Read Ghomala New Testament MFA' MGHƐ NTHƏM 9 Bible Online

MFA' MGHƐ NTHƏM 9 - Ghomala New Testament bible

MFA' MGHƐ NTHƏM 9

¹Cɔk pú nə zhwə mghɛ zhi'nwə Cyəpɔ lə jɑ pɑ nə Saulo.

²E pɑ gɔ ywə ŋkhamsi gwyə ŋkwi mŋwa'nyə nə̀ nə gɔ nə msinagogə Damasi po'o gɑ e yɔ pɔ pyə wap m nə Məjyə a, pɑ bɛ kɑ pɑ jwǐ lə, e cə́ŋ wap nə gɔ Yerusalɛm.

³E lə ghɔ tə bɑ gɔ kəm Damasi, mu' ŋkha' wuŋ fɑ kɛbəŋ dɑ sɛ é sam e.

⁴E lə vʉ̌ si, ju' pa' gi mo wə gɔm bi gɑ: Saulo, Saulo, o shwɔ'mkwə mə̌ cwəpuŋ gɑ́ kɑ?

⁵E həŋtə gɑ: O bɑ wɑ Cyəpɔ? Gɑ̌ bɑ Yeso, o bɑwə shwɔ' pa' a pɑ mkwə mɑ cwəpuŋ.

⁶Da' gɑ lusi ŋkho tisuŋ, pu gɔ siŋ o ywə yə́ o gɔ ghə a.

⁷Msǒ ghiŋ pyə́ lə tiŋnyə, pwɔk cɑ́ mshwə map. Wap lə bɑ́wə ju' gi mo, da' gɑ la' wap pɑ́wə jɔ sɔmmo.

⁸Saulo lə lusi, ba tə pá' mnyə myə́ lə bɑwə gyɛ'ghyɛ' a, e lə pɑwə biŋ jɔ sɔmywə, mso pyə tɔm pɑ pu e tɑ dɑ e ŋkho Damasi.

⁹E cwə wə tə yɔ tsʉ' dzʉ̌ tyɛ' tà, tə tsʉ̌ ywə, tə nwə́ shyə.

¹⁰Mu' gɛ zhi'nwə lə bɑ Damasi tso tsyə pɑ Ananias; Cyəpɔ ké e nthʉm nə yɔ m nthʉ̀m zhwenyə gɑ Ananias, e pa' gɑ: gɑ̌ yəŋ m Cyəpɔ.

¹¹Cyəpɔ piŋ gɔm gɑ: Lusi gɔ Damasi nə məjyə yə pu ŋkhè gɑ jyə dəŋdəŋ a, dyə Yuda, həŋtə mu' mo yə pu ŋkhe e gɑ Saulo yə Tarso a. E tsʉ̌' bɑwə shwyɛ'nyə Si,

¹²E du m nə yɔ pa' mu' mbɛ yə pu ŋkhe e gɑ Ananias a ŋkho dyə jap bu nə e gɑ e piŋ jɔ tsʉ' a.

¹³Ananias pa' gɑ: Cyəpɔ, gɑ̌ yu' pa' pɔ jɔmyɔm gɔm nwə nə bɛ bǎ, bɑ gɔm guŋ mnwə cwəpuŋ myə é gə nə pɔ dɔlɔ̌ pǔ Yerusalɛm a.

¹⁴E piŋ bɑ tsɔ'ɔ bɑ mkhamsi gwyə hɑ guŋ gʉ' bi awɛ nə nə shə̌ŋ guŋ pɔ pyə́ wap ŋkhe Tso tsʉ̌ a awɛ.

¹⁵Da' gɑ Cyəpɔ ghɔm bi e gɑ: Ghɔ̌, nə pa' bɛ bǎ bɑ́ ywə fa' yə gɑ shwɔ' nə nə gɔm nwə nə Tso tsɑ̌ dzə mguŋ dyɛ', dzə mfomfo, ba dzə pɑ Israɛl a.

¹⁶Pɑ kwa' myə̀ nə gɔ sɔ' la'tə e go' yə e gɔ yɔ nə tso tsɑ̌ a.

¹⁷Ananias lə ghɔ̌ ŋkho dyə, jap bu nə e, gɔm gɑ: Saulo, fɑ a, Cyəpɔ nə nthəm a, gɑ gɔm Yeso yə e ŋwak bu məjyə yə o kɑ bɑwə giŋ nə a, po'o gɑ o piŋ jɔ tsʉ', Zhwenyə Dɔlɔ̌ lo nə o.

¹⁸Ywə lə tə̌m nə mnyə Saulo pa' gwɔp a guŋ bvʉsi, e piŋ jɔ tsʉ', ŋkwishyə,

¹⁹biŋ dzʉywə cwəlɔ, gʉ̌' sɔ' bi e. Pu a pɑ piŋ lə cwə nə pǒ mtyɛ'dzʉ Damasi.

²⁰E wuŋ ntho' nə cyanyə dyə sinagogə gɑ Yeso bɑ Mǔ Si.

²¹Nwə lə pɑ shyə guŋ pɔ awɛ pyə wap lə ju' pa' Saulo wə gɔm po'o a. Lə́ wap pɑ gɔm gɑ: Tə́ yʉ nə lə bɑ Yerusalɛm ŋkho jʉm pɔ pyə wap lə ŋkhe tso tsɔ gɑ a lə? E ka tə biŋ sɔ' po'o nə cə̀ŋ wap nə ghɔ hɑ bi mkamsi a lə?

