Read Ghomala New Testament ROMA 15 Bible Online

ROMA 15 - Ghomala New Testament bible

ROMA 15

¹Da' gɑ a bɑ fa' bi pɑ, wɔk pɑ pyə pɑ bɑ pɔ nthʉɔtʉɔ a, nə pɑ ŋkwa tsə mkʉ́m pɔ bwapwǎ, ba nə cyətə pɑ̌ shəŋ pɑ́ ywə yə ǎ puŋ wɔk pɑ a.

²Bǎ yá mo lə nə pɑ cəŋ nə puŋ mo yə ě bəŋ e a, nə nwə pɑpúŋ nə nə kwɑ.

³Kristo lě tə́ cəŋ pɑ́ ywə yə a lə buŋ e a pɑ́, dəŋdəŋ pa' a bɑ pu lě bvə gɑ: Mcap pɑ cap o lě ŋkho nə m̀.

⁴A nə pɑ̌ po'o bɑ ywə yə pu lə la' bvə a, nə cwə yə a lə cyə a bɑ pu lə́ bvə nə́ nə nthɔk wɔk pɑ, po'o gɑ pɑ cyə m nə́ nə kaktʉɔ ba zhwyətə̀ yə ywə yə pu lə və a nə sɔ' a gə mɔktə̀.

⁵A Si yə e hɑ kaktʉɔ ba zhwyətə a hɑ ŋkwishwə cəcɑ po pa' Yeso Kristo shəŋ a;

⁶po'o gɑ po lɑ ta' tʉ̌m ba ta' gi nə hɑ ghu'tə bi Si yə é bɑ Tá Cyəpɔ Yeso Kristo yɔk pɑ a.

⁷Po pɑ dɑ wɔ wɔwɔ dəŋdəŋ pa' Kristo lə lɑ wɔ a nə ghu'tə Si.

⁸Gɑ̌ wə biŋ: a shyə m nə nyənyɔ Si tə Kristo cʉ' gɛfa' pɔ pyə pu le bvo wap a, po'o gɑ́ mka'nyə myə pu lə ka' bi mtá pɔk pɑ á a pəmtə;

⁹tə sɔ' m nə pɑ tə pɑ́ pɑ Yudea, wap gu'tə yap Si shyə pɑ́ m̀ nə́ cɔ̌mmtso e, dəŋdəŋ pa' a bɑ pu lě bvə gɑ: A po'o tə gɑ gɔ sɔ' pɑ́ zhwɔp o cəcɑ mguŋ pɑ tə pɑ́ pɑ Yudea piŋ pɑ́ zhwɔp nə hɑ mku' nə tsó tsǔ.

¹⁰A bɑ pu kwi' bvə gɑ: Mguŋ mguŋ, pǒ ŋwɛnyə wɔ ba pɔ pyə.

¹¹Ba m̀ gɑ: Mguŋ mguŋ po gho'tə Cyəpɔ guŋ yɔ awɛ, guŋ pɔ awɛ piŋ nthogəŋ bi e.

¹²Esaya ŋkwi' gɔm gɑ: Twɔp Yese gɔ sɔ' təm, mo yə e dusi nə sa' mguŋ mguŋ a. Mguŋ mguŋ gɔ sɔ' pɑ́ yáp yap mɔktə pɑ nə é.

¹³Si mɔktə fi'tə ŋwɛ́nyə ba hwitə nə po nthʉm piŋnthʉm po'o gɑ mɔktə lonyə nə po shyə́ m̀ nə́ tʉɔ Zhwenyə Dɔlɔ̌.

¹⁴Tə sɔ' m̀ nə wɔ mfɑ pɑ a bɑ gɑ̌ zhyə nyənyɔ gɑ́ kwa' wɔ bɑ po ghə tʉm pɑpuŋ, bɑ nə zhyə́ pɑpuŋ lo nə po, po ku'nyə nə pɑ nthɔknyə nɑ tsɔ.

¹⁵Da' gɑ nə ghə gɑ́ po kamtə́ ywə yə a bɑ pǒ zhyə a, ŋ də lɑ̌ pɑ́ ka'tə̀ tə nə bvə ŋwa'nyə bi po nə shɑ mcwə, shyə m̀ nə gho' yə Si gə bəm,

¹⁶gɑ́ myə pɑ́ gɛfa' Yeso Kristo bi pɑ tə pɑ́ pɑ Yudea, bɑ gɛfa' Cuŋ pɑpuŋ Si, po'o gɑ pɑ tə pɑ pɑ Yudea cʉ' ywə hɑ hɑ̌ yə Zhwenyə Dɔlɔ̌ dɔnyə yá a puŋ bi Si a.

