Read Ghomala New Testament YOHANE 8 Bible Online

YOHANE 8 - Ghomala New Testament bible

YOHANE 8

²Dzʉ̌ lə nə́ lɔ, e pɑnyə Dyə Si, a piŋ bɑ́ pa' pɔmnəŋ lə́ bɑwə sɔ' bi e a, e cwə́si, ntho' nə zhi'tə ywə́.

³Pɑ zhyə́ mcò' pu a pɑ Farisai lə lɑ̌ mu' mjwǐ bɑ pu ghəm é nə ghap sɔ̌' jap e tǔŋ pɔ pyə́ wap lə́ bɑ wap cu'tə tsʉ'u a.

⁴Gɔm gɑ: Ta pu yɔ mjwǐ yəŋ e pɑwə gə ghap.

⁵A bɑ́ nthʉm mcò' bɑ Mosɛ lě bvə gɑ́ pu lɑ mwɔ' nthamtə nthi pɑjwǐ bǎ. Kwa' wə ghɔm yǔ gɑ́ kɑ?

⁶Wap lə́ gɔm po'o, a pɑ́ yo' bɑ wap tʉ' nə e tə́ nə pútə e. Da' gɑ́ Yeso lə pɔnyə si, bɑ dɑ nthə́ pu e nə ŋkhʉə ŋkhɛ nə cǎ'.

⁷Pa' wap lə́ pɑ həŋtə é nwə nə gɔ pɑ́ m dzə a, e lə pʉ' nɑ e gɔm bi pu gɑ: Mo yə ě cəcɑ̌ po bɑ e la m hɔnwə a, ma' dəŋdzə gwɔ' nə e.

⁸E lə piŋ kwi' bɔnyə si, biŋ bɑ ŋkhʉə ŋkhɛ nə cǎ'.

⁹Wap lə́ cwə̌ tə ju' mghɔm, gɔ pɑ yɑmu' yɑmu' tə́ ntho' fɑ nə mghətso, tə́ Yeso cʉ' dǒ e. Mjwǐ bɔ lə bɑ́ pɑ́ tùŋ.

¹⁰Yeso lə pʉ' nɑ e gɔm bi e gɑ: Mɑmjwi, wap m hɑ́? Sɔmmo ka nyəŋ shɛ thə o a?

¹¹E pa' gɑ: Sɔmmo m Cyəpɔ; Yeso piŋ gɔm bi e gɑ: Ba myə̀ yɑ̌ ŋ kha nyəŋ shɛ thə o. Ghɔ, tə́ fɑ cwəlɔ, kɑ piŋ hɔnwə.

¹²Yeso lə́ kwi' gɔm ghɔm bi pú gɑ: Gɑ̌ bɑ́ ŋkha' nthʉm dzʉ, mo yə ě yap jʉ̌m m̀ a tə́ gɔ sɔ' ghiŋ nthʉm jʉ́m pɑ́; e gɔ ghə ŋkha' yə a dɑ mo gɔ nə vɔk a.

¹³Pɑ Farisai ghɔm bi e gɑ: Wə nə bɑ ŋkwinthɛ̌ thə́ nɑ o; bi a pɑ́ pu lə piŋ yu nə́ ŋkwinthɛ̌.

¹⁴Yeso pa' bi pu gɑ: A nyənyɔ gɑ́ myə̀ nə bɑwə ŋkwinthɛ̌ nə nɑ a, da' gɑ pu gɔ piŋ yɑ nə ŋkwinthɛ̌ nə pa' a bɑ gɑ̌ zhyə́ tsʉ' yə gɑ̌ fɑ m nə á, biŋ bɑ gɔ m nə a; tə́ sɔ' m nə po, a bɑ po ka zhyə́ tsʉ' yə gɑ̌ fɑ a, po lə nəŋ jyə́ tsʉ' yə gɑ̌ gɔ a.

¹⁵Pǒ fyɛ' yɔ pɑ pa' monəŋthə́ a; tə́ sɔ' m nə m̀ ŋ tə fyɛ' sɔmmo pɑ.

