Read Ghomala New Testament MFA' MGHƐ NTHƏM 28 Bible Online

MFA' MGHƐ NTHƏM 28 - Ghomala New Testament bible

MFA' MGHƐ NTHƏM 28

¹Pyə lə cwətə bvɔk, ju' gɑ̀ tso guŋ cəcɑ shyə bɔ bɑ̀ Malta.

²Pɑ guŋ bɔ̌ lə́ lɑ̌ wɔk kwa' pɑpuŋ. Wap lə sǔ mɑ mɔk, shu'tə wɔk bəŋ o, nə pa' bə̀ŋ lə bɑwə dú, fɔ̌k piŋ bɑwə ŋkhú.

³Polo lə ŋwǎ pǔ ŋkwyə́ bɑ gɔ m nə tò mɔk, tsʉ̀' ləmnyə, nɔk mtiŋ təm nə ŋkwyə́ bɔ̌, shiŋnyə nə pu Polo.

⁴Pɑ guŋ bɔ́ lə nə́ yɔ pa' nɔk shiŋnyə nə pú Polo a bɑ gɔm cəcɑ̌ pu gɑ: Bɛ yəŋ gɑ jwə́ mò kwa' nyənyɔ. E vɔk nə shyə lɑpʉə da' gɑ̀ yə nə ya'shɛ Si ka piŋ gɑ e vɔk.

⁵Polo lə nɔk pu e nɔ́k bɔ vʉ̌ mɔ́k, tə ghə sɔmywə cwəpuŋ nə é.

⁶Pɔ bɔ lə bɑwə byap nə yɔ pa' Polo gɔ mʉ́ə a, kɑ pa' e gɔ tiŋ vʉ pfʉ a lə. Wap lə pyap tə bwa, la' wap yɔ sɔmywə bɔkpɔ̌k yə a sɔ' nə Polo a, biŋ fɛ bɑ gɔm cəcɑ̌ pu gɑ: E bɑ sí.

⁷A lə bɑ̀ giŋnyə tsʉ'u bɔ, mlǎ' pɑ tsʉ'u, bɑ myə́ dəŋdzə ŋkham guŋ bɔ tso tsyə pɑ Publio. E lə cəŋtə dɑ wɔk ghʉɔ pa' mso pyə a, nə tyɛ'dzʉ́ tá.

⁸Tap e lə bɑ̀wə gǒ; mhwi ba cupú pɑ́wə gə e. Polo lə ghɔ̌ bəŋ e, shwyɛ'nyə Si, biŋ jap bu dəm e, jɛ̌ e.

⁹A lə pɑ̌ po'o guŋ pyə shɑ mghɛ ghó pyə wap lə bɑ nthʉ́m guŋ bɔ a sɔ' yap jɔ Polo, bɑ jɛ̌ ba yap.

¹⁰Wap lə cəŋtə gə mku mɔk tə́ pyə nə ko shyə́ nə tyɛ' nə ghɔ, wap hɑ ywə yə a lə bɑwə jak wɔk a bi pyə.

¹¹A lə cyə mŋwə tá, tə pyə ko kənu' gwyə yə a lə cwə guŋ cəcɑ̌ shyə́ ŋkhàp ŋʉ́m a, kənu' gwyə pɑ Aleksandria yə a lə bɑ pu və Mdioskuri nə́, a pɑ̀ mtiŋ myə́ a.

¹²Pyə lə ko Sirakus nthiŋnyə nə tyɛ'tá.

¹³Pyə lə lǔ wə́ giŋ pɑ́ giŋnyə kəŋ shyə tə ŋkhəm Régio. A lə pɑ̀ yə mu' jʉ̀m dzʉ̌ fəfa cʉ' nthəm m mto dzʉ, pyə ghiŋ nə tyɛ'dzʉ yɑpʉə ŋkhəm Potioli.

¹⁴Pyə lə ko tisuŋ bɔ jɔ mfɑ̌mfɑ; wap həŋtə gɑ pyə a pu na' shwə nə ta' gapdzʉ́ yəŋ pa' pyə lə nə gɔ Roma a.

¹⁵Mfɑ̌mfɑ pyə wap lə yu' tisuŋ bɔ gɑ pyə wə sɔ̌' a, lə sɔ' pyə a pú yu'tə Sim Apios ba m Triɔn Tabɛrnɔn. Polo lə nə yɔ wap go'tə Si, lam tsyə kó dyə.

¹⁶Pyə lə kǒ Roma pú piŋ gɑ Polo ghə yə tsʉ' cwə dó e, pu tá' sə́ŋwi, e pɑ byap e.

