Read Ghomala New Testament ROMA 11 Bible Online

ROMA 11 - Ghomala New Testament bible

ROMA 11

¹Gɑ̌ həŋtə gɑ́: Si bɑ é lě gwa' pɔ pyə́ a? Gɛ̌! Nə pa' kwa' myə gɑ̌ bɑ yə Israɛl, gwya Abraham, nə tuŋdyə Bɛnyamɛn.

²Si bɑ e ka wa' pɔ pyə́, wap pyə e lə ləŋdzə jyə́ wap a. Kɑ a bɑ po ka zhyə pa' ywə yə́ pu lə və a gɔm nə tsʉ' yə Elia dɔ bi Si nə pɑ Israɛl a gɑ:

³Cyəpɔ, wap zhwə mghɔ́m ghɔm tsu, sa'tə mtsʉ' to tsə pwɔ'; gɑ cʉ' da' myə dǒ m̀, wap piŋ bɑwə shəŋ nə zhwə a.

⁴Tə́ Si ba' bi e gɑ kɑ? Gɑ̌ lwɔ' pɑbɛ sha' sɔmbʉə, pɔ pyə wap ka kam mkwi'tə map dzə̌ Baal a.

⁵Ba m nə cwə dzʉ̌ yəŋ gɑ, bvʉ' pɔ pa' gho' nə shwɔ' wap a.

⁶A pɑ gɑ a shyə pɑ́ m nə́ gho' bɑ a tə bɑ nwə mfa' pɑ, a pɑ nwə mfa', bɑ gho' tə yɑ̌ gho' pɑ.

⁷A po'o bɑ gɔm gɑ́ kɑ? Ywə yə Israɛl shəŋ a, a bɑ e ka kəm nə́; tə pɔ pyə pu cwɔ' wap a bɑ wap kəm nə́. Tə́ sɔ' m nə pyə shɑ́ pɔ, a bɑ pu lě gə tʉm tsap sɔk.

⁸Dəŋdəŋ pa' a bɑ pu və gɑ: Si bɑ ě hɑ zhwenyə pwɔk bi pú, mnyə́ tə nə jɔ, mtəŋ tə nə ju', tə ŋkhəm tyɛ' ɔ.

⁹David biŋ gɔm yə́ gɑ: A tɑpe yap pɑ́ yo' nə pú, bɑ́ ŋkhəvʉm, ywə yə wap gɔ cyə m nə vʉ̀ si a, biŋ bɑ shɛ dəŋdəŋ yə pu nyəŋ thə pu a!

¹⁰Mnyə map sonyə sonyə tə bi; ghə̌ ŋkha'tə yap ŋwɔ' guŋ mcwə awɛ.

¹¹Gɑ həŋtə gɑ: Jyə gɑ a bɑ́ wap vʉ̀si pɑ mama lə? Tə gɛ̌! Da' gɑ́ a bɑ a lě shyə m nə mhɔ map pɑ tə pɑ́ pɑ Yudea ko nə ywə vɔk, po'o gɑ Israɛl lǎ'.

¹²A bi a pɑ gɑ mhɔ map lě ji fʉ' bi dzʉ̌, yap nə kəŋnyə pɑ fʉ' bi pɑ tə pɑ́ pɑ Yudea, bɑ yap nə cəŋtə ŋkho nə ywə vɔk gɔ cyətə ghə kɑ?

¹³Gɑ gɔm bi po, wɔ pɑ tə pɑ́ pɑ Yudea gɑ: Pa' gɑ̌ bɑ gɛ nthəm bi pɑ tə pɑ Yudea a, gɑ da'tə dəŋ ghu'tə yə a bɑ nə fa' tsɑ̌ a,

¹⁴po'o tə nə thənyə mfɑ pɑ̌ ŋkhənthú nthʉm ghi'nyə gɑ a vɔk shɑ pɔ nə pú.

¹⁵A pɑ gɑ́ nə fʉ'tə wap hɑ jʉ̀m lě bɑ nə́ nə gwɔ' bvɑnyə dzʉ́, bɑ yap nə piŋ ŋkhó ŋkhɛ gɔ sɔ' pɑ kɑ́ tə pɑ̌ pɑ nə cyə nə vʉ̌ ŋkho nə vɔk?

¹⁶Nə pa' a pɑ gɑ́ zhwi'tə pɑ dɔlɔ̌, bɑ guŋ ywətsʉ awɛ gɔ pɑ dɔlɔ̌; biŋ bɑ gɑ́ gɛ thə́ pɑ dɔlɔ̌ bɑ bǔ thə gɔ pɑ yə́ pɑ́ po'o.

