Read Ghomala New Testament MFA' MGHƐ NTHƏM 12 Bible Online

MFA' MGHƐ NTHƏM 12 - Ghomala New Testament bible

MFA' MGHƐ NTHƏM 12

¹A lə pɑ nə wɔ̌dzʉ bɔ, fo Herode to' nə lɑ shɑ pɔ pyə wap lə bɑ nthʉm cu'tə pɔ Kristo a jɔgo'.

²E lə ghə̌ pu wà Yakop fɑ Yohane.

³E lə nə yɔ gɑ ǎ puŋ pɑ Yudea, gə pu kwi' gəm Pɛtrɔ, a lə bɑ nə tyɛ' msɛ́ tə kwɔ'msɛ̌.

⁴E lə ghə tə pu kyəp e cwəlɔ, e nyəŋ e dyəcɛ̌, jap gɑ msəŋwi mkam pfʉə pɔ pfʉə pɔ pfʉ̀ə pɑ dé e. E lə bɑwə shəŋ gɑ Paska cyə tə e putə e bi pɔmnəŋ.

⁵Cwə yə Pɛtrɔ lə bɑ dyəcɛ̌ a, mcwyɛ'nyə Si tə pwa nthʉm mcu'tə pɔ Kristo pɑ ŋkwɔ' gùŋ mcwə awɛ bəŋ Si nə tso tsyə.

⁶Herode lə pɑ gɔ ghə pu fyɛ' e. A pɑ mtsʉ', Pɛtrɔ pɑ dyəcɛ̌, tuŋ msəŋwi pɑpʉ̌ə bɑ e nuŋ bɑwə di, bɑ pu lɑ mgwɑ mtʉ̌ɔ məbʉə shəŋ e, shɑ msəŋwi pɑ jyədyə̌ bɑwə byap.

⁷Da' gɑ aŋgəle Cyəpɔ lə wuŋ ŋwak, ŋkha' lo dyə̌. Aŋgəle pu'tə bhə be Pɛtrɔ nə jam e, gɔm bi e gɑ: Lusi m gʉ̌'. Mgwɑ mtʉɔ lə kyɛ́' nə bu myə́.

⁸Aŋgəle piŋ gɔm bi e gɑ: Zhwé tap o, biŋ ŋkwɑ ŋkhə̀ mthap mǔ e ghə po'o, e piŋ ŋkwi' gɑ ŋkwa dzə o yə jʉm dzʉ̌ jap jʉ̌m m̀.

⁹Pɛtrɔ yap jʉ̀m e nthəm. E la tə bɑwə jyə nyənyɔ gɑ aŋgəle nə lə́ bɑwə bvɔk e pɑ, é bɑwə ŋkwɛ gɑ e jɔ pɑ nə yɔ m nthʉ̌m zhwenyə.

¹⁰Wap lə twɔk dəŋdzə nthap pyap, ba bátə nthap pyap yɑpʉə. Ŋwak nə jyədyə̌ mtʉ̌ɔ yə a de m tisuŋ a, a hé pɑ dǒ e dzə̌ pú; wap lə ko dzʉ cwəlɔ, gɔ tə ŋkhəm nə dhə təŋjyə gwyə, aŋgəle wuŋ fiŋ Pɛtrɔ gɔ tsyə.

¹¹E zhyə nɑ e, gɔm gɑ: cwəlɔ gɑ wə ju' kwa' nyənyɔ gɑ Cyəpɔ təm aŋgəle e, e sɔ' bvɔk a nə bǔ Herode pu a nə ywə yə pɑ Yudea kɑ bɑwə byap a.

¹²E lə́ lə̌ŋtə jyə cwəlɔ, ŋkhəm wə Maria ma Yohane yə pu ŋkhe e gɑ Markusi a. Pɔ tə jɔm lə bɑ wə bɑwə shwyɛ'nyə Si.

¹³E lə ko'tə vi' pù', mu' mú go, gɛfa', tso tsyə pɑ Rode sɔ' de.

¹⁴E lə tǐŋ gi Pɛtrɔ, ŋwɛnyə, ŋthak nə he pù' nəŋ ŋkhʉdʉ́ bɑnyə gɔm gɑ Pɛtrɔ shwə pú'.

¹⁵Pu ghɔm bi e gɑ o wə bʉə, da' gɑ e lə nə fʉ' m jʉ̀m. Wap ghɔm gɑ a aŋgəle e.

¹⁶Pɛtrɔ lə bɑ pɑ shwə pu' bo ŋkho'tə, wap cwɔ' cwəlɔ, jɔ a pɑ yʉ́. Nwə cyə wáp.

¹⁷Pɛtrɔ ma'tə pǔ gɑ wap lɛtə. Siŋ wap pa' Cyəpɔ bvɔk e á, nə mìŋ gɔm gɑ: Po ghɔ siŋ Yakop ba mfɑ̌mfɑ́. Biŋ ntham məjyə cwəlɔ gɔ m nə mu' tsʉ'.

¹⁸Dzʉ lə lɔ̌, va' ko cəcɑ̌ msəŋwi nə ywə yə Pɛtrɔ zhi ya a.

¹⁹Herode ghə gɑ pu cəŋ e, da' gɑ mo lə yɔ e. E ghə pu cəŋtə fyɛ' pɑ pyap cɛ́, e piŋ gɔm gɑ pu lə wap gɔ jwətə wap. Pɛtrɔ lə pǐŋ fɑ Yudea cwəlɔ dzəŋ gɔ Kaesarea na' shwə wə́.

²⁰Shɛ́ lə bɑ cəcɑ̌ Herode pu a pɑ Tiro ba pɑ Sidon. Wap lə cɔ̌m bɑ ŋkwishwə gɔ dzə e, Wap lə cyə̌ m nə yə nə ghiŋkǎm Blasto gɛfa' nthʉm twɔ'dyə̌ fò yə e lə bɑ nə yap jʉm a, gɔm gɑ pu a pu nyaptə pɑ tə nə gə shɛ. Nə pa' ywətsʉ lə fɑ m guŋ fò Herode tə sɔ' gǔŋ pu.

²¹A lə kǔ' tyɛ' mka'nyə, fo Herode kwadzə fo nə e, shwə dzə, sa' la'.

²²Cwə yə pɔmnəŋ lə pɑ̌ bu' bu gɑ a gi Si, a tə gi monəŋ pɑ̀!

²³Aŋgəle Cyəpɔ wuŋ dzɔp Herode nə pa' e ka hɑ ghu'tə bi Si a, mcwəcwə tsʉnyə e, e pfʉ.

²⁴Da' gɑ ghɔm Si pɑ ŋkwyə, bɑ sé.

²⁵Sɔ' m nə Barnabas pu Saulo, wap fɑ Yerusalɛm gɔ nə lɑ fa' tsap gɔ dzə̀; wap lə nə pɑnyə dɑ Yohane yə pu lə ŋkhe e gɑ Markusi a.