ju' a; yɑ nə fyɛ' piŋ bɑ nyənyɔ nə pa' ŋ tə́ gə pɑ ywə yə myə̀ nə shəŋ a pɑ; gɑ gə ywə yə mo yə e nthəm a shəŋ a.

³¹Ŋ da' bɑ ŋkwinthɛ̌ a pɑ́ myə̀ bɑ pu tə́ gɔ piŋ yɑ nə ŋkwinthɛ̌ pɑ́.

³²Mu' mo nə ŋkwinthɛ̌ a, nəŋ bɑwə jyə gɑ mkwinthɛ myə e ŋkwi nə m̀ a bɑ kwa' pa' a shəŋ a.

³³Po lě nthəm pɔ bəŋ Yohane, e nəŋ ŋkho ŋkwinthɛ̌ nə nyənyɔ.

³⁴Sɔ' m nə m̀ a tə́ bɑ m gɑ́ gɑ̌ bɑwə byap gɑ mo ŋkwinthɛ̌ a pɑ́; da' gɑ́ gɑ̌ gɔm po'o tə́ po vɔk.

³⁵Yohane lə́ bɑ́ lambù yə pú su mɔk nə́ a kyɛ́' a: Po lě ŋwɛnyə tsɔ' pɑ nə mu kam cwə nə ŋkha' e.

³⁶A nə pɑ̌ po'o bɑ gɑ̌ ghə mu' nə ŋkwinthɛ̌, bɑ a cyə yə Yohane; a bɑ́ mfa' myə Ta hɑ́ gɑ́ gə a. Gɑ̌ gə má a piŋ bɑ́ mkwinthɛ gɑ Tá nə nthəm a.

³⁷Tá yə e nthəm a bɑ e ŋkwinthɛ̌ a. Da' gɑ la' po yu' gi e kɑ nə yɔ ywə yə a da'tə é a lə.

³⁸Ghɔm tsyə lə piŋ bɑ shwə nə po, nə pa' po tə́ biŋ mo yə e nthəm e a pɑ́.

³⁹Po nthàk ywə yə pu lě bvə a, bɑ́ ŋkwɛ gɑ po gɔ cyə m nə́ ghə vɔk mama: A nəŋ bɑ po'o, ywə yə pu lə və a pɑ ŋkwinthɛ̌ nə m̀.

⁴⁰Po lə nəŋ ŋkhuŋ nə sɔ' bəm, gɛvɔk mama.

⁴¹Ghú'tə a tə fɑ m bi pɔmnəŋ pɑ;

⁴²ba tə́ po'o, a bɑ gɑ̌ zhyə wɔ. Ŋkhuŋnyə Si tə́ bɑ nə po pɑ́.

⁴³Gɑ̌ sɔ' m nə́ tsǒ Tá a, po piŋ ŋkhəŋnyə nə lɑ a. Mu' mo sɔ̀' pɑ kwa' nə tsyə́ tso bɑ pǒ gɔ lɑ e.

⁴⁴Wɔ pyə pǒ gu'tə nɑ tsɔ́, la' po pɑ shəŋ ghu'tə yə a fɑ m bi Si a, a bi a po piŋ m gɑ́ kɑ?

⁴⁵Ka po kwɛ gɑ́ myə̀ nə́ gɔ sɔ' putə́ wɔ bi Tá: Mo yə e gɔ sɔ' putə́ wɔ a bɑ́ Mosɛ yə po jap tʉm tsɔ nə é a.

⁴⁶Nə pa' po la' pé e biŋ Mosɛ, bɑ a bɑ po piŋ ba myə̀, nə pa' ywə yə e lə və a, e lə́ bvə pɑ nə m̀.

⁴⁷Po pɑ́ tə piŋ ywə yə é lə və a, bɑ po gɔ piŋ ywə yə gɑ̌ gɔm a m gɑ́ kɑ?