Read Ghomala New Testament MFA' MGHƐ NTHƏM 7 Bible Online

MFA' MGHƐ NTHƏM 7 - Ghomala New Testament bible

MFA' MGHƐ NTHƏM 7

¹Ŋkhamsi gwyə lə həŋtə Etiennə gɑ: A kwa' nyənyɔ po'o lə?

²Etiennə pa' gɑ: Mfɑ̌mfɑ́, ba mtǎmtá, po yu', Si ghú'tə lə la'tə nɑ e bi ta yɔk pɑ Abraham cwə yə e lə bɑ Mesopotamia tə gɔ Karan shwə́ á,

³gɔm bi é gɑ: Təm gǔŋ o, ba nə tuŋdyə o, biŋ gɔ nə gùŋ yə gɑ gɔ la'tə bu a.

⁴Abraham lə təm gùŋ Kaldea gɔ shwə́ Karan. E lə ko wə tap e pfʉ́, Si cya e nthʉm gùŋ yə po shwə̀ nə cwəlɔ a.

⁵Si la tə hɑ sɔmywə bi e nthʉm gùŋ yəŋgɑ pɑ, bǎ tsʉ' yə bi a pɑ e tʉ́ kwə é nə a. Da' gɑ e lə ka' bi e gɑ e gɔ la' hɑ guŋ bɔ bi e, bɑ m bi gwya e jʉm e ba tə pa' Abraham lə bɑ e ka ghə mu a.

⁶Nə pa' Si lə ghɔm gɑ: Gwya e gɔ sɔ' cwə nthʉm guŋ pɔ dyɛ'. Pu lɑ wap gə mkwɔ, biŋ dɑ wap jɔgo' nə gu'dzʉ ŋkhəpfʉə.

⁷Dá' gɑ́ Si lə piŋ gɔm gɑ: Guŋ yə wap gɔ sɔ' pɑ mkwɔ bi a, gɑ gɔ la' cwɔ'tə shɛ́ é, a nə mi wap təm mkwɔ bɑ shu'tə gamtə a si tsɔ'ɔ.

⁸Pu e lə wakɔ, mtiŋ myə pɑ nə̀ vó mò; a cyə m po'o Abraham tsə́ Isak bvo e nə batə tyɛ'dzʉ hɔm; Isak lə ti gə pɑ po'o nə Yakop, ba Yakop nə mtʉ̌ gùŋ shwɔppʉə m gham.

⁹Mtʉ gùŋ lə kǐŋ Yosɛp, fiŋ e, pu lɑ e gɔ m Egipto. Da' gɑ pu Si pəmtə bɑ;

¹⁰e kwitə é nə guŋ go' é awɛ, hɑ gho' pu a zhyənwə bi e dzə Faraon, fo pɑ Egipto, e lɑ e gə gɛ sa' gùŋ Egipto ba gùŋ dyə e awɛ.

¹¹A lə pɑ̌ po'o kəya' ti ŋkho nthʉm gùŋ Egipto awɛ, ba m nthʉm gùŋ Kanaan. Ghəghʉɔ lə yɔm tə la' mtá pɔk pɑ piŋ gə ywətsʉ.

¹²Yakop lə yu' gɑ ywətsʉ Egipto, nthəm mtá pɔk pɑ wə dəŋdzə cʉ̌m.

¹³A lə pɑ́ nə batə mcʉm bʉə, Yosɛp ghə mfɑ pyə piŋ jyə é, ba Faraon piŋ jyə yə́ tsʉ' yə Yosɛp lə nthəm nə a.

¹⁴Yosɛp lə tə̀m gɑ pu ghɔ shəŋ tap e Yakop pu a tuŋdyə̀ e, pɔ shwɔptɔ mgham sɔmbʉə.

¹⁵Yakop lə tsəŋ gɔ Egipto cwəlɔ, di pfʉ́ wə, ba mta pɔk pɑ.

¹⁶Pú kwa wap nə gɔ Sikem, nyəŋ wap nə thəsì yə Abraham lə lɑ ŋkhap nə jó bi pǒ Emmor, ta pɑ Sikem a.

¹⁷Cwə yə mka'nyə myə Si lə ka' bi Abraham gɔ pəmtə a lə pɑ gɔ ku', pɔmnəŋ kwi', biŋ sé Egipto,

¹⁸tə gɔ ŋkhəm nə mu' fo, bɑ e la tə zhyə̀ Yosɛp pɑ̀.

¹⁹Fo bɔ lə lɑ fʉ̌ ŋkho jʉ̌m gwya yɔk pɑ; dɑ mtá pɔk pɑ jɔgo' tə gə wap yɔnyə po pap po'o bɑ nə ŋkhɔ́ gɑ wap kɑ vɔk.

²⁰A pɑ cwə o bɔ pu tsə Mosɛ. E lə bɑ buŋ mu nə mnyə Si. Pú lɑ wim e dyə tap e nə mŋwə̀ tá.

