Read Ghomala New Testament MFA' MGHƐ NTHƏM 26 Bible Online

MFA' MGHƐ NTHƏM 26 - Ghomala New Testament bible

MFA' MGHƐ NTHƏM 26

¹Agripa ghɔm bi Polo gɑ: Pu piŋ gɑ o tɛ yù nwə̀. Polo siŋ pu e, nthɛ nwə e gɑ:

²Fo Agripa, a bəm tyɛ' ɔ bɑ kwa' nwə pɑpuŋ gɑ nthiŋnyə dzə o ŋkwinthɛ̌ nə mnwə myə pɑ Yudea nthʉ́ thə m̀ a.

³Nə pa' a bɑ o zhyə guŋ mà pɑ Yudea awɛ pu a mfəŋnyə mnwə map. Səso ghɔ dɑ kwa' tʉ̌m pɑpúŋ tə nə ju' yɑ nwə.

⁴Guŋ pɑ Yudea awɛ zhyə pa' ŋ də nə bvɔk Yerusalɛm tə fɑ cwə yə ŋ də bɑ mú bwa a.

⁵Wap zhyə́ tə fɑ tə tyɛ̌' tə bi a pɑ wap kùŋ bɑ wap gɔ pɑ mkwinthɛ gɑ ŋ də vɔk kwa' dəndəŋ pa' nə piŋ Si yɔk shəŋ a, bvɔk pa' tà' Farisai a.

⁶A pǐŋ bɑ tyɛ' ɔ pu pɑ̀wə dɑ a sɔ' dyə fyɛ' po'o gɑ gɑ̌ mɔktə mka'nyə myə Si lə la' ŋkha' bi mtá pɔk a.

⁷Mka'nyə myə mtùŋdyə mɔk shwɔppʉə mgham nə fa' bi Si mtsʉ' ba mɔkcʉ tə pwa, bɑ́ mɔktə gɑ a gɔ la' pəmtə a; pɑ Yudea butə a po'o nə nə́ piŋ bɔ̌ m fo pɑ lɔ'.

⁸Nwə kɑ̀ po pɑ̀ cəcɑ̌ pó bɑwə gɔm gɑ bi a pɑ́ Si lə yam mo nə vʉ̌? Gɑ a msya nwə?

⁹Sɔ' m nə m̀, bɑ ŋ də cəŋtə nyəŋ gɑ́ gɑ gɔ ma' tsó Yeso yə Nazarɛt shù nə guŋ mməjyə̀ awɛ.

¹⁰A nə́ŋ bɑ̀ ywə yə ŋ də ghə Yerusalɛm a; nə pa' ŋkhamsi gwyə lə hɑ tʉɔ bəm, gɔ Yerusalɛm gəm pɑ piŋ nyəŋ wap cɛ́, biŋ bíŋ gɑ pú zhwə wap.

¹¹Ŋ də kǎ nə guŋ msinagogə awɛ bɑ shɔ́k nə pú, nthənyə wap gɑ̀ wap kəŋnyə piŋnthʉm yap; ŋ də nə miŋ ma' nə, jə́ŋ wap zhəŋ tə ŋkho ba tisuŋ dyɛ'.

¹²A po'o tə ŋ də kwi ŋwa'nyə bi ŋkhamsi gwyə, ŋwa'nyə yə a lə hɑ guŋ tʉɔ awɛ bəm a, bɑ nə gɔ m Damasi.

¹³Ŋ də pɑ̌ məjyə m fò yɔ̀k, a pɑ̀ ŋkhɛ a mɔ́kcʉ, guŋ nə yɔ mú' ŋkha' fɑ kɛbəŋ bɑ̀wə dəŋnyə tə shyə́ nam, dɑ́ sɛ e nə dzʉm wɔk pyə a mso ghiŋ pɑ̌.

¹⁴Pyə a pú awɛ vʉsi, ju' gi mo ghɔm bəm nə ghɔm pɑ Ebraika gɑ: Saulo, Saulo! O shwɔ' mkwə mɑ cwəpuŋ gɑ̀ kɑ̀? A tʉɔ bu nə tʉɔthə́ bi shyə syap.

¹⁵Ŋ də pa' gɑ: O bɑ̀ wɑ̀ Cyəpɔ? Cyəpɔ ghɔm gɑ̀: gɑ̌ bɑ́ Yeso yə o shwɔ'mkwə myə́ cwəpuŋ a.

¹⁶Da' gɑ lusi, tiŋnyə thə́. Ywə yə a gə tə sɔ' bu a bɑ gɑ́ gɑ̌ cwɔ' o nə gə gɛfa' biŋ bɑ ŋkwinthɛ̌ nə nə́ yɔ m nthʉ̀m zhwenyə yə o jɔ a nə a, ba myə́ shɑ myə o gɔ sɔ' yɔ à nə a.