²²Da' gɑ Saulo pɑ shəŋtə biŋ, biŋ bɑ siŋ ɑ tsɑ bi pɑ Yudea pyə wap lə bɑ Damasi, gə wap zhyə gɑ Yeso shəŋtə bɑ Mesia.

²³A lə nə cwə́ muywə pɑ Yudea tɛ nə zhwə Saulo.

²⁴Da' gɑ Saulo zhyə gɑ wap wə shəŋ nə zhwə é. A lə bɑ wap ghə tə bɑ byap məjyə nə ŋkho tisuŋ mɔkcʉ bǎ mtsʉ' po'o tə zhwə Saulo.

²⁵Da' gɑ a pɑ mu' mtsʉ' pɑkhʉ pyə lə ŋkhəkhʉɔ ja' e m thə ŋkhɛ pe bəmpə̌m shya é nə yə mu' jʉ̀m.

²⁶Saulo lə ghɔ tə́ ŋkho Yerusalɛm bɑ ŋkhaktʉɔ nə pɑ cəcɑ̌ pɑkhʉ Yeso. Da' gɑ guŋ yap awɛ pɑ bwɔk pwɔk nə pa' wap la tə bɑwə bíŋ nyənyɔ gɑ e cʉ' mukhʉ Yeso a.

²⁷Barnabas lə lɑ e, pu e ghɔ cəcɑ̌ mghɛ nthəm, e piŋ siŋ wap pa' e lə yɔ Cyəpɔ məjyə̀ e ghɔmnwə bi e, ba m pa' e lə cəŋtə gɔm nwə nə tsǒ Yeso Damasi a.

²⁸Tə fɑ po'o Saulo pu a mghɛ nthəm pɑ bəmtə giŋ Yerusalɛm, bɑ gɔm nwə nə tsǒ Cyəpɔ tə pwɔk.

²⁹Saulo pu a pɑ Elenistə pɑ gɔm biŋ bɑ fəŋnyə nwə; da' gɑ wap pɑ shəŋ pɑ nə zhwə e.

³⁰Mfɑ̌ mfɑ́ lə nə yu' po'o dɑ e nə gɔ Kaesarea, shya e Tarso.

³¹Cu'tə pɔ Kristo nthʉm gúŋ Yudea, ba m Galilea pu a m Samaria pɑ shwə nə hwitə̀, bɑ ŋkwyə, biŋ bɑ giŋ nthʉm nə pwɔk Cyəpɔ, a pɑ shyə m nə Zhwenyə Dɔlɔ̌ bɑ sé.

³²A lə pɑ̌ po'o Pɛtrɔ yə e lə bɑ guŋ mcwə awɛ bɑ pɑ məjyə a, tsə̌ŋ ba m Lidia wə pɔ dɔlɔ̌ pyə wap lə shwə́ wə́ a.

³³E lə ko wə̀ jɔ mu' mbɛ tso tsyə pɑ Enea, e pɑ dəm ko'tə kodyə tɑ fɑ gu'dzʉ́ hɔm bɑ po'tə lě ŋkho nə e.

³⁴Pɛtrɔ ghɔm bi e gɑ: Enea, Yeso Kristo yɛ́ o. Lusi nyaptə kódyə o pɑ́ kwa' wə: E lə wuŋ dusi.

³⁵Gúŋ pɑ Lidia ba pɑ hù Saron lə nə yɔ po'o, biŋ Cyəpɔ.

³⁶Mu' mjwǐ lə bɑ́ Yope, bɑ biŋ Si, tso tsyə pɑ Tabita, a pɑ̀ nthutə gɑ Dorkas. Mfa' pɑpuŋ myə́ lə bɑ ǎ yɔm, ba m nə kwitə hɑ ywə yə e lə hɑ a.

³⁷A lə pɑ mu' tyɛ'dzʉ e nuŋ gho, pfʉ. Pu sɔk nɑ e, jap e twɔ'dyə̌ zhəŋ thə́.

³⁸Pa' Lidia bɑ pɑ bəŋ Yope a, pɑ piŋ lə yu' gɑ Pɛtrɔ Lidia, nthəm pɔ bi e gɑ wap ghɔ wə gɔm bi é gɑ: Lo'nyə sɔ' ŋkwyatə wɔk.

³⁹A lə pɑ̌ po'o pu a Pɛtrɔ lə wuŋ gɔ. E lə ŋwak pu lɑ e bʉɔ nə twɔ'dyə̌ zhə̀ŋ thə. Guŋ mpfɔk awɛ tiŋnyə dzə é, bɑ dɔ̌, lə da'tə e msʉəsʉə dzə myə Dorkas lə ba' cwə yə pu a pu lə bɑ a.

⁴⁰Pɛtrɔ lə ghə guŋ pɔmnəŋ awɛ tə́m dyə. E kam mkwi'tə myə́ si, shwyɛ'nyə Si; biŋ fɛ nɑ e de pfə Dorkas gɔm gɑ: Tabita lusi. E ghyɛ' mnyə myə́, nə yɔ̌ Pɛtrɔ, bʉ' nɑ e, shwəsi.

⁴¹Pɛtrɔ nya pu e bi e, nə ŋa' e si cwəlɔ, ŋkhe pɑ piŋ, pu a mpfɔk, da'tə e bi pu, bɑ e tʉɔ.

⁴²Guŋ yap awɛ lə yǔ', bo'gwyə pɔ piŋ Cyəpɔ.

⁴³Pɛtrɔ lə na' shwə Yope ywə mu' Simon yə e lə bɑ ntham gwɔp a.