¹⁶Bi a nəŋ bɑ gɔ fyɛ' mo bɑ yɑ nə fyɛ' gɔ pɑ pa' nyənyɔ shəŋ a, nə pa' ŋ tə bɑ do m̀ pɑ, ba mo yə e nthəm a bɑ́ si.

¹⁷A bɑ́ nthʉm mcò' mɔ bɑ pu və gɑ pu biŋ mkwinthɛ pɔ pɑpʉə.

¹⁸Gɑ̌ ŋkwinthɛ̌ nə thə nɑ a, ba Tá a yə e nthəm a piŋ ba ŋkwinthɛ̌ a yə́.

¹⁹Wap ghɔm bi e gɑ: Tɔ ɔ bɔ hɑ? Yeso pa' gɑ: Pǒ bɑ po ka zhyə a, po lə nəŋ jyə Tá a. Po la' pé' jyə a, bɑ po zhyə ba Tá a.

²⁰E lə gɔm mɔ mghɔm po'o nə tsʉ' yə pu ŋkhe gɑ́ Nthɛ a; da' gɑ bɑ ji'tə pɔmnəŋ m Dyə Si. Sɔm mò lə nəŋ sho' pu nə e nə pa' yə cwə lə jɑ tə wuŋ sɔ̌'.

²¹Yeso lə kwi' gɔm bi pu gɑ: Gɑ̌ gɔ ghɔ, po gɔ sɔ' cəŋ a bà cə̌ŋ, da' gɑ́ nəŋ pfʉ́ pɑ́ nə mhɔnwə mɔ. Tsʉ' yə gɑ̌ gɔ m nə a bi a pɑ́ po lə ghɔ nə́.

²²A lə pɑ̌ po'o pɑ Yudea to' nə pɑ gɔm cəcɑ̌ pu gɑ: Bi a pɑ e pɑwə ŋkwɛnyə nə zhwə nɑ e a? Nə pa' e du m si nə ghɔm gɑ: Tsʉ' yə́ gɑ̌ gɔ nə a, pɑ po lə ghɔ nə́.

²³Yeso pa' bi pu gɑ: Pǒ bɑ pɑ dəmcǎ', myə, gɑ̌ bɑ mo kɛbəŋ. Po bɑ pɑ nthʉm yəŋ dzʉ̌, ŋ də́ pɑ mo yəŋ dzʉ̌ pɑ́.

²⁴A ywə yə a gə tə́ gɔm gɑ́ po gɔ sɔ' pfʉ́ pɑ́ pu a mhɔnwə mɔ a. Nə pa' po pɑ tə́ pǐŋ gɑ́ gɑ̌ bɑ, bɑ po gɔ pfʉ́ nə mhɔ mɔ.

²⁵Wap ghɔm bi e gɑ: O bɑ́ wɑ́? Yeso pa' bi pu gɑ: Gɑ̌ bɑ́ ywə yə́ ŋ də́ siŋ wɔ tə́ fɑ nə to' a.

²⁶Sɔ' m nə ywə yə ǎ wə́ dé wɔ a, nwə gɔmghɔm yɔm, ba fyɛ' piŋ jɔ́m; tə́ mo yə e nthəm a bɑ nyənyɔ, ywə yə gɑ siŋ dzʉ́ á, a nəŋ bɑ ywə yə gɑ̌ ju' bi a.

²⁷Wap la tə́ yu' gɑ́ e lə́ gɔm po'o bɑ gɔm Tá pɑ́.

²⁸Yeso ghɔm bi pú gɑ: Cwə yə po gɔ sɔ' cyəŋ Mú mo thə́ a, po zhyə gɑ́ gɑ̌ bɑ, ba m gɑ́ ŋ tə́ gə sɔmywə nə yɑ thə́ pɑ́. Gɑ̌ gɔm ywə yə Ta ji'tə a.