¹⁷A po'o tə bi a pɑ́ ŋ ŋa'tə tsɑ̌ shyə m nə Yeso Kristo nə fa' Si.

¹⁸Nə pa' bi a pɑ ŋ də ghɔm sɔmywə tə ně da' yə Kristo shyə m nə m̀ gə po'o gɑ pɑ tə pɑ pɑ Yudea yu'nyə e shyə m nə ghɔm ba m nə nə ghə̀,

¹⁹shyə m nə gʉ' mtiŋ pu a msya nə tʉɔ Zhwenyə Dɔlɔ̌. A po'o tə́ tə fɑ Yerusalɛm gɔghɔ tə ŋkhəm Iliria gɑ cəŋtə́ siŋ Cuŋ pɑpuŋ Kristo.

²⁰Da' gɑ ŋ də kaktʉɔ nə siŋ Cuŋ pɑpuŋ pɑ nə tsʉ' yə pu lə jɑ tə́ wuŋ nthʉ tso Kristo nə a, po'o gɑ ŋ khɑ kwɑ nə cyə́ pa' yə́ mu' mo nə lə yap a.

²¹A pɑ po'o bɑ giŋ nə ywə yə a bɑ pu və gɑ: Pɔ pyə pu lě tə siŋ wap a gɔ sɔ' yɔ, ba pɔ pyə wap lě tə yu' nə ghɔm a yu'.

²²A ywə yə a ŋkhɔ mcʉm jɔmyɔ̌m gɑ́ ŋ khɑ ghɔ wə po a.

²³Tə cwəlɔ yə ŋ kha piŋ gə tsʉ' fa' nə yə bɔ ghə̌ŋ, a piŋ bɑ́ bɑ tə fɑ tə tyɛ̌' bɑ shəŋ nə sɔ' wə po a,

²⁴cwə yə́ gɑ gɔ ghɔ Spanya a gɑ̌ wə ŋkwɛ gɑ́ gɑ gɔ nə cyə yɔ wɔ, piŋ kwi yɔ ywə kwitə tə́ nə ghɔ, piŋ na' ŋwɛnyə bǎ muywə é nə pɑ bəŋ po.

²⁵Da' gɑ́ cwəlɔ, gɑ wə gɔ m Yerusalɛm nə fa' pɔ dɔlɔ̌,

²⁶nə pa' pɑ Makedonya ba pɑ Akaya yáp gɑ wap gɔ la'tə yap nə tɔmnyə bǔ nə pɔ dɔlɔ̌ pyə wap Yerusalɛm nthʉm pə́ŋ a.

²⁷Nə pa' a bɑ wap nyəŋ po'o biŋ bɑwə giŋ po'o. Nə pa' a pɑ gɑ́ pɑ tə pɑ́ pɑ Yudea lě ŋkwitə wap nə mfa' zhwenyə bɑ ǎ puŋ gɑ wap piŋ ŋkwitə wap yap nə ywə yə ǎ wə jak wap a.

²⁸Cwə yə gɑ gɔ miŋ nwə bɔ, piŋ hɑ ywə yə wap shwɔp a bi pu sɔsɔ̌ a, gɑ gɔ nə ghɔ Spanya cyə wə po.

²⁹Gɑ biŋ bɑwə jyə gɑ́ gɑ gɔ nə sɔ' wə po lɑ́ pɑ byanyə Kristo nə sɔ'.

³⁰Tə́ gɑ̌ wə səso wɔ mfɑmfɑ shyə m nə́ Cyəpɔ Kristo yɔk pɑ, ba m nə́ ŋkhuŋnyə Zhwenyə gɑ́ pɑ pəmtə do' shyə m nə mcwyɛ'nyə, myə po hɑ bi Si nə thə́ a,

³¹po'o gɑ ŋ bvɔk nə pɑ ghə tʉm sɔksɔk pɑ Yudea, ba m gɑ ywə kwitə yə gɑ̌ nə gɔ m Yerusalɛm a pɔ dɔlɔ̌ kwi nə pɑpuŋ.

³²A gɔ cyə m po'o ŋ ŋwak wə po nthʉm ŋwɛnyə, a piŋ shyə m pa' Si nə jap a, a ná' hwitə nɑ a wə po.

³³A Si hwitə pɑ bi po! Amɛn.