Read Ghomala New Testament ROMA 14 Bible Online

ROMA 14 - Ghomala New Testament bible

ROMA 14

¹Po nyəŋ mo yə piŋnthʉm é pwa a dyə́ tə tébya nə́ yə nə sɛnwə.

²Yə́ piŋnthʉm mu' mo biŋ gɑ e tsʉ́ guŋ dzʉ́ awɛ. Da' gɑ yə mu' mo pɑ shyə m nə pwa bɑ pfɑ́ pɑ́ da' jap.

³Mo yə e dzʉ guŋ dzʉ awɛ a kɑ wak mo yə e tə́ dzʉ́ a pɑ́; a mo yə́ e tə́ dzʉ́ a pɑ́ kɑ tebya nə mo yə e dzʉ́ a, nə pa' a bɑ Si nyəŋ e dyə́.

⁴O bɑ wɑ́ tə bɑ fyɛ' gɛfa' yə e tə bɑ yù a pɑ? Kɑ ě tiŋnyə thə́, kɑ ě vʉ̀ pɑ si lɑ, bɑ a bɑwə dé pɑ́ kwa' ta fa' e. Tə́ e gɔ tiŋnyə thə́ pɑpuŋ nə pa' Cyəpɔ bɑ ě ghə tʉɔ nə gə e tiŋnyə thə́.

⁵A bɑ́ bi mu' mo mtyɛ'dzʉ pɑ nthinthi; bɑ bi yə mu' mo mtyɛ'dzʉ pɑ pɑ́ ŋkwi nthi. Tə bǎ wɑlə́ nə́ yə nə sɛnwə cəŋtə́ biŋ tə bǐŋ.

⁶Mo yə e tə jɔ mtyɛ'dzʉ ŋkwi nthi a pɑ́ gə po'o pɑ bi Cyəpɔ. Mo yə e dzʉ́ guŋ dzʉ awɛ pɑ gə po'o pɑ bi Cyəpɔ, nə pa' e go'tə Si. Ba mo yə́ e tə́ dzʉ́ guŋ dzʉ awɛ a pɑ pɑ́ gə po'o bi Cyəpɔ. Biŋ bɑ go'tə Si.

⁷Nə pa' sɔmmo nə́ pɑ tə bvɔk nə yə thə́ pɑ́, sɔmmo lə nəŋ bɑ́ pfʉ́ nə yə thə́ pɑ́.

⁸Nə pa' pɑ vɔk bɑ pɑ̌ bvɔk m bi Cyəpɔ; bi a pɑ nəŋ pfʉ́ bɑ pɑ̌ pfʉ m nə Cyəpɔ. Kɑ pɑ bvɔkvɔk kɑ pɑ pfʉ́ pfʉ́ lə bɑ pɑ m bi Cyəpɔ.

⁹Nə pa' Kristo lə pfʉ́ biŋ bɑnyə nə vɔk po'o gɑ e pɑ Cyəpɔ pɔ pyə wap pfʉ́ a ba pɔ pyə wap pɑwə.

¹⁰Tə wə̀! Nwə kɑ̀ o fyɛ' fɑ o? Ba wə! Nwə́ kɑ o wak fɑ o? Guŋ yɔk pɑ awɛ pu gɔ sɔ' fyɛ' wɔk pɑ dyə fyɛ' Si.

¹¹Nə pa' a bɑ pu və gɑ: Dəŋ pa' ǎ nyənyɔ gɑ́ gɑ̌ bɑwə a, Cyəpɔ nə gɔm, guŋ mkwi'tə awɛ gɔ sɔ' kam dzə m̀, ba guŋ mghɔm awɛ sɔ' gu'tə Si.

¹²A bɑ po'o tə bǎ ya mo lə nə pɑ̀ pɑ́ gɔ sɔ' siŋ myə́ mcùŋ bi Si pɑ́ nə yə thə́.

¹³Pɑ ya' nə pɑ fyɛ' nɑ́ tsɔk pɑ cəcɑ̌ pɑ. Pɑ pɑ sa' m gɑ ka fɑ mo pɑ ywə yə yə mu' fɑ gɔ cyə m nə́ vʉ̀si a, kə ywə fa'tə lə.

¹⁴Gɑ̌ zhyə́ kwa' pɑpuŋ shyə́ m nə Cyəpɔ Yeso gɑ sɔmywə tə̌ nə pɑ guŋ bɑ pɑ ywə mviŋ pɑ́. Da' gɑ ywə bɑ́ ywə mviŋ bi mo yə́ ě yɔ gɑ́ a ywə mviŋ a.

¹⁵A bi a o pɑ gɔ tsʉ mu' ywə, tə fɑ o yɛluŋ nə́ bɑ o tə wə́ giŋ nə kuŋnyə pɑ̀. Pɔmtə́ gɑ o kɑ cyə m nə nwə ywətsʉ gə mo yə Kristo lə pfʉ̌ nə e a pfʉ́.

¹⁶Kɑ́ lɑ yu ywə yə ǎ bu bɑ ywə pɑpuŋ a gə ywə yə pyə shɑ pɔ gɔ ghɔm cwəpuŋ nə a.

¹⁷Nə pa' Nəfo Si tə́ bɑ nwə ywətsʉ kɑ mlu' pɑ; a bɑ́ nwə dəŋdəŋ, bɑ hwitə́, ba ŋwɛnyə nthʉm Zhwenyə Dɔlɔ̌.

¹⁸Mo bɑ́ fa' bi Kristo m̀ nthi po'o tə buŋ Si, ba pɔmnəŋ kuŋ o.

¹⁹Pɑ pɑ́ shəŋ pɑ ywə yə a buŋ nə hwitə á ba yə a ŋkwɑ́ pɔ nthamtə́ wap a.

²⁰Kɑ cyə m nə nwə ywətsʉ sa'tə fa' Si. Guŋ ywə awɛ bɑ a puŋ, da' gɑ́ a ka puŋ nə tsʉ́ sɔmywə yə bi a pɑ a fa'tə yə mu' mo a.

²¹Ywə yə a bɑ pɑpúŋ a bɑ gɑ o kɑ pfɑ bap, kɑ nwə́ mlú' kɑ sɔmywə lə yə a gɔ ghə fɑ o vʉ́si a.

²²Lwɔ' ywə yə piŋnthʉm o gə o kyəp ya a pɑ da' bu dzə̌ Si. Buŋtsě bɑ mo yə e tə dɑ yə nthi nə piŋ nə nyəŋ pɑ shɛ thə e a pɑ.

²³Da' gɑ́ mo yə e nə tsʉ̌ ywə bɑ jʉ'nyə a bɑ mo yə bi a pɑ́ pu nyəŋ shɛ thə e a, nə pa' ghiŋ tsyə tə fɑ m nə piŋnthʉm e pɑ́. A nəŋ nə pɑ̌ po'o guŋ ywə awɛ yə a tə́ fɑ m nə nwə piŋnthʉm pɑ pɑ́ mhɔ.