Read Ghomala New Testament MFA' MGHƐ NTHƏM 25 Bible Online

MFA' MGHƐ NTHƏM 25 - Ghomala New Testament bible

MFA' MGHƐ NTHƏM 25

¹Festo lə ŋwák ghəŋ guŋ é, a nə cyə tyɛ' tá, e lú Kaesarea bʉɔ gɔ Yerusalɛm.

²Mkamsi gwyə pu a mkam guŋ pɑ Yudea sɔ' jɔ́ é butə Polo bi e. Wap lə shəŋtə

³biŋ həŋtə é pa' cwə yə wap shwyɛ'nyə e cwyɛ'nyə a tə a pɑ mfʉ̌ gɑ̀ e ghə Polo pɑnyə Yerusalɛm: wap lə bɑ̀wə dʉ' pɑ yo' nə Polo, bɑ́ shəŋ nə zhwə e məjyə.

⁴Da' gɑ Festo pa' bi pu gɑ̀ tsʉ́' cɛ́ Polo bɑ́ pɑ́ Kaesarea, a piŋ nə pɑ̌ po'o e pɑwə gúŋ bɑnyə m wə. Biŋ gɔm bi pu gɑ:

⁵Pɔ pyə wap cəcɑ̌ po bɑ̀ wap ghə tʉɔ a, pyə a pu pəmtə dzəŋ Kaesarea, po'o gɑ nwə pɑ nə bɛ bɔ, wap pùtə e.

⁶Festo la tə cwə wə pu tə a kəm tyɛ'dzʉ hɔm kɑ gham lə. E lə tsəŋ tə ŋkho Kaesarea cwəlɔ, dzʉ́ nə lɔ́ e wuŋ gɔ dyə fyɛ̀' gɔm gɑ̀ pú lɑ Polo sɔ̌'.

⁷Polo lə sɔ̌' tə bɑ tsʉ'u, pɑ Yudea pyə wap lə tsəŋ fɑ Yerusalɛm a, tsam e nyəŋ tùŋ, gɔm nthinthi mnwə cwəpuŋ nə e, da' gɑ wap lə kú' nə la'tə gɑ ywə yə wap gɔm a nyənyɔ pɑ.

⁸Polo tɔm ghɔm nə nthɛ tsyə́ gɑ: Ŋ khɑ hɔ mco' pɑ Yudea, ŋ də nəŋ hɔ bi Dyə Si, kɑ bi Kasa lə.

⁹Festo pɑ shəŋ nə puŋ pɑ Yudea, gɔm bi Polo gɑ: O piŋ nə pʉɔ Yerusalɛm po'o gɑ pu fyɛ' nwə o dzə̌ m̀ a?

¹⁰Da' gɑ Polo pa' gɑ: Gɑ po'o bɑ dzə dyə fyɛ' Kasa, a pɑ̀ tsʉ' yə pu gɔ fyɛ' a nə a. Sɔ' m nə pɑ Yudea, bɑ ŋ kha hɔ sɔmywə bi pu pa' kwa' wə̌ wə shəŋtə jɔ a.

¹¹A pɑ nyənyɔ gɑ gɑ̌ hɔ mu' nwə, bɑ gɑ gɑ̌ ghə nwə yə a wə shəŋ pɑ gɑ́ pú zhwə ǎ, bɑ ŋ tə wə ŋkhəŋnyə vʉ́ pɑ́. Nəŋ bɑ́ gɑ́ guŋ mnwə myə pɔ pɔ̌ gɑ gɔm nə m̀ a tə ywə pɑ́, bɑ sɔmmo ka ghə nə hɑ a bi pù. Gɑ̌ si bɑwə nthéŋ Kasa.

¹²Festo lə həŋtə mkwɛnyə pɔ pyə wap lə bɑ̀ bəŋ e a, biŋ gɔm bi Polo gɑ: Pa' o ntheŋ Kasa a, o gɔ ghɔ dzə̌ Kasa.

¹³Shɑ mtyɛ'dzʉ lə nə cyə, fo Agripa pu Bernike sɔ' Kaesarea, gɔ de Festo.

