Read Ghomala New Testament MFA' MGHƐ NTHƏM 14 Bible Online

MFA' MGHƐ NTHƏM 14 - Ghomala New Testament bible

MFA' MGHƐ NTHƏM 14

¹A lə ko Ikonya bɑ pɑ́ pa' a kɑ zhí bɑ a: Polo pu Barnabas ghɔ dyə Sinagogə pɑ Yudea, gɔm nwə tə pɑ Yudea ba pɑ Grikia pʉɔtʉm tsap shʉ' pɑ piŋ kwa' vəŋ e.

²Da' gɑ pɑ Yudea pyə wap la tə piŋ a nyəŋ bo nthʉm tʉm pɑ tə pɑ pɑ Yudea pyə wap lə piŋ a nə mfɑ̌mfɑ.

³Polo pu Barnabas la tə cyətə na' shwə́ wə́ pɑ; tʉm sap lɑ bɑwə shəŋtə jap nə Cyəpɔ yə e lə bɑwə ŋkwinthɛ̌ nə ghɔm gho' tsyə́, bɑ gə wap lɑ bu map gə mtiŋ ba msya.

⁴Pɑ tisuŋ lə ghap m ghə̌ŋ bʉə. Shɑ pɔ pɑ jʉ̀m pɑ Yudea, pyə shɑ pɔ pɑ jʉm mghɛ nthəm.

⁵Pɑ tə pɑ pɑ Yudea pu a pɑ Yudea lə yap gɑ wap gɔ lɑ gʉ' ko nə, lɑ mwɔ' tamtə mghɛ nthəm.

⁶Polo pu Barnabas lə zhyə ywə yə a si a, shəŋ tsʉ' tʉmnyə tisuŋ Likonya, ba m Listra, ba m Dɛrbe pu a m géŋnyə tsʉ'u.

⁷Ba m tsʉ'u bɔ wap pɑ siŋ Cuŋ pɑpuŋ.

⁸Mu' mbɛ lə bɑ Listra bɔ bi a pɑ e lə tiŋnyə nə mkwə myə́, bɑ ŋkho'tə tə fɑ vam, bɑ e la m giŋ.

⁹E lə pɑ̀ mu' tyɛ'dzʉ bɑwə ju'nwə yə Polo lə bɑ̀wə́ gɔm a, Polo lé é dəŋdəŋ biŋ jɔ gɑ e ghə piŋnthʉm yə bi a pɑ a vɔ́k e a,

¹⁰gɔm bi e tɑ thə́ gɑ: Lusi nthiŋnyə dəŋdəŋ nə mkwə mu! Bɛ bɔ léŋ, giŋ.

¹¹Pu lə nə yɔ ywə yə Polo gə a, shɑ pɔ cəcɑ̌ pɔmnəŋ ghɔm nə ghɔm pɑ Likonya gɑ: Msi sɑnyə shʉ' pa' pɔmnəŋ a, fi' sɔ' bəŋ pɑ.

¹²Wap lə ké Barnabas gɑ Zʉs, ŋkhe Polo gɑ Hɛrmɛs nə pa' yʉ nə lə bɑ gɔm nwə.

¹³Ŋkhamsi dyə Zʉs lə́ ghə pu lɑ mpɔp mhuŋ pu a co' fo nə sɔ' mshwə tisuŋ. Pu a pɔmnəŋ pɑ ŋkwishwə nə nuŋpwɔ'.

¹⁴Mghɛ nthəm, Barnabas pu Polo lə nə yu' mɔ mcuŋ ŋkhitə dzə nə pù, ntham jʉ̌m pɔmnəŋ shwé gɑ:

¹⁵Mso mso! Po gə kɑ pa' a? Ba wɔk yɔk, pyə̌ bɑ pɑ̀ pɔmnəŋ pa' wɔ a! Cúŋ pɑpuŋ yə pyə siŋ wɔ a, bɑ gɑ po tak tsə mzhʉm ba nəŋ, ŋkwyəpnyə, fɛ de m nə Cyəpɔ Si nthʉɔtʉɔ yə e lə nyaptə kɛ̀bəŋ, ba sicǎ', ba shyə́ lɑpʉə pu a guŋ tsə tsyə a bɑ nthʉm o a.

¹⁶E le nthak guŋ mguŋ awɛ nə mwɔdzʉ myə a lě shyə a, bǎ ya lə ghiŋ nə yə məjyə̀ nə piŋ.

¹⁷Da' gɑ nə ghə po'o bɑ da'tə nwə pɑpuŋ e bi pu, nə pa' e gə bə̀ŋ fɑ kɛbəŋ, gə tsə puŋ, e hɑ bi pó, mtʉm mɔ́ pɑ ŋwɛnyə.

¹⁸Mghɔm mɔ gɑ lə ghə pɔmnəŋ lɛtə cwəlɔ, nthak pwɔ' tsyə wap kɑ́ bɑ̀ gɔ nuŋ bi pu a nəŋ.

¹⁹Shɑ pɑ Yudea lə fɑ Antiokia ba m Ikonya sɔ' ŋkho cəcɑ̌ pɔmnəŋ, gə wap piŋ mkwɛnyə map. Pu lə lɑ̌ mwɔ' nthamtə Polo, fəŋ e nə nthəm tisuŋ ma' e pa' pfə mo a.

²⁰Da' gɑ mghɛ zhi'nwə lə sɔ' shu'tə bəŋ e, e lusi cwəlɔ, biŋ ŋkho tisuŋ. Dzʉ lɔ, pu Barnabas lɑ m Dɛrbe.

²¹Wap lə kǒ wə siŋ Cuŋ pɑpuŋ. Gə mghɛ zhi'nwə jɔmyɔ̌m, wap lu, biŋ shyə m Listra, Ikonya, ba m Antiokia.

²²Wap lə ko wə bɑ kwyətə́ piŋnthʉm mghɛ zhi'nwə, bɑ shwi'tə gɑ wap kaktʉɔ nthʉm piŋnthʉm bɑ gɔm gɑ: Pɑ gɔ cyə m nə mghəghʉɔ jɔmyɔ̌m tə ko nə̀ Nəfo Si.

²³Wap lə ko bǎ nə ya cu'tə pɑ piŋ a, shwɔ' mghətso bi pù, shwə tə tsʉywə nə shwyɛ'nyə Si, tə nthak wap nə bǔ cyəpɔ yə wap lə piŋ e a.

²⁴Wap lə cyə Pisidia, gɔ Pamfilia

²⁵siŋ Ghɔm bi pɑ Pɛrge, dzəŋ m Atalea

²⁶ŋwak wə ŋkho kənu' gwyə nə gɔ m Antiokia tsʉ' yə wap lə lu nə tə pu cyə m nə gho' Si hɑ fa' tsyə wap lə lu m nə fa' a bi pu a.

²⁷Wap lə ŋwak wə cwəlɔ, shu'tə pɑ piŋ siŋ wap ywə yə Si lə ghə shyə m nə pu a, pa' e lə ghyɛ' jyədyə̌ piŋnthʉm bi pɑ tə pɑ pɑ Yudea a.

²⁸Wap pu a mghɛ zhi'nwə lə na' shwə.