Read Ghomala New Testament MFA' MGHƐ NTHƏM 19 Bible Online

MFA' MGHƐ NTHƏM 19 - Ghomala New Testament bible

MFA' MGHƐ NTHƏM 19

¹Polo lə tsəŋ fɑ m nə gùŋ mkúŋ ŋkhəm Efeso, cwə yə Apolos lə bɑ Korinto a. E lə ko wə jɔ shɑ mghɛ zhi'nwə

²biŋ həŋtə wap gɑ: Po kě ŋkwi Zhwenyə Dɔlɔ̌ cwə yə po kɑ cʉ' mghɛ piŋ a? Da' gɑ wap pa' bi e gɑ̀, pyə lam ju' bɑ pa' pu gɔm nwə nə Zhwenyə Dɔlɔ̌ a.

³Polo həŋtə wap gɑ, pu lə nu' wɔ pɑ nə kɑ? Wap ghɔm gɑ: Pyə lə ŋkwi pɑ shyə Yohane.

⁴Polo piŋ gɔm gɑ: Yohane lə nu' pɔ shyə pʉɔtʉm, biŋ həŋtə bi pɔmnəŋ gɑ wap piŋ Mo yə e gɔ sɔ' təm jʉ̀m e a; yəŋ la'tə gɑ Yeso.

⁵Wap lə yu' shwə e, ŋkwishyə nə tsǒ Cyəpɔ Yeso,

⁶Polo yap bu nə pu, Zhwenyə dɔlɔ̌ sɔ' nə pu. Wap ghɔm mghɔ̀m, gɔm nwə nə tso Si.

⁷Guŋ yap awɛ lə bɑ pɔ shwɔppʉə mghǎm.

⁸Polo lə́ bɑ gɔ dyə sinagogə guŋ mcwə awɛ, po'o nə mŋwə̀ tà, bɑ gɔm nwə nə Nəfo Si tə pwɔk, ŋkhaktʉɔ nə ghə gɑ pɔ pyə wap lə bɑ si ju' ywə yə é gɔm a piŋ.

⁹Cwə yə shɑ pɔ lə pɑ̀ sɔksɔk, dɑ nthə nə piŋ, bɑ shap məjyə̀ Si pɑ cəcɑ̌ pɔmnəŋ a, Polo tə́m nə pu, biŋ dɑ mghɛ zhi'nwə nə gɔ jʉ̀m, bɑ gɔm nwə bi pù guŋ mtyɛ'dzʉ awɛ dyə zhi'tə Tirano.

¹⁰A lə pɑ̌ pɑ po'o nə gu' pʉ̌ə, tɑ guŋ pɑ Azia, pɑ Yudea ba pɑ Grikia yu' ghɔm Cyəpɔ.

¹¹Si lə shyə́ m nə bǔ Polo bɑ́ gə kwa' msya.

¹²Tə́ pu pɑ dɑ bak dzə myə a kwak nə bəŋ nɑ Polo, jap nə mghɛ ghó, mghò map mi, mzhwenyə cwəpuŋ pɑ nthəm nə pù gɔ̌.

¹³Shɑ̀ pɑ Yudea, pɑ kəka jəŋ mzhwenyə cwəpuŋ lə to' yap nə pɑ ŋkhe tso Cyəpɔ Yeso nə pɔ pyə mzhwenyə cwəpuŋ lə bɑ̀ nə pu a. Wap lə gɔm gɑ: Gɑ gɔm bu nə tso Yeso yə Polo shyanyə a.

¹⁴Pǒ mu' tadyə mkamsi yə Yudea tso tsyə pɑ Seva, pó sɔmbʉə lə fo' yap mghətsə bɔ.

¹⁵Zhwenyə cwəpuŋ ghɔm bi pu gɑ: Gɑ zhyə́ Yeso biŋ jyə́ mo yə Polo bɑ yʉ̀ a. Tɑ sɔ' m nə po, pó bɑ̀ pɑ wɑ?

¹⁶Bɛ yə zhwenyə cwəpuŋ lə bɑ̀ nə e a lə piŋ deŋ ntham nə pu, shyə̀ wap awɛ, shwɔ wap tə wap nə thə́tə tam pe, dzə lə yɑ dəm sɔmmo, bɑ mfiŋ lo nə pu.

¹⁷Guŋ pɑ Efeso awɛ, ba pɑ Yudea pu a pɑ Grikia lə yu' nwə bɔ, pwɔk ko nə guŋ yap awɛ, wap pɑ jwɔp dəŋ pa' a bɑ tso Cyəpɔ Yeso ghú' a.

¹⁸Pɑ piŋ kwa' vəŋ e lə sɔ' bɑ biŋ mnwə map tə thə́.

¹⁹Bo'gwyə pɔ pyə wap lə bɑ wap ko nə mkɛ a pɑ shu'tə mŋwa'nyə map pfɑ́ e, pɑ cəcɑ̌ pɔmnəŋ ntho. Pu pɑ sɛ dəŋ e jɔ gɑ ŋkhap lə bɑ nə bi a pɑ a twɔk tsə bɛ sha' mghamnthɔ́.

²⁰A pɑ po' o bɑ shyə́ m nə gʉ' Cyəpɔ ghɔm pɑ ŋkwyə gɔ dzə biŋ bɑ gə dəŋ.

