Read Ghomala New Testament MFA' MGHƐ NTHƏM 27 Bible Online

MFA' MGHƐ NTHƏM 27 - Ghomala New Testament bible

MFA' MGHƐ NTHƏM 27

¹Pu lə cwə tə nyəŋ gɑ́ pyə gɔ lɑ kənu' gwyə nə ghɔ Italia, pù hɑ Polo pu a shɑ́ mghɛ cɛ́ bi tá sá' msəŋwi ŋkhə yə tso tsyə lə bɑ̀ Yulio a. E lə bɑ nə kam msəŋwi Kasa Ogwisto.

²Pyə a pu lə kó nə kənu' gwyə pɑ Adramuteno, a pɑ gɔ m Azia; pyə lə tam shyə lɑpʉə. Pyə a Aristarko yə Makedonya m Tesalonika.

³A lə pɑ̌ yə mu' jʉm dzʉ̌, pyə tiŋnyə Sidon. Yulio yə e lə bɑwə dɑ msəm tɑ nə gwim Polo a piŋ gɑ e ghɔ jɔ mso pyə wap kwitə e.

⁴Pyə lə piŋ dù wə de jyə m Kipro nə pá' fəfa lə bɑwə nthəm m dzə pyə a.

⁵Pyə lə sa' shyə lɑpʉə yə a dzamnyə́ Kilikia ba Pamfilia a, ŋkhəm Mira m Likia, nthiŋnyə wə́.

⁶Tà sa' msəŋwi ŋkhə lə ko wə jɔ kənu' gwyə pɑ Aleksandria, a pɑ gɔ m Italia, e nyəŋ wɔk nthʉm o.

⁷Pyə lə lɑ́ shɑ mtyɛ'dzʉ bɑ giŋ pɑ gɑ zhyə̀ dəm shyə, tə́ nə́ kó Knido bɑ pyə yɔgo' té' o, nə pa' fəfá lə bɑwə dɑ wɔk biŋ pɑ mjʉ̀m, pyə cyə bəŋ Kreta, m ghəŋ Salmoneŋkhǒ cǎ' shyə.

⁸Biŋ guŋ nə fiŋnyə tsʉ'u bɔ, pyə ŋwak nə mu' tsʉ' yə pu ŋkhe gɑ Buŋ tsʉ' tiŋnyə kənu' gwyə a, bəŋ tisuŋ Lasaya.

⁹Da' gɑ a lə nə cyə múywə nə piŋ jwɔ'shyə pɑ vʉ̌, nə pa' cwə̀ nə cwə tə tsʉ̌ywə lə bɑ a cyə́. Polo lə hɑ myə́ mkwɛnyə nə gɔm gɑ:

¹⁰Msó pɑ, gɑ̌ yɔ́ gɑ́ nə piŋ jwɔ'shyə si gɔ sím tsə nə kənu' gwyə yɔk pɑ, nə tsə tsyə a nthʉm o a ba m nə nɑ tsɔk pɑ.

¹¹Tá sa' msəŋwi ŋkhə lə bɑwə ju'nyə bi tadyə kənu' gwyə pu gɛ kənu' gwyə biŋ bɑwə ŋkhəŋnyə nə yu' nthɔk Polo.

¹²Pa' a lə nə pɑ̌ po'o a pɑ́ ŋkhap ŋʉ́m, bɑ tsʉ' yə kənu' gwyə nthiŋnyə nə́ a ka nəŋ buŋ nə cwə tzʉ̌' bɔ a, guŋ pɔ awɛ lə pɑ̌ ŋkwishwə gɑ́ pu tam shyə gɔ̌ bi a pu kəm Feniksə, tsʉ' nə tiŋnyə kənu' gwyə Kreta yə mkənu' gwyə fɑ mto dzʉ ghəŋ nthəm nam kɑ shyə dzʉ̌ ghəŋ bi nam nthiŋnyə tsʉ'u a nthiŋnyə.

¹³Muywə fəfa lə na' bɑwə nthəm m mto dzʉ, wap kwɛ́ gɑ̀ bi a pɑ wap ghiŋ pa' wap sɛ́ a. Wap lə lǔsi tə bɑ gɔ m nə ghəŋ Kreta.