¹⁷Gɑ̌ tsə vɔk o nə pɔmnəŋ ba m nə mguŋ pɑ tə pɑ pɑ Yudea myə gɑ̌ gɔ təm o nə̀ a,

¹⁸gɑ o ghyɛ' mnyə map, fɛ wap nə jʉ̌m shya wap nə ŋkha', fɛ wap nə guŋ Sata shya wap bi Si, po'o ga Si lɑ mhɔnwə map nə shwyɛ' wap, hɑ yap ywə yə e hɑ bi pɔ dɔlɔ̌ nthʉm piŋnthʉm shyə m nə m̀ a.

¹⁹Fo Agripa tə fɑ cwə o bɔ ŋ khɑ tʉɔthə́ bi yɔ m nthʉ̀m Zhwenyə kɛbəŋ.

²⁰Tə fɑ po'o ŋ bɑ siŋ tɑ ntho' bi pɑ Damasi, ba m bi pɑ Yerusalɛm, nthʉ́m guŋ Yudea awɛ ba m bi mguŋ pɑ tə pɑ́ pɑ Yudea gɑ́ wap pʉɔtʉm tsap, fɛ́ bɑ shʉ m nə Si, bɑ bvɔk pɑ nə pa' pʉɔtʉm shəŋ a.

²¹A ywə yə a lə́ gə tə́ pɑ Yudea ghəm a Dyə Si bɑ gɔ zhwə a.

²²Shyə m nə pa' Si kwitə a tə ŋkhəm cwəlɔ a, gɑ bɑwə jɑ́ ŋkwi pɑ nthɛ̌ nə nwə bɔ dzə mghətso ba pɑkhʉ̌. Nə pa' mghɛ ghɔ̀m ghɔ́m Si ba Mosɛ lə la' gɔm nwə yə a gɔ la' pɑ a. Gɑ̌ nəŋ bɑwə gɔm pɑ ya,

²³gɑ Kristo gɔ yɔgo', pɑ̀ dəŋdzə mo nə yam nə vʉ̌, la'tə ŋkha' bi pɔ pɔk pɑ ba m bi mguŋ pɑ tə pɑ́ pɑ Yudea.

²⁴Pa' Polo lə pɑ̀ gɔm po'o a, Festo lə́ wuŋ gɔm tə thə gɑ: Polo ǒ pʉə́! Mɑ zhyənwə ó lɑ ó gə bʉəpǒ.

²⁵Da' gɑ Polo pa' bi é gɑ, Festo, Fo gwyə ŋ kha pʉə́. Ghɔm tsyə gɑ wə gɔm a bɑ nyənyɔ biŋ bɑ dəŋdəŋ;

²⁶nə pa' fo yə gɑ bɑwə shəŋtə gɔm bi po'o a, bɑ̀ e tsə zhyə mnwə bɔ, biŋ bɑwə jyə gɑ e ka tʉɔnyə sɔmywə nə pɑ́, nə pa' mnwə bɔ la tə́ nthəm dʉmnyətʉmnyə pɑ̀.

²⁷Fo Agripa, o biŋ ghɔm mghɛ ghɔm ghɔ̀m Si a? Gɑ zhyə kwa' gɑ̀ o biŋ.

²⁸Agripa lə pa' bi Polo gɑ: A cʉ' mù ywə o kwɛ gɑ́ ǒ lɑ á gə mo Kristo.

²⁹Polo pa' gɑ: kɑ ǎ cʉ' pɑ mù ywə, kɑ ǎ cʉ' pɑ té' lɑ, pa' Si yɔ a, wə̀ pu a guŋ pɔ awɛ pyə wap wə ju' gi a tyɛ' ɔ a; po cʉ' kwa' dəŋdəŋ pa' gɑ wə bɑ a, tə ně da' gɑ gwɑ kɑ pɑ mkwə̌ po.

³⁰Fo lə lusi ba gɔpna' pu Bernike, ba guŋ pɔ awɛ pyə pu a pú lə bɑ̀ dyə fyɛ' a.

³¹Wap lə nə təm bɑ gɔm cəcɑ̌ pu gɑ: Bɛ yəŋ gɑ ka ghə sɔmywə yə bi a pɑ pu zhwə e, kɑ shə́ŋ e nə a lə.

³²Agripa lə́ ghɔ̌m bi Festo gɑ: Bɛ yəŋ kɑ pe' bɑ tə ké Kasa bɑ pu tak e nəŋ.