Read Ghomala New Testament MFA' MGHƐ NTHƏM 2 Bible Online

MFA' MGHƐ NTHƏM 2 - Ghomala New Testament bible

MFA' MGHƐ NTHƏM 2

¹Tyɛ'dzʉ Pantekɔtə lə nə sɔ', bɑ guŋ yap awɛ cu'tə́ nə ta' tsʉ',

²pu lə wuŋ nə yu' ywə zhwyanyə kɛbəŋ pa' mɑ fəfa gwyə a: Dyə tsʉ' yə wap lə bɑ nə a lo ywə bɔ̌,

³a ŋwa' pa' mgwa mɔk a, gaptə bɔnyə ba a nə ya mo lə́ nə pu.

⁴Zhwenyə Dɔlɔ̌ lo nə guŋ yap awɛ. Wap pɑ gɔm shɑ́ mghɔm dyɛ', myə Zhwenyə Dɔlɔ̌ hɑ gɑ wap ghɔm a.

⁵A lə nə pɑ̌ po'o bɑ pɑ Yudea, pɑ lə mku' biŋ Si pɑ bɑ wap fɑ nə guŋ mguŋ to kɛbəŋ awɛ bɑ Yerusalɛm.

⁶Pɔmnəŋ lə nə yu' zhwyanyə sɔ' kwa' vəŋ e. Nwə pɑ shyə wap nə pa' bǎ ya mo lə lə bɑwə ju' ywə yə wap lə bɑwə gɔm a pɑ nə ghɔm tsyə.

⁷Nwə pɑ shyə wap bɑ jʉm wap wap pɑ́ gɔm gɑ: Guŋ pɔ pɔ́ gɑ pyə wap bɑwə gɔm a tə bɑ pɑ Galilea a lə?

⁸Tə a shyə m gɑ kɑ tə ba a ya mo lə nə pɑ̀ pɑwə ju' wap pɑ nə ghɔm tsyə?

⁹Pɑ Parta, pɑ Mɛdo, ba pɑ Elamita, ba pɑ Mesopotamia, pɑ Yudea ba pɑ Kapadokia, pɑ Ponto ba pɑ Azia

¹⁰pɑ Frugia ba pɑ Pamfilia; pɑ Egipto ba pɑ ghəŋ Libia, pɑ Kirena ba pɑ Roma pyə wap tsɔ' a.

¹¹Guŋ pɔ awɛ, pɑ Yudea ba pɑ piŋ nwə yap; pɑ Kreta ba pɑ Arabya, pɑ si bɑwə ju' pa' wap wə gɔm msya Si a nə ghɔm tsɔk pɑ̀.

¹²Nwə pɑ shyə wap, wap yak ywə yə wap ghɔm a gɔm cəcɑ̌ pu gɑ: yəŋ kɑ nthi nwə?

¹³Shɑ pɔ pɑ gwi wap gɔm gɑ: pyanyə́ mlu' bɑ a lo nə pu.

¹⁴Pɛtrɔ yə pu a pɔ shwɔp ya mu' mgham lə bɑ a lə ghɔm tə thə gɑ: Wɔ pɑ Yudea, ba guŋ yɔ awɛ pyə pǒ shwə Yerusalɛm a, po cəŋtə ju' ywə yə a wə shyə a, biŋ nthéŋ mtəŋ nə mghɔm mə̌.

¹⁵Gɛ̌! Pɔ pɔ gɑ ka nwə́ pa' pǒ wə ŋkwɛ a, nə pa' pɑ jɑ pɑ́ fɔkdzʉ̌, nə mnam vʉ̌'.

¹⁶Ywə yə a bɑwə shyə a, bɑ ywə yə gɔm mghɔm Si Yoɛl lə la' gɔm a:

¹⁷Nə pa' Si lə ghɔ̌m gɑ: A gɔ sɔ' pɑ nə jyɔjʉm tyɛ'dzʉ a sɛ Zhwenyə a nə guŋ bapnɑ pɔ awɛ. Pó pɔ́ pyə pɑ bɛ ba pyə pɑ jwǐ cʉ' mghɛ ghɔm ghɔ̀m Si. Mŋkhɛ mo pɔ́ pɑ jɔ nə yɔ m nthʉm zhwenyə, mvo pɔ pɔ́ pɑ jɔjʉm.