¹⁴Guŋ nə yɔ mu' mɑ fʉ̀m yə pu ŋkhe gɑ Eʉrakilon a fɑ nə mu' guŋ cəcɑ shyə bvʉ nə pù.

¹⁵Nthə kənu' gwyə nə gɔ tə pyə́ lə piŋ jyə́ nə yap kənu' gwyə dəŋdəŋ, bɑ giŋ pɑ khʉ'tə khʉ'tə.

¹⁶Pyə lə cyə m mto mu' guŋ cəcɑ̌ shyə yə pu ŋkhe gɑ Koda a, a ghə pyə na' jap kənu' gwyə dəŋdəŋ nə yap bɑ bvɔk vɔk.

¹⁷A lə cwə tə bɑ̀ dəŋdəŋ, pu cəŋtə́ mgwɑ nə́, biŋ bɑ̀ bwɔk nə ghɔ bvʉ nə Sirta, ma' gwɔ' nə nthɔm kənu' gwyə shyə cwəlɔ, kənu' pɑ giŋ dəm shyə pɑ gɑ zhyə̀.

¹⁸Fʉ́m lə piŋ shʉ' cʉ' tə dzʉ̌ nə lɔ́ pu to' nə ma' tsə tsyə a lə bɑ nthʉ́m kənu' gwyə a shyə.

¹⁹A lə nə kəm nə batə tyɛ' tá mghɛ fa' nthʉm kənu' gwyə kwa tsə kənu' gwyə pɑ m mbu map ma'tə shyə.

²⁰Fʉ́m lə cɔ̀k cɔ̌k nə mtyɛ'dzʉ jɔmyɔ̌m, tə mo jɔ tsə nam kɑ sɛ mɑŋwə́ lə tə pyə lə yɑwə sɛ́ vɔk nə pyə.

²¹Pu lə cwə te' tə tsʉ́ sɔmywə, Polo lə tiŋnyə thə́ cəcɑ̌ pu gɔm gɑ: Mso pɑ, po ka yɔ a: A lə bɑ buŋ gɑ po yu' nthɔk mə̌, pɑ kɑ tə́m Kreta, sí yə̀ŋ gɑ pí.

²²Da' gɑ̀ cwəlɔ, gɑ səso wɔ gɑ po kaktʉɔ; nə pa' ywə tə gɔ ghə sɔmmo nə po a, da' tsə tsyə a gɔ pɔptə nə kənu' gwyə a.

²³Nə pa' a pɑ́ mtsʉ́' tyɛ' ɔ, aŋgəle Si yə gɑ̌ bɑ bi e, biŋ bɑ gɛfa' e a sɔ' bəm, jɔ e,

²⁴e piŋ gɔm bəm gɑ: Polo kɑ pwɔk. Pu gɔ fyɛ' o dzə Kasa. Si pɑ́ bɑ ě tak vɔk pɔ pyə pu a pu pɑ̌ a bu.

²⁵Mso pɑ, po kaktʉɔ. Gɑ zhyə gɑ ywə yə Si gɔm a, a gɔ pəmtə.

²⁶Pɑ si gɔ vɔk nə fa shyə tiŋnyə nə mu' guŋ cəcɑ́ shyə.

²⁷A lə pɑ nə batə mtsʉ' shwɔppfʉə mgham pa' pyə pɑ jwɔ' shyə lɑpʉə Adria a, ŋkhɛ a teŋ msʉ̌', mghɛ fa' nthʉm kənu' gwyə yu' zhwyə̌ ca';

²⁸wap lə na' si, ju' gɑ cǎ' tə̀ sishyə nə bú mgham bʉə; wap kwi' na' giŋ, kwi' sí ju' ca' nə bú shwɔptɔ mgham.

²⁹Wap lə pɑ bwɔk gɑ kənu' gwyə yɔk kɑ càm nə mwɔ', shəŋtə mwɔ' nə ŋkhyəp kənu' gwyə mapfʉə jʉ̀m kənu' gwyə ma' shyə, shwə, byap gɑ dzʉ̌ lɔ́.