¹⁴Pa' wap lə bɑ gɔ na' cwə wə́ a, Festo lə siŋ fo nwə Polo gɑ: Mu' mo bɑ dyəcɛ̌ tsɔ'ɔ bɑ Feliksə lə nyəŋ e.

¹⁵Pa' ŋ khɑ pɑ́ Yerusalɛm, mkamsi gwyə pu a mkam guŋ pɑ Yudea kɑ sɔ' butə e bəm, gɔm gɑ pu nyəŋ shɛ thə̀ é.

¹⁶Ŋ gɔm bi pu gɑ a tə bɑ ma bi pɑ Roma gɑ pù pùtə mo pù wuŋ nyəŋ pɑ shɛ thə́ e tə yu' wap pu a pɑ putə e biŋ fyɛ' e, ju' mtɛ myə́ nə nwə yə pu gɔm nə e a pɑ.

¹⁷A kě bɑ po'o wap sɔ' tsɔ'ɔ, guŋ gə dzʉ̌ nə lɔ guŋ gɔ pɑ dyə fyɛ' gɔm gɑ pu lɑ bɛ bɔ sɔ̌'.

¹⁸E sɔ', pɑ putə́ e tsam e nyəŋ tùŋ, da' gɑ la' wap hɑ sɔm mhɔ nə e myə ŋ khɑ bɑwə ŋkwɛ a pɑ bɔkbɔk e pɑ́.

¹⁹Pu a pu lə bɑwə fəŋnyə nwə pɑ da' nə nwə Si yap biŋ bɑwə fəŋnyə nwə mu' Yeso yə e kɑ pfʉ̌, tə Polo pɑ́wə gɔm gɑ e bɑ pɑ wə a.

²⁰Pa' ŋ ka tə zhyə pa' bi a pɑ gɔm nə yəŋ gɑ nthi nwə a, ŋ khɑ ghɔm bi Polo gɑ e ghɔ Yerusalɛm tɑ pu fyɛ' yəŋ nwə.

²¹Da' gɑ Polo kəŋnyə gɔm gɑ e gɔ ké pɑ Kasa nə yə́ shɛ. A pɑ po'o dwɔ' e dyəcɛ̌ tə nə byap cwə yə gɑ gɔ cya e dzə Kasa a.

²²Agripa lə yu' po'o gɔm bi Festo gɑ: Ba myə̀ yɑ̌ gɑ̌ gɔ yu' mo bǎ. Festo pa' bi e gɑ: A gɔ pɑ yo' o yu' e.

²³Dzʉ̌ lə lɔ̌, Agripa pu Bernike lɑ msəm kwiŋ ŋwak, ŋkho dyə fyɛ', mtadyə msəŋwi pu a mkam tisuŋ pɑ jʉ̌m pú, Festo ghɔm pu lɑ Polo sɔ'.

²⁴Festo piŋ dɑ ghɔm, gɔm gɑ: Fo Agripa ba guŋ yɔ awɛ pɑ́ pyə́ pɑ pə̌mtə bɑ a, po yɔ bɛ yəŋ gɑ. Guŋ pɑ Yudea awɛ kɑ sɔ' jɔ a nə e Yerusalɛm ba m tsɔ'ɔ bɑ shwe gɑ pu zhwə e.

²⁵Sɔ' kwa' m nə m̀, ŋ khɑ yɔ sɔmywə nə mfa' myə́ yə bi a pɑ a ghə pu zhwə e a. Da' gɑ pa' e kɑ téŋ Kasa á, gɑ gɔ cya e bi e.

²⁶Pa' ŋ khɑ zhyə ywə yə gɑ gɔ nə cyə e bi Kasa və bi e kwa' pɑpuŋ a, gɑ̌ lɑ e sɔ' dzə po, dzə̌ o, wə fo Agripa fyɛ' tə yɔ ywə yə gɑ̌ gɔ və bi Kasa nə nwə yəŋ a.

²⁷Nə pa' gɑ yɔ gɑ shya gɛ cɛ̌ bi Kasa tə və ywə yə pu butə e nə a, bɑ a gɔ pɑ kwa' mzhʉ̌m.