¹⁷Tə a bi a a pɑ gɑ pu le ŋkho' shɑ bu thə́, biŋ sɔ' m nə wə yə o bɑ pu ta' thə vó a pu la o cəcɑ̌ bvʉ' bu thə olivə myə a lɑ cʉ' a, po'o gɑ po a pu pəmtə gə fʉ́' yə a fɑ nə gɛ́ tsyə́ a,

¹⁸o kɑ ŋa'nɑ o cəcɑ bǔ thə́ olivə. Bi a pɑ́ o ŋa'nɑ́ o! Tə́ tə wə nə ŋkwa gɛ́ thə́ pɑ́, gɛ́ thə́ nə ŋkwa o.

¹⁹Bi a pɑ o ghɔm gɑ: Pu lě ŋkho' shɑ bu thə́ tə́ jap a.

²⁰A puŋ. Tə́ pu lə ŋkho' wap nə yap nə cyətə pɑ̌ nyənyɔ. Tə sɔ' m nə o, a shyə m nə piŋnthʉm tə o tɔm. Kɑ́ ŋa'nɑ́ o, dzə nə pwɔk.

²¹Nə pa' a pɑ gɑ Si lě tə tak kwa' bu thə olivə nəŋ, bɑ ba wə e tə́ gɔ sɔ' tak o nəŋ pɑ.

²²Yɔ tʉm pɑpúŋ pu tʉm shɔkcɔ̌k Si: Tʉm shɔkcɔ̌k nə pɔ pyə wap lě bvʉtə a, puŋnwə e nə o, a pɑ gɑ o cwə nə puŋnwə e bɔ; tak po'o bɑ pu gɔ té o ba wə.

²³Tə sɔ' m nə wap, wap pɑ tə wuŋ nthʉm nə cyətə pɑ̌ nyənyɔ, bɑ pu gɔ la ba wap yap nə thə. Nə pa' Si bɑ e ghə tʉɔ nə piŋ da wap nə ta' thə́.

²⁴A pɑ gɑ́ wə yə pu ja' o nə thə vo a, pu la o nə thə olivə, bɑ a gɔ pɑ m gɑ kɑ kwa' nə bǔ thə olivə myə́ pu gɔ la' la wap kwa' nə to thə́ yə wap bɑ bú myə a?

²⁵Mfɑmfɑ̌, ŋ tə̌ wə shəŋ nə tʉ̀m wɔ yəŋ nwə cyə zhyənwə pɑ̀, bwɔk gɑ́ po kɑ kě nɑ tsɔ gɑ mzhyənwə. Mu' kam pɑ Israɛl gɔ ghə tʉm sɔksɔk ghə tə̌ gùŋ pɑ tə pɑ́ pɑ Yudea la' ŋkho dyə awɛ.

²⁶A pɑ́ po'o guŋ Israɛl awɛ vɔk dəŋdəŋ pa' a bɑ pu və gɑ: Gɛvɔk pɔ gɔ sɔ' fɑ m Sion, e gɔ sɔ' té nə cyətə pǐŋ Si nə gwya Yakop.

²⁷Yəŋ gɑ́ bɑ̀ pa' kɔ tsɑ̌ gɔ sɔ' pɑ nə pyə a pú nə cwə yə gɑ̌ té mhɔnwə map a.

²⁸Pu yɔ wap m nə́ Cuŋ pɑpuŋ bɑ wap bɑ mghɛ bo, a pɑ́ pɑpuŋ bi po; tə́ jɔ wap m nə́ ghə̌ŋ Ci, bɑ a bɑ pu kuŋ wap, shyə́ m nə mtǎ.

²⁹Nə pa' ywə hɑ hɑ̌ ba nə ké yə a fɑ m bi Si a tə ŋkwyəpnyə pɑ.

³⁰A lə pɑ̌ cwə̀ dzə̀, po kəŋnyə nə yu'shwə bi Si, tə́ cwəlɔ a cyə m nə nə́ kəŋnyə nə yu'shwə yàp po ghə cɔmmtso Si.

³¹Ba wap yap cyətə yu'shwə cwəlɔ po'o tə a cyə m nə cɔ̌mmtso yə pu gə nə po a ba wap yap ghə cɔmmtso.

³²Nə pa' Si bɑ e nyəŋ guŋ pɔ awɛ nə tʉɔthə́ po'o tə nə cɔmmtso guŋ pɔ awɛ.

³³Fo' fʉ' Si tə̌ wə pɑ, fo' zhyə̌nwə e lə pɑwə, a bɑ ǎ zhi te'! Pɑ wɑ̌ zhyə́ yə nə fyɛ'! Pɑ́ sɔmmo lə cyə nə́ mjyə myə́!

³⁴Kwa' wɑ lə zhyə mkwɛnyə Cyəpɔ? Kɑ kwa' wɑ̌ lə pɑ gɛ hɑ nthɔk bi e?

³⁵Kɑ wɑ lə ləŋdzə hɑ kɑ bi é tə bɑwə byap gɑ é pa' bi é?

³⁶Nə pa' guŋ ywə awɛ bɑ pɑ nə e, bɑ shyə́ pɑ m nə e, biŋ bɑ pɑ bi e. Ghu'tə pɑ bi e mama! Amɛn.