³⁰Mghɛ fa' nthʉm kənu' gwyə lə pɑ shəŋ nə kʉ̀, nthəm nthʉm kənu' gwyə, ma' pó mpɛ nə ŋkwitə shyə; gɔm gɑ wap nə gɔ mdzə kənu' cəŋ kənu' gwyə.

³¹Da' gɑ Polo ghɔm bi Tá sa' msəŋwi ŋkhə ba bi msəŋwi pɑ Roma gɑ̀: mghɛ fa' nthʉm kənu' gwyə pɑ tə wuŋ nthʉm kənu' gwyə bɑ bi a pɑ po lə vɔk.

³²A lə pɑ̌ po'o, msəŋwi ya'tə mkhə nə po mkənu' gwyə nthak nəŋ a ghɔ.

³³Pú lə nə́ pyap gɑ dzʉ̌ lɔ́, Polo ghɔm bi guŋ pɔ awɛ gɑ wap tsʉywə gɔm gɑ: Yəŋ gɑ̀ bɑ̀ batə tyɛ' shwɔppfʉə mgham yə po shwə pɑ̀ nthʉm sɔlam tə tsʉ sɔmywə a, po yɑ tə tsʉ́ sɔmywə.

³⁴Gɑ wə gɔm bi pó gɑ̀ po tsʉ ywə, ǎ wə bɑ nwə nə vɔk yɔ. Gɑ wə ŋkwi' siŋ wɔ gɑ̀ sɔmmo nə po tə gɔ pi bǎ ta' nəŋ thə e pɑ́.

³⁵Polo lə ghɔm po'o, bé msɛ, go'tə Si nə́ dzə̌ guŋ pɔ awɛ, bo' cwəlɔ ntho' nə tsʉ.

³⁶Guŋ yap awɛ lə kaktʉɔ cwəlɔ dzʉ yap ywə.

³⁷Pyə lə bɑ̀ guŋ yɔk awɛ pɔ shwɔp nthɔk m gham sɔmbʉə dəm khə pʉə.

³⁸Pu lə tsʉ̌ ywə tə jwyə cwəlɔ, bɑ̀ shəŋ pa' kənu' gwyə na' yɛ a, nthe msɛtʉɔ ma' shyə.

³⁹Dzʉ̌ lə lɔ̌, pɑ fəŋ kənu' gwyə lə piŋ jyə tsʉ' yə ca' m nə́ a, da' gɑ wap lə yɔ mu' nthɔ shyə kəŋ shyə, bɑ shəŋ nə lɑ kənu' gwyə nthiŋnyə tsʉ'u.

⁴⁰Pɑ fəŋ kənu' gwyə lə ŋkhyɛ' mwɔ' nə shəŋ kənu' gwyə ma' shyə, biŋ ŋkhyɛ' ba mtsə nə nthɔm kənu' gwyə cwəlɔ, fɛ́ kənu' gwyə shya nə ghəŋ nthɔ shyə.

⁴¹Wap lə kəm nə́ bvɛ̌, a tɔm kənu' gwyə, dzə e ko nə bvɛ̌, jʉ̀m e sa'tə bɑ fa shyə nə́ gə.

⁴²Msəŋwi lə sɛ̌ gɑ wap gɔ zhwə mghɛ cɛ́ bɑ bwɔk pa' wap gɔ zhwɔ' shyə kʉ́ a.

⁴³Da' gɑ̀ pa' tá sa' msəŋwi ŋkhə lə bɑ̀wə shəŋ nə vɔk Polo, e lə kɔ gɑ ka səŋwi ghə ywə yə wap sɛ́ a; gɔm gɑ pɔ pyə wap zhyə nə zhwɔ'shyə a ləŋdzə deŋ ntham shyə, jwɔ'shyə ŋkhəm kəŋ shyə.

⁴⁴A sɔ' m nə pyə shɑ pɔ, wap cyə yap m nə mbak pələŋ kɑ m nə bak tsə tsyə a nthəm nə sa'tə kənu' gwyə a lə. A lə cyə m po' guŋ yap awɛ ghɔ tə ŋkhəm nə cǎ' tə ywə gə sɔmmo.