²⁹Pyə mo yə é nthəm a nə bəmtə bɑ: A bɑ é kɑ tak a dó m̀ pɑ, nə pa' gɑ̌ gə pɑ ywə yə a buŋ e a, guŋ mcwə awɛ.

³⁰E lə́ pɑ̌ gɔm po'o pɔ jɔmyɔm piŋ e.

³¹Yeso ghɔm bi pɑ Yudea pyə wap lə piŋ e a gɑ: A pɑ́ gɑ́ pǒ wuŋ nə ghɔm tsɑ̌, bɑ po bɑ́ pɑkhʉ̌ pɑ̌ nyənyɔ,

³²bɑ pǒ gɔ zhyə nyənyɔ, a nyənyɔ ghə po lə pɑ̀ mkwɔ pɑ́.

³³Wap pa' bi e gɑ: Pyə bɑ gwya Abraham. Bɑ sɔmmo lǎ m dɑ́ wɔk gə mkwɔ pɑ́: Tə́ o gɔm gɑ pyə tə gɔ piŋ pɑ́ mkwɔ pɑ́ m gɑ́ kɑ̀?

³⁴Yeso pa' bi pu gɑ: Kwa' nyənyɔ nyənyɔ, mo yə é hɔnwə̀ a bɑ ŋkwɔ mhɔ.

³⁵Ŋkwɔ tə́ guŋ dyə pɑ́; tə mú dyə̌ guŋ pɑ dyə.

³⁶A bɑ po'o tə́ bi a Mú nə te wɔ́ nə ŋkwɔ, bɑ po tə́ gɔ piŋ pɑ mkwɔ pɑ́.

³⁷Pó bɑ gwya Abraham, bɑ gɑ̌ zhyə; da' gɑ pa' ghɔm tsɑ̌ tə́ bɑwə ŋkho thə́ po a pɑ́, po bɑwə shəŋ nə zhwə a.

³⁸Ywə yə gɑ̌ gɔm a, a bɑ ywə yə gɑ jɔ bəŋ Tá a lə; tə sɔ' m nə po, po pɑ̀ gə ywə yə po jú' bəŋ tá yɔ a.

³⁹Wap pa' gɑ: Tá yɔk bɑ Abraham. Yeso ghɔm bi pu gɑ: Po pɑ pǒ Abraham, po fá' mfa' Abraham.

⁴⁰Po bɑwə shəŋ cwəlɔ nə zhwə a, myə̀ yə gɑ siŋ wɔ nyənyɔ yə gɑ ju' bəŋ Si a; Abraham la tə ghə po'o.

⁴¹Po bɑwə fá' mfa' ta yɔ. Wap ghɔm bi Yeso gɑ: Pyə tə́ bɑ pó pyə́ pu dzə wap m pě a pɑ́! Pyə̌ bɑ pyə ghə da' ta' tá yɑmu', e pɑ́ Si.

⁴²Yeso ghɔm bi pu gɑ: Si lǎ' bɑ́ pé'e bɑ́ tá yɔ, bɑ po kuŋ a, nə pa' gɑ̌ nthəm m nə Si tə́ sɔ̌'; ŋ tə sɔ' m nə yɑ thə́ pɑ́. Yʉ́ nə nthəm a.

⁴³Pǒ shyətə́ zhyə́ ghɔm tsɑ̌ nə kɑ? Nə pa' po ka ku' nə yu' ywə yə gɑ̌ gɔm a.

⁴⁴Tá yɔ bɑ́ Sata, po piŋ bɑ shəŋ pɑ nə ghə ywə yə tá yɔ shəŋ a. Tə́ fɑ pɑ́ nə to' e pɑ́ shəŋ pɑ nə zhwə mo; e lě tə́ ku' nə wuŋ nthʉm nyənyɔ pɑ́, nə pa' nyənyɔ tə́ bɑ nə́ é pɑ. Cwə yə e bɑ gɔm mcwanwə á, e té pɑ nə pa' e nə bɑ á, nə pa' e bɑ shwanwə, biŋ bɑ tá mcwanwə.