¹⁸Əŋ, gɑ gɔ sɔ' sɛ Zhwenyə a nə mghɛ fa' pɑ̌ pyə pɑ bɛ bɑ pyə pɑ jwǐ, nə Tyɛ'dzʉ bɔ a sɛ Zhwenyə a nə pu, wap cʉ' mghɛ ghɔm ghɔ̀m Si

¹⁹Gɑ̌ gɔ sɔ' te msya kɛbəŋ piŋ la'tə mtiŋ dəmcǎ', a pɑ mcyə, mɔ̌k ba dhə mɔk.

²⁰Nam gɔ sɔ' kwyəpnyə cʉ' jʉ́m. Mɑŋwə́ cʉ' mcyə. Tə tyɛ'dzʉ Cyəpɔ sɔ', tyɛ'dzʉ gwyə́, tyɛ'dzʉ ghu'tə.

²¹Po'o bǎ ya mo lə yə é gɔ sɔ' ké tso Cyəpɔ a gɔ sɔ' vɔk.

²²Pɑ Israɛl po yu' mghɔm mɔ gɑ: Yeso yə Nazarɛt, bɛ yə̌ŋ yə Si lə cwɔ' e nthəm e bəŋ po, shyə́ m nə e gə nthinthi msya pu a nthinthi mtiŋ cəcɑ́ po pa' po zhyə a, nə da'tə mtʉ̀ɔ myə́.

²³Bɛ bɔ, pa' Si lə tsə zhyə biŋ jap a, po le fiŋ e, nə zhwə e, gə pɔ cwəpuŋ kam e thə bɛnyəpɛnyə,

²⁴da' gɑ́ Si lé jam e nə vʉ̌, ŋkwi e bi gǒ' vʉ̌, nə pa' a lə bɑ́ bi a pɑ́ vʉ̌ lə lɑ́ gʉ' e nə nthɔm e pɑ.

²⁵David gɔm nə e gɑ: Ŋ də́ bɑ́wə jɔ Cyəpɔ pɑ dzə̌ m̀ nə pa' e bɑ́ nə ghə̌ŋ pu a yə tʉɔ po'o gɑ ka lam tsɑ̌ sɔ.

²⁶A pɑ́ po' o tʉm tsɑ pɑ nthʉm ŋwɛ́nyə̀, shwə̀ a pɑ jwɔp mŋwɛ́nyə̀. A kwi' bɑ́ pó'o gɑ́ ŋ sɔ' bɑ shwə nə mɔktə nə bapnɑ a.

²⁷Nə pa' o tə gɔ sɔ' tak vɔk á bi vʉ̌ pɑ, o lə nəŋ bíŋ gɑ mo dɔlɔ̌ o pi.

²⁸A bɑ o la'tə á məjyə̀ vɔk o gɔ sɔ' lə pa' o gɔ pɑ bəŋ m̀ a nə nyəŋ ŋwɛ́nyə̀ nə m̀ tə a ló.

²⁹Mfɑ́mfɑ́, a puŋ nə siŋ wɔ sɔ́sɔ̌ gɑ́ ta yɔk pɑ David bɑ e lě pfʉ́, pú lé nthəŋ e, thəsì é nəŋ jɑ pɑ́ cəcɑ̌ pɑ.

³⁰Tə é lə bɑ gɔm ghɔ̀m Si, jyə gɑ ɑ́ bɑ Si lě ŋkha' bi é, biŋ ŋkhɔ mkɔ gɑ é gɔ sɔ' yap mo nə kwɔ' é, e təm pɑ nə ŋkhənyə e, bɑ́ gwya é.

³¹E lɑ́ ləŋdzə jɔ nə́ yam nə vʉ̌ Kristo, tə́ gɔm nə́ é gɑ: Pu lé tə wa' é guŋ a vʉ̌, la' nɑ é nəŋ bǐ pɑ́

³²Yeso bǎ, Si lé jam é nə vʉ̌. Guŋ yɔk pɑ awɛ nəŋ bɑ́ mkwinthɛ́.

