Read Ghomala New Testament ROMA 10 Bible Online

ROMA 10 - Ghomala New Testament bible

ROMA 10

¹Mfɑ̌mfɑ́, ywə yə tʉm tsɑ̌ shəŋ a, ba yɑ nə cwyɛ'nyə Si nə pú bɑ gɑ́ wap kəm nə ywə vɔk.

²Nə pa' gɑ̌ wə bɑ ŋkwinthɛ̌ gɑ wap ŋkhaktʉɔ te' nə Si: Da' gɑ́ a pɑ́ kaktʉɔ tə zhyə̌nwə!

³Wap lə pɑwə jyə dəŋdəŋ yə á fɑ bi Si a pɑ, biŋ bɑwə shəŋ pɑ́ nə yáp yap nthi, wap lə pɑwə ju'nyə bi nwə dəŋdəŋ yə a bɑ yə́ Si a.

⁴Nə pa' Kristo bɑ nə myə̀ŋ mco', po'o gɑ dəŋdəŋ pɑ́ bi bǎ ya mo lə yə e piŋ a.

⁵Pɑ̀ kwa' Mosɛ bvə nə dəŋdəŋ yə a fɑ m nə mco' a gɑ: Mo yə e gə pa' a gɔm a gɔ sɔ' vɔk pɑ nə́.

⁶Tə nwə dəŋdəŋ yə a fɑ m nə piŋnthʉm a gɔm gɑ: Kɑ ghɔm nthʉm tʉm o gɑ: Wɑ gɔ sɔ' kwɔ' kɛbəŋ? O ghɔm po'o bɑ o nə shəŋ gɑ Kristo fi'.

⁷Kɑ nəŋ gɔm gɑ: Wɑ gɔ tsəŋ ko tsʉ̀m? O ghɔm po'o bɑ o nə shəŋ gɑ Kristo pʉɔ fɑ wə mpfə pɔ.

⁸Tə e gɔm gɑ́ kɑ̀? E gɔm gɑ́: Ghɔm bɑ pɑ́ bəŋ o, ǎ shwə o, nthʉm tʉm o. Ghɔm bɔ bɑ ghɔm piŋnthʉm tsyə pyə siŋ a.

⁹O lɑ shwə ó gɔm gɑ́ Yeso bɑ Cyəpɔ nəŋ biŋ bíŋ nthʉm tʉm o gɑ Si lě jam e nə vʉ̌, bɑ o gɔ sɔ' vɔk.

¹⁰Nə pa' nə piŋ nthʉm tʉm o dɑ o gɔ nə dəŋdəŋ, nə pǐŋ dɑ shwə ó gɔm pɑ́ dɑ o gɔ nə ywə vɔk.

¹¹Nə pa' ywə yə pu lə və a gɔm gɑ: Mo yə e piŋ e a, bɑ sǒ tə́ gɔ sɔ' kú e pɑ́.

¹²A po'o tə yə Yudea pu yə Grikia bɑ pɑ́ ta' ywə: Guŋ yap awɛ bɑ wap ghə pɑ́ ta' Cyəpɔ, fʉ' bi pɔ pyə wap ŋkhe é a.

¹³Nə pa' bǎ ya mo lə́ yə ě ke tso Cyəpɔ a bɑ e gɔ sɔ' vɔk.

¹⁴A po'o bi a pɑ́ wap ké é m gɑ kɑ tə́ piŋ é? Wap pɑ gɔ piŋ é m gɑ kɑ tə̀ yu' gi é? Wap pɑ gɔ yu' gi e m gɑ kɑ tə mo siŋ?

¹⁵Mo pɑ gɔ siŋ m gɑ́ kɑ tə́ pu nthəm é? Nə pa' a bɑ pu və gɑ: Mkwə pɔ pyə wap siŋ Cuŋ pɑpúŋ a bɑ ǎ pùŋ.

¹⁶Tə́ guŋ pɔ awɛ bɑ wap ka yu'nyə nə Cùŋ pɑpuŋ. Nə pa' Esaya gɔm gɑ: Cyəpɔ, wɑ̌ bɑ ě piŋ ghɔm tsyə pyə̌ siŋ a?

¹⁷Nə pa' piŋnthʉm fɑ nə ghɔm ju'yǔ', ghɔm bɔ pɑ nə siŋ ghɔm Kristo.

¹⁸Po'o tə gɑ̌ həŋtə́ gɑ: jyə gɑ a bɑ wap lě tə́ yu' lə? Tə əŋ! Nə guŋ mtsʉ' awɛ dəmcǎ', gi yap lě gi, ba mghɔm map, tə gɔ ŋkhəm nə dhə̀ dzʉ́.

¹⁹Gɑ̌ bɑwə həŋtə gɑ: Jyə gɑ a bɑ Israɛl lě tə́ yu' lə́? Tə Mosɛ bɑ e lə ghɔm gɑ: Gɑ̌ gɔ sɔ' ghə o khiŋ ywə yə a tə bɑ guŋ a pɑ; gɑ gɔ sɔ' ghə o ghi'nyə guŋ yə a ka ghə zhyənwə a.

²⁰Esaya gɔ tə gɔm ba m gɑ: Pɑ tə cəŋ a lě jɔ a; ŋ dě gə pɔ pyə wap la tə́ həŋtə a zhyə a.

²¹Tə sɔ' m nə pɑ Israɛl e gɔm gɑ: Guŋ mtyɛ'dzʉ awɛ ŋ də nyǎ pu a bi pɔ, pɑ tə yu'nyə, mtʉɔthə́.