Read Ghomala New Testament MFA' MGHƐ NTHƏM 3 Bible Online

MFA' MGHƐ NTHƏM 3 - Ghomala New Testament bible

MFA' MGHƐ NTHƏM 3

¹Pɛtrɔ pu Yohane lə pɑ bʉɔ gɔ m Dyə Si, cwə nə cwyɛ'nyə Si nə mnam tá, bwádzʉ̌.

²Pu lə bɑwə dɑ mu' mbɛ e pɑ ŋkho'tə tə fɑ tyɛ'dzʉ́ yə pu lə tsə e a, nə gɔ m wə, nə pa' a lə bɑ́ guŋ mtyɛ'dzʉ awɛ, pu pɑ jap bɛ bɔ jyə Dyə Si yə pu ŋkhe gɑ buŋ jyə dyə a, e pɑ do ywə hɑ́hɑ̌ bi pɔ pyə wap lə ŋkho Dyə Si a.

³E lə nə yɔ Pɛtrɔ pu Yohane pa' wap lə bɑ́wə gɔ ko Dyə Si a, ma' bu bi pu nə do ywə hɑ́hɑ̌.

⁴Pɛtrɔ pu Yohane lə lě e dəŋdəŋ gɔm bi gɑ: Cʉ wɔk.

⁵Bɛ bɔ lə pɑ diŋtə wap bɑ byap gɑ wap hɑ ywə bi e.

⁶Pɛtrɔ ghɔm bi e gɑ: Ŋ khɑ ghə gɔl kɑ ŋkhap lə, tɑ́ ywə yə gɑ̌ ghə a, gɑ gɔ hɑ bu: Nə tso Yeso Kristo yə Nazarɛt, ghǐŋ!

⁷E lə piŋ nthɔm e nə ghə̌ŋ pu tʉɔ bʉ' e si. Pɑ cwəo cwəo mkwə bɛ bɔ pu a mlɔm myə́ wuŋ nthʉɔ.

⁸E léŋ nthiŋnyə thə, biŋ giŋ. Pu a pu pəmtə ŋkho Dyə Si, e pɑwə giŋ, dhə́tə̀, jwɔp tso Si.

⁹Guŋ pɔmnəŋ awɛ lə yɔ e pa' e wə giŋ a, bɑ jwɔp tso Si.

¹⁰Pu tiŋ e, yʉ yə e lə shwə́ shwə̀ Buŋ jyə dyə bɑ do ywə a. Nwə lə cyə pɔmnəŋ, bva' wap nə mu' nthi nə nwə yə a lə təm nə bɛ bɔ a.

¹¹Bɛ́ bɔ lə bɑ́ guŋ mcwə awɛ bɑ pɑ́ pu a Pɛtrɔ pu Yohane; guŋ pɔ awɛ pɑ ŋkhʉdʉ́ sɔ' bəŋ pu, nthʉm pəŋ yə pu ŋkhe gɑ́ pəŋ Salomoŋ, nwə pɑ́ shyə wap.

¹²Pɛtrɔ lə yɔ po'o gɔm nwə bi pɔmnəŋ gɑ: Pɑ Israɛl, nwə kɑ nwə yə a nthəm a pɑ shyə wɔ? Nwə kɑ po cʉ wɔk mtiŋ pá' pyə dɑ pɑ́ yɔk gʉ́' kɑ yɔk nə lɑ mku' biŋ lə, tə nə gə bɛ yəŋ gɑ̀ ghiŋ a?

¹³Si Abraham, ba Isak pu Yakop, Si mtá pɔk pɑ̀ bɑ̀ e ghu'tə Ŋkwɔ e, Yeso, yə po lə fiŋ e, ŋkhəŋnyə e dzə Pilato yə e lə bɑwə shəŋ nə tak e nəŋ a.

¹⁴Po lě ŋkhəŋnyə mo dɔlɔ̌, mo dəŋdəŋ, həŋtə gɑ pu tak jwə mo nəŋ nə yə tsʉ'.

¹⁵Mu fo vɔk yə po lə zhwə e a, Si lě jám e nə vʉ̌. Pyə bɑ mghɛ ŋkwinthɛ̌ nə́.

¹⁶A shyə m nə piŋnthʉm nə tsǒ Yeso. Tso bɔ nə gə tə bɛ yə̌ŋ, yə po wə jɔ e bɑ po nəŋ jyə e a tʉɔ. Bɑ piŋnthʉm yə a fɑ bi Yeso a ghə e yɛ dzə̌ po.

¹⁷Mfɑ́mfɑ: Gɑ̌ zhyə́ gɑ po lə dɑ pɑ fʉmnyə nə gə, ba mtadyə pɔ.

¹⁸Si bɑ e lə ləŋdzə shyə́ nə mshwə mghɛ ghɔmnwə pyə gɔm gɑ Mesia gɔ sɔ' yɔgo', ě nəŋ gə a pəmtə̀.

¹⁹Po pʉɔ mtʉm mɔ, bɑnyə bi Si po'o gɑ pu vɑnyə mhɔnwə mɔ;

²⁰a pɑ po'o cwə hwitə yə Cyəpɔ hɑ a, a sɔ' nə cwə yə e gɔ təm Kristo yə e lə la' ŋkha' e bi po a, Yeso

²¹yə kɛbə̀ŋ gɔ lɑ e tə kəm cwə yə guŋ ywə awɛ yə Si lə ghɔm shyə m nə mshwə mghɔm ghɔ̀m tsyə pyə dɔlɔ̌ cwə dzə á pəmtə a.

²²Mosɛ lə ləŋdzə gɔm gɑ: Cyəpɔ Si gɔ sɔ' cwɔ' gɔm ghɔm tsyə pa' myə̀ a cəcɑ̌ mfɑ pɔ. Po gɔ sɔ' pɑ yu' guŋ ywə awɛ yə e gɔ ghɔm bi po a.

²³Bǎ ya mo lə yə e ka yu' shwə gɔm ghɔm Si bɔ a, bɑ pu gɔ té é cəcɑ̌ pɔ Si.

²⁴Guŋ mghɔ́m ghɔm Si awɛ tə fɑ nə Samuɛl pu a mtsʉdyə pyə nə map mzhəŋ lə ghɔm ghɔm nə mtyɛ'dzʉ mɔ gɑ myə pɑ nə a.

²⁵Kwa' wɔ nə́ bɑ po mghɛ mghɔm ghɔm Si, ba kɔ tsyə̀ Si lə wa pu a mtá pɔ á, nə cwə yə e lə gɔm bi Abraham gɑ: A gɔ sɔ' cyə m nə gwya o byanyə pɑ nə guŋ mtuŋdyə dəmca' awɛ.

²⁶Si bɑ e ləŋdzə shwɔ' biŋ nthəm ŋkwɔ e gɑ e nyəŋ byanyə bǎ nə ya mo lə nə po, bi a pɑ́ yə pó fɛ mnyə mɔ nə mnwə cwəpùŋ mɔ a.