¹⁷A lə cyə tyɛ'dzʉ́ tá Polo ke mkǎm pɑ Yudea gɑ pu a pú cu'tə tsʉ́'u. Cwə yə wap lə cu'tə a e ghɔm bi pu gɑ: Mfɑ̌mfɑ myə̀ yə gɑ bɑ ŋ khɑ ghə sɔm nwə cwəpuŋ kɑ nə pɔ̀ pɔk pɑ, kɑ nə mco' myə a lə fɑ̌ bi mtá pɔk pɑ a lə, gɑ̌ yəŋ bɑ gɛ cɛ̌ tə fɑ pá' pu kɑ ghəm a Yerusalɛm hɑ bi pɑ Roma a.

¹⁸Wap kɑ tiŋtə nwə a, jɔ gɑ ŋ kha hɔ sɔmywə yə bi a pɑ pu zhwə a nə a, bɑ́ gɔ tak a nəŋ.

¹⁹Da' gɑ pa' pɑ Yudea kɑ pɑ nthé pɑ dʉ' nə a, ŋ khě ŋkhe Kasa nə, tə a lə pɑ da'tə m gɑ gɑwə da' guŋ yɔk nə mu' ywə pɑ.

²⁰Yɔ ywə yə a gə tə ŋkhe wɔ gɑ̀ pɑ cɔmnwə a yəŋ. Kwa' nyənyɔ a du m nə mɔktə Israɛl tə gwɑ mtʉɔ pɑ nə bu mɑ po'o.

²¹Wap pa' bi e gɑ: Sɔm ŋwa'nyə ka fɑ Yudea sɔ́' bi pyə nə nwə o, biŋ bɑ po'o bɑ sɔmmo yə e fɑ Yudea, ka siŋ wɔk sɔm nwə cwəpuŋ nə o.

²²Da' gɑ pyə wə həŋtə gɑ pɑ kwa' wə nə siŋ wɔk ywə yə o wə ŋkwɛ a, nə pa' pyə zhyə gɑ sɔmmo tə bɑwə biŋ yu cu'tə nə sɔmtsʉ' pɑ.

²³Pu a pu lə yap mu' tyɛ'dzʉ́, wap sɔ' tyɛ' o bɔ tə jɔm, jɔ Polo dyə e, e ghɔmnwə bi pu, bɑ siŋ wap nwə nə Nəfo Si, bɑ guŋ mcwə awɛ, fɔkdzʉ̌ ba m bwadzʉ̌ bɑ ŋkhaktʉɔ shəŋ gɑ wap piŋ ywə yə e la gɔm nə Yeso a, bɑ shyə m nə mco' Mosɛ, ba ŋwa'nyə mghɛ ghɔm ghɔ̀m Si a.

²⁴Shɑ pɔ lə pǐŋ nwə yə Polo lə bɑwə gɔm a, pyə shɑ pɔ kəŋnyə nə piŋ.

²⁵Wap lə hapnyə tə pɑ ŋkwishwə cəcɑ̌ pù. Polo kwi' dɑ́ ta' shwə ghɔm gɑ, ghɔm Zhwenyə Dɔlɔ̌ bɑ nyənyɔ, ghɔm tsyə gɔm ghɔm Si Esaya lə́ ghɔm bi mtá pɔ a gɑ:

²⁶Ghɔ jɔ pɔ pɑ́ gɔm bi pu gɑ: Pǒ gɔ la' yu' pɑ gɑ kɑlə pò lə yu', le, po lə yɔ.

²⁷Nə pa' tʉ̌m pɔ pɑ́ bɑ ǎ tsɑ, bɑ mtəŋ map tʉɔ nə yu' nwə, bɑ wap cá mnyə map po'o gɑ wap kɑ yɔ nə mnyə map. Wap kɑ lɑ mtəŋ map ju' nwə. Wap kɑ nəŋ dɑ tʉm tsap ju', wap kɑ fɛ̌ de m nə Si. Gɑ̌ go ghə gɑ wap yɛ̌ lə?

²⁸Po zhyə gɑ nwə nə bvɔk yə a fɑ bi Si bɑ pu hɑ cwəlɔ m bi pɑ tə pɑ pɑ Yudea. Wap gɔ yu' nwə bɔ.

²⁹Polo lə cwətə gɔm po'o, pɑ Yudea nə ghɔ giŋ bɑ shəŋtə nthɛshwə cəcɑ́ pu.

³⁰Polo lə cwə́ gu' pʉə́ pɑ́ nə yə̀ thə, biŋ bɑ dɑ guŋ pɔ awɛ pyə wap lə sɔ' jɔ e a;

³¹bɑ shəŋtə siŋ nwə nə Nəfo Si, biŋ bɑ ji'tə nwə nə́ Cyəpɔ Yeso Kristo pɑ sɔsɔ̌ tə́ sɔm fa'tə.