²¹A lə cyə́ m nə mnwə bɔ, Polo cyə m nthʉm Zhwenyə jap gɑ̀ e gɔ ghɔ Yerusalɛm, nə ghɔ cyə m Makedonya ba m Akaya. E lə piŋ gɔm gɑ: Gɔ tə ŋkho Yerusalɛm bɑ gɑ̌ gɔ piŋ ghɔ Roma.

²²E lə təm Timotio pu Erasto pyə wap lə bɑ mkwipu pyə a Makedonya, biŋ na' shwə Azia.

²³A lə pɑ̀ cwə o bɔ, kwa' mu' mɑ paknyə təm du nə nwə məjyə.

²⁴Nə pa' Demetrio, mu' gɛfa' və nə mtʉɔ́ gɔl yə e lə dɑ mtʉɔ ŋkhap nthə mfo' pa' dyə Artemis lə shyə m nə və bɔ pu a mghɛ fa' pyə pɑ gə mɑ fʉ' gwyə.

²⁵E lə cu'tə mghɛ fa' pyə pu a pɔ pyə wap lə fa' pɑ nə tsə bɔ a, gɔm bi pu gɑ: Mso pɑ pó zhyə́ gɑ pɑ̌ vɔk pɑ nə fa' tsɔ gɑ tsyə pɑ fa' a.

²⁶A nəŋ bɑ po'o po pɑ̀wə jɔ̀ biŋ jù' pa' pu wə gɔm, tə da' Efeso pɑ̀, ba m nthʉm guŋ Azia awɛ, pa' Polo wə ŋkhenyə la'lǎ' gə gɑ̀ wap zhyə pa' e gɔm a gɑ́ msi pyə wap fɑ nə bu mɔk pɑ á tə bɑ msi pɑ̀.

²⁷A pɑ̀ po'o pu lə pɑ̀wə gwi da' fa' tsɔk pɑ pɑ̀, a pɑwə shʉ' muywə ba mɑ dyəsi Artemis lə piŋ bɑ sɔmywə pɑ́, dəŋ mɑ ghamtə yə guŋ Azia ba gùŋ dzʉ awɛ kɑ nə gamtə a, a mǐ.

²⁸Pɔmnəŋ lə nə yu' ghɔm tsɔ gɑ, luŋ yap sə́, wap cwé pɑ dɔmnyə e gɑ: Artemis Efeso bɑ ě ghu'.

²⁹Va' lə lɑ̌ guŋ tisuŋ awɛ, pu hyànyə̀ gɔ tsʉ' yə la' shu'tə nə a, nə cyə̀ gəm Gayo pu Aristarko pɑ Makedonya mso ghiŋ Polo.

³⁰Polo yap gɑ e gɔ ghɔ tsʉ' cu'tə́, da'gɑ la' mghɛ zhi'nwə piŋ pɑ́.

³¹Bɑ shɑ́ mso pyə mtadyə Azia tɔk é gɑ e kɑ́ ghɔ tsʉ'u, nə pa' bi a pɑ̀ ywə ghə é.

³²Bǎ ya mo lə́ lə́ bɑ̀wə shwé pɑ yə nthi tə la' sɔmmo pɑ́wə ju' yə́ yə mu' mo. Bɑ va' yɔm tə la' shɑ pɔ pɑ́wə jyə̀ ba ywə yə pu shù'tə nə a.

³³Shɑ pɔ cəcɑ̌ vəŋ po lə ghɔm gɑ a bɑ nwə Aleksandrə: Pɑ Yudea thə́ e shya dzə. Aleksandrə lə lɑ̌ pu e gə mtiŋ gɑ e gɔ ghɔmnwə dzə cu'tə.

³⁴Pu lə nə yu' gɑ e bɑ yə Yudea, guŋ pɔ awɛ zhwyanyə nə mnam pʉ̌ə bɑ gɔm gɑ: Artemis Efeso bɑ ě ghu'!

³⁵Dwɔ'cam lə ghə̌ tə pɔmnəŋ lɛ́tə, e ghɔm gɑ: Wɔ pɑ Efeso mu' mo wə bɑ e ka zhyə gɑ tisuŋ Efeso bɑ tisuŋ dɔlɔ̌ bi Artemis bɑ bi kətwɔk e yə a lə fɑ kɛbəŋ shʉm a?

³⁶Pa' sɔmmo tə wə ŋkhəŋnyə a pɑ, a puŋ gɑ po lɛ́tə́ bwɔk va'.

³⁷Pɔ pyə po dɑ wap sɔ' a, sɔmmo nə pu kɑ hɔ mcò', e lə̀ nəŋ jəmtə si yɔk pɑ.

³⁸A pɑ gɑ Demetrio ba mghɛ fa' pyə̀ wap jʉm e a pu a mo ghə shɛ́, bɑ tyɛ' nə fyɛ' shɛ́ bɑ wə̀, pɑ ya'shɛ́ piŋ bɑwə, Guŋ yap awɛ ghɔ dyə fyɛ'.

³⁹Bi a shɑ̀ mnwə piŋ jɑ si a, bɑ cu'tə nə gɔ ti nyaptə.

⁴⁰Pɑ si po'o bi a pɑ̀ pu putə wɔk pɑ nə cu'tə yə̌ŋ gɑ́ pɑ̌ tʉɔthə́ bi pɑ sa' guŋ, nə pa' sɔmywə yə bi a pɑ́ pɑ̀ ghɔm gɑ́ ya nə gə tə pɑ cu'tə tə bɑ mco' zhyə́ biŋ bíŋ a, a tə wə pɑ.

⁴¹E lə ghɔm pɔ cwəlɔ, shwɔ' cu'tə.