³³Pú tʉɔ Si lé ŋa' é hɑ thə́, Tá hɑ́ Zhwenyə Dɔlɔ̌ yə é lə ka' á bi e, e sɛ pa' po wə jɔ biŋ ju' a.

³⁴David lě tɑ́ kwɔ' kɛbəŋ, da' gɑ e le gɔm gɑ: Cyəpɔ ghɔm bì Cyəpɔ a gɑ: cwə nə ghəŋ pu a yə tʉɔ.

³⁵Tɑ̌ ŋ də mghɛ bò pǔ nə gə kwɔ̀' tʉ mkwə mǔ.

³⁶Guŋ tuŋdyə́ Israɛl zhyə́ nyənyɔ: Si bɑ é lé dɑ Yeso bɔ yə po lə kwé é thə́ bɛnyəpɛnyə a nə gə Cyəpɔ ba Kristo!

³⁷Wáp lə yú' mghɔm bɔ̌ á paknyə tʉm tsap. Wap hə́ŋtə̀ Pɛtrɔ, ba pyə shɑ mghɛ nthəm gɑ: Mfɑ̌mfɑ́ pyə gɔ́ ghə̀ gɑ́ kɑ?

³⁸Pɛtrɔ pa' bi pu gɑ: Po kwyəpnyə́ bǎ ya mo lə́ nə po kwishyə nə tso Yeso Kristo nə lɑ mhɔ myə́ shwyɛ́' é, po piŋ kwi Zhwenyə Dɔlɔ̌.

³⁹Nə pa' mka'nyə bɔ bɑ̀ bi po ba m bi pó pɔ́, ba m bi pɔ pyə wap tə gʉə sʉəsʉə a nə dəŋ pa' Cyəpɔ Si yɔk pɑ gɔ sɔ' nə kè wap a.

⁴⁰Pɛtrɔ lə́ lɑ shɑ nthinthi mghɔm nyəŋ gʉ' nə pu biŋ bɑ ŋkwinthɛ̌ bɑ gɔm gɑ: Po vɔk nɑ tsɔ nə yəŋ wɔ̌ dzʉ cwəpuŋ.

⁴¹Pɔ pyə wap lə piŋ ghɔm tsyə́ a, lə kwishyə, pɔ gwɛ a sha'tá piŋ nthamtə nə pu tyɛ'dzʉ bɔ.

⁴²Wap lə bɑ si guŋ mcwə awɛ bɑ ŋkhaktʉɔ nə jí' nwə mghɛ nthəm, bɑ nthamtə́ nə dzʉ̌nyə́ mfɑ̌mfɑ́, ba nə po'nyə msɛ̌, ba nə cwyɛ'nyə Si.

⁴³Pwɔk lɑ bɑ́ nə gúŋ pɔ̀ awɛ: mghɛ nthəm pɑ gə msya pwa mtiŋ nthinthi.

⁴⁴Guŋ pɔ pyə wap lə piŋ a lə bɑ́ pɑ́ ŋkwishwə, bɑ nthamtə guŋ tsə tsap tamtə.

⁴⁵Wap lə bɑ fiŋ mbé map ba tsə́ tsap, gaptə ŋkhap cəcɑ̌ guŋ yap awɛ, hɑ bǎ yə wɑlɑ nə dəŋ mnwə myə́.

⁴⁶Wap lə bɑ guŋ mtyɛ'dzʉ awɛ bɑ gɔ Dyə Si, bɑ bo'tə msɛ mdyə map, bɑ dɑ ŋwɛ́nyə̀ dzʉywə, tə ŋa'nɑ.

⁴⁷Wap lə bɑ go'tə Si, guŋ pɔ awɛ pɑ dɑ wap kwá' pɑpuŋ. Cyəpɔ pɑ guŋ mtyɛ'dzʉ awɛ ŋkwi' pɔ pyə wap kwi ywə vɔk a nə cu'tə pɔ pyə.