Read Ghomala New Testament MFA' MGHƐ NTHƏM 22 Bible Online

MFA' MGHƐ NTHƏM 22 - Ghomala New Testament bible

MFA' MGHƐ NTHƏM 22

¹Mfɑ̌mfɑ́ pu a mtǎmtá, po yu' mkwinthɛ mə̌ myə gɑ gɔ ghɔm bi po cwəlɔ a.

²Pu lə yu' pa' e gɔm ghɔm Ebraika a, pɔmnəŋ cəŋtə dɛtə gɑ kǎm.

³Polo ghɔm gɑ: Gɑ̌ ba yə Yudea, bɑ pu dzə a Tarso m Kilikia. Da' gɑ pú kwyə́ a pɑ si tsɔ'ɔ, nthʉm tisuŋ yə̌ŋ, bəŋ Gamaliɛl, e zhi'tə a mco' mta pɔk pɑ̀ kwa' pɑpuŋ. Ŋ də bɑ́ kwa' mo Si tɑ mǐŋ, kwa' pa' po wə cwəlɔ nə bɑ́ awɛ a.

⁴Ŋ də́ pɔ́ jyə́ bǎ tə shyə̀ vʉ́, gə pu ghəm pɑ bɛ́ ba pɑ jwǐ dɑ́ mtʉ́ɔ shəŋ wap nyəŋ cɛ́.

⁵Ŋkhamsi gwyə ba guŋ mghətso awɛ si bɑ̀ mkwinthɛ́ nə́. Ŋ də ŋkwi ŋwa'nyə pɑ bi pu tə bɑ nə gɔ m Damasi nə ghəm mfɑ̌mfɑ́, cəŋ wap nə ghɔ Yerusalɛm pu nyəŋ shɛ thə pu.

⁶Ŋ də ghɔ tə bɑ̀ gɔ kəm Damasi, a pɑ gwɛ a mɔkcʉ́, gúŋ nə yɔ̀ mɑ ŋkha' fɑ́ kɛbəŋ, dɑ sɛ̀ e nə sam a.

⁷Ŋ bvʉ̀si, ju' pa' gi mo wə gɔm bəm gɑ: Saulo! Saulo, o shwɔ'mkwə mə̌ cwəpuŋ gɑ̀ kɑ̀?

⁸Ŋ ba' gɑ: O bɑ̀ wɑ̀ Cyəpɔ? Gi bɔ piŋ gɔm gɑ: Gɑ bɑ Yeso yə Nazarɛt yə o bɑwə shwɔ' mkwə myə́ cwəpuŋ a.

⁹Pɔ pyə pyə a pu lə bɑ̀ a lə yɔ̌ ŋkha' bɔ da' gɑ la' wap yu' gì yə a lə bɑwə gɔm nwə bəm a.

¹⁰Ŋ də həŋtə gɑ: Gɑ gɔ ghə gɑ kɑ̀ Cyəpɔ? Cyəpɔ ghɔm bəm gɑ: Lusi gɔ Damasi, pu gɔ ko wə́ siŋ o fa' tsyə a wə byap o a.

¹¹Da' gɑ pa' sɛ ŋkha' bɔ lə bɑ a pi mnyə mə̌ a, pɔ pyə pyə a pu lə bɑ a lə tɔm pɑ pu a tə dɑ́ a nə ŋkho Damasi.

¹²Mu' mo lə bɑwə tsó tsyə pɑ̀ Ananias. E lə bɑ̀ kwa' dɑ mku' biŋ, bɑ giŋ nə mco' pɑ Yudea. Nwə tsyə́ pɑ buŋ guŋ pɑ Yudea pyə wap lə shwə́ tsʉ' u a.

¹³E lə sɔ' jɔ a, gɔm bəm gɑ: Saulo, fɑ a, piŋ jɔ́ tsʉ'! Pɑ cwə o bɔ ŋ guŋ jɔ tsʉ́', jɔ e.

¹⁴Ananias piŋ gɔm bəm gɑ: Si mtá pɔ́k pɑ cwɔ' o gɑ o zhyə ywə yə e shəŋ a, gɑ o yɔ nwə dəŋdəŋ, biŋ ju' pɑ gi yʉ Si.

¹⁵O gɔ pɑ yə ŋkwinthɛ̌ dzə guŋ pɔ awɛ nə ywə yə o gɔ yɔ piŋ yu' a.