⁴⁵Tə́ sɔ' m nə m̀, po tə́ biŋ a pɑ́ nə pa' gɑ gɔm nyənyɔ a.

⁴⁶Bi a pɑ wɑ̌ nə po la'tə mhɔ mə̌ a? A bi a bɑwə gɔm nyənyɔ, bɑ kɑ́ gə tə́ la' po piŋ a?

⁴⁷Mo yə e bɑ m nə Si a ju' ghɔm Si; a biŋ shyə́ m nə pá' po tə́ bɑ m nə Si a pɑ́ tə́ po lə yu' a.

⁴⁸Pɑ Yudea pa' bi e gɑ: Pyə̌ hɔ nə ghɔm gɑ́ o bɑ yə Samaria, biŋ bɑ́ bɑ ǒ ghə zhwenyə cwəpuŋ a?

⁴⁹Yeso pa' bi pu gɑ: Gɛ̌, ŋ tə́ bɑ gɑ̌ ghə zhwenyə cwəpuŋ pɑ; gɑ̌ bɑwə hɑ mku' bi Tá a, da' gɑ po pɑwə nɔm a nɔ̀m!

⁵⁰Ŋ tə́ shəŋ nə ghu'tə nɑ a pɑ: Mo yə e fa' nə a bɑ si, biŋ bɑ fyɛ̌'.

⁵¹Kwa' nyənyɔ nyənyɔ gɑ̌ siŋ wɔ gɑ mo yə ě tɔm ghɔm tsɑ̌ a bɑ e tə gɔ la' yɔ vʉ́ pɑ.

⁵²Pɑ Yudea ghɔm bi e gɑ: Pyə zhyə cwəlɔ gɑ́ zhwenyə cwəpuŋ bɑ nə o. Abraham bɑ e lě npfʉ́, ba mghɔm ghɔm Si piŋ pfʉ́tə́ yap, o nə́ŋ biŋ dù m sǐ nə ghɔm gɑ́ mo yə ě tɔm ghɔm tsʉ̌ a, bɑ e tə gɔ la' yɔ vʉ pɑ.

⁵³A bɑ ǒ cyə tá yɔ́k Abraham yə e lə́ pfʉ a? Bɑ ba mghɔm ghɔm Si lě nəŋ pfʉtə́. O ŋkhe gɑ́ o bɑ wɑ́?

⁵⁴Yeso pa' bi pu gɑ: ŋ dǎ' pe' e bɑ́ gu'tə nɑ a pɑ myə̀ bɑ yɑ ghu'tə tə bɑ sɔmywə pɑ. Tá a nə gu'tə a, yʉ́ yə po biŋ gɑ́ e bɑ Si yɔ a.

⁵⁵A bɑ po kɑ zhyə é, tə́ bɑ gɑ̌ zhyə é. Ŋ dǎ' pe' gɔm gɑ́ ŋ kha zhyə é, bɑ gɑ̌ bɑ́ shwanwə pɑ́ pa' wɔ a; tə́ a bɑ gɑ̌ zhyə́ é, bɑ nthɔm ghɔm tsyə.

⁵⁶Abraham, tá yɔ lə ŋwɛnyə te'o nthʉm mɔktə nə́ yɔ Tyɛ'dzʉ a: E lě jɔ, shəŋtə ŋwɛnyə.

⁵⁷A pɑ́ po'o pɑ Yudea ghɔm bi e gɑ: O ka ghə bǎ gu'dzʉ mgham nthɔ, bɑwə gɔm gɑ o yɔ Abraham!

⁵⁸Yeso pa' bi pu gɑ: kwa' nyənyɔ nyənyɔ, gɑ̌ siŋ wɔ gɑ́ Abraham lə́ nə pɑwə bɑ ŋ dé da' bɑwə.

⁵⁹A lə pɑ̌ po'o wap pé mwɔ' bɑ gɔ nə ma' e, da' gɑ Yeso tʉmnyə nthəm Dyə Si.