Read Ghomala New Testament ROMA 12 Bible Online

ROMA 12 - Ghomala New Testament bible

ROMA 12

¹Mfɑ̌mfɑ́, gɑ̌ wə səso wɔ shyə m nə́ cɔmmtso Si gɑ po hɑ nɑ tsɔ pa' tsə́ pwɔ' nthʉɔtʉɔ, tsə́ pwɔ' dɔlɔ̌, tsə́ pwɔ' pɑpuŋ bi Si: A gɔ pɑ pɑ yɔ nə sé m nə zhwenyə.

²Ka po ghiŋ m nə pa' yəŋ dzʉ̌ wə bɑ a. A zhyə̌nwə yɔ kwyəpnyə wɔ, po zhyə ywə yə Si shəŋ a: Ywə yə a bɑ a puŋ a, ywə yə a ŋwɛnyə bi e a, ywə yə a bɑ ǎ cəŋtə buŋ a.

³Shyə m nə gho' yə Si lə hɑ bəm a, gɑ̌ gɔm bǎ bi ya mo a nə po gɑ́: Ka po ka'tə tə́ nthwɔk, po ghə zhyənwə po'o gɑ po kɑ ghə ŋa'nɑ́. Bǎ wɑ lə́ pɑ nə yə də̀ŋ piŋnthʉm yə Si hɑ bi e a.

⁴Dəŋdəŋ pa' a bɑ pɑ̀ ghə mzhəŋnɑ́ jɔmyɔ̌m nə ta' nɑ́ a, mzhəŋnɑ́ bɔ lə piŋ bɑ fa' pɑ́ tá ywə a,

⁵a dəŋdəŋ po'o tə pɑ bɑ ta' nɑ́ nə Kristo biŋ bɑ mzhəŋnɑ́ cəcɑ̌ pɑ, bǎ ya mo lə nə yə dəŋ.

⁶A bɑ pɑ̌ piŋ gə mfʉ' nthinthi myə gho' Si hɑ bi pɑ a. Kɑ a bɑ e hɑ pɑ́ nə pɑ gɔm ghɔm Si bi mo lɑ? Mo nə ghɔm pu piŋnthʉm pɑ́ ŋkwishwə.

⁷Kɑ e hɑ pɑ gɑ́ mo pɑ́ gɛfa' lə, mo fa'. Kɑ e hɑ bi yə mu' mo nə pɑ́ gɛ zhi'tə lə, e pɑ ji'tə́.

⁸Kɑ e hɑ bi mu' mo nə pɑ səso lɑ e pɑ səso. Mo yə é hɑ́ ywə a hɑ́ tə sɛ, mo yə́ e shya a nə cya a pɑ buŋ e, a shɔmmtso lɑ ŋwɛnyə tə́ nə shɔmmtso.

⁹A ŋkhuŋnyə̀ pɑ́ nyənyɔ. Po cəŋtə ŋkhʉ́ cwəpuŋ, dá nɑ tsɔ́ nə pɑpuŋ.

¹⁰A ŋkhuŋnyə mfɑ́mfɑ kwɑ wɔ, po pɑ shəŋtə ŋkhuŋnyə́ wɔwɔ.

¹¹Po fa' bi Cyəpɔ tə pwa, nə pɑpuŋ nthʉm zhwenyə.

¹²Po pɑ ŋwɛnyə nthʉm mɔktə̀, ŋkhyəptʉm cwə ghəghʉɔ, ŋkhaktʉɔ nthʉm mcwyɛ'nyə.

¹³Po a pɔ dɔlɔ̌ pɑ giŋ ŋkwikwə̀, nə ywə yə po ghə a; po pɑ nyəŋ mghʉɔ dyə́.

¹⁴Po pɑ̀ nyəŋ byanyə nə pɔ pyə́ wap dɑ wɔ jɔgo' a; po pɑ nyəŋ byanyə, ka po nyəŋ dò.

¹⁵Po pɑ ŋwɛnyə pu a pɔ pyə wap wə ŋwɛnyə á, bɑ̀ dɔ pu a pɔ pyə wap wə dɔ a.

¹⁶Po pɑ́ ŋkwishwə cəcɑ̌ po; ka po ghə mkwɛnyə̀ ŋa'nɑ́, po piŋ gɑ nə fi'nɑ́ hɑ si pɑ nə po. Ka po lɑ nɑ tsɔ gə mzhyənwə.

¹⁷Ka po lɑ cwəpuŋ ba' cwəpuŋ bi sɔmmo. Po kaktʉɔ nə ghə nwə pɑpuŋ dzə guŋ pɔ awɛ.

¹⁸Po kaktʉɔ gɑ á miŋnyə m wɔ po pɑ bvɔk pɑ nthʉm hwitə.

¹⁹Ka po pa' sʉ̌' mnwə cwəpuŋ myə pu ghə bi po a pɑ kwa' wɔ, wɔ pyə gɑ̌ ŋkhuŋ wɔ a; da' gɑ po tak bi yɛlúŋ Si e pǎ', nə pa' a bɑ pu lě bvə gɑ: Nə pa' bo bɑ m bəm, myə nə pɑ gɔ la' hɑ mcwɔ'fa' Cyəpɔ nə gɔm po'o.

²⁰Da' gɑ́ jikǔ' yɛ gɛ bo o, o hɑ ywətsʉ bi é, bi a ji shyə́ yɛ é o hɑ shyə́ bi é e nwə́, nə pa' o gə po'o bɑ ǒ cu'tə mgho' mɔk hwə́hwə̌ thə́ é.

²¹Kɑ tak gɑ̀ nwə cwəpuŋ cyə́ o, da' gɑ lɑ nwə pɑpuŋ do' shyə nwə cwəpuŋ.