²¹Cwə yə pu lə yɔnyə̀ e a, gò Faraon hò e, gwim e kwa' pa' tsə mù é a.

²²Pu lə guŋ zhyənwə pɑ Egipto awɛ nə nthɔk Mosɛ. E lə bɑ ě tʉɔ nə ghɔm tsyə̀ ba nə mfa' myə́.

²³E lə kəm gu' mghappfʉə dəŋdəŋ, mkwɛnyə sɔ' bi e gɑ e ghɔ cəcɑ̌ mfɑ pyə̀ pɑ Israɛl.

²⁴E lə ko jɔ̀ mu' fɑ e pu pɑ̀wə dɑ e jɔ́go', e lə twɔk nwə è, ba' bo nə yə Egipto jwə e.

²⁵E lə bɑ̀wə ŋkwɛ gɑ e gɔ ghə mfɑ pyə̀ zhyə gɑ Si gɔ cyə m nə pu e vɔk wap, da' gɑ la' wap yu' e pɑpuŋ.

²⁶Dzʉ lə lɔ̌ pu yɔ e, e pɑwə haptə shɛ shɑ pɔ pɑpʉə, shəŋ gɑ wap pɑ ŋkwishwə gɔm bi pu gɑ: mso pɑ, pǒ bɑ mfɑ, biŋ bɑwə nthuŋkwɑ kʉ̌?

²⁷Da' gɑ mo yə e lə bɑ̀ wə hya yə mu' mo a nə zhəŋ Mosɛ, gɔm bi e gɑ: Wɑ bɑ ě lɑ o gə tadyə̌ gɛ ya'shɛ cəcɑ̌ pyə̌?

²⁸O gɔ zhwə a pa' o kɑ zhwə yə Egipto yo a?

²⁹Mosɛ lə yu' po'o ŋkhʉ̌ gɔ dʉmnyə nthʉm guŋ pɑ Madiaŋ, bɑwə bɑ́ gʉɔ. E lə ko wə gə po pyə pɑpʉə.

³⁰A lə cyə gu'dzʉ mghappfʉə, ta' aŋgəle ŋwak bi e ghakgo, kuŋ Sinai nthʉm gwa mɔkə nə mu' cu' mghé, mɔkə pɑ nə.

³¹Yɔ m nthʉm Zhwenyə bɔ lə cyə Mosɛ, e cəŋ nə ghɔ tə bəŋ o tə dé. E lə yu' gi Cyəpɔ gɑ:

³²Gɑ bɑ Si mtá pǔ, Si Abraham, Isak ba Yakop. Mosɛ lə səŋ taktak, la' e piŋ ŋkwi' shəŋ nə lé.

³³A pɑ po'o Cyəpɔ ghɔm bi e gɑ: Tɔk mtháp mkwə́ o, nə pa' tsʉ' yə o tiŋnyə̀ nə a, bɑ ca' dɔlɔ̌.

³⁴Əŋ, gɑ̌ yɔ ghəghʉɔ pɔ pɑ̌ Egipto, gɑ̌ yu' lɔ tsap. Gɑ̌ fi' sɔ' po'o nə vɔk wap. Cwəlɔ̌, ghɔ̌, gɑ̌ gɔ təm o Egipto.

³⁵Yəŋ Mosɛ yə wap lə ghɔm bi gɑ wɑ̌ jap o nə gə tadyə gɛ ya'shɛ nə nə́ ŋkhəŋnyə e a, a yʉ tə Si təm e pa' tádyə, gɛ kwi pɔ a, shyə m nə aŋgəle yə e lə ŋwak bi e nthʉm cu' mghe a.

³⁶Yʉ nə lě nthé wap Egipto, gə msya pu a mtiŋ Egipto, ba m shyə lɑpʉə pəpɛ, ba m ghakgo nə gu'dzʉ mghappfʉə.

³⁷Pɑ yʉ Mosɛ nə lə gɔm bi pɑ Israɛl gɑ: Si gɔ la' ghə mu' ta' gɔm ghɔm Si pa' myə̀ a təm cəcɑ̌ mfɑ pɔ bi po.

³⁸Yʉ nə lə bɑ̀ nə cu'tə ghakgo bɑ nthiŋnyə cəcɑ mta pɔk pɑ pu a aŋgəle yə e lə gɔm nwə bi e kúŋ Sinai a. Yʉ nə lə ŋkwi mghɔm vɔk tə hɑ bi pɑ.

³⁹Da' gɑ mtà pɔk pɑ la tə piŋ nə yu'nyə bi e, wap lə kəŋnyə e, mkwɛnyə map lɑ wap bɑnyə m Egipto.

⁴⁰Wap lə ghɔm bi Aaron gɑ: Ghə msi pyə wap gɔ pɑ sa' wɔk a. Nə pa' Mosɛ yə e lə té wɔk nthʉm guŋ Egipto a, pyə ka zhyə ywə yə a kě gə e a.

⁴¹Wap lə nyaptə mú hùŋ tyɛ'dzʉ bɔ, núŋpwɔ' bi kətwɔk bɔ biŋ ŋwɛnyə nə mfa' bu map.

