Read Ghomala New Testament ROMA 13 Bible Online

ROMA 13 - Ghomala New Testament bible

ROMA 13

¹Bǎ yá mo lə́ yu'nyə́ bi pɑ sa' gùŋ pyə wap sa' a, nə pa' nə sa' fɑ pɑ bi Si, yʉ́ nə jap bǎ ya nə sa' lə̀.

²A po'o tə mo yə é nthʉɔthə bi sa' guŋ a nthʉɔthə pa' a pɑ́ nə ŋkhɛ yə Si jap a, mtʉɔthə́ pɑ́ fəŋ pa' shɛ nyəŋ nə pú.

³Nə pa' mo tə́ bwɔk pɑ fyɛ' nə cwə yə ǒ gə nwə pɑpúŋ a pɑ́, mo bwɔk wap nə cwə yə o gə nwə cwəpùŋ a. O pɑ́ tə pɑ̌ shəŋ nə pwɔk gɛ sa' o ghə nwə pɑpúŋ; pu gɔ gho'tə o,

⁴nə pa' gɛ sa' bɑ gɛfa' Si nə ghə gɑ́ o ghə nwə pɑpúŋ. Da' gɑ́ o ghə cwəpuŋ o pwɔk gɛ sa'. Nə pa' e tə gwim nyədwɔp pɑ pɔpɔ pɑ́. Gɛ sa' fa' pa' a pɑ́ bi Si, fa' tsyə pɑ nə la'tə yɛ̌lúŋ Si.

⁵A po'o tə a puŋ gɑ mo yu'nyə, e lə nə yu'nyə bɑ bwɔk pɑ lúŋ pɑ́, e yu'nyə m pa' a ŋkwɔ' fɑ nthʉm tʉm e a.

⁶A biŋ bɑ ywə yə a gə tə́ po pɑ́ ma' shwɔp a: Pɔ pyə wap ŋkwi shwɔp a, Si nə jap wap gɑ wap cəŋtə́ fa' nə́ fa' bɔ.

⁷Po pa' bǎ yə wɑlə́ bi e: nthinthi mshwɔp bi gɛ mshwɔp; bwɔk mo yə pu gɔ pwɔk e a, mku' bi gɛ mku'.

⁸Ká po a sɔ́m mo pɑ́ jǔ tə ně da' jú kuŋnyə̀ cəcɑ̌ po; nə pa' mo yə e ŋkhuŋ yə mu' mo a bɑ ě ghiŋ nə mco'.

⁹Nə pa' mco' gɑ: kɑ́ ghə ghap, kɑ́ zhwə mo, kɑ̀ zhʉ̀, ba gùŋ myə́ shɑ mco' awɛ ŋkwɑ mthə́ myə nə ghɔm tsɔ gɑ: Kuŋ mo yə e bəŋ o a pa' o ŋkhuŋ thə nɑ o a.

¹⁰Kuŋnyə tə gə sɔmywə bɔkpɔ̌k bi mo yə ě bəŋ mo a pɑ; kuŋnyə bɑ nə ghiŋ nə mco'.

¹¹Pa' bɑ pǒ zhyə cwə dzʉ̌ yə́ pɑ bɑ nə a: Yɔ cwə yə́ po gɔ yàm nə lwɔk a yə̌ŋ. Kwa' tyɛ' ɔ gɑ, ywə vɔk ghɔptə́ bəŋ pɑ tə́ shyə́ cwə yə́ pɑ lə́ piŋ a.

¹²Təŋ dzʉ́ sʉəsʉə cyə, dzʉ̌ pɑwə gɔ lɔ́. Pɑ wa' mfa' jʉ́m, be tsə́ shù ŋkha'.

¹³Pɑ ghiŋ tə ghə mfʉ̀m, pa' nə dɔdzʉ̌ a, tə tsʉ̌ kʉ́ə ywə́, tə pám, tə pɑ gəgəm kɑ nə ghə ghap lə, tə sa' mshɛ kɑ nə kiŋ mo lɑ.

¹⁴Da' gɑ́ po kwa Cyəpɔ Yeso Kristo nə po pa' dzə a, po kɑ tak nɑ tsɔ m̀ nə tsə bapnɑ kɑ m gɑ́ tsə́ ghi'nyə pəmtə nə po lə́.