¹⁶O biŋ jʉ'nyə nə kɑ? Kwi shyə, ŋkwi ba nə cǔ' o nə mhɔ mǔ shyə m nə tso tsyə́.

¹⁷Ŋ də́ pɑnyə Yerusalɛm, bɑ̀ Dyə Si bɑwə shwyɛ'nyə Si mu' tyɛ'dzʉ, jɔ nə yɔ m nthʉm zhwenyə.

¹⁸Biŋ jɔ Cyəpɔ e ghɔm bəm gɑ: Təm Yerusalɛm kwa' mgʉ' ʉ nə pa' wap tə gɔ piŋ kwinthɛ yə o gɔ kwi nə m̀ a pɑ.

¹⁹Ŋ ba' bi e gɑ. Cyəpɔ wap zhyə gɑ myə̀ nə lə gɔ msinagogə gə pu nyəŋ pɑ piŋ dyə cɛ́, biŋ dɑ mka' cyə shwɔ wap.

²⁰A piŋ nə pɑ bɑ po'o, bɑ cwə yə pu lə pfyə mcyə Etiennə ŋkwinthɛ̌ o a, ba myə̀ yɑ ŋ də bɑ́ si, nwə pɔ pyə wap lə zhwə Etiennə a puŋ a, nə pa' myə̀ nə lə dwɔ' dzə tsap.

²¹Da' gɑ Cyəpɔ piŋ gɔm bəm gɑ: Ghɔ̌, gɑ gɔ təm o tə gʉə sʉəsʉə, nə mguŋ pɑ tə pɑ pɑ Yudea.

²²Mguŋ pɑ Yudea pyə́ wap lə yu' ywə yə Polo lə ghɔm tə ŋkhəm cwə bɔ a, lə nə yu' mghɔm mɔ̌, bɑ shwé gɔm gɑ: Pu zhwə mó bǎ, e tə mo yə bi a pɑ̀ tak é tə zhwə e a pɑ̀.

²³Cwə yə wap lə pɑ shwé po'o, bɑ ma' mdzə map pu a vɔp thə a,

²⁴tadyə sa' msəŋwi ghɔm gɑ́ pu nyəŋ Polo nthʉɔdyə dɑ pɑ nthé tɑ nə həŋtə e nwə; po'o gɑ pu zhyə̀ kwa' ywə yə a gə tɑ pu pɑwə shwe jʉm e a.

²⁵Pù lə ghɔ m nə siŋ Polo si tə cwɔ e, e ghɔm bi tádyə msəŋwi ŋkhə yə e lə bɑ nə fa' a gɑ: Mu e Roma yə pu ka wuŋ fyɛ' e, o ghə nə cwɔ e a?

²⁶Tádyə msəŋwi ŋkhə lə nə yu' po' gɔ siŋ tà sa' msəŋwi, gɔm bi e gɑ: O bɑ gɔ ghə kɑ̀ pe' e! Bɛ bɔ bɑ mù e Roma.

²⁷Tá sa'msəŋwi lə piŋ sɔ', həŋtə Polo gɑ: Siŋ a, o bɑ mù e Roma nyənyɔ a? Polo ghɔm gɑ ŋ.

²⁸Tá sa'msəŋwi piŋ gɔm gɑ: Ŋ də yǒ m tʉɔdə̀ŋ tə́ biŋ tso bǎ. Polo piŋ gɔm gɑ tə sɔ' m pa' myə̀ a pu lə́ nə dzə̀ a.

²⁹Pɔ pyə wap lə̀ bɑ gɔ təŋtə e a lə wuŋ nə̀ŋ é. Tə sɔ' m nə tádyə sa' msəŋwi lam tsyə sɔ' nə zhyə gɑ à bɑ mù è Roma tə á bɑ̀ é cəŋ é.

³⁰Dzʉ lə lɔ̌, tádyə sa' msəŋwi pɑ shəŋ nə zhyə kwa' ywə yə pɑ Yudea bútə Polo nə á kwa' nyənyɔ, gə pu kyɛ́' mgwɑ mtʉɔ mkwə e biŋ shu'tə mkamsi gwyəgwyə ba guŋ Sanedrɛŋ awɛ cwəlɔ gə Polo fi' sɔ' dzə pù, wap fyɛ' e.