⁴²A cyə m po'o Si tak wap nəŋ, wap pɑ gamtə pɑ tsə ŋkhyɛ'kyɛ' kɛbəŋ, dəŋdəŋ pa' a bɑ nthʉm ŋwa'nyə mghɛ ghɔm ghɔm Si a gɑ: Nə gʉ'dzʉ mghappfʉə myə po lə̌ ghakgo a, po lə zhwə kɑ́ bəm kɑ nuŋ kɑ pwɔ' bəm. Wɔ gwya Israɛl?

⁴³Po lə kwɑ nthap Molɔk, bɑ sé si yɔ yə pu ŋkhe é gɑ Rəfaŋ a, mkətwɔk myə́ myə po lə nyaptə bɑ gamtə a. Pa' a pɑ po'o a gɑ gɔ sɔ' cwɔ' wɔ nə ghɔ tə twɔk Babilon.

⁴⁴Mtá pɔk pɑ ghakgo lə bɑ wap ghə nthap a pɑ ŋkwinthɛ̌; mo yə e lə ghɔmnwə bi Mosɛ a lə cwi'tə gɑ e ghə nthap bɔ kwa' fo' pa' e lə yɔ a.

⁴⁵Pa' mtá pɔk pɑ lə kwi ya bɔ a, Yoswa lə cya wap, wap nə ŋkho nthʉm guŋ yə wap lə kwi bi pɔ pyə Si lə zhəŋ wap dzə pu a. A lə cwə́ pɑ wə́ tə ŋkhəm nə cwə David.

⁴⁶David lə ghə gho' dzə Si; həŋtə gɑ e piŋ gɑ e ghə tsʉ' cwə bi Si Yakop.

⁴⁷Da' gɑ Salomoŋ e lə la' bəm pa' bi e.

⁴⁸Ba tə po'o, Si gwyə tə thə́ lə pɑ shwə nə mtsʉ' cwə myə bu pɔmnəŋ nə ŋkwɑ a. Dəŋdəŋ pa' gɔm ghɔ̀m Si gɔm a gɑ:

⁴⁹Kɛbəŋ bɑ leŋfo a, Sicǎ' pɑ kwɔ' tʉ mkwə mə̌. Po gɔ kwɑ́ ma mnthi pa' bəm? Cyəpɔ nə gɔm po'o. Ba tsʉ' hwitə a gɔ́ pɑ ya a?

⁵⁰Tə pú ǎ nə lə gə guŋ tsə awɛ a lə́?

⁵¹Pɔ bɑ nthuŋ yap lě nthiŋ, pɔ bɑ pu ka vó mtʉm map pu a mtəŋ map. Po bɑ guŋ mcwə awɛ bɑ shɑ̀ jyə̀ bi Zhwenyə Dɔlɔ̌, po bɑ̀ pɑ̀ pa' mtà pɔ a.

⁵²Mtà pɔ lə cyətə cwɔ' mkwə ya gɔ̀m ghɔm Si cwəpuŋ? Wap le jwə ba pɔ pyə wap lə la' dəŋdzə bhə gɑ Mo dəŋdəŋ gɔ sɔ' sɔ' a, Mo yɑ yə po kɑ tɛ̌mnɛ́ myə́ jwə é a.

⁵³Po le ŋkwi mcò' shyə̀ m nə pɑ aŋgəle po lə ghiŋ nə.

⁵⁴Mghɔm mɔ lə ghə̌ lúŋ yap sə́, wap pfɑ msuŋ nə Etiennə.

⁵⁵Da' gɑ sɔ' m nə yʉ Etiennə, Zhwenyə Dɔlɔ̌ lə lo nə e, e le kɛbəŋ jɔ nə ghu' Si ba Yeso bɑ e tiŋnyə nə ghəŋ pu tʉɔ Si.

⁵⁶A pɑ po'o, e ghɔm gɑ: Gɑ wə jɔ́ kɛbəŋ bɑ a ghyɛ' ba Mú mo bɑ e tyəŋnyə nə ghəŋ pu tʉɔ Si.

⁵⁷A lə pɑ po'o wap togə̀ŋ, jʉ́ɔ mtəŋ map, nthamtə guŋ yap wɛ, bvʉ nə Etiennə

⁵⁸fəŋ e nə nthəm tisuŋ ntho' nə lɑ mwɔ' nə nthamtə e. Mkwinthɛ lə nuŋ dzə tsap dzə mu' mú sə̀m tso tsyə pɑ Saulo.

⁵⁹Cwə yə wap lə pɑ dɑ mwɔ' nthamtə Etiennə a é cwyɛ'nyə gɑ: Cyəpɔ Yeso, kwi zhwenyə a.

⁶⁰Biŋ ŋkham mkwitə myə́ si shwé tɑ thə gɑ: Cyəpɔ kɑ sɛ mhɔnwə mɔ bi pú. E lə ghɔm po' pfʉ.