Read Ghomala New Testament MFA' MGHƐ NTHƏM 1 Bible Online

MFA' MGHƐ NTHƏM 1 - Ghomala New Testament bible

MFA' MGHƐ NTHƏM 1

¹Teofilə, guŋ ywə awɛ yə Yeso lə ghə biŋ ji'tə tə fɑ nə́ nə ntho'

²tə gɔ́ ŋkhəm nə tyɛ'dzʉ yə e lə cyə m nə Zhwenyə Dɔlɔ̌ siŋ pɑkhʉ pyə pyə̀ e lə cwɔ' wap a ywə yə e shəŋ a, tə ŋkwɔ' kɛbəŋ a, dě bvə nthʉm dzə ŋwa'nyə a.

³Cwə yə e lə yɔgo' npfʉ́ biŋ jam nə vʉ̌ bɑ pɑ́ nthʉɔ a, e lə la'tə nɑ e pɑ bi pɑkhʉ pyə bɔ, da'tə nthinthi mtiŋ bi pu, gɑ wap nə jyə́ é; e lə la'tə nɑ e bi pu nə mtyɛ'dzʉ mghappfʉə, bɑ siŋ wap nwə nə Nəfo Si.

⁴Cwə yə pu a pú lə pɑwə dzʉywə a, e hɑ mco' bi pu gɑ ka wap təm Yerusalɛm, gɑ wap cwə pɑ wə́ byap ywə yə Ta lə ka'nyə bi pu a. Gɔm bi pu gɑ: mka'nyə myə po lə yu' bəm a,

⁵nə pa' Yohane lə nu' pɔ pɑ shyə, tə a cʉ' po mtyɛ'dzʉ pu nu' wɔ nthʉm Zhwenyə Dɔlɔ̌.

⁶Wap lə cu'tə həŋtə e gɑ: Cyəpɔ, a bɑ cwəlɔ tə o gɔ piŋ tʉ Nəfo Israɛl a?

⁷E ghɔm bi pu gɑ: A tə yɔ shɛ nə zhyə cwə ba wɔ dzʉ yə Ta jap nə pa' e zhyə a pɑ̀.

⁸Da' gɑ po gɔ sɔ' kwi tʉɔ, a tʉɔ Zhwenyə Dɔlɔ̌ yə a gɔ sɔ' nə po á, po cʉ' mghɛ kwinthɛ pɑ̌ Yerusalɛm, ba m nthʉm guŋ Yudea awɛ, ba m Samaria, tə gɔ ŋkhəm nə dhə dzʉ́.

⁹E lə ghɔm po'o, wap yɔ pa' e ŋkwɔ' gɔ a, mlwa sɔ' sam e, nthé é nə mnyə map.

¹⁰Pa' wap lə pɑ nthʉ mnyə map nə dé kɛbəŋ pa' Yeso wə gɔ a, wap wuŋ jɔ pɔpʉə bəŋ pu bɑ wap kwa mfə dzə.

¹¹Pɔ bɔ ghɔm bi pu gɑ: Pɑ Galilea, nwə kɑ po cwə tsa' a bɑ de kɛbəŋ? Yeso yɑ yə pu nthé e cəcɑ̌ po nə gɔ m kɛbəŋ a gɔ la' kwi' sɔ' pɑ pa' po jɔ e ghɔ m kɛbəŋ a.

¹²Pɑkhʉ̌ pyə lə fɑ kuŋ mthə Olivə gɔ Yerusalɛm. Kuŋ bɔ bɑ nə nthə ghiŋ yə pu biŋ nə ghiŋ nə Sabat a.

¹³Wap lə pɑnyə, ŋkwɔ' mtwɔ'dyə̌ nə zhə̀ŋ dyə́ thə́, tsʉ' yə wap lə shu'tə nə a. Wap pyə wap lə bɑ tsʉ'u a lə bɑ Pɛtrɔ, gə Yohane, gə Yakop pu Andreya; Filipo pu Tomasi; Batəlemi pu Matio. Yakop mu Alfeo, Simon Zelot ba Yuda mu Yakop.

¹⁴Guŋ yap awɛ lə bɑ pɑ ŋkwishwə, bɑ nthamtə shwyɛ'nyə Si guŋ mcwə awɛ pu a shɑ pɑ jwǐ pa' Maria má Yeso a bɑ mfɑ̌ Yeso.

¹⁵A lə pɑ nə mtyɛ'dzʉ bɔ Pɛtrɔ lusi cəcɑ̌ mfɑ̌mfɑ bɑ wap cu'tə tə bɑ gwɛ a pɔ popʉə m ŋkhə gɔm gɑ:

¹⁶Mfɑmfɑ, a lə bɑ shəŋ gɑ ywə yə Zhwenyə Dɔlɔ̌ lə ghɔm nthʉm ŋwa'nyə shyə̀ m nə shwə David gɔm tə tyɛ' a pəmtə nə Yuda yə e kɑ cʉ' gɛ la'tə məjyə bi pɔ pyə wap kɑ ghəm Yeso a.

¹⁷Pɑ a pu lə́ nə́ bəmtə bɑ, bɑ ě kwi tsyə́ fa' nə fa' tsɔk pɑ.

¹⁸A bɑ bɛ bɔ lě dɑ ŋkhap mnwə cwəpuŋ jo ca'; biŋ dɑ thə e bvʉ̌ bvyə́, tsə vam tsyə sɛ pě.

¹⁹Guŋ pɑ Yerusalɛm lə zhyə́ awɛ, a cyə m po'o wap ke cǎ' bɔ nə ghɔm tsap gɑ Hakəldama, a la'tə gɑ cǎ' mcyə.

²⁰A bɑ pu le shəŋtə bvə nthʉm ŋwa'nyə mzhwɔp gɑ: La' tsyə cʉ' famla', sɔmmo kɑ cwə nə. Biŋ kwi' bvə gɑ: Mu' mo kwi tsyə fa'.

²¹Shɑ pɔ sì pyə pa pú lə bəmtə bɑ̀ nə guŋ mcwə awɛ yə pa Cyəpɔ Yeso lə pɑ̌ e pɑ́ sa' wɔk pɑ a,

²²tɑ fɑ nə kwishyə Yohane gɔ ŋkhəm nə tyɛ'dzʉ yə e lə tə̌m cəcɑ̌ pɑ a. A ta' mo nə pu cʉ' mu' gɛ kwinthɛ pa' wɔk pɑ a, nə nə́ yam nə vʉ̌ é.

²³Pu lə la'tə pɔpʉə: Yosɛp yə pu ŋkhe e gɑ Barsabas ba m gɑ Yustos, biŋ gə Matiasi.

²⁴Pu lə piŋ shwyɛ'nyə Si gɔm gɑ: Wə Cyəpɔ yə o bɑ o zhyə mtʉm guŋ pɔ awɛ a, la'tə yə mo yə o cwɔ' e nə pɔ pɔgɑ pɑpʉə a,

²⁵po'o gɑ e ko nthʉm fa' mghɛ nthəm nə tsʉ' yə Yuda kɑ wa' a, gɔ m nə yə nthi tsʉ' a.

²⁶Pu lə tǎmnthuŋ a tsʉ Matiasi; tə fɑ cwə bɔ pu nyəŋ e cəcɑ̌ mghɛ nthəm pɔ shwɔp a mu' mgham.